Roma 9:4 - ꞌRe Ihâimana Uꞌâsi Mono Zadawa Wasuꞌu

⁴ Ta norĩ hã 'Re ihâimana u'âsi mono nhimipisudu, te 're hâimana za'ra. Ta norĩ ãma, ma tô 're 'ra za'ra, 'Re ihâimana u'âsi mono hã. Ta norĩ ma si, ma tô rowa'a na aré i'rata 're sãmra za'ra 'râwi, iwaihu'u pese zé hã duré ihâimana wẽ zé hã te te waihu'u za'ra da. Simisutu siré, ãma 're hâimana u'âsi za'ra mono da, ma tô duré marĩ iwẽ hã te te tãma 're apisutu. Isimiroti na Mozési te te irob'ui'érézé hã ma tô duré tãma sõmri za'ra. Ta norĩ ma, ma tô duré 're siwaihu'u za'ra, i'uwaibaba si ãma 're iwata za'ra mono zéb da hã. Ta norĩ ma, ma tô duré ahâ na te te tãma 're aropisutu, zudeu norĩ ma, za te te tãma ãma 're i'a'uwaimrami mono zém na hã.

Roma 9:4 ပူးပေါင်းရင်းမြစ်များ

Zenezi 15:18

Tawamhã tô taha bâtâ na ma tô Uburé Danhib'apito, Abrãhã ma, tinhimiropisutuzé hã tãma 'manha, ãne: — Asihudu norĩ ma, ã hã ti'a te tãma sõmri za'ra da wa ĩnhimiropisutu zahi hã 'manha, Ezitu ãma ti'a zada'ré inomro hawi, panho'u Eufrati na isisi u hã,

Zenezi 17:10

Ĩnhimiropisutuzé aima, duré asihudu norĩ ma, te i'manharĩzéb zarina, te za uburé ai'reb za'ra wa'aba aibâ norĩ tinhihâiwata nhihârizé te te sima 're 'manharĩ za'ra.

Zenezi 17:2

Ĩnhimiropisutuzé te aima i'manharĩzéb zarina, wa za asihudu norĩ ahâ uptabi na 're ihâimana za'ra mono da hã aima 'manha.

Zenezi 17:7

Ĩnhimiropisutuzé õne u'â aima 're hâimana mono da, duré asihudu norĩ ma zama õne u'â tãma 're hâimana za'ra mono da zama wa aima 'manha ãne: Õne u'â, ate 'Re ihâimana u'âsi mono na, duré asihudu norĩ te 'Re ihâimana u'âsi mono na, wa za tãma 're ĩhâimana za'ra.

Zenezi 32:28

Tawamhã te duré tãma tinha ãne: — Asisi õ di za oto, Zaco na. 'Re ihâimana u'âsi mono ma tô i'wapé. Duré aibâ norĩ zama ma tô i'wapé za'ra. Tahawa, ma tô ãma i'ai'uté za'ra. Ãhã wa, asisi hã za oto Izaraéu na.

Neemia 13:29

“Ĩte 'Re ihâimana u'âsi mono, ma'ãpé a'uwẽ norĩ ãmamhã aipo're si'âri za'ra tõ. E marĩ wa. Sasedoti nhimiromhuri na te te wasété za'ra wa, duré sasedoti norĩ ma, levita norĩ me asimiropisutu zahi tãma i'manharĩ za'ra zém na zama te te duré wasété za'ra wa.”

Salmu 78:61

Wanhitob'ru norĩ ma, ma tô tãma sa'ré za'ra, tinhimiroti ré ite wedehâ're 'manharĩ hã te te wawi âri za'ra da hã, 're ihâimana mono hã iwaihu'u pese ré, duré ite rowẽ za'ẽtẽ ré hã.

Salmu 89:3

A hã te inha ãne: “Wa hã, ĩnhib'a'uwẽ Dawi te ipisutu ma, wa tô ĩnhimiropisutu zahi hã 'manha. Ãne wa tô taha ma hã ropisutu:

Salmu 89:34

Ropisudu õhõ ma, te i'manharĩzé te ãma tãma i'upa da hã mare di za. Duré te tãma iropisutuzém na, te ãma tiwi saprĩ waihu'u õ di za.

Ezodu 12:25

Tawamhã 'Re ihâimana u'âsi mono, airob za'ra wa'aba da, te te aima iropisutu aba zéb u, aihutu aba wamhã, tame oto 're airob za'ra wa'aba mono wamhã, te za Pascowa na dasaihurizé hã 're i'manharĩ u'âsi za'ra wa'aba mo, õne u'âsi.

Ezodu 34:27

Tawamhã Uburé Danhib'apito te Mozésihi ma zahadu tãma tinha ãne: — Ã hã ĩmreme hã anhihâtâ mono. E marĩ wa. Ãhã zarina wasisazezé hã te aima 'manharĩ wa, duré Izaraéu nhihudu norĩ ma hã.

Ezodu 4:22

Tawamhã wa hã Uburé Danhib'apito te iwaihu'uzém na hã te za apito Fara'oho ma ĩzadawa wasu'u ãne: “Izaraéu nhihudu norĩ hã aibâ na dama 're ipoto 'rata za'ra mono ne hã te ĩma 're hâimana za'ra.

Ezodu 40:34

Tawamhã hâiwa'a zarob'a ma tô romhâ 'manharĩ na 'ri hã suwa. Te te suwai wamhã, ma tô Uburé Danhib'apito hâiba na rowa'a hã sa'ẽtẽ na 'ri 're wa'a.

Mateu 21:33

Tawamhã Zezusi hã te duré ãne tãma rowasu'u za'ra: — Ãne wa za duré aima ãma romnhimiré'é za'ra wa'wa. Ma'ãpé, ĩwapari pese za'ra wa'aba za. Aibâ hã te 're sãmra, buru tede'wa hã. Tawamhã tiburu ãma ma tô a're, uwa 'ru hã. Te te a're pari, ma tô duré buru 'wawi wa'ra hã 'manha. Ma tô duré ẽtẽ nhisiwi sada ab're, iwa uwa'ru 'rãi watizéb da hã, iwa'u zô. Taha pari, 'ri 'rãihâ hã ma duré buru wa'wa 'manha, isipsaihuri norĩ zô, dasipapara rob'madâ'âzéb da hã. Tawamhã ma tô ni'wam norĩ hã sisõ'a ré pisutu za'ra, iburu hã te te sô 're 'madâ'â za'ra mono da. Uwa 'ru 'rã hã 're 'rã prédub za'ra mono wapsi, te za te te tãma ãma 're amo za'ra, buru tede'wai ma hã. Taha pari, te oto mo, buru tede'wa hã darob amoi u, tamomo a'â sãmra da.

Zuwã 1:47

Tawamhã te te sãmri wi, te Zezusi hã tãma tinha, Natãnaéhé ma, ãne: — Õhõta te wei mo, Izaraéu nhihudu uptabi hã 're imorĩ wẽ uptabi hã. Sadawa nhipese ãna hã te 're mo.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:39

Ãne ma tô aima ropisutu siromo za'ra wa'wa, te te aima 're sõmri za'ra wa'aba mono da, asihudu norĩ ma zama. Wasiré'õ norĩ ma zama ma tô tãma ropisutu siromo za'ra. Wanhib'apito, 'Re ihâimana u'âsi mono, za sitẽme sô 're ihârâ za'ra mono norĩ ma, ma tô ropisutu siromo za'ra, Tipẽ'ẽzani na hã.

Roma 3:2

Mare di. Tô sena tãma hã, zudeu na 're aihâimana za'ra wa'aba mono zé hã. Tãma wẽ di, 'Re ihâimana u'âsi mono ma hã. E niha, wa za tawamhã ãne hã waihu'u za'ra ni, zudeu norĩ 're ihâimana za'ra mono zé hã. Duréihã 'Re ihâimana u'âsi mono hã ma tô zudeu norĩ si te te sima 're awẽ, isimiroti na rob'ui'éré 'rada hã uburé da'udâna te te 're 'madâ'â pese za'ra mono da, dawi simani tõ da.

Roma 8:15

E marĩ da, ma tô 'Re ihâimana u'âsi mono hã Tipẽ'ẽzani te te aima 're sõmri za'ra wa'wa. E isimirob'manharĩzé ma, 're aipahi za'ra wa'aba mono sina, tãma 're romhuri za'ra wa'aba mono da, ma tô te te aima 're sõmri za'ra wa'wa. Mare di. Taha dai õ di. 'Re ihâimana u'âsi mono hã ai'ãma 're 'ra za'ra wa'aba mono da si, ma tô te te aima 're sõmri za'ra wa'wa, Tipẽ'ẽzani hã. Taha nhimipawaptobzéb zarina, wa 'Re ihâimana u'âsi mono hã wa te 're 'mahârâ za'ra, ãne: “Wamama, Wamama.” Ãne wa te 're i'mahârâ za'ra mono zé hã.

Roma 9:6

E tawamhã, Izaraéu nhihudu norĩ hã Cristu te te siwi 're wẽ'õ za'ra mono wa, te te tãma ãma 're a'uwaimrami mono õ di, 'Re ihâimana u'âsi mono, te te tãma 're iropisutu za'ra mono zém na hã. Ma tô te te tãma ãma 're a'uwaimrami, tô. Izaraéu nhihudu norĩ hã, 'Re ihâimana u'âsi mono nhimipisudu hã aihĩni 're hâimana za'ra mono õ di, isib'a'uwẽ uptabi, 're nomro mono da.

2 Corĩtu 11:22

Zezusihi zadawa wasu'u'wa newa, tô senai'õ na te te aima 're iroti za'ra wa'aba mono norĩ hã te sina aima 're wata za'ra wa'wa, hebreu na 're ihâimana za'ra mono na hã, duré Izaraéu nhihudu 're ihâimana za'ra mono na hã, duré Abra'ãhã nhihudu 're ihâimana za'ra mono na hã. Tane, wa duré wa hã hebreu na, duré Izaraéu nhihudu na, duré Abra'ãhã nhihudu na ĩwamri na hã 're ĩhâimana. Ãne na wawamri na 're iwahâimana za'ra wa'aba mono hã aiwa tô wama za'ra hã.

Galata 3:16

Tane Abra'ãhã ma, isipai u isihudu na zama, 'Re ihâimana u'âsi mono te te iropisutuzé hã. Ãhã wasu'u na, da te ãma rob'ui'éré wamhã, isihudu norĩ hã da te wasu'u za'ra õ di. Isihudu norĩ hã da te wasu'u za'ra 'wa'âhã, te aré isihudu ahâ na dasiwi wasu'u ni. Isihudu misi, te wasu'u. Ta hã Cristu.

Hebreu 9:1

'Re ihâimana u'âsi mono hã duréihã tinhimiropisutu 'rada hã te te dama sõmri wamhã, ma tô dama pisutu za'ra, ãma 're idawata za'ra mono zéb da hã. 'Re dazâmorĩ mono ré, danhimizahâri sidâpâsi, romhâ 'manharĩ na 'ri hã da te dasiwi isimizusi mono zéb da hã, ma tô duré dama pisutu, ãma 're idawata za'ra mono zéb da hã, duré iwa 're isãmra mono zéb da zama.

Hebreu 9:10

'Re ihâimana u'âsi mono ma, danhoprubzé, da te 're isõmri za'ra mono zé hã dapẽ'ẽ 're, da te dasima 're irosa'rata za'ra mono zém na te te wama rowasu'u õ di. Taré dasa hã marĩ, da te 're ihuri mono zém na roti te wasu'u. Duré marĩ wa'u, da te 're i'âhuri mono zém na rowasu'u zama hã te wasu'u. Duré 're dasihâiba wasété za'ra mono tõ da, 're idasi'upsõi pese za'ra mono zém na zama roti hã te wasu'u. Ã norĩ na roti hã taré sõ'awi dahâiba na roti, ma tô dama 're hâimana za'ra. Tane nherẽ, 'Re ihâimana u'âsi mono hã 're idanomro mono zép té hã, te te dama ipisutuzép téb ãma, ma tô oto dawi ai'utõ, ã norĩ na roti 'rada hã.

Hebreu 9:3

Duré zazahâ ihâpa na 'ri 're wa'wa nhitobzé babarã niwĩ, 're ihâimana mono hã maparane ãma 'ri 're wa'wa hâiba amo nhisi hã, 'Re ihâimana u'âsi mono te, danhipai u iwẽ uptabi hã, iwa 're isãmra mono zém na taha nhisi hã.

Hebreu 9:5

Wedehâ're nhisiwi te duré ropodo hã 're sima'wara zahuré, rob'manharĩ hã ropoto hâiba hã isaripi ré hã. 'Re ihâimana u'âsi mono, tame 're isãmra mono zé, te ta norĩ hã wasu'u zahuré. Wedehâ're nhisiwi, te ta norĩ hã duré 're papo zahuré. Wedehâ're nhitobzé nhisi hã 'Re ihâimana u'âsi mono, dawasédé te te dama 're i'apari mono zém na isisi hã. Ãne duréihã romhâ 'manharĩ na 'ri wasu'u hã. Tane nherẽ, ãhã na hã te ãma aima rowasu'u uptabi za'ra wa'aba õ di za. Suru na wa tô ãma aima rowasu'u za'ra wa'wa.

Hebreu 9:6

Ãne ma tô danhimizahâri mono sidâpâsi 'ri paramhã marĩ hã sipu'u pese na iwa da te 're sa'ra. Tawamhã sasedoti norĩ hã 'Re ihâimana u'âsi mono ma da'ãma romhuri'wa norĩ hã awẽ sidâpâsi ma tô 're sisisi, 'ri 're wa'wa imorĩ'rata u hã, tame iwa tinhimiromhuri mono bâ marĩ na te te 're romhuri za'ra mono da.