Tiagu 3:2 - ꞌRe Ihâimana Uꞌâsi Mono Zadawa Wasuꞌu

² Uburé wa norĩ hã wa wahâimanazém na wa te 're upa za'ra. Ni'wa hã timreme na te te 're upai mono õ 'wa'âhã, aré 're hâimana wẽ mono di. Duré tiwasédé hã te te 're 'manharĩ tõ mono da hã, te aré 'râwi siwi 're simi'rãmi, tãma waihu'u pese wa.

Tiagu 3:2 ပူးပေါင်းရင်းမြစ်များ

Salmu 34:13

Tahawa, ma'ãpé asoto na aimreme iwasété na 're nharĩ za'ra wa'aba mono tõ. Duré asadawa nhipese na dama 're rowasu'u za'ra wa'aba mono tõ da, 're asi'madâ'â pese za'ra wa'aba mono.

Provébiu 10:19

Ni'wa hã te te 're robzanhamri hâ mono wamhã, te za tiwasédé te te 're i'manharĩ mono zéb u hã 'râwi pesere oto 're hâimana. Tane nherẽ, ni'wa hã niha na 'râwi timreme na 're si'madâ'â mono wamhã, te za ta hã 'rãi waihu'u wẽ ré 're hâimana.

Provébiu 13:3

Ni'wa tinhimirobzanhamri wasété wi, 're sisadawa uwati mono wamhã, te za tihâimana wẽ zém na hã 're si'madâ'â. Tane nherẽ, ni'wa siwa'ru te te 're robzanhamri hâ mono wamhã, te za 'râwi tihâimana wẽ zé hã te te siwi 're uprosi.

Provébiu 20:9

E 'wa ãne hã te te nharĩ waihu'u pese di: “Wa tô ĩsipese, ĩpẽ'ẽ 'remhã; tahawa ĩwasété ãna wa oto 're ĩhâimana.”

Provébiu 21:23

Ni'wa niha na timreme zani wi 're si'madâ'â pese mono wamhã, te za ropire te te sisô iwazere nhiti hã 're hâimana.

Mateu 12:34

A norĩ wa'wa hã te wahi ne 're anomro aba mo. Dapẽ'ẽ 're, da te 're irosa'rata za'ra mono zéb zarina te za 're damreme zusi. Tahawa, aiwasété na 're aihâimana za'ra wa'aba mono wa, marĩ iwẽ na 're aimreme zusi waihu'u aba mono õ di. Aipẽ'ẽ 're, 're irosa'rata wasété za'ra wa'aba mono zéb zarina si, te a norĩ wa'wa hã marĩ iwasété na si hã 're aimreme zusi aba mo.

Mateu 12:37

Tahawa, ti'ab ré uburé marĩ na 're i'aimreme zusi aba mono zéb zarina, te za 'Re ihâimana u'âsi mono hã aima rowairébé za'ra wa'wa, za da'ãma isipo'ozéb ãma hã. Ti'ab ré, marĩ iwẽ na 're i'aimreme zusi aba mono zéb zarina si, te za aiwẽsãmri za'ra wa'wa. Duré, marĩ iwasété na 're i'aimreme zusi aba mono zéb zarina si, te za siwi aiwẽ'õ za'ra wa'wa, 'Re ihâimana u'âsi mono hã. — Ãne ma tô Zezusi hã tãma waihu'u siromo za'ra, farizeu norĩ ma.

Roma 3:10

Duréihã ma tô ãne na ni'wam norĩ hã ãma rob'ui'éré za'ra: “Ni'wam norĩ hã si'uihâ na 're inomro wẽ mono zém na, 'Re ihâimana u'âsi mono te te 're iwẽsãmri za'ra mono zéb da hã, robaba di. Uburé te 're danomro wasété, 're idahâimana za'ra mono hã.

Roma 7:21

Ãne hã wa tô uburé ĩsina waihu'u, 're ĩhâimana mono zém na hã. Marĩ iwẽ si te 're ab'manharĩ u'âsi mono da, te ĩsima 're wẽ mono nherẽ, wa i'upana marĩ iwasété zô si 're ĩsipizari, te ĩsiwi 're awẽ'õ waihu'u mono ãna.

1 Corĩtu 9:27

Ni'wa hã dame wara da, te te sima wẽ wamhã, te za 're siwasutu u'âsi, dazada siptete da. Tane, wa duré wa hã 'râwi 're ĩsi'wapéi u'âsi, ĩwasété na 're ĩhâimana 'rata mono zéb zarina, 're ĩhâimana tõ mono da oto. Ĩpẽ'ẽ 're, te ĩsima 're irosa'rata wasété mono zé hã wa tô oto 'râwi te ĩsima 're a'uprosi. Tahawa, wa tô ãne si te ĩsima 're ab'manharĩ, ĩnhimirowasu'u zarina, da'ahâ na da te 're saze za'ra mono nherẽ, 'Re ihâimana u'âsi mono, iwẽ uptabi hã te te ĩma pisutu nherẽ, 'râwi te ĩsiwi simini tõ da.

Galata 3:22

Tane nherẽ, daro mono bâ te dawasété na 're danomro. Dasi'uihâ na dawasété wi 're dasipizari waihu'u za'ra mono õ di tô. Ãne, da te iwaihu'u za'ra zéb da hã, ma tô 'Re ihâimana u'âsi mono zadawa 'mahârâ'wa hã ãma rob'ui'éré. E marĩ da. Zezu Cristu Danho'reptui'wa na, da te dasina 're umnhasi za'ra mono da, tawapsi 'Re ihâimana u'âsi mono iwẽ hã te te dama ãma 're uwaimrami mono da, te te dama iropisutuzéb zarina.

Colosu 1:28

Tahawa, Cristuhu si wa oto wa te dama 're wasu'u za'ra. Hâiwa hawi dahâimanazém na rowaihu iwẽ hã wa te 're iwaihu'u za'ra mono zéb zarina, wa tô duré wa te 're da'uwati wẽ za'ra dahâiba mono bâ, marĩ hã da te 're 'manharĩ wasété za'ra mono tõ da oto. Wa tô duré wa te dama 're roti za'ra, marĩ da te 're 'manharĩ wẽ za'ra mono da, i'uwaibaba si. Ni'wam norĩ hã Cristuhu ãma prédup sina 're inomro mono norĩ hã 'Re ihâimana u'âsi mono nho're u, wa te 're simroi mono da, wa tô ãne hã wa te dama 're roti za'ra, rosa'rata wẽ hã wa te oto 're iwaihu'u za'ra mono zém hawimhã.

Colosu 4:12

Epafrasi te duré ãma asawi za'ra wa'wa, tame asiré isazei'wa norĩ siré 're ihâimana mono hã, Cristu Zezusihi ma romhuri'wa hã. Ta hã te ai'ãma 're mreme u'âsi 'wa simi'ẽ na, 'Re ihâimana u'âsi mono ma, taha si te te 're aipawaptob u'âsi za'ra wa'aba mono da, asiptete sina ãma 're anomro aba mono da, duré aihâimana prédup sina 're aihâimana wẽ za'ra wa'aba mono da, ta hã te te aima 're iwẽ za'ra wa'aba mono zéb zarina si. Cristu hã asina 're i'umnhasi za'ra wa'aba mono zém na 're asiptete za'ra wa'aba mono da, te duré ai'ãma 're mreme u'âsi za'ra wa'wa.

Tiagu 1:26

Ãté ni'wam norĩ hã te za taré te te sina 're rosa'rata za'ra, 'Re ihâimana u'âsi mono nhimiroti 'madâ'â'wa na, tô sena ãma 're nomro mono newa, ta norĩ hã. Tane nherẽ, ãté 'râwi siwi 're simi'rãmi waihu'u za'ra mono õ di za, 're mreme wasété tõ za'ra mono da hã. Ãne wamhã, tô sena 'Re ihâimana u'âsi mono nhimiroti 'madâ'â'wa na 're hâimana za'ra mono õ di za. Taré te za tinhimirosa'rata na 'râwi sima 're sadawa nhipese za'ra.

Tiagu 1:4

Tawamhã iwẽ uptabi za, ãma 're i'aihâimana za'ra wa'aba mono zé hã.

Tiagu 2:10

Ãté ni'wa hã Wamama nhimiroti, Mozésihi ma te te i'awaihu hã, te za misi ãma tizaihâ. Ãne wa, te za 'Re ihâimana u'âsi mono hã iwasédé hã ãma sa'ra, isimiroti mono bâ te te 're 'madâ'â pese za'ra mono õ wa.

1 Pedru 3:10

Duréihã ãne na ma tô 'Re ihâimana u'âsi mono zadawa 'mahârâ'wa hã dama roti: “Aihâiba ré, robzei u'âsi 're anomro aba mono da, asima 're wẽ za'ra wa'aba mono wamhã, aimreme wasété na dama 're nharĩ za'ra wa'aba mono õ di za. Duré dama 're asadawa nhipese za'ra wa'aba mono õ di za.

1 Pedru 5:10

Tane nherẽ, 're robzépata hâ za'ra wa'aba mono õ ré, rowẽzé hã te za te te aima ãma 're a'uwaimrami 'wa, 'Re ihâimana u'âsi mono hã. Taha si te za te te 're asiptete u'âsi za'ra wa'wa, tiwaihu'u pese na, asiptete u'âsi ãma 're aihâimana za'ra wa'aba mono da. Õhõ ma si te isimizawizé hã sa'ẽtẽ na tãma 're hâimana. Tahawa, ma tô sitẽme asô tihârâ za'ra wa'wa, rowẽ isi'utõrĩ'õ ãma isiré 're aihâimana u'âsi za'ra wa'aba mono da, Cristuhu nhib'a'uwẽ oto 're anomro aba mono wa.