Zenezi 18:14 - ꞌRe Ihâimana Uꞌâsi Mono Zadawa Wasuꞌu

¹⁴ E Uburé Danhib'apito ma, marĩ hã ĩma waihu'u prã pâ. Uburé marĩ hã ĩma waihu'u pese di. Tahawa, te inharĩzéb zarina wahup tém na wa za we atẽme mo apâ. Tawamhã taha na te za i'ra hã tãma podo, Saraha ma.

Zenezi 18:14 ပူးပေါင်းရင်းမြစ်များ

Zenezi 17:16

Ĩwẽ uptabi wa za te tãma 're anhomri. Tahawa wa za duré ai'ra aima tisõ, isé're hawimhã. Wa za tô iwẽ hã te tãma 're anhomri. Tahawa te za a'uwẽ wamri mono bâ da'ahâ uptabi hi'rata sipi'õ na dama 're hâimana. Te za isihudu norĩ 'remhã nima norĩ hã dama 're si'apito za'ra.

Zenezi 17:21

Tane nherẽ, wa za ai'ra Izaquihi ma, ĩnhimiropisutu zahi hã tãma 'manha, tô ãhã a'amo wahup tém na Saraha zé're ipoto ma.

Zenezi 18:10

Tawamhã te Abra'ãhã ma, nimahã tãma tinha ãne: — Wahup tém na tô ã a'amo na wa za we apâ atẽme mo. Tawamhã taha na te za aimro Saraha ma, i'ra hã tãma podo. Tahawa, Sara 'ridawa ãma ibabarã na isa hã ma tô isimirobzanhamrizé sina wapa.

Zenezi 18:13

Tawamhã Uburé Danhib'apito, te Abra'ã hã sadanha ãne: — E marĩ wa, te Sara hã aihâ. E marĩ da, te tinha, ihi wa, za oto i'ra waihu'u õ na hã.

Zenezi 18:15

Tawamhã ãne na imreme te te wapari wamhã, ma tô Sara hã tãma tipahi. Tahawa te tiwi ai'udâ ãne: — Ĩsihâ õ di. Tane nherẽ, Uburé Danhib'apito, ma te ãma tãma wa'rã ãne: — Senai õ di i'asiwasu'uzé hã. Ma! Te tô aihâ.

Zenezi 21:1

Tawamhã Uburé Danhib'apito te te iropisutuzéb zarina, ma tô iwẽ hã tãma pisutu, Saraha ma.

Zenezi 21:2

Tahawa ma oto tiwasã, Abra'ã si'ihi nherẽ. Ma i'ra hã tãma tisõ. Tawamhã 'Re ihâimana u'âsi mono, bâdâ te te tãma ipisutuzéb zarina, ma tô i'ra si'aibâ hã tãma waptãrã.

Salmu 95:3

E marĩ wa. 'Re ihâimana u'âsi mono hã sa'ẽtẽ uptabi di. Duré Apito isa'ẽtẽ uptabi uburé ihâiba'õ norĩ nhisiwi 're isãmra mono.

Daniéu 6:20

Tawamhã ab're u te te sina rotété wamhã, ma tô te te ãma robzépata wa, mreme zei ãna 'mahâ ãne: — Daniéu, 'Re ihâimana u'âsi mono idâ'â'õ nhib'a'uwẽ! E 'Re ihâimana u'âsi mono, a hã ãma 're i'aihâimana mono hã, duré õne u'â tãma 're i'asisõmri mono hã, ma tô hu'u zérépa norĩ wi te te i'asõ'reptu da hã ãma aima uwaimra.

Mateu 14:31

Tawamhã awa'awi ma tô Zezusi hã pa'â, tinhib'rata na. Ãne te tãma tinha, Pedruhu ma: — E niha aima ĩzaze surure di. E marĩ da, ma tô 'râwi ĩ'ãma asiwawã, za te i'aipawaptobzém na hã.

Mateu 19:26

Tawamhã Zezusi hã te 'madâ'â pese za'ra, tisiré 're inomro mono norĩ hã. Tawamhã te te 'madâ'â pese za'ra wamhã, te duré asa tãma nharĩ za'ra, ãne: — Dasi'uihâ na danho'reptuzé hã da te dasina 're uwaimrami za'ra mono õ di za. Dama hã waihu'u õ di. 'Re ihâimana u'âsi mono si siminho'reptu waihu'u pese di. Taha ma si waihu'u pese di, uburé marĩ te te 're i'ab'manharĩ mono zéb da hã.

Mateu 3:9

Duré Abra'ãhã nhihudu wẽ te, asina 're rosa'rata za'ra wa'aba mono õ di za, 'Re ihâimana u'âsi mono te te 're i'aihâ za'ra wa'aba mono õ na hã. 'Re ihâimana u'âsi mono ma, waihu'u pese di, ã ẽtẽ norĩ ma, te te nharĩ da, tãma si'a'uwẽ za'ra da, Abra'ãhã nhihudu oto 're hâimana za'ra mono da, ẽne hã.

Marcu 10:27

Tawamhã Zezusi hã te 'madâ'â za'ra. Ãne ma tô tãma waihu'u za'ra: — Dasi'uihâ na danho'reptuzé hã, da te dasina 're uwaimrami za'ra mono õ di za. Dama waihu'u õ di. 'Re ihâimana u'âsi mono si siminho'reptu waihu'u pese di. Taha ma si, uburé marĩ hã 'manharĩ waihu'u pese uptabi di.

Luca 1:13

Tawamhã te tãma tinha, ãne: — Zacaria, aipahi tõ. 'Re ihâimana u'âsi mono, ma tô aimreme hã wapa, tiwi irowaptẽrẽzém na hã. Aimro te za oto ti'ra. Tawamhã ai'ra aima waptã'ã wamhã, te za isisi, Zuwã na.

Luca 1:18

Tawamhã Zacaria asa ma tô sadanha, romhuri'wa hã, ãne: — E niha wa za asaze, tane na hã. Wa hã ĩhi uptabi oto. Duré ĩmro zama, ihi uptabi.

Luca 1:37

Uburé marĩ hã tãma waihu'u pese di, 'Re ihâimana u'âsi mono ma. Tahawa, ma tô tiwasã.

Luca 8:50

Tawamhã Zezusi ma tô sina wapa. Tahawa, te Zairuhu ma tinha, ãne: — Ai'ra wasu'u ma, aipahi tõ. Ĩwétési asina ĩ'umnhasi, te aipawaptob da. Ĩwétési ĩ'umnhasi wamhã, rowẽ na te za oto aima 're sãmra.

Roma 4:21

'Re ihâimana u'âsi mono te te tãma iropisutuzé hã za te te tãma ãma i'uwaimramizéb zô, te te duré 're sazei pese u'âsi. Te te sazei utõrĩ ãna, Abra'ã hã.

Éfézu 3:20

'Re ihâimana u'âsi mono hã waihu'u pese di, te te wama ãma 're i'a'uwaimrami mono zéb da hã, marĩ iwẽ zô wa te 're irosa'rata za'ra mono zém nhipai u, duré marĩ iwẽ hã wa te tiwi 're iwaptẽrẽ za'ra mono zém nhipai u zama. Tiwaihu'u pese na te te 're iwa'apawapto mono zéb zarina, tãma waihu'u pese di, iwẽ na te te wama ãma 're i'a'uwaimrami mono zéb da hã.

Filipu 3:21

Taha si te uburé marĩ hã tiwaihu'u pese na te te 're ab'madâ'â, siptete uptabi wa. Tahawa, tiwaihu'u pese na te za wahâiba itém na wama ãma saprĩ za'ra, wahâiba isib'uware ré 're iwanomro 'rata mono zém hawi, isi'utõrĩ pese hawimhã. Tawamhã wahâiba itéb ré, Cristuhu hâiba ne iwẽ uptabi ré, wa za oto 're wahâimana u'âsi za'ra, i'rata.

Filipu 4:13

Ãne hã niha ĩma 're romhâimana mono nherẽ, wa sada 're ĩnhiptete mono. E marĩ wa. Cristu hã ĩnhiptetezé te te ĩma sada 're anhomri u'âsi mono wa.

Hebreu 11:19

Abra'ã hã ãne ma tô sima rosa'rata: “'Re ihâimana u'âsi mono ma si, waihu'u pese di, 're dadâ'â za'ra mono nherẽ, apâ te te 're ida'ahâiwa'utu mono da hã. Tahawa, ĩ'ra hã te aré tãma iwĩrĩ hã, te te duré waihu'u pese di, apâ te te ĩma ihâiwa'utu da hã, te te ĩma iropisutuzém na te te ĩma ãma uwaimrami da hã.” Ãne ma tô sima rosa'rata, Abra'ã hã. Tawamhã i'ra Izaqui hã dâ'â uptabi õ nherẽ, aré dâ'â wa, apâ te te tãma ihâiwa'utu ne, ma tô dâ'â ãna tãma tisõ apâ, 'Re ihâimana u'âsi mono hã.

Zuize 13:3

Tawamhã Hâiwa ãma Romhuri'wa ma tô itẽme wi. Ta hã itẽme wisi wamhã, ma tô ãne tãma tinha: — Ai'ra waihu'u ãna te aré 're aimo. Tahawa aré niwamhã dana na hã 're aihâimana waihu'u mono õ di. Tane nherẽ, te za ãhã na hã oto aiwasã, ai'ra aima poto da.

1 Samuéu 14:6

Tawamhã Zonata te aibâ iprédupté isi'wapézé âri'wai ma tinha ãne: — Oto wane na, filisteu norĩ, ihâiba'õ 'Re ihâimana u'âsi mono upa na ãma 're iwata za'ra mono norĩ 're ihâimana wasété za'ra mono te te sima i'ri nhoré za'ra zéb u. Ãté te za Wanhib'apito wapawapto. Te te wapawaptob da hã wamhã, wa te ãma i'ai'uté za'ra zéb da hã wa'umro nherẽ marĩ hã te te wawi sawi waihu'u za'ra õ di za.