Zenezi 12:3 - ꞌRe Ihâimana Uꞌâsi Mono Zadawa Wasuꞌu

³ Duré iwẽ te te aima 're i'manharĩ za'ra mono norĩ ma, wa hã wa za duré iwẽ hã te tãma 're 'manharĩ u'âsi za'ra, isimi'manharĩ za'ra zé wa'rãmimhã aima. Duré te te aima 're irob'manharĩ wasété za'ra mono norĩ ma, wa za duré iwẽ'õ hã te tãma 're pisutu za'ra, isimi'manharĩ wasété za'ra zé wa'rãmi, aima hã. Tawamhã duré ai'u'âbâmhã, wa hã wa za ti'ai ãma uburé a'uwẽ mono bâ 're idahâimana za'ra mono norĩ ma, iwẽ hã te dama 're anhomri u'âsi.

Zenezi 12:3 ပူးပေါင်းရင်းမြစ်များ

Zenezi 18:18

Isihudu sidâpâsi ahâ uptabi na 're hâimana za'ra mono wa, te za a'uwẽ misi ãma isitom na dama siptete na 're hâimana za'ra. Ta norĩ u'âbâ wa za uburé a'uwẽ mono bâ iwẽ hã te tãma 're sõmri za'ra, ti'ai mono bâ.

Zenezi 18:19

Wa hã, Abra'ã wa tô pisutu, ti'ra norĩ ma, tinhihudu norĩ ma, ĩzadawa na si 're sõpré mono da hã te te tãma 're waihu'u za'ra mono da, tãma ĩnhimirotizé hã te te 're wapari pese za'ra mono da, duré i'uwaibaba na si sena na ãma 're nomro mono da. Tawamhã ta norĩ ĩmreme te te 're iwapari pese za'ra mono na 're hâimana za'ra mono wamhã, wa hã wa za Abra'ãhã ma, te tãma iropisutuzé hã uburé ãma tãma a'uwaimra.”

Zenezi 22:18

Asihudu norĩ u'âbâmhã wa za a'uwẽ mono bâ ropâ 're ĩdahâimana za'ra mono iwẽ hã te tãma 're apisutu, a hã te aima iwaihu'uzém na ĩwapari pese wa, ãne hã 'manharĩ wa.

Zenezi 24:35

Uburé Danhib'apito ma tô ĩnhib'apito ma iwẽ si te te tãma 're apisutu. Tahawa, ma tô sisimarĩ pese. Isimizama da, pone'ẽrebâ norĩ hã, pone'ẽrebâ zéré uzé norĩ hã, powawẽ norĩ hã, ẽtẽ waipo prã prata 'manharĩ hã, ẽtẽ waipo pré oru 'manharĩ hã, pawa'âbâ ãna tãma romhuri'wa si'aibâ norĩ hã pawa'âbâ ãna romhuri'wa sipi'õ norĩ hã, awaru ba'õmore norĩ hã, duré awaru po're pore norĩ zama hã ma tô tãma sõmri za'ra.

Zenezi 25:11

Tawamhã Abra'ã dâ'â parimhã, ma tô 'Re ihâimana u'âsi mono hã, i'ra Izaquihi ma, iwẽ hã ma tô te te tãma 're apisutu. Izaqui hã Be'e-La'ai-Ro'i 'ratamhã ma tô 're hâimana.

Zenezi 26:29

A hã niwamhã iwasédé hã wama 'manharĩ za'ra õ di za. Duré wa norĩ hã niwamhã iwasédé wa te aima 'manharĩ za'ra õ di za. Iwẽ na hã wa tô wa te aima 're 'manharĩ u'âsi za'ra. Duré rowẽ na warob za'ra hawi aiwatobro da hã wa tô aima waprosi za'ra ni. Ãhã na wa tô oto waihu'u za'ra ni, Uburé Danhib'apito iwẽ te te aima 're i'apisutu mono zém na hã.

Zenezi 26:4

Wa hã wa za pisutu, asihudu norĩ ahâ na 're hâimana za'ra mono da hã, wasi hâiwa na 're isimasa mono ne. Wa za duré uburé ã hã ti'a te tãma 're anhomri. Asihudu norĩ u'âbâmhã, wa za a'uwẽ mono bâ iwẽ hã te tãma 're pisutu za'ra, ro pâ.

Zenezi 27:29

A'uwẽ mono bâ asapari te te aima 're iromhuri za'ra mono da si, iwẽ hã. Duré daro mono bâ da te dasiwi 're i'aiwazé mono da si, iwẽ hã. Duré asisãnawã norĩ nhib'apito na 're i'aihâimana mono da si, iwẽ hã. Duré ana zé're hawi a'uwẽ norĩ hã, asõ'remhã aima 're isiwẽ'ẽ za'ra mono da si, iwẽ hã. Tawamhã duré iwasédé te te aima 're ipisutu za'ra mono norĩ ma hã, 'Re ihâimana u'âsi mono, ta norĩ ma, iwasédé te te tãma 're ipisutu za'ra mono da si, iwẽ hã. Duré iwẽ te te aima 're ipisutu za'ra mono norĩ ma, 'Re ihâimana u'âsi mono, iwẽ te te tãma 're ipisutu za'ra mono da si, iwẽ hã.”

Zenezi 28:14

Asihudu norĩ hã ti'a zapru ropâ 're ihâimana za'ra mono ne, ahâ uptabi na te za 're hâimana za'ra. Ta norĩ te za hâiwa nhimi'e niwĩb ãma ro 're ihâimana mono u hã, hâiwa nhimire niwĩb ãma ro 're ihâimana mono u hã, bâtâ pusizém niwĩb ãma, ro 're ihâimana mono u hã, duré bâtâ zasizém niwĩb ãma ro 're ihâimana mono u hã te te ropé. Tawamhã ai'u'âbâ, asihudu norĩ u'âbâb zama wa za daro mono bâ uburé 're idahâimana za'ra mono norĩ ma hã, iwẽ te dama 're apisutu.

Zenezi 30:27

Tawamhã Labã, ma te ãma sada'â ãne: — Ĩzawi na hã ma'ãpé ĩ'rata 're aihâimana u'âsi mono. E marĩ wa. Wa hã marĩ te i'manharĩ nhipese na, wa tô waihu'u, aihâiba u'âbâmhã Uburé Danhib'apito iwẽ na te te 're ĩpawapto mono zéb zarina hã.

Zenezi 30:30

We ãwa ĩwisi wana ré hã asimarĩ hã aré umrore di. Tane nherẽ, ma tô oto sina hâ. Duré 'Re ihâimana u'âsi mono, nimomo 're ĩne mono sidâpâsi ma tô iwẽ hã te te aima 're apisutu. Tane nherẽ, oto wa hã ãhã na hã ĩhawi a'uwẽ norĩ si te oto 're i'a'madâ'â mono da si, wa tô oto ĩsima wẽ zahi.

Zenezi 39:5

Tawamhã ta hawimhã haré ma tô Zuzéhé hâiba u'âbâ, Uburé Danhib'apito ezipsiu nhorõwa 're, isimarĩ tãma 're hâimana wẽ za'ra mono da hã, duré isimizama zama rom na tãma 're simasa wẽ mono da hã, iwẽ na te te 're pawapto.

Salmu 72:17

Apito nhisi na õne u'â ãma 're idasipo're pu'u za'ra mono da hã si, iwẽ hã. Duré bâdâ te te 're rowa'a mono ré, iwasu'u wẽ hã a'â 're ihâimana mono da si! Duré uburé daro mono bâ a'uwẽ norĩ, apito hâiba u'âbâ iwẽ na si 'Re ihâimana u'âsi mono te te dama 're i'apisutu mono da si. 'Re ihâimana u'âsi mono, apito ma, iwẽ hã te te tãma 're i'apisutu mono da si, te za duré da te 're waptẽrẽ za'ra.

Mateu 25:40

— Tawamhã Uburé Danhib'apito hã te za ta norĩ ma ãne tãma rowasu'u za'ra: “Tô sena wa aima rowasu'u za'ra wa'wa. Ĩsisãnawã norĩ hã ti'ab ré ãne na te te 're robzépata za'ra mono wamhã, dama wapu na 're hâimana za'ra mono nherẽ, marĩ iwẽ hã tô õhõ na hã tãma 're 'manharĩ wẽ za'ra wa'aba mono wamhã, ta norĩ hâiba u'âbâ ma tô ĩma 're i'manharĩ wẽ za'ra wa'aba mo.” Ãne na te za ta norĩ ma waihu'u za'ra.

Mateu 25:45

— Tawamhã ta norĩ ma, te za duré ãne rowasu'u za'ra: “Tô sena wa aima rowasu'u za'ra wa'wa. Ti'ab ré, ã norĩ hã dama wapu na 're ihâimana za'ra mono norĩ hã ãne na te te 're robzépata za'ra mono ré hã, marĩ iwẽ na 're pawaptob za'ra wa'aba mono õ di. 'Re pawaptob za'ra wa'aba mono õ wamhã, ta norĩ hâiba u'âbâ, asiwi 're ĩpawaptob za'ra wa'aba mono õ di duré.” Ãne te za ta norĩ ma, tãma waihu'u na wa'rãmi za'ra, isimi'e niwĩ isimasam norĩ ma hã.

Luca 24:27

Romhâ ré, ma tô iwana Danho'reptui'wa na rob'ui'éré za'ra ni. Tawamhã Mozési te te ãma irob'ui'éré na, te oto tãma rob'rãzarõtõ zahuré. Taha pari, uburé 'Re ihâimana u'âsi mono zadawa 'mahârâ 'rata 'wa norĩ, te te ãma irob'ui'éré za'ra na, te tãma rob'rãzarõtõ zahuré duré.

Roma 4:11

'Re ihâimana u'âsi mono hã, Abra'ã hã te te sina i'umnhasi pese zém na si, ma tô wẽsã, sihâiwata nhizâri õ nherẽ. Tahawa, sihâiwata nhizâri õ ré, Abra'ã hã, 'Re ihâimana u'âsi mono te te iwẽsãmrizém na hã, te wama wasu'u za'ra, tô sena na uburé da te 're iwaihu'u za'ra mono zéb da hã. Tahawa, Abra'ã hã uburé 'Re ihâimana u'âsi mono, da te dasina 're i'umnhasi za'ra mono norĩ hi'rada, ta hã. Duré sihâiwata nhihâri õ nherẽ, 'Re ihâimana u'âsi mono te te 're i'awẽsãmri mono norĩ hi'rada.

1 Corĩtu 1:30

'Re ihâimana u'âsi mono nhimipisutuzéb zarina si, te oto Cristu Zezusihi ãma 're anomro aba mo. Cristuhu ãma si oto 're anomro aba mono wa, te tinhimirowaihu iwẽ hã te te aima 're waihu'u u'âsi za'ra wa'wa. Cristuhu dâ'âzém na si, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Taha zarina si, ma tô duré te te 're wa'apisutu, isib'a'uwẽ si oto tãma 're wahâimana wẽ za'ra mono da. Taha zarina si, ma tô duré wawasété hawi wa'anho'reptu, sitẽme te te 're wa'awaibui mono da.

Galata 3:16

Tane Abra'ãhã ma, isipai u isihudu na zama, 'Re ihâimana u'âsi mono te te iropisutuzé hã. Ãhã wasu'u na, da te ãma rob'ui'éré wamhã, isihudu norĩ hã da te wasu'u za'ra õ di. Isihudu norĩ hã da te wasu'u za'ra 'wa'âhã, te aré isihudu ahâ na dasiwi wasu'u ni. Isihudu misi, te wasu'u. Ta hã Cristu.

Galata 3:28

Taha zarina, 'Re ihâimana u'âsi mono hã te te siwi 're da'aba'a waihu'u mono õ di, zudeu norĩ hã, duré zudeu'õ norĩ hã, iwada'uri zarina si, pawa'âbâ ãna dama romhuri'wa norĩ hã, duré wada'uri ãna si'uihâ na 're ihâimana za'ra mono norĩ hã, aibâ norĩ hã, duré pi'õ norĩ hã. Simisutu Cristu Zezusihi nhib'a'uwẽ si, te 're aihâimana za'ra wa'aba mo. Tahawa, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Ãhã wa, iwẽ na si, Abra'ãhã ma te te iropisutuzéb zarina, te za iwẽ na si te te aima ãma 're a'uwaimrami 'wa, Aimama 'wa hã.

Galata 3:8

Zahadu romhâ uptabi nherẽ, ma tô zudeu'õ norĩ ãma sima roti, 'Re ihâimana u'âsi mono hã. Ãne isimiroti hã: Zudeu'õ norĩ hã, Cristu Danho'reptui'wa na te te sina 're umnhasi za'ra mono wamhã, ta norĩ ma zama te za duré tãma 're irowẽ za'ra mono zéb da hã te te tãma 're apisutu, 'Re ihâimana u'âsi mono hã. Iwasédé hã te te oto ãma 're i'ab'madâ'â mono õ zéb zarina, te za te te 're awẽsãmri. Taha zarina wasété za'ra 'ru te, te te ahâ za'ra õ di za, rob'rãsutuzéb ãma hã. Ãne isimiroti hã zudeu'õ norĩ ãma hã. Tahawa, ma tô ãne Abra'ãhã ma waihu'u siro, 'Re ihâimana u'âsi mono hã: “Te aima iropisutuzém na asina ĩzazei pese zéb zarina, wa za dama 're irowẽ za'ra mono zéb da hã te dama 're apisutu, dapoto mono bâ.” Ãne ma tô iwasu'uwẽ na romhâ ré ãma po're pu'u siro.

Éfézu 1:3

'Re ihâimana u'âsi mono hã sõpru uptabi di, Wanhib'apito Zezu Cristuhu mama hã. Ta hã Cristuhu ãma 're wanomro mono wa, ma tô marĩ mono bâ wama ãma 're sõpru, uburé marĩ iwẽ na, hâiwa hawi. Tahawa, wama 're sõprub za'ra mono wa, ãma 're wawata u'âsi za'ra wa'aba mono za.

Colosu 3:11

Tahawa, dapoto mono bâ dasipu'u pese na tãma 're dahâimana za'ra mono nherẽ, te te siwi 're da'ahâiba wẽ'õ mono õ di oto, 'Re ihâimana u'âsi mono hã. E marĩ wa. Cristuhu zazei'wa norĩ hã aiwapsi te te 're azawi pese mono wa, zudeu'õ norĩ hã zudeu norĩ me, duré sihâiwata nhihâri ré 're inomro mono norĩ hã, duré sihâiwata nhihâri ãna 're inomro mono norĩ hã, duré a'uwẽ pahi norĩ, marãi 'rowi 're ihâimana za'ra mono hã darob amoi ãma, duré iwada'uri zarina pawa'âbâ ãna te te dama 're iromhuri za'ra mono norĩ hã, duré wada'uri ãna si'uihâ na 're ihâimana za'ra mono norĩ hã. Ãne hã te uburé isazei'wa norĩ hã aiwapsi tãma 're hâimana za'ra, 'Re ihâimana u'âsi mono ma hã. Cristuhu si te pire uptabi na wama 're hâimana za'ra, danhipai u. Taha si wama ipire uptabi za'ra hã, wasiré isazei'wa norĩ ma hã. Taha si te za tizazei'wa norĩ pẽ'ẽ 're, 're sãmra u'âsi, ihâiba mono bâ.

Apocalipsi 7:9

Taha parimhã, wa hã Zuwã, wa tô duré 'madâ. Te 'madâ'â wamhã, wa tô da'ab'madâ, da'ahâ uptabi na, da te idaza'rata waihu'u õ hã. Dapoto mono bâ te aimasam ni, damreme sipo'o mono bâ 're idahâimana za'ra mono hã. Danhib'apito simasisizém nho're te aimasam ni, duré Pone'ẽrebâ nho'reb zama. Da'uza hâpa hâirã ré te isõ're aimasam ni. Tawamhã wa'asu ne hã, da te tété za'ra sina, te damreme 'rãihâ na ãma tawata za'ra ni, ãne: — Wanhib'apito 'Re ihâimana u'âsi mono, danhib'apito simasisizém na isãmra hã ta hã, Wa'anho'reptui'wa. Duré Pone'ẽrebâ hã tô isiré Wa'anho'reptui'wa. Ã norĩ hã ma tô wawasété wi te te 're wa'anho'reptu zahuré, 're iwasi'utõrĩ za'ra mono zé wib zama.