Zenezi 2:7 - ꞌRe Ihâimana Uꞌâsi Mono Zadawa Wasuꞌu

⁷ Tawamhã Uburé Danhib'apito, ti'a zaprum na ma tô a'uwẽ hã 'manha, aibâ na. Tahawa, isisi're ãma ma tô sa'u, pẽ'ẽzani ré oto 're hâimana mono da. Ãhã wa, te oto ipẽ'ẽzani ré na hã 're hâimana, hâiba ré.

Zenezi 2:7 ပူးပေါင်းရင်းမြစ်များ

Zenezi 1:27

Ãne ma tô 'Re ihâimana u'âsi mono, a'uwẽ hã poto na'rata za'ra. Isine 're ihâimana za'ra mono da hã ma tô te te apoto, aibâ duré pi'õ.

Zenezi 2:6

Tane nherẽ, te ti'ai hawimhã ub're hã 're praba za'ra, te te 're iti'a ti'i mono da hã.

Zenezi 3:19

Tawamhã duré asu'u za'ẽtẽ 'rowi te za romhuri pire na hã 're iromhuri u'âsi mo, asazéb da, ti'ai ãma 're aihâimana mono ré, apâ asiti'azéb u. E marĩ wa. Ti'a 'manharĩ na dâ'âsina, a hã. Duré a hã ti'ai 'manharĩ wa, te za apâ asiti'a.

Zenezi 3:23

Tahawa, Uburé Danhib'apito 'Re ihâimana u'âsi mono, ma tô Édẽ na rob're nhisi hawimhã tãma rob'ru, ti'a na te te ihâiba 'manharĩzém na si te te sima 're rob're mono da oto.

Zenezi 7:22

Uburé ti'ai ãma 're ihâimana za'ra mono hã ma tô ai'utõrĩ pese, pẽ'ẽzani ré 're inomro mono hã.

Salmu 100:3

Ma'ãpé, Uburé Danhib'apito ãma 're aipo're pu'u za'ra wa'aba mono, ta hã 'Re ihâimana u'âsi mono wa. Ta hã ma tô te te 're wa'apoto. Tahawa, wa ite na tãma 're wahâimana za'ra. Duré isib'a'uwẽ na wa tãma 're wahâimana za'ra, ite pone'ẽrebâ ne.

Salmu 103:14

E marĩ wa. Õhõ ma hã waihu'u pese di, niha na we iwasi'manharĩ za'ra zé hã. Te duré ti'a zapru 'manharĩ na hã wa'ãma 're sipo're pu'u za'ra.

Provébiu 20:27

Uburé Danhib'apito ma tô dapẽ'ẽ 're danhimirosa'rada hã dama tisõ, ãma 're idasiwaihu'u za'ra mono zéb da hã. Tahawa, ni'wa 'râwi tihâimanazém na hã siwi simani waihu'u õ di.

Zuwã 20:22

Tawamhã tizadawa wa'u'u na ma tô sa'uri za'ra. Ãne te tawamhã tãma nharĩ za'ra: — Wa za oto Ĩpẽ'ẽzani hã aima sõmri za'ra wa'wa. Wẽ uptabi di, ta hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:25

Õhõ si ma tô dapẽ'ẽzanizé hã te te dama 're anhomri. Taha zarina si te duré 're dapẽ'ẽzani za'ra. Taha si, ma tô uburé marĩ hã te te dama 're anhomri, ãma 're idahâimana za'ra mono zéb da hã. Tahawa, da te 're ipawaptob za'ra mono zéb zô, 're simipari mono õ di.

Roma 9:20

E a norĩ wa'wa hã 'Re ihâimana u'âsi mono ma, aipire za'ra wa'aba bâ, te za ãne na ĩma 're inharĩ za'ra wa'aba mo. Piza na zé 'manharĩ hã, e ti'manharĩ'wa te za sina sadanharĩ za'ra, ãne: “E marĩ da, ma tô ãne iwa'ab'manha.” Ãne na te te sina sadanharĩ waihu'u za'ra õ di za.

1 Corĩtu 15:45

Duréihã Mozési hã ma tô ãne na ãma rob'ui'éré: “'Re ihâimana u'âsi mono hã ma tô aibâ hã poto 'rata, Adã na isisi hã. A'uwẽ hâiba na 're morĩ da, ma tô poto 'rata tô.” Tane nherẽ, Adãhã ne te tô 're hâimana, 'Re ihâimana u'âsi mono 'rata, dadâ'â ãna 're danomro mono da, te te dama 're i'apisutu mono hã, Ipẽ'ẽzani nhimipisutuzéb zarina. Ta hã Zezusi.

1 Corĩtu 15:47

Duréihã te te dama i'manharĩ 'rada hã aibâ na ma tô ti'a na 'manha, 'Re ihâimana u'âsi mono hã. Tane nherẽ, taha uirĩ na si, ma tô aibâ aimawi hã wei mo hâiwa hawimhã, ti'ai u, Adãhã ma ipire uptabi hã, duré iwẽ uptabi hã.

2 Corĩtu 4:7

Ãté ni'wa hã te za marĩ iwẽ uptabi hã iwa'âbâ za'ẽne hã piza na zé'a 'manharĩ 're tisẽ, piza isipo'o pese wa, i'manharĩ uwa wa. Tane duré, wa norĩ hã wahâiba nhib'uware nherẽ, wa marĩ iwẽ uptabi hã wa te dama 're wasu'u, tô Cristuhu wasu'uwẽ hã, 'Re ihâimana u'âsi mono si iwaihu'u pese na, da te 're waihu'u za'ra mono da, wawaihu'u pese newa, wa'ãma si, da te 're rosa'rata za'ra mono tõ da.

2 Corĩtu 5:1

Wahâiba hã 'ri na, wa za oto ãma aima simiré'é za'ra wa'wa. A'ubuni wi 're dazâmorĩ mono ré hã, romhâ 'manharĩ na 'ri hã iwa 're dasi'ubumroi hutu mono pari, te za dasisa'u da te dasiwi 're 'ri nhamra. Tane duré, wa norĩ hã. Ti'ai ãma 're wahâimana hutu za'ra mono ré, te za wahâiba hã wawi 're si'utõrĩ za'ra. 'Ri iwẽ uptabi hã dama 're simasam hâ mono da, te za duré iwẽ na da te dasima 're 'ri za'ra. Tane te za duré 'Re ihâimana u'âsi mono hã wahâiba té hã te te wama 're ab'manharĩ, iwẽ uptabi hã, hâiwa ãma za wawi 're isi'utõrĩ waihu'u za'ra mono õ hã, taha ré si oto i'rata 're wahâimana u'âsi za'ra mono da. Ãne hã wama waihu'u pese za'ra di oto, wa norĩ ma hã.

Hebreu 12:9

Ti'ai ãma wamama uptabi norĩ hã wawasété na 'râwi 're wasiwaihu'u za'ra mono da, wanhimiza'rese wi te te 're wahâ za'ra mono wamhã, wa tô ta norĩ hã wa te 're hâimana wazéb za'ra, wama pire na 're hâimana za'ra mono wa. Taha nhipai u, wa za duré hâiwa ãma Wamama uptabi hã wa te 're wapari pese za'ra, te te 're wa'ahâ za'ra mono nherẽ, rowẽ na õhõ ãma si 're wanomro u'âsi mono da oto.