Zenezi 26:3 - ꞌRe Ihâimana Uꞌâsi Mono Zadawa Wasuꞌu

³ Ãme te za tô a'â 're aihâimana mo. Tawamhã wa hã wa za asiré 're ĩhâimana. Wa za duré iwẽ hã te aima 're apisutu u'âsi. Asihudu norĩ ma, wa za ã hã uburé ti'a hã te tãma 're anhomri. Ãhã wamhã, wa za ãma tãma uwaimra, aimama Abra'ãhã ma, ĩnhimiropisudu te tãma i'manharĩzé hã.

Zenezi 26:3 ပူးပေါင်းရင်းမြစ်များ

Zenezi 12:7

Tawamhã tame Uburé Danhib'apito, Abrãhã u wisi wamhã, ma tô ãne tãma tinha: — Asihudu norĩ ma, wa za ã ti'a hã tãma sõmri za'ra. Tawamhã tame Abrã ma tô ẽtẽ za'ra hã 'manha, tinhimizama te te tãma ãma zata da, Uburé Danhib'apito ma. E marĩ wa. Tame hâimana ré, itẽmemhã wisi wa.

Zenezi 13:15

Ta hã wa za asihudu norĩ ma ropibuma aima tisõ, õne u'â asihudu norĩ nhipti'a na tãma 're hâimana za'ra mono da, ã hã i'ab'madâ'â mono hã.

Zenezi 13:17

Tahawa te za ã hã ti'a na hâiwa nhimi'e niwĩmhã, hâiwa nhimire niwĩmhã, bâtâ pusizém niwĩmhã, duré bâtâ zasizém niwĩmhã 're robzabui mono da hã 're aimo, wa hã za te aima sõmri dâ'âsina.

Zenezi 15:18

Tawamhã tô taha bâtâ na ma tô Uburé Danhib'apito, Abrãhã ma, tinhimiropisutuzé hã tãma 'manha, ãne: — Asihudu norĩ ma, ã hã ti'a te tãma sõmri za'ra da wa ĩnhimiropisutu zahi hã 'manha, Ezitu ãma ti'a zada'ré inomro hawi, panho'u Eufrati na isisi u hã,

Zenezi 17:19

Tane nherẽ, 'Re ihâimana u'âsi mono, ma te ãne asa ãma tãma wa'rã: — Te inharĩzéb zarina te za tô aimro Sara aima ti'ra. Tawamhã a hã te za isisi, Izaqui na. Tawamhã taha ma, wa za ĩnhimiropisutu zahi isi'utõrĩ'õ õne u'â te tãma 're 'manharĩ, isihudu norĩ ma ropibu ma.

Zenezi 17:8

Ti'a wa za aima tisõ. Asihudu norĩ ma zama wa za tisõ, dasiré a'uwẽ'õ na iwa 're i'aihâimana mono zé hã. Uburé Cana'ã ãma ti'a te za õne u'â asihudu norĩ ma, ite na tãma 're hâimana za'ra. Tawamhã wa za duré ite za'ra na 'Re ihâimana u'âsi mono na tãma 're ĩhâimana za'ra.

Zenezi 20:1

Tawamhã Abra'ã, Mare na romnhisi hawimhã, ma tô watobro. Tahawa hâiwa nhimi'e niwĩ Cana'ã ti'ai wa'õtõ nho'õmo u te mo, Cadi na romnhisi norĩ wa'wa, Su na romnhisi wa'wa me 're hâimana mono da oto. Tawamhã nimahã na Gera na 'ri wa'õtõ nhisi ãma 're hâimana mono ré hã,

Zenezi 25:11

Tawamhã Abra'ã dâ'â parimhã, ma tô 'Re ihâimana u'âsi mono hã, i'ra Izaquihi ma, iwẽ hã ma tô te te tãma 're apisutu. Izaqui hã Be'e-La'ai-Ro'i 'ratamhã ma tô 're hâimana.

Zenezi 26:12

Tawamhã Izaqui, taha wahum na ma tô tame rob're hã 'manha. Tawamhã te te oto tehâri wamhã, te te i'a're nhipai u ma tô waze, 100 na isa'rata nhipai u. E marĩ wa. Uburé Danhib'apito iwẽ na te te pawapto wa.

Zenezi 26:14

Izaquihi nhimizama pone'ẽrebâ hã, pone'ẽrebâ zéré uzé hã, powawẽ hã, duré tãma iromhuri'wa norĩ hã ahâ uptabi di. Tahawa te filisteu norĩ hã te te siwi 're 'ruiwapari oto.

Zenezi 26:24

Tawamhã tô taha mara na, Uburé Danhib'apito tãma sihâi'ré wamhã, te ãne tãma tinha: — Wa hã, Abra'ã aimama te, 'Re ihâimana u'âsi mono. Aipahi õ di za, wa hã asiré 're ĩhâimana u'âsi mono wa. Ĩma romhuri'wa Abra'ãhã u'âbâ, wa za iwẽ hã te aima 're apisutu. Duré asihudu norĩ ahâ uptabi na 're hâimana za'ra mono da wa za aima 'manha.

Zenezi 28:13

Tahawa, te te isahoi mono 'remhã te Uburé Danhib'apito, sai'urizé zababamhã za. Ãhã wamhã, te tãma tinha ãne, ta hã: — Wa hã Uburé Danhib'apito, ai'rada Abra'ãhã te, duré Izaqui aimama te, 'Re ihâimana u'âsi mono. Ti'a iwa i'anomrozé hã wa za aima tisõ. Asihudu norĩ ma zama wa za tãma sõmri za'ra.

Zenezi 28:15

Wa hã wa za asiré 're ĩhâimana u'âsi. Wa za duré ai'wawimhã 're ĩsimapa, nimomo 're ane mono sidâpâsi. Wa za duré ã hã ti'ai u we apâ ai'ãma siri. Te i'airẽme da hã mare di, uburé ĩnhimiropisutuzé te aima ãma i'uwaimramizéb u.

Zenezi 31:3

Tawamhã Uburé Danhib'apito te Zacoho ma tinha ãne: — Aimama norĩ nhipti'ai u te za oto apâ aimo, asiré a'uwẽ asisãnawã norĩ 're ihâimana za'ra mono zéb u. Wa hã wa za asiré ĩhâiba.

Zenezi 35:12

Tawamhã Abra'ãhã ma, duré Izaquihi ma, ti'a te isõmri hã, ta hã aima zama wa za oto tisõ. Taha parimhã wa za asihudu norĩ ma tãma sõmri za'ra, ai'uirĩ na.”

Zenezi 39:2

Tame Uburé Danhib'apito, Zuzéhé siré 're hâimana u'âsi mono wa, te uburé marĩ hã te te 're ab'manharĩ wẽ u'âsi. Tawamhã te oto tinhib'ihâ'a nhorõwa ãma 're sãmra, ezipsiu nhorõwa ãma.

Zenezi 39:21

Tane nherẽ, tame 'Re ihâimana u'âsi mono, isiré 're hâimana mono wa, ma tô iwẽ hã te te tãma 're apisutu. Taha zarina, ma tô oto dazazé 'madâ'â'wa Zuzé hã wẽsã.

Zenezi 48:21

Taha pari te Zuzéhé ma oto tinha ãne: — Wa za oto dârâ. Tane nherẽ, te za 'Re ihâimana u'âsi mono, asiré za'ra wa'aba 're hâimana, apâ aihi'rata za'ra wa'aba nhipti'ai u te te asimroi wa'aba mono da hã.

Zenezi 50:24

Tawamhã nimahã bâtâ na te Zuzé, tisisãnawã norĩ ma sina tãma nharĩ za'ra ãne: — Nimahã na romhutu na wa za tô oto dârâ. Tane nherẽ, ĩ'uirĩ na te za tô sena na 'Re ihâimana u'âsi mono si te te 're aipawaptob za'ra wa'wa. Duré taha si te za ã hã ti'ai wa'õtõ nho'õmo hawimhã apâ te te asimroi wa'wa, Abra'ãhã ma, Izaquihi ma, duré Zacoho ma, te te ãma iropisutu siromo u.

Salmu 32:8

Uburé Danhib'apito te ĩma tinha ãne: “Bâdâdi iwẽ na wa za ãma aima te 're rowasu'u, nimomo 're i'ane mono da hã. Wa za te 're asaprõni u'âsi. Duré wa za te 're ai'madâ'â pese.

Ezodu 2:24

Tawamhã 'Re ihâimana u'âsi mono, Izaraéu nhihudu norĩ 're iwazidi za'ra mono zé hã ma tô wapa. Tahawa Abra'ãhã ma, Izaquihi ma, duré Zacoho ma, tinhimiropisutu zahi te te i'manharĩzém na hã, ma tô sina po're puru.

Ezodu 3:12

Tawamhã 'Re ihâimana u'âsi mono, ma duré ãma sada'â ãne: — Wa hã wa za asiré ĩhâiba. Niwa nimahã na Ezitu hawi ĩnhib'a'uwẽ awazere wamhã, a norĩ wa'wa te za ã hã ẽtẽ ãma hã ĩ'ãma 're aiwata za'ra wa'aba mo. Tawamhã ãne na te i'asatõrĩzém na te za a hã tô sena na hã iwaihu.

Ezodu 6:4

Wa tô iwẽ na tãma ropisutu za'ra, Cana'ã na romnhisi ãma ti'a te tãma sõmri za'ra da, isiré a'uwẽ'õ norĩ iwa 're ihâimana za'ra mono zé hã.

Ezodu 6:7

Ĩnhib'a'uwẽ na 're anomro aba mono da, wa za ãne hã aima 'manharĩ za'ra wa'wa. Tawamhã wa hã ate za'ra wa'wa 'Re ihâimana u'âsi mono na wa za oto 're ĩhâimana. Duré tawamhã wa hã Uburé Danhib'apito, ate wa'wa 'Re ihâimana u'âsi mono, ezipsiu norĩ ma 're iromhuri za'ra wa'aba mono zém hawi te i'asõ'reptu za'ra wa'aba na hã te za oto tô a norĩ wa'wa asiwi ĩwaihu'u 'wa.

Ezodu 6:8

Tawamhã wa hã wa za Abra'ãhã ma, Izaquihi ma, duré Zacoho ma, ti'a za te tãma isõmri za'ra zém na te iropisutu u hã te asimroi wa'wa. Tawamhã õ hã ti'a hã wa za aima sõmri za'ra wa'wa, ate na oto aima 're hâimana za'ra wa'aba mono da. Wa hã Uburé Danhib'apito.”

Filipu 4:9

Te aima 're rowasu'u za'ra wa'aba mono ré, aipo're na 're ĩwapari za'ra wa'aba mono zéb zarina, ma tô 'Re ihâimana u'âsi mono nhimiroti hã iwaihu'u pese za'ra wa'wa. Duré ai'rata 're ĩnhamra aba mono ré, atõmo na asiwi 're ĩ'madâ'â aba mono na, ma tô duré iwaihu'u pese za'ra wa'wa. Ãne na uburé marĩ na aima 're ĩsisanho za'ra wa'aba mono zéb zarina, te za 're aihâimana wẽ za'ra wa'aba mo. Ãne wamhã, 'Re ihâimana u'âsi mono hã wama rowẽ nhomri'wa hã te za 'râwi asiré 're hâimana u'âsi za'ra wa'wa.

Hebreu 11:9

'Re ihâimana u'âsi mono si te te sina 're i'umnhasi mono zéb zarina, ma tô darob amoi ãma 're sãmra Abra'ã hã, dasiré õ nherẽ, 'Re ihâimana u'âsi mono, za ãma isa'ru da hã te te tãma ipisutuzéb ãma. Ãhã wamhã, romhâ 'manharĩ na 'ri wa, te oto 're sãmra, 'ri uptabi õ wa. Izaqui norĩ hã ma tô duré romhâ 'manharĩ na 'ri wa, 're simasisi zahuré, Zacoho me. Ta norĩ ma, ma tô duré ropisutu zahuré, Abra'ãhã ma te te iropisutu ne, 'Re ihâimana u'âsi mono hã.

Hebreu 6:17

Tane hã ma tô duré 'Re ihâimana u'âsi mono hã tinhisi pire na tãma ãma ropisutu za'ra, tinhib'a'uwẽ norĩ ma hã, tinhimirosa'rata na tô sena te te ãma 're isaprĩ mono õ na, ta norĩ hã te te ãma 're sazei pese za'ra mono da, 'Re ihâimana u'âsi mono te te tãma iropisutu za'ra zéb zarina, iwẽ hã za te te sima 're iwaibui mono norĩ hã.