Tiagu 2:5 - ꞌRe Ihâimana Uꞌâsi Mono Zadawa Wasuꞌu

⁵ Ĩsisãnawã norĩ, ĩma i'asawi pese za'ra wa'aba norĩ, ma'ãpé ĩwapari pese za'ra wa'aba. Ti'ai ãma, simarĩ ãna 're ihâimana za'ra mono norĩ, ma tô 'Re ihâimana u'âsi mono hã pisutu za'ra, te te sina 're i'umnhasi za'ẽtẽ za'ra mono na si, 're hâimana za'ra mono da, duré da'ãma 're isib'a'uwẽ mono zéb 're rowẽ uptabi na i'rata 're hâimana u'âsi za'ra mono da, isawi'wa norĩ ma, te te tãma iropisutu za'ra zéb zarina.

Tiagu 2:5 ပူးပေါင်းရင်းမြစ်များ

Ezodu 20:6

Tane nherẽ, wa hã te te 're ĩzawi pese za'ra mono norĩ ma hã, duré ĩnhimiroti te te 're iwapari pese za'ra mono norĩ ma hã, wa iwẽ na hã tãma 're ĩhâimana za'ra. Duré ta norĩ u'âbâ isihudu mono sidâpâsi, wa iwẽ hã te tãma 're 'manharĩ u'âsi za'ra.

Provébiu 13:7

Ni'wam norĩ hã sibro pese ne dama 're sihâi'ré za'ra mono zahã, te tô simarĩ ãna hã 're hâimana za'ra, i'uptabi na hã. Duré isiré norĩ hã simarĩ'õ ne dama 're sihâi'ré za'ra mono zahã, te duré tô sibro pese na 're hâimana za'ra, iwa'rãmi.

Provébiu 7:24

Tahawa, ĩ'ra, te za ĩwapari pe! Aipo're pese na ĩwapari, za te aima inharĩzém na hã.

Provébiu 8:32

“Tahawa, ipréduptém norĩ, asiwi ĩwapari pese aba! Te aima irowasu'u za'ra wa'aba zé 're 'manharĩ za'ra wa'aba mono wamhã, te za rowẽ uptabi na hã 're aihâimana za'ra wa'aba mo.

Mateu 11:5

Itob'a norĩ hã to pese za'ra wa, ma tô apâ te te 're rob'madâ'â za'ra. Imorĩ'õ norĩ hã te duré oto para na 're nomro. Duré i'wa're ré norĩ hã ma tô 're pese za'ra. Tahawa te oto duré hâiba wẽ na hã 're nomro. Duré ipo'reptõ norĩ hã te oto po're 'repu'u wa 're simipari za'ra. Duré 're idâ'â za'ra mono norĩ hã ma tô duré apâ 're hâiwa'utu za'ra. Ĩwasu'uwẽ hã ma tô duré isibrob'õ norĩ hã te te 're wapari za'ra. Ãne na te za tãma irowasu'u za'ra wa'wa, Zuwãhã ma.

Mateu 25:34

Tawamhã Uburé Danhib'apito te za ãne ta norĩ ma hã nharĩ za'ra, isimire niwĩm norĩ ma: “Ĩmama, iwẽ si te te aima 're isõmri za'ra wa'aba mono norĩ hã te za oto ĩ'rata 're aihâimana u'âsi za'ra wa'aba mo. Duréihã te te aropoto mono wamhã, ma tô sima aipisutu za'ra wa'wa, ai'ãma 're sib'a'uwẽ za'ra wa'aba mono da. Tahawa, te za oto ĩ'rata 're aihâimana u'âsi za'ra wa'aba mo, ai'ãma 're sib'a'uwẽ u'âsi za'ra wa'aba mono da oto.

Mateu 5:3

— Ni'wam norĩ hã 'râwi 're isipawapto waihu'u za'ra mono õ na 're siwaihu'u za'ra mono wamhã, duré 'Re ihâimana u'âsi mono si za ta norĩ hã i'upana te te 're ipawapto wẽ za'ra mono na te te sina 're waihu'u za'ra mono wamhã, ta norĩ si te za rowẽ na 're hâimana za'ra, ãma 're sib'a'uwẽ za'ra mono wa.

Marcu 7:14

Tawamhã Zezusi te duré sima dazô hâ, te te dama roti da, ãne: — Ma'ãpé, ĩnhimirowasu'u hã wapari pese za'ra wa'aba za, marĩ hã waihu'u za'ra wa'aba da ãma.

Luca 12:21

— Tane, danhimarĩ hã dasima si, da te 're ubumroi pese za'ra mono wamhã, 'Re ihâimana u'âsi mono ma, 're danhoprub za'ra mono ãna, te za taré da te dasima 're ubumroi pese za'ra, danhimarĩ hã.

Luca 12:32

Te duré tãma nharĩ za'ra, ãne: — Ĩsiré norĩ, ai'umrore wa'aba nherẽ, asina 're aihâtâ'â za'ra wa'aba mono õ di za. Aimama 'wa hã Danhib'apito uptabi hã, te za aima pisutu za'ra wa'wa, isiré dama 're roti za'ra wa'aba mono da. Ãne ma tô sima aiwẽ za'ra wa'wa.

Luca 16:22

Tawamhã ma tô oto dârâ, isibrob'õ hã. Dâ'â wamhã, hâiwa u ma tô siwi ti'â, 'Re ihâimana u'âsi mono ma, romhuri'wa norĩ hã. Abra'ãhã 'rata, te oto 're sãmra, dame 're sai mono da. Isibro pe hã ma tô duré dârâ. Dâ'â wamhã, ma tô dasiwi sẽrẽ ni, ab're 're.

Luca 16:25

— Tahawa, ma tô Abra'ã hã asa tãma tinha, isibro pese ma, ãne: “Ĩnhihudu, aihâiba ré, aima 're rowẽ mono di. Uburé marĩ iwẽ hã ma tô asô 're simi'wara. Lazaru ma hã, marĩ iwasétére si, ma tô da te tãma 're sõmri za'ra. Ãhã na hã rowẽ na te oto 're hâimana. A hã te oto tô ropipa hã 're isépata mo.

Luca 22:29

Tahawa, roti'wa da, dama ĩpire na 're ĩhâimana mono da, Ĩmama te te ĩma ipisutu ne, tane wa za duré wa hã aipisutu za'ra wa'wa, dama aipire na 're aihâimana za'ra wa'aba mono da, dama roti'wa na.

Luca 6:20

Tawamhã Zezusi hã te tisiré 're inomro mono norĩ hã 'madâ'â pese za'ra. Tahawa, te ãne tãma nharĩ za'ra: — Ãté asibrob ãna, te oto 're anomro aba mo. Tane nherẽ, aima 're robze za'ra wa'aba mono di za. 'Re ihâimana u'âsi mono hã, Danhib'apito uptabi. Tahawa, isib'a'uwẽ 're anomro aba mono wa, aima 're robze za'ra wa'aba mono di za.

Zuwã 7:48

E Danho'reptui'wa na hã ma tô dame siwi 'mazaze dama ipire hã, duré farizeu norĩ hã. Mare di. Ni'wa te te ãma sazei õ di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:2

Tawamhã Estewã ma tô tãma rob'rãzarõtõ za'ra, dahi'rata norĩ wasu'u na hã, ãne: — Wasiré Izaraéu nhihudu norĩ, duré wamama norĩ zama hã, ĩwapari za'ra wa'aba. 'Re ihâimana u'âsi mono hã, rowa'a na 're isãmra mono hã duréihã ma tô Abra'ãhã ma sihâi'ré, wahi'rata ma. Mezopotãmia na danhipti'a nho'õmo nhisi ãma 're sãmra mono ré, ma tô itẽme wi, zahadu Harã na 'ri nho'õmo nhisi u morĩ õ ré. Ãne te tãma tinha: “Ma'ãpé airom nhiti aiwatobro, asisãnawã norĩ nhiti aimorĩ da. Airop téb u wa za asaprõ, tame 're aihâimana mono da oto.” Ãne ma tô tãma roti.

Roma 8:17

'Re ihâimana u'âsi mono 'ra, oto 're wanomro mono wa, marĩ iwẽ na tinhib'a'uwẽ ma, 're isõpru mono zéb da, te te tãma 're iropisutu za'ra mono zéb ré, wa za 're wahâimana za'ra. Duré uburé marĩ iwẽ na Cristuhu ma, isõprubzéb da, te te tãma iropisutuzéb ré, wa za isiré 're wahâimana za'ra. Zezusihi ne, wa te 're robzépata za'ra mono wamhã, wa za isine rowẽ uptabi na 're wahâimana za'ra.

1 Corĩtu 2:9

Tane nherẽ, ta norĩ hã te te waihu'u za'ra õ di tô. Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré siro: “'Re ihâimana u'âsi mono zawi pese 'wa norĩ ma, iwẽ hã te te tãma 're i'apisutu mono zé hã, te te tãma ãma 're i'a'uwaimrami mono zéb da hã, dasi'uihâ na datõmo na da te 're 'madâ'â waihu'u za'ra mono õ di. Duré dapo're na da te 're wapari waihu'u za'ra mono õ di. Duré dapẽ'ẽ na dasi'uihâ na da te dasina 're waihu'u za'ra mono õ di, da te dasina ãma 're i'uwaimrami za'ra mono zéb da hã, 'Re ihâimana u'âsi mono, iwẽ hã tinhib'a'uwẽ norĩ ma, te te 're i'apisutu mono hã.”

2 Corĩtu 4:15

Wa norĩ hã ai'madâ'â sina za'ra wa'aba, wa marĩ hã ahâ na wa te 're sépata. Tawamhã Cristuhu wasu'uwẽ na daro mono bâ wa te 're da'apawapto mono wamhã, 'Re ihâimana u'âsi mono nhimizawi pese zéb zarina, da'ãma 're isiwãrĩ mono zé hã, wa za wa te dama ãma 're aropé, da'ahâ uptabi na oto iré 're dahâimana za'ra mono da. Taha zarina te za da'ahâ na ãma 're dawata za'ra oto, 'Re ihâimana u'âsi mono ãma hã, tinhoprubzéb zarina, da'ãma 're siwãrĩ mono wa, te te duré 're da'anho'reptui mono wa oto.

2 Corĩtu 6:10

Nimahã bâtâ na, da te dasina 're wapẽ'ẽzé zani za'ra mono nherẽ, wa watoi u'âsi 're wahâimana za'ra, 'Re ihâimana u'âsi mono ãma si. Duré wanhibrob'õ na 're wahâimana za'ra mono nherẽ, wa wa te 're dapawaptob za'ra, iwasu'uwẽ na si, danhibro pese ne, rowẽ na 're dahâimana u'âsi za'ra mono da, 'Re ihâimana u'âsi mono siré. Wa norĩ hã wanhimarĩ õ nherẽ, 'Re ihâimana u'âsi mono, uburé te te wama 're i'anhomri mono ré si, wa oto 're wanomro, iwẽ uptabi ré si.

2 Corĩtu 8:9

Wanhib'apito Zezu Cristuhu nhimizawi pese zé hã aima waihu'u pese za'ra wa'aba di oto. Ta hã Timama siré robze na 're hâimana u'âsi mono nherẽ, ma tô hâiwa ãma tihâimanazé hã we tirẽ a'â, ti'ai ãma si'a'uwẽ da, te te a'â dame 're robzépata mono da. Asada za'ra wa'aba, ma tô dawazari si'a'uwẽ, taha zarina, a norĩ wa'aba zama 'Re ihâimana u'âsi mono 'rata 're asimroi u'âsi aba mono da, hâiwa ãma hã. Tahawa, Wanhib'apito hã sisawi ãna 're ihâimana mono ne, te za asisawi ãna dama asõprub za'ra wa'wa, ate rob'uiprazé wa'aba na hã.

Éfézu 1:18

Wa hã wa ĩsima wẽ, 'Re ihâimana u'âsi mono te te 're aipawaptob za'ra wa'aba mono da, isimiroti hã 're waihu'u pese za'ra wa'aba mono da, duré rowẽ uptabi zô te te i'aipisutu za'ra wa'aba zé wasu'u hã, 're waihu'u za'ra wa'aba mono da. Duré uburé marĩ iwẽ uptabi na wama 're isõprub za'ra mono zéb da hã tinhib'a'uwẽ norĩ ma, te te iropisutuzéb zarina, taha wasu'u zama 're waihu'u za'ra wa'aba mono da, wa ĩsima te 're aiwẽ za'ra wa'wa.

Éfézu 3:8

Ĩwana isazei'wa norĩ hã ĩwẽ na te sipa za'ra õ di. Ta norĩ si ma tô tiwẽ na ĩnhipa za'ra. Tane nherẽ, ma tô ĩpisutu, zudeu'õ norĩ ma te tãma 're wasu'u za'ra mono da, iwẽ hã sa'ẽtẽ na Cristuhu ma 're ihâimana mono hã dama ãma 're isõpru mono zéb da hã.

1 Tesalonita 2:12

Duré da te aima 're amhâzépa za'ra wa'aba mono nherẽ, wa tô ãma aima robze za'ra wa'aba ni iwasu'uwẽ na, aiwi 're robzei'õ tõ za'ra wa'aba mono da. Wa tô aima roti pese za'ra wa'aba ni, 'Re ihâimana u'âsi mono nho'a 're anomro wẽ wa'aba mono da, toi uptabi na te te 're ai'madâ'â za'ra wa'aba mono da. Ta hã ma tô te te sima 're aiwẽ za'ra wa'wa, hâiwa ãma ihâiba na rowa'a na isiré 're aihâimana u'âsi za'ra wa'aba mono da, rowẽ uptabi na.

2 Tesalonita 1:5

Tawamhã wa tô wa norĩ hã waihu'u za'ra ni. 'Re ihâimana u'âsi mono hã, sena na te za dahâimanazéb zarina te te dama 're arowairébé. A norĩ wa'wa hã 're sazei pese za'ra wa'aba mono wa, te 're irobzépata za'ra wa'aba mo. Tawamhã 'Re ihâimana u'âsi mono hã te te 're aipawaptob za'ra wa'wa, ãma 're anomro wẽ u'âsi aba mono da. Tahawa, te za te te 're aipisutu za'ra wa'wa, i'rata 're aihâimana u'âsi za'ra wa'aba mono da, isimiroti ré 're anomro wẽ u'âsi aba mono da. Tahawa, za iré 're anomro wẽ wa'aba mono wa, te a'â 're irobzépata za'ra wa'aba mo, asirõiwi da, 're sazei pese za'ra wa'aba mono wa. Ãne na te te 're aipawaptob za'ra wa'aba mono na, wa tô waihu'u za'ra ni, tô ibâ isimirowairébézé hã.

1 Timotiu 6:18

Ãne te za duré isibrob ahâ norĩ ma 're i'aroti mo, te te dama 're 'manharĩ wẽ u'âsi za'ra mono da. Te za duré uburé marĩ wẽ na dama 're sõprub za'ra. Te za duré simi'ẽ na marĩ na te te 're dazari u'âsi za'ra.

2 Timotiu 4:18

Tane te za Wanhib'apito hã duré rowasété hawi ĩnho'reptu, hâiwa u te te ĩ'ãwisi wẽ da, tinhib'a'uwẽ norĩ te te 're i'ab'madâ'â mono zéb u hã. Ta hã si wẽ uptabi wa, aihĩni wa za ãma 're wawata u'âsi za'ra.

Hebreu 11:26

Apito Fara'oho nhorõwa ãma 're sãmra u'âsi mono 'wa'âhã, te aré marĩ iwa'âbâ za'ẽtẽ na tinhibro pese, Ezitu ãma uburé marĩ hã iwa'âbâ za'ẽne hã 're isimi'wara mono na. Ta hã marĩ wa'âbâ za'ẽtẽ mono hã wẽ nherẽ, taha upana marĩ iwẽ uptabi si ma tô sima wẽ, Mozési hã. Danho'reptui'wa da, 'Re ihâimana u'âsi mono te te ipisutu ma si, te te 're robzépata mono da si, ma tô sima wẽ pese. Iwẽ hã 'Re ihâimana u'âsi mono, niwa za te te tãma isõmri na si, ma tô te te ãma 're rosa'rata u'âsi, Mozési hã.

Tiagu 1:12

Wa za duré ãne aima waihu'u za'ra wa'wa. Marĩ ahâ na dazada 're hâimana za'ra mono wamhã, 'Re ihâimana u'âsi mono hã ro'wa'rudu hã te te dama 're ba'a za'ra mono õ nherẽ, te za danhiptete sina ãma 're dahâimana u'âsi za'ra. Ãne wamhã, 'Re ihâimana u'âsi mono hã te za ãne na da'awaihu'u. Tawamhã isawi pese 'wa 're dahâimana za'ra mono wa, te za tãma wa'âbâ za'ra oto, rowẽ uptabi na, i'rata 're idahâimana u'âsi za'ra mono zém na, te te dama iropisutuzéb zarina. Tawamhã dama 're rowẽ uptabi za'ra mono di za.

Tiagu 1:16

Ĩsisãnawã norĩ, ĩma asawi pese za'ra wa'aba norĩ hã, 'Re ihâimana u'âsi mono wasu'uwẽ na ãma 're upa za'ra wa'aba mono õ di za, asimirosa'rata na.

Tiagu 1:19

Ĩsisãnawã norĩ, ĩma asawi pese za'ra wa'aba norĩ hã, ãne wa za duré aima waihu'u za'ra wa'wa, ãma 're i'asipo're pu'u u'âsi za'ra wa'aba mono zéb da hã. Ari'iwi te za a'â 're idawapari za'ra wa'aba mo, aiwara sina aimreme hã 're sani za'ra wa'aba mono tõ da, duré dazada 're asahi za'ra wa'aba mono tõ da.

Tiagu 1:9

Wasiré isazei'wa norĩ hã simarĩ õ nherẽ, Wanhib'apito zazei'wai wa, te za tipẽ'ẽ na 're toi u'âsi za'ra.

1 Pedru 1:4

Nimahã na, te za marĩ hã iwẽ hã te te wama 're anhomri, tinhib'a'uwẽ norĩ zô te te 're i'ab'madâ'â mono hã hâiwa ãma. Tame iwẽ uptabi si te asô 're simi'wara u'âsi 'wa, dawi 're isi'utõrĩ waihu'u za'ra mono õ hã, dawi 're iwasété za'ra mono õ hã duré.

2 Pedru 1:11

Taha zarina, te za 'Re ihâimana u'âsi mono hã to sina te te 're ai'a'mazasi 'wa hâiwa u, Wanho'reptui'wa, Wanhib'apito Zezu Cristuhu u, Danhib'apito uptabi na dama 're ihâimana u'âsi mono u.

Apocalipsi 2:9

Ĩma waihu'u pese di, da te aima 're irob'manharĩ wasété za'ra wa'aba mono zém hawi, 're irobzépata za'ra wa'aba mono zé hã. Duré, ĩma waihu'u pese di, asibrob'õ na 're irobzépata za'ra wa'aba mono zé hã. Tane nherẽ, te asibrob ahâ ne, rowẽ na 're aihâimana za'ra wa'aba mo, ĩnhimipawaptobzém na si 're aihâimana za'ra wa'aba mono wa. Duré ni'wam norĩ hã te te dama 're aiwasu'u wasété za'ra wa'wa. Te te dama 're aiwasu'u wasété za'ra wa'aba mono zé hã ĩma waihu'u pese di. Ta norĩ hã zudeu na 're poto za'ra mono zahã, te Satanasihi nhimiroti zarina si, siwa'ru 're hâimana za'ra.

Apocalipsi 21:7

Ni'wam norĩ hã tidâ'âzéb u ĩwi sipizari ãna, Satanasihi ãma te te i'ai'uté za'ra norĩ hã ta norĩ ma, wa za Isib'apito za'ra na 're ĩhâimana. Ĩnhib'a'uwẽ si te za oto ta norĩ hã 're hâimana za'ra.

Apocalipsi 3:18

Tahawa, wa za oto aima roti pese za'ra wa'wa. Ẽtẽ waipo pré oru uptabi hã iwazari'õ hã da te 're i'ruiwapari za'ra mono zéb zarina, da te dawi 're i'uipra za'ra mono ne, te za ĩnhimiroti zô si 're asõpré wa'aba mo, iwẽ uptabi zô si, aipẽ'ẽ 're asibro pese ne, rowẽ na si ĩ'ãma 're aihâimana u'âsi za'ra wa'aba mono da. Duré da'uza hâirã hã te za da te dawi 're uipra za'ra, ãma 're dasi'uza za'ra mono wa, da te 're 'madâ'â ze za'ra mono da. Tane te za duré a norĩ wa'wa hã ĩwi 're irowaptẽrẽ u'âsi za'ra wa'aba mo, wa hã te 're aipawaptob za'ra wa'aba mono da, ĩ'ãma 're anomro wẽ wa'aba mono da, taha zarina, asisém na 're aihâimana za'ra wa'aba mono tõ da oto. Duré datõmo nhihâzém na 're dasitõmo wẽ za'ra mono da, 're dasitõmonhihâ za'ra mono da, da te dawi 're i'uipra za'ra mono ne, te za ĩzô si tô 're asõpré u'âsi aba mo, ĩnhimiroti hã waihu'u pese za'ra wa'aba da.

Zuize 9:7

Tawamhã Zotã ãne hã te te waihu'u wa, ma tô Gerizi na ẽtẽ nhisi na sai'u. Te te sai'uri wamhã, ma tô ãne hârâ 'rãihâ na 'mahârâ za'ra: — Siquẽ ãma aibâ norĩ, asiwi ĩwapari aba! Tawapsi te za 'Re ihâimana u'âsi mono te te 're aiwapari za'ra wa'wa.

1 Samuéu 2:30

Wa hã Izaraéu nhihudu norĩ te, 'Re ihâimana u'âsi mono Uburé Danhib'apito hã wa tô ropisutu duréihã aihi'rata norĩ ma hã za isihudu norĩ hã õne u'â te te ĩma 're iromhuri za'ra mono na hã sasedoti na. Tane nherẽ, ãhã na hã wa za tinha, õne u'â 're ihâimana mono õ na hã za oto. E marĩ wa. Wa hã za oto te 're da'awazé mono dâ'âsina, da te 're ĩwazéb za'ra mono norĩ hã, duré za oto te 're da'awazé mono õ dâ'âsina, da te 're ĩwazéb za'ra mono õ norĩ hã.

1 Samuéu 2:8

'Re ihâimana u'âsi mono hã te robzaprum hawi te te 're awahutu, isiptihai õ norĩ hã. Te duré tihai õ zarina robzépata hawi, te te 're azani, tiha zô tiwi 're iro'wanhi'riti u'âsi za'ra mono norĩ hã. Ta hã te duré isiptihai õ norĩ ma hã te te 're apisutu, dama ipire norĩ siré 're idahâimana za'ra mono zéb da hã. Te duré te te 're da'a'maza, dawazém na 're idahâimana za'ra mono zéb u hã. Ti'a na'rada hã Uburé Danhib'apito te hã. Ta hã ma tô ti'a hã isisiwimhã 'manha.