Roma 8:2 - ꞌRe Ihâimana Uꞌâsi Mono Zadawa Wasuꞌu

² 'Re ihâimana u'âsi mono pẽ'ẽzani hã ma tô te te 're wa'apisutu, Cristu Zezusihi ãma si 're wanomro wẽ u'âsi mono da. Taha zarina, ma tô ĩwasété u'âsi 're ĩhâimana mono nherẽ, ĩnho'reptu, ĩpẽ'ẽ 're, ĩdâ'â u'âsi aré 're ĩhâimana mono zém hawi. Tiwaihu'u pese na ma tô ãne hawi duré ĩnho'reptu.

Roma 8:2 ပူးပေါင်းရင်းမြစ်များ

Salmu 51:12

Apâ rowẽzém na 're ida'anho'reptui mono zé hã, ma'ãpé apâ ĩma sõmri. Duré ma'ãpé asimiroti te 're iwapari pese mono da hã, 're ĩ'upari mono.

Zuwã 4:10

Tahawa, ma tô Zezusi hã asa tãma tinha, ãne: — 'Re ihâimana u'âsi mono nhoprubzé hã waihu'u 'wa'âhã, duré ĩwaihu'u 'wa'âhã, te aré â hã ĩwi iwaptẽ. Tawamhã â u'â hã wa aré aima tisõ.

Zuwã 4:14

Ĩnhib'â hã te dama 're anhomri mono wa, da te 're âhuri mono wamhã, 'rubu ãna te za iré 're dasi'ubumroi u'âsi. Ub're 're isidototo u'âsi za'ra mono ne, dawi 're si'utõrĩ waihu'u za'ra mono õ di za, da te 're âhuri mono wamhã. Tawamhã 're dadâ'â za'ra mono ãna, te za 're dasi'ubumroi u'âsi, hâiwa ãma.

Zuwã 6:63

'Re ihâimana u'âsi mono pẽ'ẽzani si te za te te dama 're anhomri, dadâ'â ãna 're idahâimana u'âsi za'ra mono zé hã. Dasi'uihâ na da te dasina 're uwaimrami za'ra mono õ di za. Marĩ na te aima 're irowasu'u za'ra wa'aba mono zéb zarina, te za Ipẽ'ẽzani hã te te dama 're anhomri, 're idahâimana u'âsi za'ra mono zéb da hã.

Zuwã 8:32

Tawap si te za iwaihu'u pese za'ra wa'wa, sena na rowaihu iwẽ hã 'Re ihâimana u'âsi mono ãma. Taha zarina te za tô sena na rowaihu iwẽ hã te te 're asani za'ra wa'wa, asima iwẽ na 're aihâimana za'ra wa'aba mono zéb u.

Zuwã 8:36

Wa hã wa aima ĩsiwasu'u za'ra wa'wa, 'Re ihâimana u'âsi mono 'ra na. Aiwasété hawi te 're asõ'reptu za'ra wa'aba mono wamhã, tô sena te za rowẽ na ĩ'ãma 're anomro aba mo.

Roma 16:3

Ma'ãpé, duré ĩma sawi za'ra wa'aba za, Prisila norĩ hã Aquiraha me, te ãma isawi zahuré zéb zarina, rob'ui'éré na.

Roma 3:27

E tawamhã wasi'uihâ na, wa za wawẽ na wasina 're wawata za'ra, 'Re ihâimana u'âsi mono te te 're iwa'awẽsãmri mono na hã. Mare di. E marĩ wa. 'Re ihâimana u'âsi mono nhimiroti si, wa te 're i'madâ'â pese za'ra mono na, te te sima wa'ãma 're aroti mono õ na dâ'âsina, taha zarina wawasédé hã te te wa'ãma 're ab'madâ'â tõ mono da. Taré, Zezusi hã wa te 're isazei pese za'ra mono na, te te sima wa'ãma 're aroti, taha zarina wawasédé hã te te oto wa'ãma 're ab'madâ'â tõ mono da, taha zarina te te duré 're wa'awẽsãmri mono da.

Roma 5:21

Ãne na rowasu'u na, wa za oto aima 'rãsutu za'ra wa'wa. Dawasété na si 're danomro u'âsi mono wa, ma tô aré dapẽ'ẽ 'remhã, dadâ'â ne 're dahâimana u'âsi za'ra, 'Re ihâimana u'âsi mono nhiti. Tane nherẽ, tinhimizawi pese zéb zarina, ma tô 'Re ihâimana u'âsi mono hã Wanhib'apito Zezu Cristu dâ'âzéb zarina te te sima 're wa'awẽ, taha zarina si rowẽ uptabi na 're wanomro u'âsi mono da oto.

Roma 6:14

'Re ihâimana u'âsi mono nhimiroti 'rata na rob'ui'éré hã asina tãma ãma 're i'uwaimrami za'ra wa'aba mono zéb zarina, aiwasédé hã te te oto ai'ãma 're ab'madâ'â aba mono tõ da, 're asi'madâ'â za'ra wa'aba mono õ di za. Tinhimizawi pese zém na si, ma tô 'Re ihâimana u'âsi mono hã ai'ãma 're pẽ'ẽzé za'ra wa'wa, aiwasété na 're aihâimana za'ra wa'aba mono nherẽ. Taha zarina si, ma tô te te 're aiwẽsãmri za'ra wa'wa. Tahawa, te za aiwasété wi asina 're asiptete u'âsi za'ra wa'aba mo oto.

Roma 6:18

'Re ihâimana u'âsi mono hã tinhiptetezé hã ma tô te te aima 're sõmri za'ra wa'wa, aiwasété ãna oto ãma 're anomro aba mono da. Ma tô duré aima si'apito za'ra wa'wa, aiwẽ na si oto tãma 're aihâimana za'ra wa'aba mono da.

Roma 6:22

Tane nherẽ, 'Re ihâimana u'âsi mono hã tinhiptetezé hã ma tô te te aima 're sõmri za'ra wa'wa oto, aiwasété ãna ãma 're anomro aba mono da oto. Ma tô duré aima si'apito za'ra wa'wa, taha ma si oto 're romhuri za'ra wa'aba mono da. Tahawa, ma tô, tiwi 're asisawi za'ra wa'aba mono ãna, aihâiba hã tãma 're isõmri za'ra wa'aba mo. Taha wa'rãmi te za rowẽ uptabi na i'rata 're aihâimana u'âsi za'ra wa'aba mono zé hã te te aima 're apisutu 'wa oto.

Roma 7:21

Ãne hã wa tô uburé ĩsina waihu'u, 're ĩhâimana mono zém na hã. Marĩ iwẽ si te 're ab'manharĩ u'âsi mono da, te ĩsima 're wẽ mono nherẽ, wa i'upana marĩ iwasété zô si 're ĩsipizari, te ĩsiwi 're awẽ'õ waihu'u mono ãna.

Roma 7:23

Tane nherẽ, aimawi 're ĩhâimana mono zéb da hã, te ĩma 're hâimana u'âsi, ĩpẽ'ẽ 'remhã, ĩnhimirosa'rata wasédé hã. Ĩpẽ'ẽ 'remhã ĩnhimirosa'rata wasédé hã, ĩnhimirosa'rata wẽ me hã te 'râwi nherẽ, 're si'wapé u'âsi zahuré, ĩwasédé hã te 're i'manharĩ mono zéb da hã, duré te ĩsima 're iwẽ mono zéb zarina, iwẽ hã te 're i'manharĩ mono zéb da hã. Ni'wam norĩ hã danhimiwada'uri zarina si 're hâimana za'ra mono wamhã, marĩ hã te te sima 're iwẽ za'ra mono zéb zarina, te te 're 'manharĩ waihu'u za'ra mono õ di. Tane duré, wa hã marĩ iwẽ si te 're ab'manharĩ u'âsi mono da, te ĩsima 're wẽ mono nherẽ, marĩ iwasédé hã ĩpẽ'ẽ 'remhã ĩma 're ihâimana mono zarina, wa marĩ iwasédé hã te 're ab'manharĩ tô.

Roma 7:4

Ĩsisãnawã norĩ, tane duré, a norĩ wa'wa hã. Cristu hã wedepo'o nhonhi'rãmi na asada dâ'â za'ra wa'aba wa, ma tô isiré 're atâ'â za'ra wa'aba mo. Tahawa, 'Re ihâimana u'âsi mono nhimiroti 'rata na rob'ui'éré hã asina tãma ãma 're i'uwaimrami za'ra wa'aba mono zéb zarina, aiwasédé hã te te oto ai'ãma 're ab'madâ'â aba mono tõ da, 're asi'madâ'â za'ra wa'aba mono õ di za. Tâibâ oto. 'Re ihâimana u'âsi mono te te ihâiwa'utu nhib'a'uwẽ si, wa oto 're wanomro, taha ma si, wa te oto 're romhuri za'ra mono da, iwẽ na si. Pi'õi wi, imro tiwi 're dâ'â za'ra mono wamhã, isimiroti hã te te 're wapari za'ra mono õ di za oto. 'Re mro zahu za'ra mono wapsi, te za duré timro tém nhimiroti hã te te 're 'madâ'â pese za'ra apâ. Tane hã 'Re ihâimana u'âsi mono nhimiroti 'rata na rob'ui'éré hã asina tãma ãma 're i'uwaimrami za'ra wa'aba mono zéb zarina, 'Re ihâimana u'âsi mono, aiwasédé hã te te oto ai'ãma 're ab'madâ'â aba mono tõ da, 're asi'madâ'â za'ra wa'aba mono õ di za oto, pi'õi wi imro 're dâ'â za'ra mono wa, isimiroti te te oto 're i'madâ'â za'ra mono õ ne. Tâibâ oto. Cristuhu ãma si, te za oto 're anomro aba mo, pi'õ hã apâ 're imro zahu za'ra mono norĩ, timro tém nhimiroti te te 're iwapari pese za'ra mono ne.

Roma 8:1

Cristu Zezusihi ãma 're inomro mono norĩ hã, 'Re ihâimana u'âsi mono te te siwi 're i'awẽ'õ mono zé hã hâimana õ di oto. Taha zarina, te te duré oto 're ahâ za'ra mono õ di za.

1 Corĩtu 15:45

Duréihã Mozési hã ma tô ãne na ãma rob'ui'éré: “'Re ihâimana u'âsi mono hã ma tô aibâ hã poto 'rata, Adã na isisi hã. A'uwẽ hâiba na 're morĩ da, ma tô poto 'rata tô.” Tane nherẽ, Adãhã ne te tô 're hâimana, 'Re ihâimana u'âsi mono 'rata, dadâ'â ãna 're danomro mono da, te te dama 're i'apisutu mono hã, Ipẽ'ẽzani nhimipisutuzéb zarina. Ta hã Zezusi.

2 Corĩtu 3:17

Wanhib'apito si, wa te 're saze za'ra mono wamhã, Tipẽ'ẽzani ma, te za te te 're wa'apisutu, taha si te te 're wa'apawapto mono da, rowẽ na ãma 're wanomro mono da, marĩ na wasi'uihâ na wa te wasina tãma ãma 're i'uwaimrami za'ra mono zém na, 'râwi 're wasi'madâ'â za'ra mono tõ da, duré taha zarina, 'Re ihâimana u'âsi mono hã te te 're wa'anho'reptui mono da newa.

2 Corĩtu 3:6

Taha si ma tô te te 're wapawapto, te te dama iropisutuzép téb zarina, wa te dama 're romhuri wẽ mono da. E niha tawamhã, 'Re ihâimana u'âsi mono te te dama iropisutuzép té hã. E 'Re ihâimana u'âsi mono nhimiroti 'rata na Mozésihi nhimi'ui'éré, te wasu'u, ã hã. Mare di. 'Re ihâimana u'âsi mono pẽ'ẽzani nhimipawaptobzéb zarina 're idanomro mono zép té, te wasu'u, ã hã. Mozésihi nhimi'ui'éré zarina 're danomro mono nherẽ, e taha zarina te za 're dasisõ'reptu za'ra, ropipa hawimhã. Mare di. Ni'wa hã te te sina uwaimrami waihu'u õ di, Mozésihi nhimi'ui'éré hã. 'Re ihâimana u'âsi mono te te dama iropisutuzép té hã da te 're saze za'ra mono wapsi, te za Ipẽ'ẽzani hã te te 're da'anho'reptu ropipa hawimhã, rowẽ na isiré 're dahâimana u'âsi za'ra mono da oto.

Galata 2:19

Ãne te aré ĩnhimirosa'rata 'rada hã ĩma 're hâimana: 'Re ihâimana u'âsi mono nhimiroti 'rata na rob'ui'éré zarina te 're rob'manharĩ mono wamhã, taha zarina si ĩwasédé hã te te ĩ'ãma 're 'madâ'â mono õ di za. Tawapsi te za oto te te 're ĩwẽsãmri. Taha zarina ĩwasété 'ru te, rob'rãsutuzéb ãma te te ĩ'azâri õ di za, 'Re ihâimana u'âsi mono hã. Ãhã na ĩnhimirosa'rata 'rada hã te oto ĩza'u 're simi'wara. Ta hã wa tô oto rẽme pese ĩsipara, 'Re ihâimana u'âsi mono te te ĩma iwaihu'uzéb uwaibaba si 're ĩmorĩ da. Zezu Cristu, wedepo'o nhonhi'rãmi na dâ'â wa, isiré ĩdâ'â ne, ĩsi'uihâ na te ĩsima 're irosa'rata mono zém na 're ĩhâimana mono õ di oto, Cristuhu si oto ĩpẽ'ẽ 're, 're hâimana mono wa, 're ĩwada'uri wẽ mono 'wa da hã. Cristu hã, 'Re ihâimana u'âsi mono 'ra. Ta hã te te 're ĩzawi pese mono wa, ma tô ĩzada sisõ, ĩzada dâ'â da. Tahawa, 'Re ihâimana u'âsi mono 'ra umnhasi sina, wa oto 're ĩhâimana.

Galata 5:1

Zezu Cristu hã ma tô wa'anho'reptui pa, rowẽ na ãma 're wahâimana za'ra mono da. Tahawa, 'Re ihâimana u'âsi mono nhimiroti 'rata na rob'ui'éré zarina, wa te 're irob'manharĩ za'ra mono zém na, 're wanhopré mono õ di za oto, taha zarina te te õ hã 're wa'anho'reptui mono õ wa oto. Ãne wa, tô senai'õ na rowasu'u'wa norĩ wi 're asiptete za'ra wa'aba mono za oto, isimiroti na 're aihâimana za'ra wa'aba mono wa, apâ robzei'õ na 're anomro aba mono tõ da.

Galata 6:2

Marĩ wa, aiwi 're robzei'õ za'ra wa'aba mono wamhã, ma'ãpé 're asipawapto pese za'ra wa'aba mono, roti iwẽ na si. Ãne wamhã, Cristuhu nhimiroti wẽ 'madâ'â'wa te za tô 're aihâimana za'ra wa'aba mo.

Tiagu 1:25

'Re ihâimana u'âsi mono nhimiroti hã wẽ uptabi di. Ta hã wapawapto'wa da, te wama 're hâimana, wawasédé, wa te 're irẽme pese za'ra mono zéb da hã. Tawamhã isimiroti na da te 're rosa'rata pese za'ra mono wamhã, duré õne u'âsi ãma 're dahâimana za'ra mono wamhã, taré imreme wapari'wa 're danomro mono õ di za. Tô sena imreme wapari pese 'wa, te za oto 're danomro. Taha zarina rowẽ u'âsi te za ãma 're dahâimana za'ra.

Apocalipsi 11:11

Tawamhã si'ubdatõ bâdâ, ãma ineb zahuré zé wãiwa pari, te za 'Re ihâimana u'âsi mono hã ipẽ'ẽzani hã apâ tãma sõmri zahuré, hâiba ré 're neb zahuré da apâ. Taha pari, te za oto hâiwi aima'wara zahuré. Sima'wara zahuré wamhã, te za tãma tapẽ'ẽwara za'ra ni, da te i'madâ'â za'ra norĩ hã.

Apocalipsi 22:1

Tawamhã hâiwa ãma 'Re ihâimana u'âsi mono ma romhuri'wa hã, tô õ hã ma tô duré ĩzaprõ, â u'â hã te 'madâ'â da. Â u'â hã da te 're âhuri mono wa, dato sina 're idanomro u'âsi mono zé hã. Simhi zarob'a uptabi ne â zarob'a uptabi di, â u'â hã. Panho'u 're ipraba za'ra mono ne, te 'Re ihâimana u'âsi mono norĩ simasisizéb zahâpâ hawi tipraba, Pone'ẽrebâ simasisizéb zahâpâ hawi me.