Tiagu 5:9 - ꞌRe Ihâimana Uꞌâsi Mono Zadawa Wasuꞌu

⁹ Ĩsisãnawã norĩ, asima 're aiwapsari za'ra wa'aba mono õ di za, 'Re ihâimana u'âsi mono hã aiwasédé hã te te ai'ãma 're sa'ra za'ra wa'aba mono tõ da. Dahâimanazéb zarina da'ãma rowairébé'wa hã we imorĩzéb u hã romhuture di oto. Ãne wa, asima 're aiwapsari za'ra wa'aba mono õ di za.

Tiagu 5:9 ပူးပေါင်းရင်းမြစ်များ

Zenezi 4:7

Tô i'uwaibaba na a hã 'manharĩ 'wa'âhã, te aré 're aihâ mo, rowẽ te. Tane nherẽ, ma tô asiwasé, a hã. Tahawa te i'aiwasétézé hã 'ridawa ãma asô mapa. Ta hã te sima wẽ, siptete na asada 're hâimana mono da. Tane nherẽ, te za a hã asiptete na ãma ai'uté da sada asipte.

Mateu 24:33

Tane duré, marĩ hã 're iromhâimana mono zéb da, te aima iwasu'u za'ra wa'aba zéb zarina, 'madâ'â za'ra wa'aba wamhã, te za iwaihu'u za'ra wa'wa, rob'rãsutuzé hã za oto iwatobro na hã.

Marcu 13:29

Tane duré, marĩ hã 're iromhâimana mono zéb da, te aima iwasu'u za'ra wa'aba zéb zarina, 'madâ'â za'ra wa'aba wamhã, te za ãma iwaihu'u za'ra wa'wa, rob'rãsudu hã za oto iwatobro na hã.

Marcu 6:19

Tahawa, Erodiza hã te te sina 're mreme 'ruiwapari, Zuwã hã. Te te wĩrĩ neza. Tane nherẽ, te te wĩrĩ waihu'u õ di. E marĩ wa. Erodi hã te te tiwi 're 'madâ'â pese, Zuwã Batista hã. Zuwã hã wẽ uptabi na, te dama 're hâimana. Ãne na ma tô ihâimanazém na waihu'u, Erodi hã. Tahawa, sina 're pahi mono wa, ma tô dawi te te 're 'madâ'â pese, Zuwã hã. Zuwãhã nhimirowasu'u hã te nasi wapa, Erodi hã. Tawamhã wapari ze na nasi te te wapari wa, zahadu rosa'rada hã te te sima ãma hiri wẽ õ di Erodi hã, Zuwã Batistaha hâiba na hã.

1 Corĩtu 10:11

Ãne ma tô wahi'rata norĩ ma tiromhâiba duréihã, tiwasédé te te 're i'manharĩ za'ra mono zéb zarina, 'Re ihâimana u'âsi mono te te 're ihâ za'ra mono zém na, da te 're waihu'u za'ra mono da. Ma tô duré ãne na ni'wa hã ãma rob'ui'éré, ãma 're iwasipo're pu'u za'ra mono zéb da hã, isine wa te 're 'manharĩ za'ra mono tõ da. Romhuture di oto, waré za'ra irob'rãsutuzéb u hã. Tahawa, wa za wanhimiza'rese 're wahâimana u'âsi za'ra.

1 Corĩtu 4:5

Tahawa, asiwi 're dawẽ'õ za'ra wa'aba mono õ di za, zahadu bâdâ hã wisi õ nherẽ. Wanhib'apito uburé za te te ida'awaihu'uzé wana, asiwi ĩwaihu'u aba zarina, asiwi ĩwẽ'õ za'ra wa'aba da, asima ĩ'ãma 're rosa'rata za'ra wa'aba mono õ di za, Wanhib'apito apâ wei morĩ õ ré hã. Ni'wam norĩ zama asiwi iwaihu'u aba zéb zarina, asiwi wẽ'õ za'ra wa'aba da, asima ãma 're rosa'rata za'ra wa'aba mono õ di za, bâtâ na Wanhib'apito za da'ãma isipo'ozé wana. Taha si te za dawi a'upsibi nhamra oto sõ'awi, uburé dapẽ'ẽ 're, 'râwi da te dasima 're irosa'rata za'ra mono zé hã. Marĩ hã bara na, da te 're 'madâ'â za'ra mono da, da te 're i'uiwẽ za'ra mono ne, te za Wanhib'apito hã sõ'awi oto dawi a'upsibi nhamra, uburé marĩ hã da te 're 'manharĩ za'ra mono da, da te dasima 're iwẽ za'ra mono zém na, danhimirosa'rada hã. Tawapsi te za 'Re ihâimana u'âsi mono hã wasu'u wẽ za'ra ni'wam norĩ hã, ti'ab ré tihâimana wẽ zém na te te tãma ãma 're uwaimrami za'ra mono wa, te te 're i'awaihu'u mono zéb zarina.

2 Corĩtu 9:7

'Râwi aipẽ'ẽ 're, asima iwaihu'u za'ra wa'aba zéb zarina si, te za aihâiba mono bâ dama asõprub za'ra wa'wa, ãté sa'ẽtẽ na, ãté suru na. Robzei'õ nherẽ, dama asõprub za'ra wa'aba õ di za. Duré taré da te aima i'ru za'ra wa'aba zéb zarina, dama asõprub za'ra wa'aba õ di za. Mare di. Asi'uihâ na si te za asima iwẽ za'ra wa'aba zéb zarina, dama asõprub za'ra wa'wa, ato sina. Ãne si iwẽ uptabi hã, 'Re ihâimana u'âsi mono ma hã, dato sina dasima 're idanhoprub za'ra mono zé hã.

Galata 5:14

'Re ihâimana u'âsi mono nhimiroti 'rada hã ahâ uptabi nherẽ, simisutu haré te wasu'u, isimiroti hã ãne: “Ma'ãpé, 're dazawi pese za'ra wa'aba mono za. Marĩ iwẽ na asima 're irosa'rata za'ra wa'aba mono ne, te za duré dama zama sô 're asõpré wa'aba mo.” Ãne si isimiroti hã.

Galata 5:26

Danhipai u, wapire na 're wahâimana za'ra mono newa, 'râwi wapẽ'ẽ na wasina 're wawata za'ra mono õ di za, da te wama 're nharĩ za'ra mono tõ da. Duré wanhipai u, dapire na 're idahâimana za'ra mono na, wa te 're da'ruiwapari za'ra mono õ di za.

Tiagu 4:11

Ĩsisãnawã norĩ, asisa're'ra 're asibâsi za'ra wa'aba mono õ di za. Ni'wam norĩ hã tisiré isazei'wai ãma, te te ãma 're wasété za'ra mono wamhã, niha wamhã, te te duré 're wẽ'õ za'ra mono wamhã, tisiré isazei'wai u'âbâ, Wanhib'apito nhimiroti hã 're idasisawi pese za'ra mono zé hã te za te te siwi 're wẽ'õ za'ra. Ãne wamhã, isimiroti te te 're 'madâ'â pese za'ra mono ãna, te za 're nomro.

Tiagu 4:12

'Re ihâimana u'âsi mono si danhipai u roti wẽ 'manharĩ'wa hã te 're hâimana. Taha si dahâimanazéb zarina da'ãma rowairébé'wai uptabi hã te duré 're hâimana. Õhõ ma si waihu'u pese di, te te 're ida'anho'reptui mono zéb da hã, duré te te 're ida'a'uprosi mono zéb da hã. E a norĩ wa'wa hã dahâimanazéb zarina da'ãma rowairébé'wa pâ, te bété asiré Cristuhu zazei'wa 're iwẽ'õ za'ra wa'aba mo.

Tiagu 5:10

Duréihã Uburé Danhib'apito zadawa 'mahârâ'wa norĩ hã, da te tãma 're rob'manharĩ wasété za'ra mono nherẽ, ma tô simi'ẽ na tihâimana wẽ na te te 're robzépata za'ra. Tane te za duré ta norĩ wasu'u na 're irosa'rata u'âsi za'ra wa'aba mo, isine 're aihâimana za'ra wa'aba mono da.

Tiagu 5:7

Ĩsisãnawã norĩ, rowasédé hã 're hâimana mono nherẽ, te za asimi'ẽ na Wanhib'apito zô 're asimipari za'ra wa'aba mo, apâ wei morĩ õ ré. Ma'ãpé rosa'rata za'ra wa'aba, buru tede'wa na. Buru tede'wa norĩ hã te simi'ẽ na, tã zô 're simipari za'ra, a'ẽ ta'a zô, duré ipĩni 'rãsutuzéb zô zama. Simi'ẽ na te sô 're simipari za'ra, ropoto té te te 're i'ubumro za'ra mono zéb zô, tãma sawi za'ra wa, buru nho hã.

1 Pedru 4:5

Tane nherẽ, nimahã na ta norĩ hã 're ihâimana wasété za'ra mono zém na te te iwaihu'u za'ra zéb zarina, te za ta norĩ ma arowairébé, 'Re ihâimana u'âsi mono hã. Te te ida'awaihu'uzéb zarina, te za romhutu na uburé norĩ ma rowairébé, ihâiba ré norĩ ma, duré 're idâ'â za'ra mono norĩ ma zama.

1 Pedru 4:9

Te za duré 're ida'mazasi wẽ za'ra wa'aba mo ari'iwi, 're dawata'ẽ za'ra wa'aba mono ãna.

Apocalipsi 3:20

“Ma'ãpé duré, wapari pese za'ra wa'aba, te ãma isimiré hã. Aibâ te 'ridawab za. Tawamhã 'ri tede'wa hã te 'mahâ, sãmra zô, duré itẽme sébré da. Tawamhã 'ri tede'wa te te wapari wamhã, te za tãma 'ridawa, sitẽme te te 'mazébré da, siré sa zahuré wa, rowẽ na te te sima rowasu'u zahuré da. Tane wa hã aibâ, 'ridawa isam ne, wa asô 're ĩnhimipari za'ra wa'wa. Ĩmreme 're wapari za'ra wa'aba mono wa, ĩzô 're aihãsi aba mono zô, wa 're ĩnhimipari u'âsi. Tawamhã ĩzô 're aihãsi aba mono wapsi, duré asitẽme 're ĩ'mazasi za'ra wa'aba mono wapsi, wa za aipẽ'ẽ 're, 're ĩnhamra u'âsi za'ra wa'wa. Tawapsi, wa za wasiré rowẽ na 're wahâimana u'âsi za'ra.