Tiagu 2:8 - ꞌRe Ihâimana Uꞌâsi Mono Zadawa Wasuꞌu

⁸ Ibaihâ na te tihâiba, Danhib'apito uptabi nhimiroti hã 'Re ihâimana u'âsi mono nhimiroti hã. Isimiroti hã ãne: “Dahâiba mono bâ te za 're idazawi pese za'ra wa'aba mo. Taha zarina marĩ iwẽ zô, asima 're asõpré wa'aba mono ne, te za duré uburé iwẽ zô dama zama 're asõpré wa'aba mo.” Ãne ãma irob'ui'éré hã, ibaihâ na hã. Tawamhã ãne na isimiroti hã 're 'madâ'â pese za'ra wa'aba mono wamhã, wẽ di.

Tiagu 2:8 ပူးပေါင်းရင်းမြစ်များ

Zona 4:4

Tawamhã Uburé Danhib'apito hã te asa tãma tinha ãne: — Zona, e i'uwaibaba bâ asahi uptabi na i'aihâimana da hã.

Zona 4:9

Tane nherẽ, te 'Re ihâimana u'âsi mono hã sadanha: — Zona, e tô i'uwaibaba ma asib'ru, rob're zabâdâmhã. Zonahã asa te tãma tinha ãne: — E marĩ bété. Tô i'uwaibaba ma ĩwa aime, ĩnhiti'rui pese zé hã. Taha zarina i'uwaibaba ĩdâ'â da si, wa ĩsima wẽ.

Mateu 22:39

Duré 'Re ihâimana u'âsi mono nhimiroti amo hã, aiwa ipire uptabi hã, ãne: “Te za 're idazawi pese za'ra wa'aba mo, uburé. Marĩ iwẽ zô asima 're asõpré wa'aba mono ne, te za duré uburé dama zama sô 're asõpré wa'aba mo, iwẽ zô.” Ãne isimiroti amo hã ipire uptabi hã, Mozési te te ãma irob'ui'érézé hã.

Mateu 25:21

— Tawamhã isib'apito te asa tãma tinha, ãne: “Wẽ di tô. A hã ĩma romhuri wẽ 'wai uptabi. Ĩma ai'umnhasi di. Rob'uiprazé hã surure na hâimana nherẽ, ma tô ãma iromhuri wẽ, ĩzô. Tahawa, ãhã nhipai u wa za oto aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô tãma ropisutu siro, tãma iromhuri wẽ 'wai ma.

Mateu 25:23

— Tawamhã isib'apito asa te tãma tinha, ãne: “Wẽ di tô. A hã ĩma romhuri wẽ 'wa. Ĩma ai'umnhasi di. Rob'uiprazé hã surure nherẽ, ma tô ãma ĩzô iromhuri wẽ. Tahawa, ãhã nhipai u wa za duré aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô duré tãma ropisutu siro, tãma iromhuri wẽ 'wai ma hã.

Mateu 7:12

— Marĩ iwẽ si da te aima 're 'manharĩ za'ra wa'aba mono da, asima 're idawẽ za'ra wa'aba mono ne, te za marĩ iwẽ si dama 're i'manharĩ u'âsi za'ra wa'aba mo, iwa'rãmi. Ãne duréihã 'Re ihâimana u'âsi mono nhimiroti na Mozési te te ãma irob'ui'éré hã te wama wasu'u za'ra, duréihã isadawa 'mahârâ'wa norĩ nhimi'ui'éré zama.

Roma 13:10

Ni'wam norĩ hã te te 're dazawi pese za'ra mono wamhã, marĩ iwasédé hã te te dama 're 'manharĩ waihu'u za'ra mono õ di za. Tahawa, ni'wam norĩ hã te te 're dazawi pese za'ra mono wamhã, ta hã uburé 'Re ihâimana u'âsi mono nhimiroti 'madâ'â pese 'wa, te za 're hâimana za'ra.

Galata 5:14

'Re ihâimana u'âsi mono nhimiroti 'rada hã ahâ uptabi nherẽ, simisutu haré te wasu'u, isimiroti hã ãne: “Ma'ãpé, 're dazawi pese za'ra wa'aba mono za. Marĩ iwẽ na asima 're irosa'rata za'ra wa'aba mono ne, te za duré dama zama sô 're asõpré wa'aba mo.” Ãne si isimiroti hã.

Galata 6:2

Marĩ wa, aiwi 're robzei'õ za'ra wa'aba mono wamhã, ma'ãpé 're asipawapto pese za'ra wa'aba mono, roti iwẽ na si. Ãne wamhã, Cristuhu nhimiroti wẽ 'madâ'â'wa te za tô 're aihâimana za'ra wa'aba mo.

Filipu 4:14

Tane nherẽ, ĩma wẽ uptabi di, we asiwi ĩpawaptob za'ra wa'aba zé hã, ãhã na ãme te robzépata ré hã.

1 Tesalonita 4:9

Isazei'wai mono bâ 're asisawi pese za'ra wa'aba mono zém na, wa te aima rob'ui'éré za'ra wa'aba õ di za oto. Tô sena ma tô 'Re ihâimana u'âsi mono hã si'uihâ na ãma aima rowahutu za'ra wa'wa, 're asisawi pese za'ra wa'aba mono zéb da hã.

Tiagu 1:25

'Re ihâimana u'âsi mono nhimiroti hã wẽ uptabi di. Ta hã wapawapto'wa da, te wama 're hâimana, wawasédé, wa te 're irẽme pese za'ra mono zéb da hã. Tawamhã isimiroti na da te 're rosa'rata pese za'ra mono wamhã, duré õne u'âsi ãma 're dahâimana za'ra mono wamhã, taré imreme wapari'wa 're danomro mono õ di za. Tô sena imreme wapari pese 'wa, te za oto 're danomro. Taha zarina rowẽ u'âsi te za ãma 're dahâimana za'ra.

Tiagu 2:12

Isimiroti hã wapawapto'wa da, te wama 're hâimana za'ra, wawasédé hã wa te 're irẽme pese za'ra mono zéb da hã. Nimahã na te za wahâimanazém na te te 're wa'awaihu'u Wamama hã, isimiroti 'madâ'â pese 'wa na. Ãne wa, wa za wamreme wẽ na si wasima wa te 're rowasu'u u'âsi za'ra. Duré wahâimanazé iwẽ na si, wa za dama 're wahâimana u'âsi za'ra.

Tiagu 2:19

Misire uburé Danhib'apito uptabi hã te 're sãmra. Ãne na hã aima waihu'u pese di. Taha wasu'u na ma tô ãma isaze. Wa'uburé norĩ zama ma tô misire Danhib'apito uptabi wasu'u hã waihu'u za'ra. Tahawa, te pipa te, 're rẽrẽ'ẽ za'ra.

Tiagu 4:11

Ĩsisãnawã norĩ, asisa're'ra 're asibâsi za'ra wa'aba mono õ di za. Ni'wam norĩ hã tisiré isazei'wai ãma, te te ãma 're wasété za'ra mono wamhã, niha wamhã, te te duré 're wẽ'õ za'ra mono wamhã, tisiré isazei'wai u'âbâ, Wanhib'apito nhimiroti hã 're idasisawi pese za'ra mono zé hã te za te te siwi 're wẽ'õ za'ra. Ãne wamhã, isimiroti te te 're 'madâ'â pese za'ra mono ãna, te za 're nomro.

1 Pedru 2:9

Tanei õ di, a norĩ wa'wa hã. 'Re ihâimana u'âsi mono, ma tô sima aipisutu za'ra wa'wa, isib'a'uwẽ si oto tãma 're anomro aba mono da. Sasedoti norĩ hã te te sima 're i'apisutu mono ne, te oto a norĩ wa'wa hã uburé Danhib'apito ma romhuri'wa, 're anomro aba mo, õhõ ãma si 're anomro aba mono da, ite da. Ta hã robra hawi ma tô rowa'a u sitẽme asô tihârâ za'ra wa'wa, 're anomro wasété aba mono zém hawi, rowẽ uptabi na si 're anomro aba mono da oto. Taha wasu'u na, tiwaihu'u pese na te te aima ãma 're i'uwaimrami wẽ za'ra wa'aba mono zém na, ma tô sima aipisutu za'ra wa'wa, ãma 're dapo're pu'u u'âsi za'ra wa'aba mono da.