Zenezi 22:9 - ꞌRe Ihâimana Uꞌâsi Mono Zadawa Wasuꞌu

⁹ Tawamhã 'Re ihâimana u'âsi mono, ẽne te te tãma ipisutu u oto simasisi wamhã, ma tô Abra'ã, ẽtẽ za'ra hã 'manha. Duré ẽtẽ nhisi wi, ma tô mi hã sa'ra. Taha pari, ma tô ti'ra Izaqui pa ubumro, te te wapre mono da. Te te wapre mono pari, ma tô mimi za'ra nhisi wi oto tihi.

Zenezi 22:9 ပူးပေါင်းရင်းမြစ်များ

Zenezi 12:7

Tawamhã tame Uburé Danhib'apito, Abrãhã u wisi wamhã, ma tô ãne tãma tinha: — Asihudu norĩ ma, wa za ã ti'a hã tãma sõmri za'ra. Tawamhã tame Abrã ma tô ẽtẽ za'ra hã 'manha, tinhimizama te te tãma ãma zata da, Uburé Danhib'apito ma. E marĩ wa. Tame hâimana ré, itẽmemhã wisi wa.

Zenezi 12:8

Taha pari Abrã, Bétéu na 'ri nho'õmo nhisi ãma bâtâ pusizém niwĩ, ẽtẽ ahâ na 're iromhâimana mono u hã, te duré oto mo. Tawamhã tame ma tô te te sima 'ri nhoré. Bétéu hã te bâtâ zasizém niwĩmhã 're hâimana, duré Ai na 'ri wa'õtõ nhisi te bâtâ pusizém niwĩmhã 're hâimana. Ta norĩ wa'wa te te sima i'ri nhoré mono hã ma tô simasa. Tawamhã tameb zama ẽtẽ za'ra te te 'manharĩ wamhã, ma tô duré Uburé Danhib'apito ãma hã tiwata.

Zenezi 13:18

Tawamhã ãne te te tãma waihu'u wa, Abrã te te sima i'ri nhoré mono zé hã ma tô te te awasihu, te te aza'ré da 'ri hã, rowede iwazéb zahi, Mare na isisi 'rata 're hâimana mono da oto, 'ri nho'u Hebrõ na isisi 'rata 're isa mono ãma. Tame ma tô Abrã, Uburé Danhib'apito ma, ẽtẽ za'ra hã 'manha, ãma iwatazéb da hã.

Zenezi 22:10

Tawamhã awa'awi sib'ézé, ma tô sada sarõtõ, ti'ra te te ãma wĩrĩ da.

Zenezi 22:8

Tawamhã imama Abra'ã, ma te ãma sada'â ãne asa: — Ĩ'ra, 'Re ihâimana u'âsi mono si te za pone'ẽrebâ 'ra, te tãma izata na ãma tãma ĩnhoprub da hã tisõ. Ãne pari te duré siré tineb zahuré.

Zenezi 8:20

Tawamhã Nowé, ẽtẽ za'ra hã ma tô 'manha, Uburé Danhib'apito ma, ãma tãma isõprubzé te te ãma zata da. Taha pari, si norĩ abaze norĩ me, 'Re ihâimana u'âsi mono ma, iwẽ hã ma tô nima norĩ si 'mai'âri za'ra. Tawamhã ta norĩ hã ma tô ẽtẽ za'ra nhisiwimhã tãma zata za'ra.

Salmu 118:27

Uburé Danhib'apito, ta hã 'Re ihâimana u'âsi mono. Ta hã te wama te te 're rob'uiwẽ u'âsi za'ra. Wede panhipti asib'rata 're 'wasari aba ré, ma'ãpé dato na asiwi ãma sãna'rata za'ra wa'aba. Te za duré danhimizama zatazé wedezane 'manharĩ hã nasi asiwi isa'oto 'wa.

Mateu 27:2

Tawamhã sasedoti ipire norĩ zadawa para, ma tô Zezusi hã dasiwi pawasisi ni, da te dasiwi saprõni da, Pilatuhu u. Ta hã Zudéa ãma da'madâ'â'wa, romanu norĩ nhib'apito uptabi nhimipisudu. Tawamhã itẽme da te dasiwi ãwisi wamhã, ma tô tãma hâiba nhomri ni, Zezusi hã, Pilatuhu ma.

Marcu 15:1

Tawamhã awẽm na mararé, ma duré si'rã'õtõ, sasedoti ipire norĩ hã, duré zudeu norĩ ma roti'wa norĩ hã, duré 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã. Zezusihi ãma te te sima roti za'ra da, ma si'rã'õtõ, dama roti'wa ipire norĩ me. Taha pari, ma oto siwi pawasisi Zezusi hã, Pilatuhu u te te siwi saprõni da. Tawamhã itẽme te te siwi ãwisi wamhã, Pilatu te Zezusi sadanha, ãne: — E a hã, zudeu norĩ nhib'apito. Tawamhã Zezusi te asa tãma tinha, ãne: — Tahata ma te tô tane hã isarina ĩ'ãma iwaihu.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:32

Rob'ui'éré te te isõré mono hã ãne: “Pone'ẽrebâ, da te wĩrĩ da, da te dasiwi isaprõni ne, ma tô dasiwi saprõni ni, da te dasiwi wĩrĩ da. Tawamhã dawi sisawi ãna ma tô dama mo. Duré pone'ẽrebâ 'ra hã da te séré nhihâri wamhã, isadari õ ne, ari'iwi ma tô tihâiba.

Galata 3:13

Wa norĩ hã wa te dame wasina tãma ãma 're uwaimrami za'ra mono õ di, 'Re ihâimana u'âsi mono nhimiroti mono hã. Tahawa, te aré duré te te siwi 're wa'awẽ'õ, 'Re ihâimana u'âsi mono hã. Tawapsi hã te aré duré wahâ za'ra, wawasété za'ra 'ru te. Tane nherẽ, te te 're wahâ za'ra mono tõ da, ma tô Cristu hã wẽ nherẽ, wazada sisõ, wa'upana 'Re ihâimana u'âsi mono te te azâri da. Taha na ma tô wa'awa'â, Cristu hã. Duréihã ma tô ãne na ãma rob'ui'éré ni: “Ni'wa hã wasété uptabi wa, te za dasiwi wĩrĩ ni. Taha pari, wede na te za dasiwi sasõmri ni, da te ãma waihu'u za'ra da, wasété uptabi wa, 'Re ihâimana u'âsi mono ma iwẽ õ na.” Tawamhã ãma irob'ui'érézéb zarina, Cristu hã wẽ nherẽ, wedepo'o nhonhi'rãmi na sa'o ré, ma tô siwi wẽ'õ, 'Re ihâimana u'âsi mono hã. Wa'upana ma tô azâ, wasété õ nherẽ.

Éfézu 5:2

Cristu te te 're iwa'azawi pese mono zéb zarina, te za oto 're idazawi pese za'ra wa'aba mo. Ta hã te te 're wa'azawi pese mono wa, ma tô sisawi ãna, wazada za'ra hã sisõ, dâ'â da. Tahawa, 'Re ihâimana u'âsi mono ma 're idanhoprub za'ra mono zéb zarina, sisawi ãna sisõmri wa, Wamama ma wẽ uptabi di, wazada idâ'âzé hã.

Hebreu 9:28

Tane ma tô duré Cristu hã misi haré dazada dârâ, dawasédé hã da'ahâ na te te oto dama ãma 're i'apari mono zéb da hã. Tawamhã niwa ti'ai u apâ wei morĩ zahu wamhã, ta hã oto dazada dâ'â da hã, wei morĩ õ di za, taha zarina dawasédé hã te te duré dama 're apari mono da hã. Ãne hã mare di za. Sô 're isimipari za'ra mono norĩ si, te te oto isõ'reptui pese za'ra da si, te za wei mo apâ Cristu hã, ta norĩ zô si.

Tiagu 2:21

Duré ma'ãpé ãma rosa'rata pese, wahi'rada Abra'ãhã wasu'u na. E marĩ wa, ma tô 'Re ihâimana u'âsi mono hã wahi'rada hã te te 're wẽsãmri. Ti'ra Izaqui hã te te tiwi sawi ãna, te aré tãma tiwĩ, ẽtẽ za'ra nhisiwimhã, 'Re ihâimana u'âsi mono ma ãma tãma isõprubzéb da, te te i'ruzéb zarina. Tahawa, ma tô wẽsã.

1 Pedru 2:24

Cristu hã wedepo'o nhonhi'rãmi na dâ'â wamhã, ma tô wawasété wa, wawa'âbâ za'ra, wawasédé hã wa te oto 're 'manharĩ tõ za'ra mono da, wahâimana wẽ na si oto 're wahâimana za'ra mono da. Ihâiba na da te tãma irob'manharĩ wasétézém na, ma tô robzépata za'ẽtẽ. Taha zarina, a norĩ wa'wa hã rowẽ na te oto 're aihâimana za'ra wa'aba mo.