Zenezi 20:3 - ꞌRe Ihâimana Uꞌâsi Mono Zadawa Wasuꞌu

³ Tawamhã 'Re ihâimana u'âsi mono, bara na Abimelequi sõtõ ré isimirosawẽrẽ na ma tô itẽme wi. Tahawa, ma tô ãne tãma tinha: — Te za atâ, pi'õ imro ré zô da'mazatõrĩ wa, sô da'maimorĩ da hã.

Zenezi 20:3 ပူးပေါင်းရင်းမြစ်များ

Zenezi 12:17

Tane nherẽ, Sara'ihi hâiba u'âbâ, ma tô Uburé Danhib'apito, apito, duré isõrõwa 're, 're ihâimana za'ra mono norĩ me, ihâzé pire na hã hâ za'ra.

Zenezi 12:18

Tahawa, te apito, Abrã itẽme morĩ da hã sô hâ. Tawamhã te ãne tãma tinha: — E marĩ da, ma ãne hã ĩma i'manha. E marĩ wa, aimro na hã ĩma wasu'u õ di bété.

Zenezi 20:7

Ma'ãpé ãhã na apâ imro ma, pi'õ hã tãma sõmri. Õ hã ĩzadawa 'mahârâ'wa, te za ai'ãma ĩwi hã rowaptẽ, atâ'â tõ da hã. Ãne na hã wa za aipo're pu'u siro. Apâ imro tãma sõmri õ wamhã, te za tô atâ za. Duré uburé aima 're ihâimana za'ra mono norĩ hã te za ai'utõ za.

Zenezi 28:12

Tawamhã Zaco ma tô te te saho. Te te isahoi mono 'remhã ma tô sai'urizé hã 'madâ, ti'ai hawi isãna'rada, hâiwa u i'rãsudu hã. Tawamhã 'Re ihâimana u'âsi mono ma romhuri'wa norĩ hã te nasi ãma sai'uri za'ra. Te duré nasi ãma si'ra za'ra, ti'ai u hã.

Zenezi 31:24

Tawamhã tô taha mara na sõtõ 'rowi ma tô Labãhã u, 'Re ihâimana u'âsi mono hã sihâi'ré. Tahawa te ãne tãma tinha: — Ni'ã pé! Niha na Zacoho ma hã tãma rob'manharĩ tõ. Tô'ã!

Zenezi 37:5

Tawamhã nimahã bâtâ na ma tô Zuzé hã rosawẽ. Ta hã ma tô tisisãnawã norĩ ma tãma wasu'u za'ra. Ãhã wa, ma tô oto sima 'ruiwazere pese za'ra,

Zenezi 37:9

Tawamhã ma tô duré rosawẽ, Zuzé hã. Tahawa, ma tô duré taha zama tãma wasu'u za'ra, tisisãnawã norĩ ma. Ãne te tãma wasu'u za'ra: — Wa duré rosawẽ ãne. Bâtâ norĩ hã a'amoi me, duré wasi 11 na ihâiba za'ra norĩ me, ma tô ĩma aiwẽ'ẽ za'ra, tãma ĩpire za'ra zarina.

Zenezi 40:5

Tawamhã nimahã mara na ma tô uwa 'rãi wa'u isé za'wari'wa norĩ, i'u'ẽtẽ wapu 'manharĩ'wai me hã si'uiwa na te te saho zahuré. Isimirosawẽrẽ zahuré si'uiwa na marĩ te te iwasu'u hã.

Zenezi 40:8

Tawamhã ma te ãne ãma tãma wa'rãmi zahuré: — Wahâiba si'uiwa na wa tô rosawẽrẽ ni. Tane nherẽ, ni'wa hâimana õ di, te te ãma wama isaprĩ da hã, wa te isahoi mono zé, marĩ te te iwasu'uzé, wa te iwaihu'u da hã. Tahawa ma tô wawi tirobzei'õ pese. Tawamhã Zuzé te asa ãne tãma nharĩ zahuré: — 'Re ihâimana u'âsi mono si te za rosawẽrẽ na isaprĩ waihu'uzé hã te te dama 're anhomri. Tahawa, ma'ãpé, irosawẽrẽ aba zé hã ĩma wasu'u aba, te waihu'u da.

Zenezi 46:2

Tawamhã 'Re ihâimana u'âsi mono, taha mara na ma tô sõtõ 'rowim ne tãma tinha. Ãne te tawamhã isisi na hã 'mahâ: — Zaco, Zaco! — E marĩ. Ãhãta wa ãme ĩhâiba. — Ãne ma asa sada'â.

Zona 3:4

Zona hã wisi wamhã, ma tô ãzé 'ri nho'õmo u hã. Tame bâtâ wahuré na ma tô 're mo, 'ri baba. Tawamhã ma tô oto ãma sãna'rata, te te dama irowahutu na hã, ãne: — Bâdâ 40 na isi'utõrĩzéb ãma hã, Niniwé hã te za ai'utõrĩ pese.

Mateu 1:20

Tawamhã ãne na te te sima rosa'rata wamhã, ma tô hâiwa hawi Wanhib'apito ma romhuri'wa hã tãma sihâi'ré, sõtõ 'rowim na. Ãne te taha wamhã tãma tinha: — Zuzé, Dawihi nhihudu, asina aihâtâ'â tõ, Mariaha ãma aimro tõ da hã. Ta hã ma tô tiwasã, 'Re ihâimana u'âsi mono pẽ'ẽzani na.

Mateu 27:19

Tawamhã Pilatu hã te te 're ida'awaihu'u mono zéb da, roti ma, 're isimasisi mono zéb ãma sãmra ré, ma tô imro hã timreme hã tãma tisõ. Ãne ma te ihâiba na hã tãma waihu'u: — Ma'ãpé ãma rosazâri, aibâ ãma. Ta hã tiha te te 're ab'manharĩ mono õ di. Bara na hã ĩnhotõ 'rowi te isawẽrẽzém na hã wa tô ãma robzépata za'ẽtẽ, taha na hã. Ãma ĩpẽ'ẽzé uptabi di. Tahawa, te za ãma irosazâ.