Zenezi 12:2 - ꞌRe Ihâimana Uꞌâsi Mono Zadawa Wasuꞌu

² Tawamhã asihudu sidâpâsi ahâ uptabi na 're hâimana za'ra mono da hã, wa hã wa za pisutu, a'uwẽ misi ãma isitom na dama siptete na 're hâimana za'ra mono da. Duré iwẽ uptabi hã wa za te aima 're anhomri u'âsi. Duré uburé dama hã asisi wasu'u za'ẽtẽ di za. Tawamhã iwẽ hã te aima 're i'apisutu mono zéb u'âbâ, te za duré a hã iwẽ na hã 're ida'apawapto mo.

Zenezi 12:2 ပူးပေါင်းရင်းမြစ်များ

Zenezi 13:16

Asihudu norĩ hã ti'a zapru ahâ uptabi na 're ihâimana za'ra mono ne, wa za ahâ uptabi na 're hâimana za'ra mono da hã tãma pisutu za'ra. Ti'a zapru hã da te 're isa'rata waihu'u za'ra mono õ ne, duré asihudu norĩ, da te 're isa'rata waihu'u za'ra mono da hã mare di za.

Zenezi 15:5

Tawamhã Uburé Danhib'apito, rob u te te saprõni wamhã, te Abrãhã ma tinha ãne oto: — Ma'ãpé hâiwa 'madâ'â, wasi norĩ sa'rata waihu'u pese wamhã, aza'rata da pé. Tane asihudu norĩ hã, ahâ uptabi di za.

Zenezi 17:20

Tawamhã duré Ismaeu ma irowaptẽrẽzéb zama wa tô wapa. Tahawa iwẽ hã wa za te tãma 're anhomri. I'ra norĩ, duré isihudu norĩ ahâ uptabi na 're hâimana za'ra mono da hã wa za 'manha. Tahawa te za 12 na dama ipire norĩ mama na 're hâimana. Duré isihudu norĩ hã a'uwẽ misi ãma isitom na dama siptete na 're hâimana za'ra mono da, wa za 'manha.

Zenezi 18:18

Isihudu sidâpâsi ahâ uptabi na 're hâimana za'ra mono wa, te za a'uwẽ misi ãma isitom na dama siptete na 're hâimana za'ra. Ta norĩ u'âbâ wa za uburé a'uwẽ mono bâ iwẽ hã te tãma 're sõmri za'ra, ti'ai mono bâ.

Zenezi 18:19

Wa hã, Abra'ã wa tô pisutu, ti'ra norĩ ma, tinhihudu norĩ ma, ĩzadawa na si 're sõpré mono da hã te te tãma 're waihu'u za'ra mono da, tãma ĩnhimirotizé hã te te 're wapari pese za'ra mono da, duré i'uwaibaba na si sena na ãma 're nomro mono da. Tawamhã ta norĩ ĩmreme te te 're iwapari pese za'ra mono na 're hâimana za'ra mono wamhã, wa hã wa za Abra'ãhã ma, te tãma iropisutuzé hã uburé ãma tãma a'uwaimra.”

Zenezi 19:29

Ãne 'Re ihâimana u'âsi mono, romharé na 'ri nho'õmo norĩ ãma ma tô da'uprosi. Tane nherẽ, ma tô Abra'ã ãma hã po're puru. Tahawa Lo, 'ri nho'õmo 're, 're ihâimana mono zéb ãma te te da'uprosi wamhã, dazu dâ'â tõ da hã, ma tô tinhimihâzé wi hã waze.

Zenezi 24:1

Tawamhã Abra'ã hã ihi uptabi na te 're hâimana oto. Duré Uburé Danhib'apito ma tô marĩ iwẽ hã te te tãma 're apisutu u'âsi.

Zenezi 24:35

Uburé Danhib'apito ma tô ĩnhib'apito ma iwẽ si te te tãma 're apisutu. Tahawa, ma tô sisimarĩ pese. Isimizama da, pone'ẽrebâ norĩ hã, pone'ẽrebâ zéré uzé norĩ hã, powawẽ norĩ hã, ẽtẽ waipo prã prata 'manharĩ hã, ẽtẽ waipo pré oru 'manharĩ hã, pawa'âbâ ãna tãma romhuri'wa si'aibâ norĩ hã pawa'âbâ ãna romhuri'wa sipi'õ norĩ hã, awaru ba'õmore norĩ hã, duré awaru po're pore norĩ zama hã ma tô tãma sõmri za'ra.

Zenezi 25:11

Tawamhã Abra'ã dâ'â parimhã, ma tô 'Re ihâimana u'âsi mono hã, i'ra Izaquihi ma, iwẽ hã ma tô te te tãma 're apisutu. Izaqui hã Be'e-La'ai-Ro'i 'ratamhã ma tô 're hâimana.

Zenezi 26:3

Ãme te za tô a'â 're aihâimana mo. Tawamhã wa hã wa za asiré 're ĩhâimana. Wa za duré iwẽ hã te aima 're apisutu u'âsi. Asihudu norĩ ma, wa za ã hã uburé ti'a hã te tãma 're anhomri. Ãhã wamhã, wa za ãma tãma uwaimra, aimama Abra'ãhã ma, ĩnhimiropisudu te tãma i'manharĩzé hã.

Zenezi 26:4

Wa hã wa za pisutu, asihudu norĩ ahâ na 're hâimana za'ra mono da hã, wasi hâiwa na 're isimasa mono ne. Wa za duré uburé ã hã ti'a te tãma 're anhomri. Asihudu norĩ u'âbâmhã, wa za a'uwẽ mono bâ iwẽ hã te tãma 're pisutu za'ra, ro pâ.

Zenezi 27:29

A'uwẽ mono bâ asapari te te aima 're iromhuri za'ra mono da si, iwẽ hã. Duré daro mono bâ da te dasiwi 're i'aiwazé mono da si, iwẽ hã. Duré asisãnawã norĩ nhib'apito na 're i'aihâimana mono da si, iwẽ hã. Duré ana zé're hawi a'uwẽ norĩ hã, asõ'remhã aima 're isiwẽ'ẽ za'ra mono da si, iwẽ hã. Tawamhã duré iwasédé te te aima 're ipisutu za'ra mono norĩ ma hã, 'Re ihâimana u'âsi mono, ta norĩ ma, iwasédé te te tãma 're ipisutu za'ra mono da si, iwẽ hã. Duré iwẽ te te aima 're ipisutu za'ra mono norĩ ma, 'Re ihâimana u'âsi mono, iwẽ te te tãma 're ipisutu za'ra mono da si, iwẽ hã.”

Zenezi 28:14

Asihudu norĩ hã ti'a zapru ropâ 're ihâimana za'ra mono ne, ahâ uptabi na te za 're hâimana za'ra. Ta norĩ te za hâiwa nhimi'e niwĩb ãma ro 're ihâimana mono u hã, hâiwa nhimire niwĩb ãma ro 're ihâimana mono u hã, bâtâ pusizém niwĩb ãma, ro 're ihâimana mono u hã, duré bâtâ zasizém niwĩb ãma ro 're ihâimana mono u hã te te ropé. Tawamhã ai'u'âbâ, asihudu norĩ u'âbâb zama wa za daro mono bâ uburé 're idahâimana za'ra mono norĩ ma hã, iwẽ te dama 're apisutu.

Zenezi 35:11

Tawamhã ãne na zama te duré sina tãma tinha: “Wa hã 'Re ihâimana u'âsi mono, danhipai u pese ĩwaihu'u pese uptabi. Ma'ãpé atébré za, ai'ra ahâ da, duré asihudu ahâ da. Aihawimhã te za a'uwẽ misi ãma isitom na dasipu'u pese na daro mono bâ 're dasitébré. Duré asihudu norĩ 'remhã te za dama 're si'apito za'ra za.

Zenezi 46:3

Tawamhã 'Re ihâimana u'âsi mono, te ãne tãma tinha: — Wa hã 'Re ihâimana u'âsi mono, aimama te, 'Re ihâimana u'âsi mono na 're ĩhâimana mono. Tahawa aipahi ãna ma'ãpé aimorĩ, Ezitu u hã. Tame wa za asihudu norĩ, ahâ uptabi na sitébré da hã tãma pisutu za'ra, a'uwẽ misi ãma isitom na dama siptete na 're hâimana za'ra mono da.

Ezodu 1:7

Tane nherẽ, Izaraéu nhihudu norĩ ma tô Zuzéhé uirĩ na Ezitu ãma 're hâimana za'ra mono ré hã atébré za'ẽtẽ za'ra, ahâ uptabi na. Tahawa, siptete na duré dama simimnhasi na ma tô 're hâimana za'ra. Tahawa daza'rui mono bâ ma tô te te ropé.

Ezodu 32:10

Tahawa, ĩwi hã robzâri tõ. Sada ĩnhiti'ru za'ra zéb zarina wa za uprosi. Tawamhã romhutu'õmhã aihawimhã wa za da'ahâ na apâ dasiré 're idahâimana za'ra mono da hã 'manha.

Roma 4:11

'Re ihâimana u'âsi mono hã, Abra'ã hã te te sina i'umnhasi pese zém na si, ma tô wẽsã, sihâiwata nhizâri õ nherẽ. Tahawa, sihâiwata nhizâri õ ré, Abra'ã hã, 'Re ihâimana u'âsi mono te te iwẽsãmrizém na hã, te wama wasu'u za'ra, tô sena na uburé da te 're iwaihu'u za'ra mono zéb da hã. Tahawa, Abra'ã hã uburé 'Re ihâimana u'âsi mono, da te dasina 're i'umnhasi za'ra mono norĩ hi'rada, ta hã. Duré sihâiwata nhihâri õ nherẽ, 'Re ihâimana u'âsi mono te te 're i'awẽsãmri mono norĩ hi'rada.

Galata 3:14

Ãne ma tô Cristu Zezusi hã wa'awa'âbâ pa. E marĩ da. Simisutu isib'a'uwẽ ãma 're wanomro mono wa, zudeu'õ norĩ ma zama, iwẽ na 'Re ihâimana u'âsi mono te te tãma ãma 're a'uwaimrami mono da, Abra'ãhã ma te te iropisutuzéb zarina, duré wahâiba mono bâ wapẽ'ẽ 're, Tipẽ'ẽzani hã te te wama 're anhomri mono da, te te wama iropisutu za'ra zéb zarina, Zezu Cristu hã Danho'reptui'wa na, wa te wasina 're umnhasi za'ra mono wa.

Galata 3:7

Tawamhã Cristu Danho'reptui'wa na, da te dasina 're umnhasi za'ra mono wamhã, simisutu Abra'ãhã nhihudu na, te za oto te te 're da'anhisi, 'Re ihâimana u'âsi mono hã. Ãne hã wa tô aima waihu'u za'ra wa'wa, waihu'u za'ra wa'aba da asina hã.