Zenezi 24:3 - ꞌRe Ihâimana Uꞌâsi Mono Zadawa Wasuꞌu

³ Uburé Danhib'apito 'Re ihâimana u'âsi mono, hâiwa ãma duré ti'ai ãma zama uburé marĩ te te 're i'ab'madâ'â mono nhisi na ropisudu hã 'manharĩ, ĩ'ra Izaqui, niwa apto'o ré, ã hã Cana'ã na ti'ai wa'õtõ nho'õmo nhisi ãma 're ĩhâimana mono zéb ãma, pi'õ na imro da hã, tãma 'maipisutu tõ da.

Zenezi 24:3 ပူးပေါင်းရင်းမြစ်များ

Zenezi 14:19

Tawamhã Mequizédéqui, Abrãhã ma, iwẽ te te tãma pisutu sina, ma tô ãne tãma tinha: “Abrã, 'Re ihâimana u'âsi mono, danhipai u 're ihâimana mono, hâiwa 'manhari'wa hã, duré ti'ai 'manharĩ'wa hã iwẽ si te te aima 're pisutu mono da, wa tiwi te 're waptẽrẽ.

Zenezi 14:22

Tane nherẽ, Abrã ma te ãne asa ãma tãma wa'rã: — Uburé Danhib'apito, danhipai u 're ihâimana mono, hâiwa 'manharĩ'wa, duré ti'ai 'manharĩ'wa, taha nho'a wa za ĩnhib'rada hã hâimo wẽ,

Zenezi 21:23

Tahawa, ma'ãpé ãme 'Re ihâimana u'âsi mono nho'a, asadawa nhipese ãna, ĩma, ĩ'ra norĩ ma, duré ĩnhihudu norĩ ma, asimiropisudu hã 'manharĩ. Wa hã wa tô iwẽ na aima ĩ'umnhasi sina 're ĩhâimana. Tahawa te za sena na ĩma iropisu, ĩma, duré ã hã ti'ai wa, 're i'asãmra mono ma, ai'umnhasi sina 're aihâimana mono da.

Zenezi 24:7

Uburé Danhib'apito, 'Re ihâimana u'âsi mono, hâiwa ãma 're isãmra mono ma tô ĩmama nhorõwa hawimhã, duré ĩsisãnawã norĩ nhipti'ai hawimhã we ĩwaze, ãwamhã. Duré ĩnhihudu norĩ ma, ã hã ti'a te te sõmri da, ma tô ĩma ropisutu. Õ hã te za tite hâiwa ãma romhuri'wa we satõ, te te asaprõni wẽ da hã. Ãhã wamhã te za ĩ'ra ma, pi'õ we tãma i'mazaprõ.

Zenezi 27:46

Taha pari Rebeca, te Izaquihi u hã mo. Tawamhã te ãne tãma tinha: — Ezau, hitita norĩ nhipi'õ maparane tãma 'maihâimana zahuré wa, ma tô ĩwĩ sina ro'wa'ré pese zahuré. Tahawa, Zacoho zama hitita norĩ nhipi'õ na mro wamhã, ĩdâ'â da si za oto, ĩnhimirosa'rada hã.

Zenezi 28:1

Tawamhã Izaqui, Zacoho zô ma tô hâ. Sô hârâ wamhã, ma tô duré ãma mre. Taha pari te duré ãne tãma rowaihu'u: — Ãme Cana'ã ãma azarutu norĩ na hã ãma ai'maimro õ di za.

Zenezi 28:8

Tawamhã Ezau, Cana'ã nhipi'õ, imama tõmo ma, te te irowẽ'õzé hã ma tô duré waihu'u.

Zenezi 34:9

Ãhã zarina wasiwadi na wasima 're iwahâimana za'ra mono da hã e wẽ õ di za bété. Ãne wamhã, te aré wa'ra sipi'õ norĩ hã ai'ra za'ra wa'aba norĩ na hã 're mro za'ra. Duré ai'ra wa'aba sipi'õ norĩ te aré duré wa'ra norĩ na 're mro za'ra.

Zenezi 38:2

Tawamhã tame Zuda ma tô cananeu norĩ nhipi'õ hã 'maiwaihu'u, Su'a na isisi hã. Tawamhã taha na Zuda mro wamhã,

Zenezi 47:31

Te duré Zaco tãma tinha ãne: — Ma'ãpé ĩma ropisutu, tane na hã. Tawamhã Zuzé, ma tô ropisudu hã tãma 'manha. Tahawa Zaco, tiza'warizé 'rãihâ ãma siwẽ'ẽ sina, ma tô 'Re ihâimana u'âsi mono ãma wata sina hã mre.

Zenezi 50:25

Tawamhã Zuzé, tisisãnawã norĩ wi, te te tãma iropisutu za'ra zéb da hã, ma tô tiwi waptẽrẽ za'ra ãne: — 'Re ihâimana u'âsi mono si te za tô te te 're aipawaptob za'ra wa'wa. Ãne hã niwa romhâimana wamhã, te za ĩhi norĩ hã asiré asiwi iduri 'wa za.

Zenezi 6:2

ma tô 'Re ihâimana u'âsi mono 'ra norĩ, pi'õ wẽ uptabi na 're ihâimana za'ra mono na te te sima 're 'madâ'â ze za'ra. Tahawa ma tô duré te te sima 're iwẽ za'ra mono zéb zarina te te sima 're pisutu za'ra, ãma 're mro za'ra mono da.

Zenezi 6:4

Tô taha wamhã, te a'uwẽ poto 'rãihâ norĩ hã 're hâimana za'ra. Duré ronomro pari, te zahadu õ norĩ hã 're hâimana za'ra, hâiwa ãma isãmri'õ norĩ, da'ra sipi'õ norĩ na 're sapa'a za'ra mono wa, i'ra norĩ hã tãma 're poto za'ra mono ré. Tawamhã a'uwẽ ipoto 'rãihâ norĩ, te duréihã siptete na, duré dama wasu'u za'ẽtẽ na hã 're hâimana za'ra.

Esdra 5:11

Tahawa, ma tô asa ãma wazada'âbâ za'ra ãne: ‘Wa norĩ hã, 'Re ihâimana u'âsi mono hâiwa 'manharĩ'wa ti'ai 'manharĩ'wa nhib'a'uwẽ, wa 're wahâimana za'ra. Wa norĩ hã wa oto 'Re ihâimana u'âsi mono nhorõwa 'ri hã wasiwi wahutu ni, duréi Izaraéu nhihudu norĩ nhib'apito isa'ẽne te te aré i'ri nharĩ hã.

Neemia 13:25

Tahawa aibâ norĩ ma, wa tô pẽtẽ za'ra. Wa tô duré 'Re ihâimana u'âsi mono nhimi'ahârizé hã sada waptẽrẽ za'ra. Tahawa, wa tô duré hâ za'ra. Wa tô duré séré zano za'ra. Tawamhã 'Re ihâimana u'âsi mono nhisi na wa tô tiwi waptẽrẽ za'ra, niwamhã i'ra norĩ hã wasiré a'uwẽ'õ norĩ nhipi'õ na hã 're mro zahu za'ra mono tõ da.

Neemia 9:6

Tawamhã Izaraéu nhihudu norĩ, ma tô ãne mreme zu: “'Re ihâimana u'âsi mono, aiwétési Uburé Danhib'apito! A hã ma tô hâiwa i'manha. Wasi norĩ hã ma tô duré i'apoto mo. Ti'a hã, âporé hã, duré iwa 're ihâimana za'ra mono hã ma tô i'apoto mo. A hã ma tô uburé asimipoto mono bâ hâiba ré, 're ihâimana za'ra mono da hã tãma i'manharĩ za'ra. Duré hâiwa ãma ihâiba ré norĩ hã te hi'rãtitõ aima 're si'ubumroi mono sina ai'ãma 're wata u'âsi za'ra.

Ezodu 20:7

— Ĩnhisi na asiwi 're ĩwazé wa'aba mono ãna taré ãma 're nharĩ za'ra wa'aba mono tõ. E marĩ wa. Wa hã Uburé Danhib'apito, ate wa'wa 'Re ihâimana u'âsi mono, wa ĩnhisi te te 're iwazéb za'ra mono õ norĩ ma te tãma 're arob'manharĩ.

Ezodu 34:16

Ai'ra norĩ wa'wa hã asiré a'uwẽ'õ norĩ sipi'õ na 're mro za'ra mono wamhã, tawamhã te aré ta norĩ hã ĩ'ãma 're ihâimana za'ra mono zém hawimhã ãma tipahâ za'ra, ĩ'upana ihâiba'õ norĩ ãma 're iwata za'ra mono na ãma 're wata za'ra mono da isiré.

1 Corĩtu 7:39

Pi'õ norĩ hã imro tiwi 're dâ'â za'ra mono õ ré, te te 're rẽme waihu'u za'ra mono õ di za. Tiwi 're dâ'â za'ra mono wapsi, te za oto pibui pese na timro na te te 're sahu za'ra, aibâ aimawi na. Tane nherẽ, aibâ isazei'õ'wa na 're mro za'ra mono õ di za. Aiwa isazei'wa si'uiwa na te za tô sina 're mro za'ra apâ.

Hebreu 6:16

Tane nherẽ, wa norĩ hã marĩ pire na wa te dama 're ropisutu za'ra mono wamhã, dama ipire norĩ nhisi na, wa za wa te dama 're ropisutu za'ra, sena na da te ãma 're wazaze za'ra mono da, duré da te ãma 're wawawã za'ra mono tõ da.

Zozué 2:12

Tahawa ma'ãpé, Uburé Danhib'apito nhisi na, ĩma ropisutu aba, iwẽ hã te aima 'manharĩ aba wa, a norĩ wa'aba zama ĩsisãnawã norĩ ma iwẽ hã 'manharĩ aba da, aiwab da. Ãne da, wa za aiwi rowaptẽrẽ 'wa, sena na aimreme wasu'u aba zéb da, tiha ĩma 'manharĩ aba da, ĩsima iwẽ na ĩhâimana da rosa'rata ahâ ãna.

Zuize 14:3

Tane nherẽ, imama norĩ, ina me hã ma tô ãne ãma sada'âbâ zahuré: — E marĩ da, ma tô filisteu nhipi'õ zô si asima i'aba mo, isihâiwata nhihâri'õ norĩ wa'wab zô. E bété wasiré a'uwẽ norĩ 'remhã wasiwadi norĩ nhipi'õ asima 'masãmri da hã asima 'maiwẽ õ di, ãma i'aimro da hã. Tawamhã Sãsã, te duré timama ma tinha ãne: — Õ hã azarudu wa tô ĩsima wẽ pese. Õhõ si ĩma iwẽ uptabi hã.

1 Samuéu 20:17

Tawamhã Zonata, Dawihi zawizém na te duré tãma 'manha, tinhimiropisudu hã. E marĩ wa, 'râwi 're isisawi pese mono ne, Dawi hã tãma sawi uptabi wa.

1 Samuéu 30:15

Tawamhã Dawi te tãma tinha ãne: — E tawamhã ĩzaprõni õ di za, amalequita norĩ ihâimana za'ra zéb u hã. Tawamhã aibâ iprédupté ma ãma tãma wa'rã ãne: — Marĩ õ di. Wa za tô asaprõ, a hã, 'Re ihâimana u'âsi mono nhisi na ĩwĩrĩ tõ da hã, duré ĩnhib'apito ma ĩhâiba nhomri tõ da hã, ĩma ropisutu wamhã.