Hâiwa ãma romhuri'wa uburé marĩ iwasété wi te te 're ĩpawapto mono 'wa hã, ã hã 'watébrémi norĩ iwẽ na te te 're ipawapto zahuré mono da si, ĩma iwẽ hã. Ĩnhisi na duré ĩmama norĩ Abra'ãhã nhisi na Izaquihi nhisi me ã norĩ hâiba u'âbâmhã ãma 're idasipo're pu'u u'âsi za'ra mono da si, ĩma iwẽ hã. Duré i'ra norĩ isihudu norĩ zama daro mono bâ isitébré za'ẽtẽ za'ra mono da hã wa aiwi waptẽ.”
Titu 2:14 - ꞌRe Ihâimana Uꞌâsi Mono Zadawa Wasuꞌu14 Ta hã ma tô wazada sisõmri za'ra, wazada dâ'â za'ra da, 're iwanomro wasété mono hawi, te te 're wa'anho'reptui mono da, isib'a'uwẽ si 're wahâimana za'ra mono da oto. E marĩ da. Sena na 're wanomro mono da, duré wawa'a ãna iwẽ na si wa te oto 're dapawaptob za'ra mono da. အခန်းကိုကြည့်ပါ။ |
Titu 2:14
54 ပူးပေါင်းရင်းမြစ်များ
Tawamhã ipahi uptabi za'ra hã ma tô iwap sisisi. Tawamhã duré ta norĩ aiwaihu'u pese na tãma irob'manharĩ za'ra zé te te 'madâ'â za'ra wamhã, ma tô ẽtẽ ne rési ãna simizahâri za'ra haré aimasa, asib'a'uwẽ norĩ te te a'â iro'rahâri za'ra zéb u, pawa'âbâ ãna te te 're iromhuri za'ra mono isõ'reptu za'ra hã.
Wei morĩ wapsi, te za da'ãma aipo'o. Amnho trigu, da te 're upõrĩ za'ra mono parimhã, te za da te 're sa'wari za'ra, isa'warizéb 're. Tawamhã itomhâ na te za da te ãma 're ro'o za'ra. Iro hã sa'ẽtẽ nherẽ, da te wĩrĩ waihu'u õ di za. Tane ĩma ipire hã wei morĩ wapsi, te za da'ãma aipo'o, trigu upõrĩ za'wari ne, duré itomhâ za'wari ne.
Tahawa, te za 're asi'madâ'â pese za'ra wa'aba mo, 're anomro wẽ wa'aba mono da. Duré isazei'wa norĩ hã te za 're i'madâ'â pese za'ra wa'aba mo, siré 're isi'rã'õtõ mono norĩ hã. 'Re ihâimana u'âsi mono pẽ'ẽzani hã ma tô sima aipisutu za'ra wa'wa, isazei'wa norĩ hã tãma 're 'madâ'â za'ra wa'aba mono da. Ti'ra wapru na ma tô isazei'wa norĩ hã wa'â, tite da. Tahawa, pone'ẽrebâ 'madâ'â'wa norĩ ne, te za 're ida'madâ'â pese za'ra wa'aba mo, 'Re ihâimana u'âsi mono nhib'a'uwẽ norĩ hã.
Wanhib'apito 'Re ihâimana u'âsi mono te te tãma iwẽzéb uwaibaba, ma tô Zezu Cristu hã wazada sisõ, wazada dâ'â da, te te wa'awa'âbâ da, 're wanomro wasété mono wa, 'Re ihâimana u'âsi mono te te wahâ za'ra tõ da, rob'rãsutuzéb ãma hã, duré dapo're'õ na 're idanomro mono norĩ ne, 're wanomro u'âsi tõ mono da.
Wa norĩ hã wa te dame wasina tãma ãma 're uwaimrami za'ra mono õ di, 'Re ihâimana u'âsi mono nhimiroti mono hã. Tahawa, te aré duré te te siwi 're wa'awẽ'õ, 'Re ihâimana u'âsi mono hã. Tawapsi hã te aré duré wahâ za'ra, wawasété za'ra 'ru te. Tane nherẽ, te te 're wahâ za'ra mono tõ da, ma tô Cristu hã wẽ nherẽ, wazada sisõ, wa'upana 'Re ihâimana u'âsi mono te te azâri da. Taha na ma tô wa'awa'â, Cristu hã. Duréihã ma tô ãne na ãma rob'ui'éré ni: “Ni'wa hã wasété uptabi wa, te za dasiwi wĩrĩ ni. Taha pari, wede na te za dasiwi sasõmri ni, da te ãma waihu'u za'ra da, wasété uptabi wa, 'Re ihâimana u'âsi mono ma iwẽ õ na.” Tawamhã ãma irob'ui'érézéb zarina, Cristu hã wẽ nherẽ, wedepo'o nhonhi'rãmi na sa'o ré, ma tô siwi wẽ'õ, 'Re ihâimana u'âsi mono hã. Wa'upana ma tô azâ, wasété õ nherẽ.
'Re ihâimana u'âsi mono hã marĩ na te te sima 're aroti mono wamhã, te za tô te te ãma 're a'uwaimrami. Ta hã ma tô wa'apisutu siro, isib'a'uwẽ 're wanomro mono da, Cristuhu ãma za 're wanomro mono wa. Ãne duréihã te te wa'ãma sima irotizéb zarina, ma tô wa'ãma uwaimrami za'ra, danho'reptui'wa zô 're iwanhimipari 'rata za'ra mono norĩ ma, ãma 're iwawata u'âsi za'ra mono zéb da hã.
Cristu te te 're iwa'azawi pese mono zéb zarina, te za oto 're idazawi pese za'ra wa'aba mo. Ta hã te te 're wa'azawi pese mono wa, ma tô sisawi ãna, wazada za'ra hã sisõ, dâ'â da. Tahawa, 'Re ihâimana u'âsi mono ma 're idanhoprub za'ra mono zéb zarina, sisawi ãna sisõmri wa, Wamama ma wẽ uptabi di, wazada idâ'âzé hã.
Õhõ si te oto Timama hã iwẽ uptabi na te te dama 're wasu'u, rowa'a isa'ẽtẽ ré na hã. Taha si te Timama ne 're hâimana, aiwa wa. Tinhimiroti nhiptete na te uburé marĩ hã te te 're a'upari wẽ, 're si'utõrĩ tõ za'ra mono da. Õhõ si dawasédé hã te te dama 're apari mono da, dazada dâ'â wa, taha pari hâiwa'utu wa, te oto 'Re ihâimana u'âsi mono nhimire niwĩ 're sãmra hâiwa ãma, danhipai u iwaihu'u pese uptabi nhimire niwĩ, isiré te te 're da'ab'madâ'â mono da oto, pire uptabi na.
Ãne hã duréihã danhimizama wapru na dahâiba mana wawi marĩ na 're idasihâiba wasété za'ra mono parizéb da hã, wẽ nherẽ, taha nhipai u, Cristuhu wapru si siptete uptabi di, dawasété parizéb da hã oto. E marĩ wa. Taha si wasété ãna 're hâimana u'âsi mono wa. Tahawa, 'Re ihâimana u'âsi mono pẽ'ẽzani waihu'u pese zarina ma tô wazada sisõmri za'ra 'Re ihâimana u'âsi mono ma, wazada za'ra dâ'â da, tiwapru na te te 're wa'a'upsõi mono da, wapẽ'ẽ 're wadâ'â u'âsi ne 're iwanomro mono zéb zarina, wawasété si wa te 're 'manharĩ za'ra mono wa, 'râwi 're iwasiwẽ'õ u'âsi za'ra mono zé hã te te oto wama 're apari mono da. Taha zarina, wa za oto 'Re ihâimana u'âsi mono ma si, wa te 're romhuri za'ra, wawẽ na wahâimanazém na wa te oto 're upa za'ra mono ãna.
Ma'ãpé Wamama u asimirosa'rata na 're aihutu aba mono. Tawamhã õ hã te za duré 'râwi atẽme 're simasisi 'wa. Ipo're'õ norĩ, asib'rata u're wa, 're asimisõ za'ra wa'aba mono ne, te za 'râwi aipẽ'ẽ na aiwasété na 're asiwẽ'õ za'ra wa'aba mo, aiwẽ na 're anomro aba mono da oto. Wamama ãma tô sena 're aihâimana za'ra wa'aba mono newa, tazahã tô sena ãma 're aihâimana za'ra wa'aba mono õ di. Tahawa, ma'ãpé aihâimana wasété wi 're aipizari za'ra wa'aba mono, aihâimana wẽ na ãma 're aihâimana za'ra wa'aba mono da.
A norĩ wa'wa hã ma tô iwaihu'u za'ra wa'wa, aiwa'âbâ za'ra wa'aba zé hã. Cristu hã ma tô aiwa'âbâ za'ra wa'wa, tarére na 're i'aihâimana za'ra wa'aba mono zém hawi, te te 're asõ'reptu za'ra wa'aba mono da, aihi'rata norĩ ne, 're aihâimana za'ra wa'aba mono tõ da oto. E ẽtẽ waipo pré oru na, duré e ẽtẽ waipo prã prata na ma tô ai'awa'âbâ 'wa. Taha na te te ai'awa'âbâ aba õ di. E marĩ wa. Ta norĩ hã wẽ u'âsi 're hâimana za'ra mono õ wa. Tahawa taha na te te aiwa'âbâ za'ra wa'aba õ di.
Wanhib'apito nhimiroti hã, tô sena. A norĩ wa'wa hã ma tô isimiroti hã 're iwapari pese za'ra wa'aba mo. Tahawa, marĩ iwasété na asima 're rosa'rata za'ra wa'aba mono õ di oto. Aiwẽ na 're anomro aba mono da si, te oto asima 're irosa'rata za'ra wa'aba mo. Dazawizé hã tô sena te oto aima 're hâimana za'ra wa'wa, asiré Wanhib'apito zazei'wa norĩ ãma. Tahawa, te za õne u'âsi 're asisawi pese za'ra wa'aba mo.
A norĩ wa'wa hã Wanhib'apito zazei'õ'wa norĩ wazari, te 're aihâimana za'ra wa'aba mo. Tahawa, te za aihâimana wẽ na si dama 're aihâimana za'ra wa'aba mo. Tawamhã aihâimana wasété na, taré da te aima 're nharĩ za'ra wa'aba mono nherẽ, te za da te 're aiwaihu'u za'ra wa'wa, dama 're aihâimana wẽ za'ra wa'aba mono zém na. Tawamhã Cristu hã apâ wei morĩ wapsi, te za 'Re ihâimana u'âsi mono ãma tawata za'ra ni, isimiroti zarina aihâimana wẽ na, dama 're aihâimana za'ra wa'aba mono wa.
Tanei õ di, a norĩ wa'wa hã. 'Re ihâimana u'âsi mono, ma tô sima aipisutu za'ra wa'wa, isib'a'uwẽ si oto tãma 're anomro aba mono da. Sasedoti norĩ hã te te sima 're i'apisutu mono ne, te oto a norĩ wa'wa hã uburé Danhib'apito ma romhuri'wa, 're anomro aba mo, õhõ ãma si 're anomro aba mono da, ite da. Ta hã robra hawi ma tô rowa'a u sitẽme asô tihârâ za'ra wa'wa, 're anomro wasété aba mono zém hawi, rowẽ uptabi na si 're anomro aba mono da oto. Taha wasu'u na, tiwaihu'u pese na te te aima ãma 're i'uwaimrami wẽ za'ra wa'aba mono zém na, ma tô sima aipisutu za'ra wa'wa, ãma 're dapo're pu'u u'âsi za'ra wa'aba mono da.
Misi haré ma tô Cristu hã dazada dârâ, 're idahâimana wasété za'ra mono hawi, te te 're da'anho'reptui mono da. 'Re imorĩ wẽ uptabi hã ma tô dârâ, 're idanomro wasété mono norĩ da, te te 're wa'anhimroi mono da, 'Re ihâimana u'âsi mono u. Cristu hã dâ'â uptabi nherẽ, ma tô Imama hã hâiwa'utu, apâ 're hâimana u'âsi mono da.
Tane nherẽ, 'Re ihâimana u'âsi mono nhimiroti zarina 're wahâimana za'ra mono wamhã, rowa'a na 're ihâimana mono ne, wa za duré wa norĩ hã rowa'a na 're wahâimana za'ra. Taha zarina, wa za duré 'râwi wasiré ãma 're wahâimana za'ra, wasisawi pese za'ra sina. 'Re ihâimana u'âsi mono 'ra hã te za duré wawasédé hã te te wama 're apari tidâ'âzém na Zezusi hã, wawasété ãna oto ãma 're wanomro mono da.
Tane nherẽ, wawasédé hã wa te 're i'manharĩ za'ra mono na 'Re ihâimana u'âsi mono ma, 'râwi 're wasiwẽ'õ za'ra mono wamhã, te te dama 're i'aropisutu mono zéb zarina, te za te te wama ãma 're a'uwaimrami, te te wama ãma 're a'upai mono ãna. Tãma 're iwasiwasu'u za'ra mono zéb zarina, wawasédé hã wa te 're i'manharĩ za'ra mono hã te te wa'ãma 're ab'madâ'â mono õ di za oto. Te za tô te te wama 're apari, wawasédé hã.
Ĩsisãnawã norĩ, ĩma asawi pese za'ra wa'aba norĩ hã, 'Re ihâimana u'âsi mono 'ra, wa oto 're wahâimana za'ra. Tane nherẽ, za 're iwahâimana za'ra mono zéb da hã, zahadu wama waihu'u prã za'ra di. Cristu hã apâ wei wazô morĩ wamhã, isine wa za oto 're wahâimana za'ra. Ãhã si wama waihu'u pese za'ra di. E marĩ wa, wa za isine 're wahâimana za'ra. Tô sena Cristu hã 're ihâimana mono zém na 'râwi wa te oto wasiwi 're waihu'u za'ra mono wa, wa za oto tô isine 're wahâimana za'ra.
Zezu Cristuhu zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã dama i'umnha, te simi'ẽ na 're hâimana, 'Re ihâimana u'âsi mono zadawa wasu'uwẽ 'wa da hã. Ta hã ma tô dawana tihâiwa'utu 'rata, ihâiba si'utõrĩ waihu'u õ na. Uburé ti'ai ãma danhib'apito norĩ nhipai u, Zezusi hã te 're hâimana. Misi Danhib'apito uptabi na, te tô 're hâimana. Ta hã te te 're wa'azawi pese. Tahawa, ma tô wazada dârâ. Wazada dâ'â wamhã, iwapru ma tiwi puru. Tawamhã wawasété na 're wanomro mono ré, ma tô tiwapru na tidâ'âzém na te te 're wa'a'upsõ, wawasété ãna ãma 're wanomro mono da oto.
Tawamhã ta norĩ hã te Pone'ẽrebâi ma tinho're za'ra, tinho're itém na. Ãne te tãma tinho're za'ra: “A hã ma tô dasiwi aiwĩrĩ ni. Ma tô dazada hã atâ. Dazada atâ'âzém na ma tô ida'awa'â, dawasédé hã dama 're apari mono da ãma, 'Re ihâimana u'âsi mono nhib'a'uwẽ oto 're danomro mono da. Dapoto mono bâ a hã ma tô ida'awa'â, damreme sipo'o mono bâ 're idahâimana za'ra mono hã. Danhipai u aiwẽ uptabi di, a hã. Aiwaihu'u pese uptabi di duré. Tahawa, te aiwétési sada hã aihâiba, ibaihâ isinhai ré i'âri da hã, duré i'uptobzé hã aprub da.
ကြော်ငြာတွေ