Tiagu 1:12 - ꞌRe Ihâimana Uꞌâsi Mono Zadawa Wasuꞌu

¹² Wa za duré ãne aima waihu'u za'ra wa'wa. Marĩ ahâ na dazada 're hâimana za'ra mono wamhã, 'Re ihâimana u'âsi mono hã ro'wa'rudu hã te te dama 're ba'a za'ra mono õ nherẽ, te za danhiptete sina ãma 're dahâimana u'âsi za'ra. Ãne wamhã, 'Re ihâimana u'âsi mono hã te za ãne na da'awaihu'u. Tawamhã isawi pese 'wa 're dahâimana za'ra mono wa, te za tãma wa'âbâ za'ra oto, rowẽ uptabi na, i'rata 're idahâimana u'âsi za'ra mono zém na, te te dama iropisutuzéb zarina. Tawamhã dama 're rowẽ uptabi za'ra mono di za.

Tiagu 1:12 ပူးပေါင်းရင်းမြစ်များ

Zenezi 22:1

Tawamhã wahu hã duré si'utõrĩ mono pari, 'Re ihâimana u'âsi mono, ma tô Abra'ã hã pibu, sena na te te sina 're umnhasi pese mono zô. Tahawa isisi na te te 'mahârâ wamhã, ma tô ãne sada'â asa: — E marĩ. Ãhãta ãme wa za.

Neemia 1:5

— Wanhib'apito 'Re ihâimana u'âsi mono, hâiwa ãma 're i'asãmra mono, aiwaihu'u pese uptabi di. Tahawa, te da te dasiwi 're i'aiwazé pese mono zé hã asina 're isani mo. Te duré te te 're i'asawi pese za'ra mono norĩ siré, duré asimiroti te te 're iwapari pese za'ra mono norĩ siré, asimiroti na asisaze za'ra wa'aba zém na tãma ãma 're i'a'uwaimrami u'âsi mo.

Salmu 119:67

Ĩ'azâri wana ré, wa tô ĩhâimanazém na te 're upa. Tane nherẽ, wa oto ãhã na hã aimreme te 're i'madâ'â pese mono na 're mo.

Salmu 119:71

Tô ĩma hã wẽ di, ĩma irob'manharĩzé hã, taha zarina asimiroti si te 're iwaihu'u mono da hã oto.

Salmu 119:75

Uburé Danhib'apito, ĩma waihu'u pese di, i'uwaibaba na si dama 're irowairébé mono zé hã. Duré ĩma waihu'u pese di, sena na 're i'aihâimana mono zéb zarina, niha hã ĩma 're irob'manharĩ mono zé hã.

Salmu 5:11

Tane nherẽ, ni'wam norĩ hã, a hã i'wawib za'ra 're aimapa mono da, sima sô 're isõpré mono hã te za tãma rowẽ sina 're hâimana za'ra. Te za pẽ'ẽto sina 're sõ're u'âsi za'ra. Asimi'madâ'âzém na i'wawi 're aimapa u'âsi za'ra mono. Asawi'wa norĩ si te ai'ãma rowẽ 're ihâimana mono hã te te 're sõpẽtẽ za'ra.

Salmu 94:12

Uburé Danhib'apito, 're i'ahâ za'ra mono norĩ si te za rowẽ na to sina 're nomro, asimiroti na ãma tãma 're irowasu'u za'ra mono norĩ hã.

Ezodu 20:6

Tane nherẽ, wa hã te te 're ĩzawi pese za'ra mono norĩ ma hã, duré ĩnhimiroti te te 're iwapari pese za'ra mono norĩ ma hã, wa iwẽ na hã tãma 're ĩhâimana za'ra. Duré ta norĩ u'âbâ isihudu mono sidâpâsi, wa iwẽ hã te tãma 're 'manharĩ u'âsi za'ra.

Provébiu 17:3

Ẽtẽ waipo pré oru hã, ẽtẽ waipo prã prata me, te za unhama na da te 're pibu za'ra, i'uptabi zô. Tane te Uburé Danhib'apito hã sena na niha na dapẽ'ẽ 're danhimirosa'rata na 're idahâimana za'ra mono zé hã te te 're apibu.

Mateu 10:22

Uburé te za da te 're ai'ruiwapari za'ra wa'wa, ĩzazei'wa 're anomro aba mono wa. Tane nherẽ, asiptete sina õne u'â ĩ'ãma si 're anomro aba mono wamhã, te za asina 're i'uwaimrami za'ra wa'aba mo, asõ'reptu za'ra wa'aba zé hã.

Mateu 25:34

Tawamhã Uburé Danhib'apito te za ãne ta norĩ ma hã nharĩ za'ra, isimire niwĩm norĩ ma: “Ĩmama, iwẽ si te te aima 're isõmri za'ra wa'aba mono norĩ hã te za oto ĩ'rata 're aihâimana u'âsi za'ra wa'aba mo. Duréihã te te aropoto mono wamhã, ma tô sima aipisutu za'ra wa'wa, ai'ãma 're sib'a'uwẽ za'ra wa'aba mono da. Tahawa, te za oto ĩ'rata 're aihâimana u'âsi za'ra wa'aba mo, ai'ãma 're sib'a'uwẽ u'âsi za'ra wa'aba mono da oto.

Luca 6:22

— A norĩ wa'wa hã ti'ai ãma Dasiré Ipoto zazei'wa, 're anomro aba mono wa, ãté te za da te 're ai'ruiwapari za'ra wa'wa. Ãté te za da te 're aiwẽ'õ za'ra wa'wa. Ãté te za da te aima 're nharĩ wasété za'ra wa'wa. Ãté aiwasédé hã te za taré da te ai'ãma 're sa'ra za'ra wa'wa. Ãne wamhã, te za robze na 're aihâimana za'ra wa'aba mo.

Roma 5:4

Ropire nherẽ, danhimi'ẽ na 're idahâimana za'ra mono na, te 'Re ihâimana u'âsi mono te te sima da'ãma 're arowẽ. Duré te te sima da'ãma 're i'arowẽ mono zéb zarina, te za 'Re ihâimana u'âsi mono nhimiropisutuzéb zô dato sina 're danhimipari za'ra, da te 're sazei utõrĩ za'ra mono ãna.

Roma 8:28

'Re ihâimana u'âsi mono zawi pese 'wa norĩ da, marĩ iwasédé hã ahâ na sada 're hâimana za'ra mono nherẽ, te za 'Re ihâimana u'âsi mono hã iwẽ si te te tãma 're apisutu iwa'rãmi, te te sima 're i'awẽ mono zéb zarina, tinhib'a'uwẽ da, te te sima 're i'apisutu mono norĩ ma hã. Ãne hã wama waihu'u pese za'ra di oto wa norĩ hã.

1 Corĩtu 2:9

Tane nherẽ, ta norĩ hã te te waihu'u za'ra õ di tô. Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré siro: “'Re ihâimana u'âsi mono zawi pese 'wa norĩ ma, iwẽ hã te te tãma 're i'apisutu mono zé hã, te te tãma ãma 're i'a'uwaimrami mono zéb da hã, dasi'uihâ na datõmo na da te 're 'madâ'â waihu'u za'ra mono õ di. Duré dapo're na da te 're wapari waihu'u za'ra mono õ di. Duré dapẽ'ẽ na dasi'uihâ na da te dasina 're waihu'u za'ra mono õ di, da te dasina ãma 're i'uwaimrami za'ra mono zéb da hã, 'Re ihâimana u'âsi mono, iwẽ hã tinhib'a'uwẽ norĩ ma, te te 're i'apisutu mono hã.”

1 Corĩtu 8:3

Ni'wam norĩ ma, 'Re ihâimana u'âsi mono, tãma isawi za'ra si, te za 'Re ihâimana u'âsi mono hã tinhib'a'uwẽ na te te sina 're awaihu'u.

1 Corĩtu 9:25

Ni'wa hã dawara na dame hâimana da, te te sima wẽ wamhã, te za nasi sihâiba wairo, dazada sihâiba wapu da. Tawamhã dawi watobro wamhã, ropsu 'manharĩ na te za ãma sõpre ni, te te da'mairẽme wẽ te. Tane nherẽ, te za tiwi tiwasété su'u, ropsu 'manharĩ hã. Tanei õ di, wa norĩ hã. Isi'utõrĩ'õ zô si, wa za Cristuhu ãma si wasina 're wanhiptete u'âsi za'ra, 'Re ihâimana u'âsi mono, marĩ iwẽ uptabi hã te te wama 're i'apisutu mono zô si.

2 Timotiu 2:15

Romhuri'wa nhimiromhuri hã wẽ wamhã, tinhimiromhuri ma, 're sisé mono õ di za. Tane te za sada 're asiptete u'âsi mo, i'uwaibaba si roti tô sena na si 're da'apawapto mono da, asimiromhuri na te te 're aiwẽsãmri mono da, 'Re ihâimana u'âsi mono hã.

Hebreu 10:32

Ma'ãpé, ãma asipo're pu'u za'ra wa'aba, duréihã Cristu hã Danho'reptui'wa na asina 're iwaihu'u na'rata za'ra wa'aba mono zém na hã, 'Re ihâimana u'âsi mono nhimipawaptobzéb zarina. Ta hawim haré, Cristuhu zazei'wa oto 're anomro aba mono wa, marĩ na 're robzépata za'ẽtẽ za'ra wa'aba mono nherẽ, ma tô asiptete sina ãma 're aihâimana u'âsi za'ra wa'aba mo, tiwi 're aipizari za'ra wa'aba mono ãna.

Hebreu 11:17

Abra'ã hã 'Re ihâimana u'âsi mono si te te sina 're i'umnhasi mono zéb zarina, ma tô aré ti'ra hã tãma tiwĩ Izaqui hã, tãma ãma isõprubzéb da, 'Re ihâimana u'âsi mono hã te te pibui wamhã. Taha õ ré, ma tô 'Re ihâimana u'âsi mono hã tãma ropisutu siro, Abra'ãhã ma hã, ãne: “Ai'ra Izaquihi hawip si, te za asihudu norĩ hã ahâ uptabi na 're hâimana za'ra, asihudu sidâpâsi te aima iropisutuzéb zarina.” Ãne na 'Re ihâimana u'âsi mono te te tãma ropisutu nherẽ, ma tô aré Abra'ã hã ti'ra hã tiwĩ Izaqui hã, i'ra si'aibâ hã misi tãma poto nherẽ. Duré ta hawip si za isihudu norĩ hã sitébré da nherẽ, ma tô aré tãma tiwĩ, 'Re ihâimana u'âsi mono ma hã.

Hebreu 12:5

E ma tô bété ãma aipo're si'âri za'ra wa'wa, 'Re ihâimana u'âsi mono te te aima iroti za'ra wa'aba zém na hã, duré ti'ra na te te aima inharĩ za'ra wa'aba zém na hã. Ãne ma tô ãhã wasu'u na ni'wa hã ãma rob'ui'éré, duréihã: “A norĩ wa'wa hã ĩ'ra na ĩma 're aihâimana za'ra wa'aba mono nherẽ, aiwasédé hã 're i'manharĩ za'ra wa'aba mono zém na 're asisãmri za'ra wa'aba mono da, wa hã Danhib'apito uptabi hã te 're aihâ za'ra wa'aba mono wamhã, ĩ'ãma 're rosa'rata upa za'ra wa'aba mono õ di za, taré newa. Duré apâ 're anomro wẽ wa'aba mono da, niha te aima 're rob'manharĩ za'ra wa'aba mono wamhã, aiwi 're robzei'õ za'ra wa'aba mono õ di za. Te za ĩ'ãma asima 're irosa'rata wẽ u'âsi za'ra wa'aba mo.

Hebreu 6:15

Tawamhã Abra'ã hã wahub ahâ na te sô 're simipari, simi'ẽ na. Tahawa, 'Re ihâimana u'âsi mono, ma tô ãma tãma uwaimra oto, te te tãma iropisutuzém na hã.

Tiagu 2:5

Ĩsisãnawã norĩ, ĩma i'asawi pese za'ra wa'aba norĩ, ma'ãpé ĩwapari pese za'ra wa'aba. Ti'ai ãma, simarĩ ãna 're ihâimana za'ra mono norĩ, ma tô 'Re ihâimana u'âsi mono hã pisutu za'ra, te te sina 're i'umnhasi za'ẽtẽ za'ra mono na si, 're hâimana za'ra mono da, duré da'ãma 're isib'a'uwẽ mono zéb 're rowẽ uptabi na i'rata 're hâimana u'âsi za'ra mono da, isawi'wa norĩ ma, te te tãma iropisutu za'ra zéb zarina.

Tiagu 5:11

Ta norĩ hã te te 're robzépata za'ẽtẽ za'ra mono nherẽ, siptete sina ma tô Wamama ãma si 're hâimana u'âsi za'ra. Tahawa, tãma 're rowẽ za'ra mono di oto. Taha wasu'u hã wama waihu'u pese za'ra di. A norĩ wa'wa hã ma tô Zoho wasu'u hã 're iwapari za'ra wa'aba mo. 'Re ihâimana u'âsi mono umnhasi sina ma tô ãma 're mo, Zo hã. 'Re ihâimana u'âsi mono hã, isimizawizé hã sa'ẽtẽ uptabi di. Duré da'ãma 're ipẽ'ẽzé mono zé hã sa'ẽtẽ di. Ãne wa, Zo hã te te robzépata za'ẽtẽ pari, ma tô marĩ iwẽ na hã apâ tãma tinhopru.

1 Pedru 3:14

Dama 're aihâimana wẽ za'ra wa'aba mono nherẽ, da te aima 're rob'manharĩ wasété za'ra wa'aba mono wamhã, dama 're aipahi za'ra wa'aba mono õ di za. Asimirosa'rata na hã 're aihâtâ'â za'ra wa'aba mono õ di za duré.

1 Pedru 4:13

Cristu hã aiwana za'ra wa'aba, ma tô robzépata za'ẽtẽ. Tahawa, isine 're robzépata za'ra wa'aba mono wa, te za aipẽ'ẽ 're, 're ato za'ra wa'aba mo. E marĩ wa. Cristu hã tiwaihu'u pese na apâ wei morĩ wapsi, ato za'ẽne hã aima 're hâimana za'ra wa'aba mono wa.

1 Pedru 4:14

Ãté Cristuhu ãma si 're aihâimana za'ra wa'aba mono 'ru te, te za da te aima 're nharĩ wasété za'ra wa'wa. Tane nherẽ, aima 're rowẽ za'ra wa'aba mono di za. E marĩ wa. 'Re ihâimana u'âsi mono pẽ'ẽzani hã aipẽ'ẽ 're aima 're hâimana za'ra wa'aba mono wa oto, rowẽ uptabi zé hã.

1 Pedru 5:10

Tane nherẽ, 're robzépata hâ za'ra wa'aba mono õ ré, rowẽzé hã te za te te aima ãma 're a'uwaimrami 'wa, 'Re ihâimana u'âsi mono hã. Taha si te za te te 're asiptete u'âsi za'ra wa'wa, tiwaihu'u pese na, asiptete u'âsi ãma 're aihâimana za'ra wa'aba mono da. Õhõ ma si te isimizawizé hã sa'ẽtẽ na tãma 're hâimana. Tahawa, ma tô sitẽme asô tihârâ za'ra wa'wa, rowẽ isi'utõrĩ'õ ãma isiré 're aihâimana u'âsi za'ra wa'aba mono da, Cristuhu nhib'a'uwẽ oto 're anomro aba mono wa.

1 Pedru 5:4

Tawamhã Da'madâ'â'wai uptabi hã apâ wei morĩ wapsi, tãma 're idapawapto wẽ za'ra wa'aba mono zé wa'rãmi, te za oto aima wa'âbâ za'ra wa'wa, iwẽ uptabi na, si'utõrĩ'õ na oto aima 're hâimana u'âsi za'ra wa'aba mono da.

1 Zuwã 4:19

'Re ihâimana u'âsi mono hã imorĩ'rata na te te 're wa'azawi pese mono wa, wa duré wa norĩ hã wa te wasiwi 're sawi pese za'ra, asa. Tahawa, wa duré 're wasisawi pese za'ra.

Apocalipsi 2:10

Za 're irobzépata za'ra wa'aba mono zém na hã asina 're aipahi za'ra wa'aba mono õ di za. Ĩwapari pese za'ra wa'aba. Wa'uburé hã nimahã na te za dama ai'mai'ru wasété 'wa, da te ai'maimrami aba da, dazazéb 're, da te ai'manheme aba da, te te aipibu za'ra wa'aba da, tô sena ĩzaze za'ra wa'aba zô. Tawamhã 10 na bâdâ hã te za ai'ãma 'maihai'utõrĩ 'wa, dazazéb 're ai'masima'wara aba ré, niha aihâiba za'ra wa'aba na 're 'mairobzépata za'ra wa'aba mono ré hã. Ãne wamhã, ma'ãpé asiwi ĩrẽme aba tõ, tô'ã. Tawamhã da te ai'manhimroi wa'aba zém na ai'masi'utõrĩ aba nherẽ, ĩ'mairẽme aba õ wamhã, duré dawi ĩ'mai'udâ wa'aba õ wamhã, wa za aima wa'âbâ za'ra wa'wa. Rowẽ, wa za aima pisutu za'ra wa'wa, ĩ'rata 're i'ai'ubumroi u'âsi aba mono zéb da hã.

Apocalipsi 3:19

Wa hã te 're i'azawi pese mono norĩ hã wa tô te tãma 're aroti pese, tiwasété na 're sisãmri za'ra mono da. Wa duré te 're hâ za'ra, apâ 're nomro wẽ mono da. Tahawa, te za aiwasété wi aipizari za'ra wa'wa, sena na ĩ'ãma 're anomro u'âsi aba mono da oto.

Apocalipsi 3:21

“Duré, ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã, ta norĩ hã wa za pisutu za'ra, danhib'apito 're ĩsimasisi mono zéb ãma, ĩzababa 're si'ubumroi u'âsi mono da. Wa hã ĩdâ'âzéb u ĩsipi'rai õ na Satanasihi ãma te ai'uté wa, taha pari Ĩmama zababa oto 're ĩnhamra u'âsi mono ne, te za ta norĩ hã ĩzababa 're si'ubumroi u'âsi.