Titu 2:5 - ꞌRe Ihâimana Uꞌâsi Mono Zadawa Wasuꞌu

⁵ Te za sina 're siptete za'ra, 're nomro wẽ mono da, i'ra ré norĩ hã. 'Ri 're, romhuri wẽ 'wa te za 're hâimana za'ra. Duré timro mreme te za te te 're 'madâ'â pese za'ra. Tawamhã da te tãma 're nharĩ wasété za'ra mono õ di za, 'Re ihâimana u'âsi mono nhimiroti na oto 're nomro wẽ mono wa, i'ra ré norĩ hã.

Titu 2:5 ပူးပေါင်းရင်းမြစ်များ

Zenezi 18:9

Tawamhã imro zô, te ãne duré siwi sadanha: — E mahãta aimro, Sara hã. — 'Ripara te nhamra. — Ãne te asa tãma wasu'u za'ra.

Zenezi 3:16

Tawamhã pi'õi ma, te duré oto tãma tinha ãne: — 'Re aiwasã mono sidâpâsi sa'ẽtẽ na 're robzépata mono da hã wa za aima pisutu. Tahawa ai'ra aima 're poto za'ra mono wamhã, te za sé uptabi na isé hã 're i'azépata mo. Ãhã nherẽ, te za aimro siré 're aihâimana mono da hã asima 're iwẽ u'âsi mo. Ta hã te za duré asib'apito na hã aima 're hâimana oto.

Provébiu 7:11

Ta hã marĩ na tãma rowazéb ãna mreme 'rãihâ na si 're ihâimana mono, duré õne u'â te te sina 're ida'a'rãiwa'ro zani mono, duré hâiwi si 'ri nhi'riti na 're ine mono.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:36

Tawamhã pi'õ hã Zezusihi nhirã zarina 're imorĩ hã te 're hâimana, Zopi na 'ri nho'õmo nhisi ãma. Tabita na pi'õ nhisi hã. Gregu norĩ nhiminhisizém na Docasi na isisi amo hã. Isibrob'õ norĩ ãma te 're siwãrĩ u'âsi, Docasi hã. Marĩ iwẽ si te te dama 're ab'manharĩ u'âsi.

Zezusihi zadawa wasuꞌuꞌwa norĩ nhimiromhuri na robꞌuiꞌéré 9:39

Tawamhã Pedru te sima wẽ, ime morĩ zahuré da. Tawamhã tamomo wisi wi, ma tô siwi saprõ hâimo, 'ri 're wa'wa u. Tame, uburé pi'õi mrotõ norĩ hã ma tô siwi uirĩ Pedru hã, siwa'õ za'ra sina. 'Ru'ru sina, te nasi zazahâ hã tãma wẽ za'ra, te te 'madâ'â za'ra da, hâiba ré Docasi te te dama 're i'ab'manharĩ mono hã.

Roma 14:16

Ãne hã marĩ hã aima wasété aba õ nherẽ, 're 'manharĩ za'ra wa'aba mono õ di za, da te 're aiwasu'u wasété za'ra wa'aba mono tõ da.

Roma 2:24

Ãne ma tô duréihã ai'ãma rob'ui'éré siromo za'ra wa'wa, 'Re ihâimana u'âsi mono zadawa 'mahârâ 'rata 'wa hã: “A norĩ wa'wa hã zudeu na 're aihâimana za'ra wa'aba mono, 'Re ihâimana u'âsi mono nhimiroti zarina si 're aihâimana za'ra wa'aba mono õ wa, te zudeu'õ norĩ hã 'Re ihâimana u'âsi mono ãma te te 're wasété za'ra.”

1 Corĩtu 11:3

Tane nherẽ, wa ĩsima wẽ, waihu'u za'ra wa'aba da, ãne: Cristu hã uburé aibâ norĩ nhib'apito, te 're hâimana. Duré aibâ norĩ hã uburé timro norĩ nhib'apito, te 're hâimana za'ra. Duré 'Re ihâimana u'âsi mono hã, te Cristuhu nhib'apito na hã 're hâimana.

1 Corĩtu 14:34

Isazei'wa norĩ, asiré 're asi'rã'õtõ aba mono wamhã, pi'õ norĩ hã te za ari'iwi dame 're si'ubumro, 're iwahâimana za'ra mono zéb zarina. Timro norĩ zapari, te za tô 're hâimana za'ra pi'õ norĩ hã, duréihã 'Re ihâimana u'âsi mono nhimiroti na, Mozési ãne na te te ãma irob'ui'érézéb zarina. Tahawa, asiré 're asi'rã'õtõ aba mono wamhã, pi'õ norĩ hã te te sima 're robzanhamri za'ra mono õ di za, timreme na asima 're rowasu'u za'ra wa'aba mono ré, te te 're ro'wa'rutu tõ za'ra mono da.

Éfézu 5:33

Aima za'ra wa'aba zama, te rowasu'u hã 're hâimana, ãma 're i'aihâimana za'ra wa'aba mono zéb da hã oto. Tahawa, aibâ norĩ, te za aimro 're isawi pese za'ra wa'aba mo. 'Re isawi pese za'ra wa'aba mono zéb zarina, marĩ iwẽ zô asima 're asõpré wa'aba mono ne, te za duré aimro ma zama 're asõpré wa'aba mo, iwẽ zô hã. Duré pi'õ norĩ, aimro hã te za 're iwazéb za'ra wa'aba mo.

Colosu 3:18

Pi'õ norĩ, aimro nhimiroti hã te za 're iwapari pese za'ra wa'aba mo, Cristuhu zazei'wa tô sena ãma 're ihâimana za'ra mono zéb zarina.

1 Timotiu 6:1

Iwada'uri zarina si, pawa'âbâ ãna dama romhuri'wa norĩ hã te za ti'madâ'â'wa hã isimiroti na te te 're wazéb za'ra. Ãne 're hâimana za'ra mono õ wamhã, ãté te za 'Re ihâimana u'âsi mono nhisi na da te ãma 're wasété za'ra. Ãté wa'ãma zama te za duré da te 're wasété za'ra, isazei'wa norĩ ma, wa te 're roti wasété za'ra mono newa.