Titu 3:3 - ꞌRe Ihâimana Uꞌâsi Mono Zadawa Wasuꞌu

³ Wa norĩ zama hã, Cereta nhihudu norĩ ne, wanhimiza'rese ãna, wa aré tô 're wanomro. Wapo're'õ u'âsi, wa aré 're wahâimana za'ra. Dazadawa nhipese na ma tô da te wama 're rob'rãmi za'ra. Uburé marĩ hã sipu'u pese na, wa tô aré wa te wasima 're wẽ za'ra, iwẽ newa, ãma wama 're robze za'ra mono da hã. Wa tô duré wa te dama 're rob'manharĩ wasété za'ra. Danhimarĩ na da'ruiwapari hã ma tô aré duré wama 're hâimana za'ra duré. Wawasédé hã wa te 're 'manharĩ za'ra mono 'ru te, ma tô aré da te 're wa'ruiwapari za'ra. Wa norĩ wa norĩ zama asa wa te 're da'ruiwapari za'ra aré.

Titu 3:3 ပူးပေါင်းရင်းမြစ်များ

Zenezi 38:9

Tane nherẽ, Onahã ma tãma waihu'u pese di, ihawi za i'ra tãma i'maipodo itei õ na hã. Tahawa tisisãnawãi mrotõ na nasi hâimana mono sidâpâsi, ma tô nasi ti'ai u tihâiba wa'u hã sa'wa, ihawimhã isisãnawã nhihudu hã tãma 'maihâimana tõ da.

Zenezi 39:16

Tawamhã Zuzéhé nhib'ihâ'a, imro iwisizéb u ma tô isi'ubuzé ihâ pa hã sô tihi.

Salmu 36:2

A'uwẽ iwasédé hã te 'râwi tipire na 're si'madâ'â. Te duré sina te te 're rosa'rata, 'Re ihâimana u'âsi mono, iwasédé te te tiwi i'upsibi mei õ na hã za, duré taha zarina za niha te te tãma irob'manharĩ õ na hã.

Provébiu 8:5

Asimirowaihu'u wẽ prã na 're i'aihâimana za'ra wa'aba mono norĩ, ma'ãpé rowaihu iwẽ hã 're waihu'u za'ra wa'aba mono. Duré asimiza'rese ãna 're i'aihâimana za'ra wa'aba mono norĩ, asimiza'rese wẽ zé hã te za oto 're iwaihu'u za'ra wa'aba mo.

Provébiu 9:6

Ma'ãpé, rẽme pese za'ra wa'aba, isimiza'rese'õ norĩ hã, rowẽ na 're i'aihâimana za'ra wa'aba mono zé hã asina uwaimrami za'ra wa'aba da. Da'rãi waihu'u wẽ na 're idanomro mono zém na bâdâdi na si 're anomro aba mono.”

Mateu 21:29

— Tawamhã asa te tãma tinha, i'ra poto'rada hã, ãne: “Te ĩsima rowẽ õ di, ĩmorĩ da hã. Wa za nhamra u'â.” Ãne ma tô timama ma waihu'u asa. Tane nherẽ, te te inharĩzém na ãma ronomro wapsi, ma tô tinhimirosa'rata na ãma saprĩ. Tahawa, ma tô oto mo buru u, te te romhuri da.

Luca 21:8

Tahawa, te Zezusi hã asa tãma nharĩ za'ra, ãne: — Ni'wam norĩ hã te za sadawa nhipese na sisarina datẽme 're nomro, ahâ na. Wa hã newa, te za taré ĩnhisi na dama 're siwasu'u za'ra, danho'reptui'wa na. Taré te za duré te te dama 're rowasu'u za'ra, ãne: “Bâdâ te za oto iwa waptãrã, 'Re ihâimana u'âsi mono te te ipisudu hã.” Ãne te za taré te te dama 're rowasu'u za'ra. Tahawa, te za aihâimana nhimiza'rese tiwi 're aihâimana za'ra wa'aba mo, sadawa nhipese sina datẽme 're inomro mono norĩ ãma, 're sasõmri za'ra wa'aba mono tõ da.

Zuwã 8:34

Tawamhã Zezusi asa te duré tãma nharĩ za'ra, ãne: — Tô sena wa aima waihu'u za'ra wa'wa. Dawasété na si 're idanomro u'âsi mono norĩ hã, tiwasété wi 're wairébé waihu'u mono õ di, pawa'âbâ ãna dama romhuri'wa da, da te dasima 're i'uipra za'ra mono norĩ, ti'madâ'â'wai hawi 're iwairébé waihu'u mono õ ne.

Roma 11:30

Duréihã, aihi'rata norĩ wa'wa hã 'Re ihâimana u'âsi mono nhimiroti hã te te 're wapari za'ra mono ãna, ma tô aré 're hâimana za'ra, zudeu'õ norĩ hã. Tane nherẽ, zudeu norĩ hã 'Re ihâimana u'âsi mono si te te 're sazei pese za'ra mono õ wa, ma tô oto ai'ãma 're pẽ'ẽzé za'ra wa'wa, ai'ãma 're sib'a'uwẽ za'ra wa'aba mono da, zudeu'õ 're aihâimana za'ra wa'aba mono nherẽ.

Roma 6:12

'Râwi marĩ na asima 're irosa'rata wasété za'ra wa'aba mono zé hã 're 'madâ'â za'ra wa'aba mono tõ da, te za aiwasété wi asina 're asiptete za'ra wa'aba mo, aipẽ'ẽ na.

Roma 6:17

Aiwasété na si, ma tô aré 're aihâimana u'âsi za'ra wa'aba mo, 're sahâri waihu'u za'ra wa'aba mono ãna. Tane nherẽ, ãne 're aihâimana za'ra wa'aba mono õ di oto. 'Re ihâimana u'âsi mono te te aima 're iroti za'ra wa'aba mono zép si, te oto 're i'madâ'â pese za'ra wa'aba mo. Tahawa, 'Re ihâimana u'âsi mono ãma si, wa za 're wawata za'ra.

Roma 6:22

Tane nherẽ, 'Re ihâimana u'âsi mono hã tinhiptetezé hã ma tô te te aima 're sõmri za'ra wa'wa oto, aiwasété ãna ãma 're anomro aba mono da oto. Ma tô duré aima si'apito za'ra wa'wa, taha ma si oto 're romhuri za'ra wa'aba mono da. Tahawa, ma tô, tiwi 're asisawi za'ra wa'aba mono ãna, aihâiba hã tãma 're isõmri za'ra wa'aba mo. Taha wa'rãmi te za rowẽ uptabi na i'rata 're aihâimana u'âsi za'ra wa'aba mono zé hã te te aima 're apisutu 'wa oto.

Roma 6:6

Wawasété na 're iwanomro 'rata mono zé hã, tâibâ oto. Cristu hã wedepo'o nhonhi'rãmi na idâ'â siré, ma tô 'Re ihâimana u'âsi mono hã te te wama 're a'uprosi, 're iwanomro 'rata mono zé hã. Marĩ iwasétére si, wa te wasima 're i'ruiwapari u'âsi za'ra mono zém hawi, te te 're wa'anho'reptui mono da, ma tô te te wama 're a'uprosi, 're iwanomro 'rata mono zé hã. Wawasédé hã wa te 're sahâri waihu'u za'ra mono ãna, 're wanomro mono tõ da, ma tô te te wawi 're a'uprosi. Ãne hã wama waihu'u pese za'ra di.

2 Corĩtu 12:20

Ai'ãma 're ĩhâtâ'â za'ra wa'aba mono sina, wa tô ai'ãma te 're rosa'rata u'âsi za'ra wa'wa, za ãma atẽme ĩmorĩ aba na dâ'âsina, duré 're aihâimana za'ra wa'aba mono zém na, za te aiwẽsãmri za'ra wa'aba õ na dâ'âsina. Ãté a norĩ wa'wa hã te za duré asiwi ĩwẽ'õ za'ra wa'wa, za ãma atẽme ĩmorĩ za'ra wa'aba wamhã. Ãté ãhã na hã te 're asisada'âbâ u'âsi za'ra wa'aba mo 'râwi. Ãté te duré marĩ na 're asi'ruiwapari za'ra wa'aba mo. Ãté te duré asisada 're asiti'ru za'ra wa'aba mo. Ãté asi'ãma si te duré 're irosa'rata za'ra wa'aba mo. Ãté te duré asi'ãma 're iwasété za'ra wa'aba mo. Ãté te duré asima 're idabâsi wasété za'ra wa'aba mo. Ãté dama aipire newa, te duré 'râwi 're asi'madâ'â ze za'ra wa'aba mo. Ãté siwa'ru te duré 're aihâimana za'ra wa'aba mo. Ãne na 're aihâimana za'ra wa'aba mono õ'umnhasite, wa ai'ãma te 're romnhimimnhasi u'âsi za'ra wa'wa, wa hã.

Galata 6:3

Ãté ni'wa hã simiroti pire newa, te za 'râwi tinhimiroti pire na 're si'madâ'â ze. Ãne wamhã, 'râwi te za tipẽ'ẽ na sima 're sadawa nhipese.

Colosu 1:21

A norĩ wa'wa hã ma tô aré 'Re ihâimana u'âsi mono nhiti si 're anomro aba mo, aipẽ'ẽ 're wa'aba hã. Asitob'ru na ma tô ãma 're irosa'rata za'ra wa'aba mo aré, aipẽ'ẽ 're marĩ iwasété na si asima 're rosa'rata za'ra wa'aba mono wa. Duré marĩ iwasété si 're 'manharĩ za'ra wa'aba mono wa, ma tô aré isiti 're aihâimana za'ra wa'aba mo.

Colosu 3:7

A norĩ wa'aba zama ma tô aré ãne na 're aihâimana za'ra wa'aba mo, aiwasété si asima 're isawi za'ra wa'aba mono zéb zarina, ãne na aré ãma 're aihâimana za'ra wa'aba mono ré hã.

2 Timotiu 3:13

Iwasété norĩ hã, duré ihâimana nhipese norĩ hã te za 're siwasété pese za'ra. Isadawa nhipese na te za da te ãma 're sasõmri za'ra. Te za duré dapẽ'ẽ 're dasima 're dazadawa nhipese za'ra.

2 Timotiu 3:6

Ta norĩ hã hâimana nhipese na danhorõwa u te za datẽme 're sihutu. Te za duré pi'õ norĩ hã tizadawa nhipese na te te 're 'rãmi za'ra. Tawamhã sib'uwa na 're hâimana za'ra mono wamhã, te za te te ãma 're sasõmri za'ra. Ãhã wamhã, pi'õ norĩ marĩ ahâ na te te 're 'manharĩ wasété za'ra mono wa, te za robzei'õ na 're hâimana za'ra. Siwa'ru te za ta norĩ hã duré 're hâimana za'ra, te te sima 're iwẽ za'ra mono zéb uwaibaba.

Titu 1:16

Ta norĩ hã te 're siwasu'u za'ra, 'Re ihâimana u'âsi mono te te iwaihu'u za'ra na. Tane nherẽ, 're nomro wasété mono wa, tô senai õ di, 're isiwasu'u za'ra mono zé hã. Te te 're ida'ruiwapari za'ra mono zép si, te tãma 're hâimana za'ra. Te duré po're'õ u'âsi hã 're nomro. Marĩ iwẽ hã te te 're 'manharĩ waihu'u za'ra mono õ di, duré ta norĩ hã.

Titu 2:12

Ta hã te te 're wa'azawi pese mono wa, ma tô wama waihu'u, wa te 're rẽme pese za'ra mono da, isazei'õ'wa norĩ hâimanazé hã, dawẽ te, wawasété zô wa te 're rowasutu tõ za'ra mono da, ti'ab ré wasina 're wanhiptete za'ra mono da, 'Re ihâimana u'âsi mono ãma si oto 're wanomro wẽ mono da.

Tiagu 1:26

Ãté ni'wam norĩ hã te za taré te te sina 're rosa'rata za'ra, 'Re ihâimana u'âsi mono nhimiroti 'madâ'â'wa na, tô sena ãma 're nomro mono newa, ta norĩ hã. Tane nherẽ, ãté 'râwi siwi 're simi'rãmi waihu'u za'ra mono õ di za, 're mreme wasété tõ za'ra mono da hã. Ãne wamhã, tô sena 'Re ihâimana u'âsi mono nhimiroti 'madâ'â'wa na 're hâimana za'ra mono õ di za. Taré te za tinhimirosa'rata na 'râwi sima 're sadawa nhipese za'ra.

1 Pedru 1:14

Tahawa, te za 'Re ihâimana u'âsi mono nhimiroti hã 're iwapari pese za'ra wa'aba mo. Isimiroti hã 're waihu'u za'ra wa'aba mono õ ré, ma tô marĩ hã iwasété zô si 're irowasutu za'ra wa'aba mo. Taha zarina 're anomro aba mono õ di za oto.

Apocalipsi 12:9

Tawamhã ho'orã hâiba ne ropoto siwamnarĩ hã ma tô siwi time ti'ai u, apâ morĩ tõ da. Ta hã Satanasi, wanhitob'ru. Ta hã duréihã wahi na isihâiba. Uburé tizadawa nhipese na te te 're ida'a'rãmi mono, 'Re ihâimana u'âsi mono zadawa para newa, ti'ai ãma daro mono bâ. Tawamhã wa'uburé norĩ zama isib'a'uwẽ zama ma tô isiré siwi sãmra ti'ai u, apâ si'aba'ré tõ da.

Apocalipsi 13:14

Ãne 'Re ihâimana u'âsi mono hã ma tô tãma waprosi, â hawi ropoto siwamnarĩ nho'a te te 're romhõsi mono da. Ãne ma tô tinhimiromhõsi na dama 're sadawa nhipese, 'Re ihâimana u'âsi mono zadawa para newa, ti'ai ãma daro mono bâ 're idahâimana za'ra mono norĩ ma hã. Ma tô duré dama ti'ru, romhâiba, da te dasiwi 'manharĩ da, â hawi ropoto siwamnarĩ hâiba na, sib'ézé 'wapa na da te dasiwi wĩrĩ nherẽ, apâ ihâiwa'utu hâiba na.

Apocalipsi 18:2

Tawamhã mreme 'rãihâ na te 'mahâ. Ãne te 'mahâ: — Babilonia hã dahu nho'u dama isa'rese za'ẽne hã ma tô daré ai'utõ. Ma tô uprosi ni. Ahâ uptabi na te oto iwasété norĩ hã iwa 're hâimana za'ra, wa'uburé norĩ hã. Sipahutu norĩ zama, duré si'õmo norĩ zama te oto ahâ uptabi na iwa 're hâimana za'ra, uburé pese si iwasété norĩ hã.