Titu 3:2 - ꞌRe Ihâimana Uꞌâsi Mono Zadawa Wasuꞌu

² Duré te te 're dabâsi wasété za'ra mono õ di za. Te te duré 're dazada'âbâ za'ra mono õ di za. Simizawi pese na si, te za 're hâimana za'ra. Duré waimri na te za uburé dama 're hâimana za'ra, hâimana wẽ na.

Titu 3:2 ပူးပေါင်းရင်းမြစ်များ

Salmu 140:11

Isoto wasété norĩ, ti'ai 'remhã wẽ na siptete na 're hâimana za'ra mono tõ da si, ĩma iwẽ hã. Duré isipãrĩ ze norĩ zarina, ropipa si te te tô 're samarĩ za'ra mono, 're idâ'â za'ra mono zéb u.

Provébiu 19:19

Ni'wa hã ihâimana wa'ro su nimahã na te te robzépata tõ da, pawaptom nherẽ, sisãmri dai õ di. Duré pawaptob zahu nherẽ, isisãmri da hã mare di. Tahawa, ihâimana wa'ro su'u norĩ te te tô 're robzépata za'ra mono.

Provébiu 25:24

Wẽ di, aibâ 'ri upsibi hâpâ zasé're ãma, timro nhiti 're ihâimana mono da hã, imro isimiwati pese me 'ri 're, 're isãmra mono nhipai u.

Mateu 11:29

Wa hã ĩpẽ'ẽ na ĩnhimizawi pese uptabi di. Atãma duré ĩhâimanazé hã. Tahawa, ma'ãpé ĩ'ãma 're sasõmri za'ra wa'aba mono, ĩ'ãma 're waihu'u pese za'ra wa'aba mono da. Tawapsi te za aipẽ i're aima 're simi'wara 'wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 23:5

Tawamhã Paulu te asa tãma nharĩ za'ra, ãne: — E nare ta hã sasedoti dama ipire. Te waihu'u õ di. Te waihu'u 'wa'âhã, te tãma nharĩ õ di aré. 'Re ihâimana u'âsi mono mreme ui'éré 'rata na wa tô ãne hã waihu'u za'ra ni: “Ni'wa hã dama pire wamhã, tãma 're aimreme wasété za'ra wa'aba mono õ di za.” Ãne ma tô wama waihu'u za'ra.

1 Corĩtu 9:19

Wa hã ĩpawa'âbâ ré, 're ĩhâimana mono õ di. Tahawa, ĩwada'uri zarina si, te 're romhuri mono õ di. Tane nherẽ, wa tô ĩsima wẽ, dapawa'âbâ ãna dama romhuri'wa norĩ ne, te dama 're romhuri u'âsi mono da, ĩnhimirowasu'u zarina, Cristu hã da te 're isaze za'ra mono da si, da'ahâ na.

2 Corĩtu 10:1

Ni'wam norĩ hã asiré wa'aba, 're ihâimana za'ra mono norĩ hã te ãne te te sima 're ĩbâsi za'ra: “Paulu hã wa'rata sãmra ré hã, waimri na ihâimana, duré wama za'ra hã isasi õ. Wanhiti romhâ na 're hâimana mono wapsi, te mreme pahi ãna te te wama 're anharĩ, tinhimi'ui'éré na si.” E ãne hã ĩma 're hâimana mono bâ. Mare di. Wa hã Paulu, wa za oto aima ãma roti za'ra wa'wa. Ĩwapari pese za'ra wa'aba za. Cristuhu nhisi na, wa za ãma aima roti za'ra wa'wa ãhã na hã, ta hã simizawi pese wa, duré atãma na 're hâimana u'âsi mono wa. Marĩ da, 're sisapẽtẽ waihu'u mono õ di, ta hã.

2 Corĩtu 12:20

Ai'ãma 're ĩhâtâ'â za'ra wa'aba mono sina, wa tô ai'ãma te 're rosa'rata u'âsi za'ra wa'wa, za ãma atẽme ĩmorĩ aba na dâ'âsina, duré 're aihâimana za'ra wa'aba mono zém na, za te aiwẽsãmri za'ra wa'aba õ na dâ'âsina. Ãté a norĩ wa'wa hã te za duré asiwi ĩwẽ'õ za'ra wa'wa, za ãma atẽme ĩmorĩ za'ra wa'aba wamhã. Ãté ãhã na hã te 're asisada'âbâ u'âsi za'ra wa'aba mo 'râwi. Ãté te duré marĩ na 're asi'ruiwapari za'ra wa'aba mo. Ãté te duré asisada 're asiti'ru za'ra wa'aba mo. Ãté asi'ãma si te duré 're irosa'rata za'ra wa'aba mo. Ãté te duré asi'ãma 're iwasété za'ra wa'aba mo. Ãté te duré asima 're idabâsi wasété za'ra wa'aba mo. Ãté dama aipire newa, te duré 'râwi 're asi'madâ'â ze za'ra wa'aba mo. Ãté siwa'ru te duré 're aihâimana za'ra wa'aba mo. Ãne na 're aihâimana za'ra wa'aba mono õ'umnhasite, wa ai'ãma te 're romnhimimnhasi u'âsi za'ra wa'wa, wa hã.

Galata 5:22

Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.

Galata 6:1

Ĩsisãnawã norĩ, ãne wa za duré aima waihu'u za'ra wa'wa. Ãté ni'wa hã te za tihâimanazém na upa. Tawamhã 'Re ihâimana u'âsi mono pẽ'ẽzani nhimiwada'uri zarina si 're aihâimana za'ra wa'aba mono wamhã, te za aiwaimri 're ipawapto pese za'ra wa'aba mo, apâ 're hâimana wẽ mono da, ni'wa hã. 'Re pawaptob za'ra wa'aba mono wamhã, ma'ãpé 'râwi a'â asina 're asõpré wa'aba mono za, a norĩ wa'aba zama, wa'rui'wa nhimiwada'uri zarina, aihâimanazém na 're upa za'ra wa'aba mono tõ da.

Galata 6:10

Ãne wa, wama iwaihu'u pese zarina, wa za dahâiba mono bâ marĩ iwẽ na, wa te 're dapawaptob za'ra. Wa te 're idapawaptob za'ra mono zém nhipai u, wa za wasiré isazei'wa norĩ hã marĩ iwẽ na 're wasipawapto pese za'ra.

Éfézu 4:2

Ãne te za 're anomro aba mo. Aipire na asina 're asõpré wa'aba mono õ di za. Duré aiwamri aihâimana atãma na te za dama 're aihâimana za'ra wa'aba mo, aihâimana wẽ sina.

Éfézu 4:31

Tahawa, te za oto 're irẽme pese za'ra wa'aba mo, aipẽ'ẽ na 're ida'ruiwapari za'ra wa'aba mono zé hã. Asiti'ru na 're i'aihâimana za'ra wa'aba mono zéb zama te za 're irẽme pese za'ra wa'aba mo, asahi duré 're i'aihâimana za'ra wa'aba mono zéb zama. Aimreme 'rãihâ sina, duré dama 're nharĩ za'ra wa'aba mono õ di za. Da'ãma zama duré 're wasété za'ra wa'aba mono õ di za. Duré dama 're rob'manharĩ wasété za'ra wa'aba mono õ di za oto.

Filipu 4:5

Aiwaimri te za dama 're aihâimana za'ra wa'aba mo, iwẽ na. E marĩ wa. Wanhib'apito hã za we apâ morĩ su'u na dâ'âsina.

1 Tesalonita 2:7

Cristu hã ma tô wazatõrĩ za'ra, iwasu'uwẽ hã wa te dama 're waihu'u za'ra mono da, isadawa para. Tahawa, dama wamreme pire za'ra di. Tane nherẽ, wamreme pire na, wa te duré 're aiwari za'ra wa'aba mono õ wa, wa te ãma aiwi robzei'õ za'ra wa'aba õ di. Mare di. Ãnei õ di, wa te aima i'manharĩ za'ra wa'aba zé hã. Wamreme wẽ na si, wa tô aima rowasu'u za'ra wa'aba ni. Wa tô ai'madâ'â pese za'ra wa'aba ni, dana norĩ hã ti'ra te te 're i'madâ'â pese za'ra mono ne.

1 Timotiu 3:11

Imro zama te za dama 're hâimana wẽ, pi'õ hã. Damreme hã iwẽ'õre na te te dama 're robzanhamri mono õ di za. Hâimana prédup sina te za dama 're hâimana. Tiwasété wi, te za sina 're siptete. Hâimana nhiptete na, te za 're hâimana.

1 Timotiu 3:3

Duré âzézei'wa, 're nomro mono õ di za. Duré da'ahâri zei 'wa, 're hâimana za'ra mono õ di za. Simizawi pese uptabi na, te za dama 're hâimana za'ra. Duré rob'uiprazéb zô si te te sima 're rob'ruiwapari za'ra mono õ di za.

Tiagu 3:17

Hâiwa hawi dahâimanazém na rowaihu'u ré, 're dahâimana za'ra mono wamhã, te za dawasété ãna 're danomro. Roti wẽ na te za da te 're dapawaptob za'ra, rowẽ na dasiré 're dahâimana za'ra mono da. Duré danhimizawi pese na, te za 're danomro. Duré danhimipari pese na, te za 're danomro. Duré te za da'ãma 're dapẽ'ẽzé za'ra. Te za duré dasina 're dapẽ'ẽzé za'ra. Duré marĩ iwẽ na te za 're dasipawaptob za'ra. Duré danhimizawizé hã da te dama 're ba'a za'ra mono õ di za. Duré dahâimana zadawa nhipese na 're dahâimana za'ra mono õ di za.

Tiagu 4:11

Ĩsisãnawã norĩ, asisa're'ra 're asibâsi za'ra wa'aba mono õ di za. Ni'wam norĩ hã tisiré isazei'wai ãma, te te ãma 're wasété za'ra mono wamhã, niha wamhã, te te duré 're wẽ'õ za'ra mono wamhã, tisiré isazei'wai u'âbâ, Wanhib'apito nhimiroti hã 're idasisawi pese za'ra mono zé hã te za te te siwi 're wẽ'õ za'ra. Ãne wamhã, isimiroti te te 're 'madâ'â pese za'ra mono ãna, te za 're nomro.

1 Pedru 2:1

Tahawa, te za aiwasédé hã 're irẽme pese za'ra wa'aba mo, dasi'ruiwapari hã, duré dazadawa nhipe hã, duré dahâimanazé tô senai'õ hã, duré danhimarĩ na danhimi'ruiwapari hã, duré dasima dawasu'u wasédé hã.

1 Pedru 3:10

Duréihã ãne na ma tô 'Re ihâimana u'âsi mono zadawa 'mahârâ'wa hã dama roti: “Aihâiba ré, robzei u'âsi 're anomro aba mono da, asima 're wẽ za'ra wa'aba mono wamhã, aimreme wasété na dama 're nharĩ za'ra wa'aba mono õ di za. Duré dama 're asadawa nhipese za'ra wa'aba mono õ di za.

1 Pedru 3:8

Ĩmreme na wa za oto aima 'rãsutu za'ra wa'wa. Asimirosa'rata wẽ na te za aihĩni 're asisazei pese za'ra wa'aba mo. Duré dapẽ'ẽzé zarina da te 're robzépata za'ra mono wamhã, te za dasiré aipẽ hã 're isépata za'ra wa'aba mo, aipẽ'ẽzé sina. Duré uburé marĩ wẽ na dama 're rowẽ za'ra mono wa, 're dato za'ra mono wamhã, te za duré dasiré 're ato za'ra wa'aba mo. Te za duré 're asisawi pese za'ra wa'aba mo. Asima aipire na 're aihâimana za'ra wa'aba mono õ di za.

1 Pedru 4:4

'Re anomro wasété aba mono zé hã, tâibâ oto. Tahawa, siwa'ru dasiré 're aihâimana za'ra wa'aba mono õ wa, te ai'ãma 're tob'uzu za'ra wa'wa, Wamama nhimiroti waihu'u'õ'wa norĩ hã. Tahawa, 're aihâimana wẽ za'ra wa'aba mono 'ru te, te oto ta norĩ hã taré te te aima 're nharĩ wasété za'ra wa'wa.

2 Pedru 2:10

Dahâimana nhiséb'õ na 're dahâimana za'ra mono wamhã, duré isimiroti hã da te dasiwi 're wẽ'õ za'ra mono wamhã, te za sa'ẽtẽ na da te 're robzépata za'ra, 'Re ihâimana u'âsi mono nhimihâzéb zarina. Senai'õ na rowasu'u'wa norĩ hã, te simipari ãna 're hâimana za'ra. Ta norĩ hã hâiwa ãma romhuri'wa norĩ hã te te 're wazéb za'ra mono õ di. Timreme na te te ãma 're wasété u'âsi za'ra, sina pahi za'ra ãna.

Zuda 1:10

Tane nherẽ, te aibâ iwasété norĩ hã rosa'rada hã uburé tãma iwaihu'u za'ra õ ma, nharĩ wasété za'ra. Robzari norĩ hã rosa'rata ãna siwa'ru 're ihâimana za'ra mono ne, te ta norĩ hã 're hâimana za'ra, simirosa'rata 'wa'rutu na. Taha zarina te za ai'utõ.

Zuda 1:8

Duréihã 're idawasété za'ra mono ne, te ãhã na hã aibâ norĩ hã 're hâimana wasété za'ra, roti tô senai'õ na te te aima 're iroti za'ra wa'aba mono norĩ hã. Ta norĩ hã sõtõ 'rowim ne, marĩ iwasétére hã te te 're i'madâ'â za'ra mono zéb zarina, te tihâiba na 're siwasété za'ra. 'Re ihâimana u'âsi mono nhimiroti hã ma tô duré te te siwi 're wẽ'õ za'ra. Hâiwa ãma 'Re ihâimana u'âsi mono ma, romhuri'wa norĩ ãma, te duré te te 're wasété za'ra, ta norĩ hã. Tanei õ di, Migueu hã hâiwa ãma romhuri'wa norĩ ma ipire hã. Ta hã duréihã ma tô Mozésihi hâiba hã sawi Wa'uburé wi, te te âri tõ da. Tawamhã Migueu aré sada sahi nherẽ, iwasédé hã te te ãma hiri õ di, te te ãma iwasété na hã. Ãne si ma tô tãma waihu'u, Wa'uburé ma: “Wanhib'apito si te za sa'ẽtẽ aima tinha.” Õ hã Wa'uburé aré dama pire na hâiwa ãma romhuri'wa na 're ihâimana mono. Tahawa, te te tô ãma wasété õ di, Migueu hã. Tane nherẽ, te ta norĩ hã hâiwa ãma 'Re ihâimana u'âsi mono ma romhuri'wa norĩ ãma, te te 're wasété za'ra, aibâ iwasété norĩ hã.