Salmu 2:7 - ꞌRe Ihâimana Uꞌâsi Mono Zadawa Wasuꞌu

⁷ Tawamhã apito te tinha ãne: “Uburé Danhib'apito te te ĩma iwaihu'uzé, wa za dama sadawa 'mahâ. Uburé Danhib'apito, te ĩma tinha ãne: ‘A hã, ĩ'ra. Ã bâtâ na wa tô aimama na aima 're ĩhâimana mono da hã ĩsi'ãma a'ube.

Salmu 2:7 ပူးပေါင်းရင်းမြစ်များ

Salmu 89:27

Wa za duré ĩ'ra ĩma ipoto'rata ne hã pisutu, ta hã. Duré uburé apito norĩ nhipai u dama sa'ẽtẽ na 're hâimana mono da hã wa za tãma pisutu.

Mateu 16:16

Tawamhã Sima Pedru ma te ãne asa ãma sada'â: — A hã Cristu, 'Re ihâimana u'âsi mono te te i'aipisudu, Danho'reptui'wa da. A hã 'Re ihâimana u'âsi mono 'ra.

Mateu 17:5

Tawamhã ãne Pedru te te tãma nharĩ ré, ma tô hâiwa nhirõno hã we hâiba zuwa za'ra, Zezusi norĩ hã. Tawamhã hâiwa nhirõtõ zarob'a hawi, ma tô 'Re ihâimana u'âsi mono hã mre, ãne: — Ã hã ĩ'ra, te 're isawi pese mono. Tãma 're ĩto za'ẽtẽ mono di. Ma'ãpé isimiroti hã 're wapari pese za'ra wa'aba mono za.

Mateu 3:17

Tawamhã hâiwa hawi te we tinha ãne: — Ã hã ĩ'ra. Ĩma sawi uptabi di. Tãma ĩto za'ẽtẽ uptabi di. — Ãne te we tinha, Imama hã.

Mateu 8:29

Tawamhã rosa'rese õ ré, ma tô sa'ẽtẽ 'mahârâ zahuré Zezusi hã, ãne: — 'Re ihâimana u'âsi mono 'ra, e marĩ wa'ãma 'manharĩ da, te we aimo, wawa'wai baba. E ropsi'utõrĩzé wana wa'ahâri da, te we aimo, wa te oto robzépata mono da.

Zuwã 1:14

'Re ihâimana u'âsi mono mreme hã wa'rata 're sãmra mono da, ma tô sihâiba. Simizawi pese uptabi di. Isimiroti hã wẽ uptabi di. 'Re ihâimana u'âsi mono 'ra wa, õhõ si 're morĩ wẽ uptabi di. Misire i'ra hã. Õhõ si, waihu'u pese uptabi di. Wa norĩ hã wa tô wasiwi waihu'u za'ra ni, 're imorĩ wẽ uptabi na. Iwaihu'u pese na zama, wa tô duré wasiwi waihu'u ni.

Zuwã 1:18

Ti'ai ãma 're idanomro mono hã datõmo na da te 're 'madâ'â za'ra mono õ di, 'Re ihâimana u'âsi mono hã. Õhõ si, ma tô Timama hã 'madâ, siré 're simasisi u'âsi zahuré mono wa, Timama me. I'ra hã misire, 'Re ihâimana u'âsi mono 'ra hã. Ta hã ma tô te te dama 're wasu'u u'âsi Timama hã, da te 're waihu'u za'ra mono da.

Zuwã 3:16

'Re ihâimana u'âsi mono ma, tãma dazawi pese uptabi wa, ma tô ti'ra hã misi nherẽ, we tisõ, dazada dâ'â da. Tawamhã i'ra, da te dasina 're umnhasi za'ra mono wamhã, dadâ'â ãna te za hâiwa ãma i'rata 're dasi'ubumroi u'âsi. Ropipa ãma isiti 're dasi'ubumroi mono õ di za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:33

'Re ihâimana u'âsi mono, wahi'rata norĩ ma, te te iropisudu hã ma tô wama ãma uwaimrami za'ra oto, wasiré isihudu norĩ ma. Zezusi hã ma tô apâ hâiwa'udu. Apâ ihâiwa'utuzé wasu'u na 'Re ihâimana u'âsi mono ãma danho're na rob'ui'éré, isãna'remhã, te wama wasu'u, ãne: “A hã ĩ'ra. Ã bâtâ na aihâiwa'utuzém na wa za Aimama na aima 're ĩhâimana.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:36

Tawamhã bâdâdi na neb zahuré ré, ma tô â u aimasisi zahuré. Tawamhã aibâ hã ma tô â hã tãma 'mahâ, Filipihi ma: — Ãhãta â. E wanhimizahâri õ di za a'â, â dawabzuri hã ĩma 'manharĩ da.

Roma 1:4

Duré 'Re ihâimana u'âsi mono 'ra na, wama waihu'u pese za'ra di, dâ'â uptabi nherẽ, Imama hã tiwaihu'u pese na te te hâiwa'utu wa. Duré Timama hawi we imorĩ na hã wama waihu'u pese za'ra di. Duré 're imorĩ wẽ na zama, wama waihu'u pese za'ra di.

Hebreu 3:6

Tane nherẽ, te Cristuhu si tãma umnhasi na uburé isib'a'uwẽ norĩ hã te te tãma 're 'madâ'â pese za'ra, pire uptabi na, 'Re ihâimana u'âsi mono 'ra hã. Wa norĩ hã Cristuhu ãma si 're wanomro mono wa, da te wama 're rob'manharĩ wasété za'ra mono nherẽ, wapahi ãna wanhiptete sina ãma 're wanomro mono wamhã, wa za tô isib'a'uwẽ na tãma 're wahâimana u'âsi za'ra. 'Re ihâimana u'âsi mono hã iwẽ si, za te te wama ipisutu za'ra zéb zô, wama umnhasi sina sô 're iwanhimipari u'âsi za'ra mono zéb zarina, tiwi 're wasipizari za'ra mono õ wamhã, tawapsi wa za tô isib'a'uwẽ na tãma 're wahâimana u'âsi za'ra.

Hebreu 5:5

Tane duré, Cristu hã si'uihâ na sipisutu õ di, sasedoti ipire uptabi na dama 're ihâimana mono da hã. 'Re ihâimana u'âsi mono si ma tô pisutu. Duréihã ma tô ni'wa hã ãne na ãma rob'ui'éré, 'Re ihâimana u'âsi mono te te irotizém na hã, ti'ra ma: “A hã ĩ'ra na te 're aihâimana mo. Tahawa, wa za ĩ'ra na te 're asisi, dama aipire na 're aihâimana mono da oto.”

Hebreu 5:8

Zezusi hã 'Re ihâimana u'âsi mono 'ra, 're hâimana mono nherẽ, ma tô te te 're robzépata, ti'ai ãma 're morĩ ré hã. Taha zarina ma tô ãne hã si'ãma waihu'u: Ni'wam norĩ hã, 'Re ihâimana u'âsi mono nhimiroti te te 're 'madâ'â pese za'ra mono da, te te sima 're wẽ za'ra mono wamhã, taha zarina te za tô te te 're robzépata za'ra, ti'ab ré. Ãne ma tô Zezusi hã si'ãma waihu'u.