Roma 8:1 - ꞌRe Ihâimana Uꞌâsi Mono Zadawa Wasuꞌu

¹ Cristu Zezusihi ãma 're inomro mono norĩ hã, 'Re ihâimana u'âsi mono te te siwi 're i'awẽ'õ mono zé hã hâimana õ di oto. Taha zarina, te te duré oto 're ahâ za'ra mono õ di za.

Roma 8:1 ပူးပေါင်းရင်းမြစ်များ

Zuwã 14:20

Apâ we atẽme ĩwisi za'ra wa'aba wapsi, te za ĩwaihu'u za'ra wa'wa, Ĩmama ãma 're ĩhâimana mono na. Ĩ'ãma 're aihâimana za'ra wa'aba mono na, te za asina 're ĩwaihu'u za'ra wa'aba mo. Wa hã ai'ãma wa'aba 're ĩhâimana mono na te za duré asina 're ĩwaihu'u za'ra wa'aba mo.

Zuwã 15:4

Ma'ãpé ĩ'ãma 're aihâimana za'ra wa'aba mono za. Tawamhã wa za 'râwi ai'rata 're ĩhâimana u'âsi za'ra wa'wa. Uwa 'ru panhipti sisa'riti amo hã 're sab u'âsi mono õ wamhã, 're 'rãi mono õ di za, ta hã. Tane a norĩ wa'wa hã ĩ'ãma 're aihâimana u'âsi za'ra wa'aba mono õ wamhã, 're anomro wẽ waihu'u aba mono õ di za.

Zuwã 5:24

— Ĩmreme hã da te 're wapari za'ra mono wamhã, duré we ĩzatõrĩ'wa hã da te dasina 're umnhasi za'ra mono wamhã, te za dapẽ'ẽ na da te sina 're uwaimrami siromo za'ra, rowẽ na 're idahâimana u'âsi za'ra mono zé hã. 'Re ihâimana u'âsi mono nhimihâzé hã da te dasina 're waihu'u za'ra mono õ di za. Te za dapẽ'ẽ na ãma saprĩ siromo za'ra ni, dapẽ'ẽ 're, dadâ'â u'âsi 're idahâimana za'ra mono zém hawi, dapẽ'ẽ 're rowẽ na 're idahâimana u'âsi za'ra mono zéb u hã.

Roma 16:3

Ma'ãpé, duré ĩma sawi za'ra wa'aba za, Prisila norĩ hã Aquiraha me, te ãma isawi zahuré zéb zarina, rob'ui'éré na.

Roma 16:7

Duré asiwi ĩma sawi zahuré wa'aba, Ãdronicu norĩ hã, Zuniasihi me. Ta norĩ hã ĩsiré zudeu norĩ, ma tô ĩsiré tihâimana zahuré, dazazéb 'remhã. Cristuhu zadawa wasu'u'wa norĩ siré te te 're romhuri zahuré mono wa, tãma waihu'u pese za'ra di, isiré romhuri'wa norĩ ma hã. Ta norĩ hã ma tô ĩwana saze na'rata zahuré, Cristu hã.

Roma 5:1

Wanhib'apito Zezu Cristu hã ma tô te te sima 're wa'awẽ, wa te wasina 're i'umnhasi za'ra mono zéb zarina. Tahawa, 'Re ihâimana u'âsi mono hã ma tô te te sima wa'ãma 're aroti, wa te 're isazei pese za'ra mono na, wawasédé hã te te oto wa'ãma 're ab'madâ'â tõ mono da, taha zarina si te te duré 're wa'awẽsãmri mono da, wawasété na 're wanomro mono nherẽ, te te 're wa'ahâ za'ra mono tõ da. Tahawa, rowẽ u'âsi, wa oto ãma 're wanomro, 'Re ihâimana u'âsi mono ãma hã.

Roma 5:16

Adã hã tiwasédé te te i'manharĩzém hawim haré, te dawasédé hã da te 're 'manharĩ u'âsi za'ra oto. Taha zarina, ma tô 'Re ihâimana u'âsi mono hã te te siwi 're da'awẽ'õ pese, dawasédé hã te te da'ãma 're i'awaihu'u mono zéb zarina. Tane nherẽ, ta hawim haré, dawasédé hã da te 're 'manharĩ u'âsi za'ra mono nherẽ, dama isõprubzém na te oto da'ahâ na te te 're da'awẽsãmri 'Re ihâimana u'âsi mono hã, i'ra dazada idâ'âzém na. Ãne wa, 'Re ihâimana u'âsi mono, dama 're isõpru mono zé hã, pire uptabi di, Adãhã nhimi'manharĩzé ma hã.

Roma 7:17

Uburé marĩ iwasédé hã te 're ab'manharĩ mono da, te ĩsima 're awẽ mono õ nherẽ, ĩwasédé hã ĩpẽ'ẽ 're, ĩma 're ihâimana mono zéb zarina, wa te te 're ab'manharĩ u'âsi tô, te ĩsiwi 're awẽ'õ waihu'u mono ãna.

Roma 7:20

Uburé marĩ iwasédé hã te ĩsima 're awẽ'õ mono nherẽ, te 're ab'manharĩ mono wamhã, e ĩsi'uihâ na te ĩsima iwẽzéb zarina, wa te te 're ab'manharĩ. Mare di. Ĩwasédé hã ĩpẽ'ẽ 're, ĩma 're ihâimana u'âsi mono zéb zarina si, wa tô te 're ab'manharĩ tô.

Roma 8:11

'Re ihâimana u'âsi mono hã Zezusihi hâiwa'utu'wa hã, Ipẽ'ẽzani te aipẽ'ẽ 're, 're sãmra za'ra wa'wa. Tô õ hã Cristu te te ihâiwa'udu hã te za aihâiba hã niwamhã aiwi 're si'utõrĩ pese za'ra wa'aba mono nherẽ, te te 're aihâiwa'utu za'ra wa'wa, Ipẽ'ẽzani hã aipẽ'ẽ 're, 're isãmra za'ra wa'aba mono zéb zarina.

Roma 8:14

Uburé 'Re ihâimana u'âsi mono pẽ'ẽzani 'madâ'â sina 're ihâimana za'ra mono norĩ si, te 'Re ihâimana u'âsi mono 'ra, 're nomro, Ipẽ'ẽzani te te 're isimroi wẽ mono norĩ hã.

Roma 8:2

'Re ihâimana u'âsi mono pẽ'ẽzani hã ma tô te te 're wa'apisutu, Cristu Zezusihi ãma si 're wanomro wẽ u'âsi mono da. Taha zarina, ma tô ĩwasété u'âsi 're ĩhâimana mono nherẽ, ĩnho'reptu, ĩpẽ'ẽ 're, ĩdâ'â u'âsi aré 're ĩhâimana mono zém hawi. Tiwaihu'u pese na ma tô ãne hawi duré ĩnho'reptu.

Roma 8:39

Uburé marĩ hã hâiwa na 're isimasa mono hã duré ti'ai 'rowi 're ihâimana za'ra mono hã te te wawi 're sawi waihu'u za'ra mono õ di za, 'Re ihâimana u'âsi mono nhimizawi pese zé hã. Uburé 'Re ihâimana u'âsi mono te te i'apoto mono hã, niwamhã te te wawi 're sani waihu'u za'ra mono õ di za tô, isimizawi pese zé hã. Robaba uptabi di. Wanhib'apito Cristu Zezusihi ãma si 're wanomro mono wa, te te 're wa'azawi pese uptabi, 'Re ihâimana u'âsi mono hã, õne u'âsi.

Roma 8:4

Ãne ma tô 'Re ihâimana u'âsi mono hã 'manha, isimiroti na rob'ui'éré hã wa te wasina 're i'uwaimrami za'ra mono zéb da hã, Ipẽ'ẽzani, wa te 're i'madâ'â pese za'ra mono zéb zarina, wapẽ'ẽ 're wanhimirosa'rata wasété na 're wahâimana za'ra mono õ wamhã.

Roma 8:9

Tane nherẽ, a norĩ wa'wa hã aipẽ'ẽ 're, aiwasédé hã aima 're ihâimana za'ra wa'aba mono zéb zarina, 're anomro aba mono õ di oto. 'Re ihâimana u'âsi mono pẽ'ẽzani te te aima 're ipisutu za'ra wa'aba mono zéb zarina si, te oto 're aihâimana wẽ za'ra wa'aba mo, Ipẽ'ẽzani hã sena na aipẽ'ẽ 're, 're sãmra za'ra wa'aba mono wa. Ni'wam norĩ ma, Ipẽ'ẽzani, ipẽ'ẽ 're, tãma 're hâimana za'ra mono õ wamhã, ta norĩ hã Cristuhu nhib'a'uwẽ 're hâimana za'ra mono õ di za.

1 Corĩtu 1:30

'Re ihâimana u'âsi mono nhimipisutuzéb zarina si, te oto Cristu Zezusihi ãma 're anomro aba mo. Cristuhu ãma si oto 're anomro aba mono wa, te tinhimirowaihu iwẽ hã te te aima 're waihu'u u'âsi za'ra wa'wa. Cristuhu dâ'âzém na si, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Taha zarina si, ma tô duré te te 're wa'apisutu, isib'a'uwẽ si oto tãma 're wahâimana wẽ za'ra mono da. Taha zarina si, ma tô duré wawasété hawi wa'anho'reptu, sitẽme te te 're wa'awaibui mono da.

2 Corĩtu 12:2

Duréihã 'Re ihâimana u'âsi mono, ma tô ĩzaprõ, hâiwa u, 're isãmra mono zéb u. Wa hã Cristuhu zazei'wa. Ĩnhotõ 'rowim ne, hâiwa u ĩmorĩzém na hã 14 na ma tô ĩ'ãma tiwahu oto. Ãté ĩhâiba u'âsi na, wa tô wi. Ãté ĩpẽ'ẽzani na si. Wa hã ĩsiwaihu'u õ di. 'Re ihâimana u'âsi mono ma si, waihu'u pese di, ãne hã.

2 Corĩtu 5:17

Ni'wam norĩ hã Cristu te te 're saze za'ra mono wa, simisutu tihâiba na sina 're sitob za'ra mono wamhã, 're idapoto téb za'ra mono zéb ré si, te za oto 're hâimana za'ra. Tahawa, te za 're inomro 'rata mono zé hã tãma 're si'utõrĩ za'ra. Ãhã wamhã, 're ihâimana 'rata za'ra mono zé hã tâibâ za oto. Taha wa'rãmi, te za oto 're idahâimana téb za'ra mono zém na si 're hâimana za'ra, iwẽ na si.

Galata 3:13

Wa norĩ hã wa te dame wasina tãma ãma 're uwaimrami za'ra mono õ di, 'Re ihâimana u'âsi mono nhimiroti mono hã. Tahawa, te aré duré te te siwi 're wa'awẽ'õ, 'Re ihâimana u'âsi mono hã. Tawapsi hã te aré duré wahâ za'ra, wawasété za'ra 'ru te. Tane nherẽ, te te 're wahâ za'ra mono tõ da, ma tô Cristu hã wẽ nherẽ, wazada sisõ, wa'upana 'Re ihâimana u'âsi mono te te azâri da. Taha na ma tô wa'awa'â, Cristu hã. Duréihã ma tô ãne na ãma rob'ui'éré ni: “Ni'wa hã wasété uptabi wa, te za dasiwi wĩrĩ ni. Taha pari, wede na te za dasiwi sasõmri ni, da te ãma waihu'u za'ra da, wasété uptabi wa, 'Re ihâimana u'âsi mono ma iwẽ õ na.” Tawamhã ãma irob'ui'érézéb zarina, Cristu hã wẽ nherẽ, wedepo'o nhonhi'rãmi na sa'o ré, ma tô siwi wẽ'õ, 'Re ihâimana u'âsi mono hã. Wa'upana ma tô azâ, wasété õ nherẽ.

Galata 3:28

Taha zarina, 'Re ihâimana u'âsi mono hã te te siwi 're da'aba'a waihu'u mono õ di, zudeu norĩ hã, duré zudeu'õ norĩ hã, iwada'uri zarina si, pawa'âbâ ãna dama romhuri'wa norĩ hã, duré wada'uri ãna si'uihâ na 're ihâimana za'ra mono norĩ hã, aibâ norĩ hã, duré pi'õ norĩ hã. Simisutu Cristu Zezusihi nhib'a'uwẽ si, te 're aihâimana za'ra wa'aba mo. Tahawa, te oto Abra'ãhã nhihudu na te te 're asisi za'ra wa'wa, 'Re ihâimana u'âsi mono hã. Ãhã wa, iwẽ na si, Abra'ãhã ma te te iropisutuzéb zarina, te za iwẽ na si te te aima ãma 're a'uwaimrami 'wa, Aimama 'wa hã.

Galata 5:16

Wa norĩ hã marĩ iwẽ'õ na ãté 'râwi wapẽ'ẽ 're, wa za wasima wa te 're rosa'rata za'ra. Ãne na te te sima 're wa'awẽ mono õ di, 'Re ihâimana u'âsi mono pẽ'ẽzani hã. Marĩ iwẽ na si 'râwi wapẽ'ẽ 're, wa te wasima 're rosa'rata za'ra mono da, te za te te sima 're wa'awẽ. Tawamhã marĩ iwẽ'õ na 'râwi wapẽ'ẽ 're, wa te wasima 're rosa'rata za'ra mono wamhã, te za te te 're wa'a'uwati, 'Re ihâimana u'âsi mono pẽ'ẽzani hã, wa te wasima ãma 're rob'manharĩ za'ra mono tõ da. Tahawa, wa za ãne aima waihu'u za'ra wa'wa. Ma'ãpé, 'Re ihâimana u'âsi mono pẽ'ẽzani nhimiwada'uri zarina si, 're anomro aba mono za oto. Tawamhã siwa'ru marĩ iwẽ'õ na aipẽ'ẽ 're asima 're rosa'rata za'ra wa'aba mono nherẽ, asina hã 're rob'manharĩ za'ra wa'aba mono õ di za.

Galata 5:25

'Re ihâimana u'âsi mono pẽ'ẽzani hã ma tô wama tisõ, wahâimanazép té hã iwẽ hã. Tahawa, ma'ãpé isimiwada'uri zarina si, 're wanomro wẽ wa'aba mono oto.

Éfézu 1:1

Wa hã Paulu, Cristu Zezusihi zadawa wasu'u'wa, wa 're ĩhâimana, 'Re ihâimana u'âsi mono te te sima ĩwẽzéb zarina. Tahawa, wa ãma aima rob'ui'éré za'ra wa'wa, Éfézu na 'ri nho'õmo nhisi ãma, 'Re ihâimana u'âsi mono nhib'a'uwẽ, 're i'aihâimana za'ra wa'aba mono norĩ ma. A norĩ wa'wa hã ma tô õne u'â Zezusihi ãma si 're anomro aba mo, aihâimana nhiptete sina.

Filipu 3:9

Misi haré Cristuhu ãma si oto 're ĩhâimana mono da, wa tô ĩhâimanazéb 'rada hã 'râwi ĩsiwi wẽ'õ pese. 'Re ihâimana u'âsi mono nhimiroti na Mozési te te ãma irob'ui'éré hã, ĩsi'uihâ na te 're i'madâ'â pese mono na 'Re ihâimana u'âsi mono te te ĩwẽsãmri da, ĩsina 're ĩnhimipari mono õ di oto. Cristu hã te ĩsina 're i'umnhasi mono zéb zarina si, 'Re ihâimana u'âsi mono te te ĩwẽsãmrizéb ré si, wa oto 're ĩhâimana, taha si te te ĩpisutu wa oto.