Titu 2:2 - ꞌRe Ihâimana Uꞌâsi Mono Zadawa Wasuꞌu

² Aibâ ihi norĩ ma, te za 're i'aroti mo, hâimana prédup sina 're hâimana za'ra mono da, duré tiwasété wi sina 're siptete za'ra mono sina, 're hâimana za'ra mono da. Wanhib'apito nhimiroti si te za duré te te 're sazei pese za'ra, ta hã tô sena wa. Te za duré te te 're dazawi pese za'ra. Marĩ hã sada 're hâimana za'ra mono nherẽ, Wanhib'apito ãma si te za 're nomro wẽ u'âsi.

Titu 2:2 ပူးပေါင်းရင်းမြစ်များ

Provébiu 16:31

Sena na i'uwaibaba na 're ihâimana za'ra mono norĩ hã te za 're ihâimana hâ za'ra mono zé hã te te sina 're sõ'õtõ za'ra. Tahawa te isi'a zarob'a hã danhoprezé iwẽ uptabi na hã tãma 're hâimana za'ra.

Marcu 5:15

Tawamhã Zezusihi u dasihutu wamhã, ma tô aibâ hã 'madâ'â za'ra ni, wa'uburé norĩ ré aré 're imorĩ hã. Uza ré, te oto nhamra, rowẽ na. Tawamhã ma tô tãma tapahi za'ra ni, õne hã dama sa'rese za'ra õ wa.

Luca 8:35

Tawamhã isimirowasu'u hã da te wapari za'ra wamhã, te itẽme ai'aba'ré ni, da te sabu za'ra da. Zezusihi u dasihutu wamhã, ma tô aibâ hã 'madâ'â za'ra ni, wa'uburé ihawi iwairébé hã. Uza ré, te oto nhamra Zezusihi papara, rowẽ na. Tawamhã tãma rowẽ wa, ma tô tãma tipahi za'ra, dama 're irowẽ za'ra mono zé hã tãma sa'rese za'ra õ wa.

Zezusihi zadawa wasuꞌuꞌwa norĩ nhimiromhuri na robꞌuiꞌéré 24:25

Iwẽ na si 're idanomro mono zém na ma tô tãma rowasu'u, marĩ hã iwasédé hã da te dasiwi iwẽ'õzém na zama. 'Re danomro wasété mono wa, rob'rãsutu u 'Re ihâimana u'âsi mono, za niha te te dama irob'manharĩ pipa zém na ma tô duré tãma rowasu'u. Ãne hã te te tãma awasu'u wa, ma tô apito Peresi hã tipahi. Tahawa, te tãma tinha, ãne Pauluhu ma: — Ãhã na te za aimo a'â. Niwa te ĩsima wẽ wapsi, wa za duré ãma asô hâ apâ, te aiwapari da.

Roma 12:3

'Re ihâimana u'âsi mono hã tinhimizawi pese zéb zarina, ma tô ĩpisutu, isadawa wasu'u'wa na oto 're ĩhâimana mono da. Tahawa, wa za oto ãne na aima roti pese za'ra wa'wa. Dama aipire na, duré dama aiwẽ na 're aihâimana za'ra wa'aba mono õ nherẽ, 'râwi aipire na 're asi'madâ'â za'ra wa'aba mono õ di za. 'Re ihâimana u'âsi mono, ma tô te te sima 're aipisutu za'ra wa'wa, õhõ ãma si oto 're anomro aba mono da. Tane nherẽ, aihĩni isazei'wa, asiré 're anomro aba mono nherẽ, ni'wam norĩ si te isazei pese 'wa hã 're hâimana za'ra. Duré ni'wam norĩ hã isazei prãi 'wa, te 're hâimana za'ra. Isazei prãi 'wa norĩ hã 're sazei pese za'ra wa'aba mono newa, 'râwi asi'ãma 're rosa'rata za'ra wa'aba mono õ di za, 're sazei pese za'ra wa'aba mono õ nherẽ.

1 Corĩtu 15:34

Ni'wam norĩ hã asiré 're ihâimana za'ra wa'aba mono norĩ hã 'Re ihâimana u'âsi mono hã 'râwi te te 're waihu'u za'ra mono õ di. E ãne na 're siséb za'ra mono ãna. Asimiza'rese ãna 're aihâimana za'ra wa'aba mono zém hawi, te za oto aipizari za'ra wa'wa, aiwasédé hã rẽme pese za'ra wa'aba da, aiwẽ uptabi na si 're anomro aba mono da oto.

1 Corĩtu 9:25

Ni'wa hã dawara na dame hâimana da, te te sima wẽ wamhã, te za nasi sihâiba wairo, dazada sihâiba wapu da. Tawamhã dawi watobro wamhã, ropsu 'manharĩ na te za ãma sõpre ni, te te da'mairẽme wẽ te. Tane nherẽ, te za tiwi tiwasété su'u, ropsu 'manharĩ hã. Tanei õ di, wa norĩ hã. Isi'utõrĩ'õ zô si, wa za Cristuhu ãma si wasina 're wanhiptete u'âsi za'ra, 'Re ihâimana u'âsi mono, marĩ iwẽ uptabi hã te te wama 're i'apisutu mono zô si.

Galata 5:23

Duré dawaimri te za dama 're dahâimana za'ra. Duré dawasété wi, dasina 're danhiptete za'ra mono sina, te za 're dahâimana za'ra. Ãne 're dahâimana za'ra mono tõ da, 'Re ihâimana u'âsi mono nhimiroti hã baba uptabi di.

Filipu 4:8

Ĩsisãnawã norĩ, ĩnhimiroti na wa za oto ãma aima 'rãsutu za'ra wa'wa, ãhã na te ãma aipo're pu'u za'ra wa'aba zém na hã. Uburé marĩ hã tô sena 're ihâimana za'ra mono na si te za asima 're irosa'rata za'ra wa'aba mo, duré marĩ hã da te dasima 're iwazéb za'ra mono na hã, duré uburé marĩ hã 'Re ihâimana u'âsi mono ma iwẽ uptabi na hã, duré marĩ hã wasété ãna 're ihâimana za'ra mono na hã, duré uburé marĩ iwẽ hã da te 're isawi pese za'ra mono na hã, duré uburé marĩ hã wẽ wa, ãma 're idatob'uzu za'ra mono na hã. Ãne na si te za uburé marĩ iwẽ uptabi na asima 're irosa'rata za'ra wa'aba mo, da te dasima 're iwasu'u wẽ za'ra mono na si.

1 Tesalonita 5:6

Tahawa, 're idanhotõ za'ra mono ne, wanhimiza'rese ãna 're wahâimana za'ra mono tõ da, wa za sô 're wanhopré u'âsi.

1 Tesalonita 5:8

Tazahã, wa norĩ hã Wanhib'apito apâ we imorĩzéb zô, 're wanhimipari za'ra mono wa, wanhimi'ẽ na sô 're wanhopré mono sina, wa za 're wahâimana za'ra. Tawamhã wa za wasi'upari za'ra ni za, wanhitob'rui wi, Wanhib'apito wa te 're isaze za'ra mono zém na, duré 're iwanhimizawi pese za'ra mono zém na, duré Zezusi te te 're iwanho'reptu za'ra mono zéb zô, 're iwanhimipari za'ra mono zém na. Da'wapéi'wa norĩ hã, tinho'utu'u ihâtete na te 're si'uza za'ra. Te duré ti'rãzaza ihâ tete na 're si'rãzaza za'ra, tinhitob'rui wi, da te 'manhiptâ'â tõ da. Ãne na wa norĩ hã, Wanhib'apito wa te 're isaze za'ra mono zém na, duré 're wanhimizawi pese za'ra mono zém na, wa za 're wahâimana za'ra, wapẽ'ẽ wẽ te te wawi wasété tõ da, wanhitob'ru hã. Duré Zezusi te te 're iwanho'reptu za'ra mono zéb zô, 're iwanhimipari za'ra mono zém na, wa za 're wahâimana za'ra, wanhimirosa'rata na te te wawi 're ro'wa'rutu tõ za'ra mono da.

1 Timotiu 1:14

Wanhib'apito hã tinhimizawi pese zém na ma tô ĩpawapto pese, te saze da, duré dazawizéb da hã, ĩma hâimana da. Aihĩni Cristu Zezusihi ãma 're ihâimana za'ra mono norĩ hã te te 're ipawaptob za'ra mono ne, ma tô ĩpawapto duré.

1 Timotiu 1:5

E marĩ da, wa tô ãne hã aima waihu'u. Wa tô ĩsima aiwẽ, isazei'wa norĩ hã 're pawaptob za'ra mono wa, Wamama zawi pese 'wa, duré dazawi pese 'wa 're nomro mono da hã. Isazei'wa norĩ hã simirosa'rata wẽ ré si, te za 're nomro. Ãne wamhã, marĩ te te 're i'manharĩ wasété za'ra mono na, 'râwi 're siwẽ'õ za'ra mono õ di za. Wanhib'apito zazei uptabi 'wa, te za 're nomro. Tawamhã te aima iwaihu'uzéb zarina 're nomro mono wamhã, te za tô dasisawizé hã ipẽ'ẽ 're tãma 're hâimana za'ra.

1 Timotiu 3:11

Imro zama te za dama 're hâimana wẽ, pi'õ hã. Damreme hã iwẽ'õre na te te dama 're robzanhamri mono õ di za. Hâimana prédup sina te za dama 're hâimana. Tiwasété wi, te za sina 're siptete. Hâimana nhiptete na, te za 're hâimana.

1 Timotiu 3:2

Isazei'wa norĩ 'madâ'â'wai mono bâ, te za 're hâimana wẽ za'ra. Tawamhã iwasédé hã da te ãma 're isa'ra mono da hã, mare di. Timro uptabi si te za duré te te sima 're 'madâ'â za'ra, misi haré. Hâimana prédum na te za duré dama 're hâimana za'ra. Tiwasété wi te za sina 're siptete u'âsi za'ra, 're nomro wẽ mono da. Te za duré dama 're hâimana wẽ za'ra. Duré itẽme 're dasihutu mono wamhã, te za te te 're da'mazasi su'u za'ra. Duré roti na rowaihu hã te za tãma 're hâimana za'ra, te te ãma 're idapawaptob za'ra mono zéb da hã.

1 Timotiu 3:4

Isõrõwa 're, 're ihâimana za'ra mono norĩ, te za duré te te 're 'madâ'â pese za'ra, timama mreme si te te 're wapari pese za'ra mono da, timama hã isimiroti na te te 're wazéb za'ra mono da.

1 Timotiu 3:8

Dapawapto'wai mono bâ te za 're hâimana wẽ za'ra. Duré âzézei'wa na 're hâimana za'ra mono õ di za. Rob'uiprazéb zô si mreme si'ahâ na 're hâimana za'ra mono õ di za.

1 Timotiu 5:1

Ãté aibâ ihâiba prédu hã te za tihâimanazém na 'mai'upa. Ãhã wamhã, aimreme ipire na tãma hã nharĩ õ di za. Aimama ma, aimreme wẽ na 're inharĩ mono ne, te za duré aimreme wẽ na hã 're ipawapto mo, 're morĩ wẽ da oto apâ. Duré ipréduptém norĩ hã te za aimreme wẽ na 're i'apawapto mo, aimreme wẽ na ano norĩ hã 're i'apawapto mono ne.

Titu 1:13

Isimirowasu'u hã tô sena. Tahawa, aimreme pire na te za isazei'wa norĩ ma 're i'aroti mo, Wanhib'apito nhimiroti si te te 're sazei pese za'ra mono da, robze sina ãma 're hâimana za'ra mono da.

Titu 1:8

Te za duré te te 're da'mazasi su'u za'ra. Duré 're nomro wẽ mono da si, te za te te sina 're rosa'rata u'âsi za'ra. Duré hâimana prédup si na, te za 're hâimana za'ra. Te za duré dama 're hâimana wẽ za'ra. 'Re ihâimana u'âsi mono ãma si te za 're nomro wẽ. Duré tihâiba na te za sina 're siptete za'ra, 're nomro wẽ mono da.

Titu 2:7

A hã aihâimana wẽ na, te za dama ãma 're asanho mo, asirã zarina si 're danomro wẽ mono da. Dama 're rowahutu mono wamhã, aimreme tô sena na si, te za duré dama 're irowahutu mo.

Filemo 1:9

Ĩma asawi pese wa, wa hã Paulu, dazazéb 're ĩnhamra nherẽ, Cristu Zezusihi zadawa wasu'u'wai wa, wa za taré aiwi rowaptẽ, asi'uihâ na si marĩ hã 'manharĩ da.

1 Pedru 1:13

Zezu Cristu hã nimahã na te za wei mo apâ. Tahawa, te za aihâimana nhimiza'rese 're aihâimana za'ra wa'aba mo. Aihâiba na te za 'râwi 're asi'madâ'â za'ra wa'aba mo. Zezu Cristu hã apâ wei morĩ wapsi, te za aima 're irowẽ za'ra wa'aba mono zé hã aima pisutu za'ra wa'wa, hâiwa ãma. Taha zô si te za asina 're asimipari u'âsi za'ra wa'aba mo.

1 Pedru 4:7

Ro isi'utõrĩzéb u hã, romhuture di oto. Tahawa, te za aihâiba na asina 're asiptete za'ra wa'aba mo. Duré aihâimana nhimiza'rese te za 're aihâimana za'ra wa'aba mo, 'Re ihâimana u'âsi mono ma, 're aimreme zusi u'âsi aba mono da.

1 Pedru 5:8

Ma'ãpé, aihâimana nhimiza'rese sina 're aihâimana za'ra wa'aba mono. Duré 're asi'madâ'â pese za'ra wa'aba mono. E marĩ wa. Da'rui'wa hã datẽme 're morĩ wa, wa'uburé norĩ nhib'apito hã. Hu'u zéré pa hã wairõ sina, tisa zô 're inomro mono ne, te ta hã datẽme 're morĩ u'â, Wanhib'apito si da te dasina 're i'madâ'â u'âsi za'ra mono zé hã te te dawi 're a'uprosi mono da.