Roma 7:7 - ꞌRe Ihâimana Uꞌâsi Mono Zadawa Wasuꞌu

⁷ Tawamhã e 'Re ihâimana u'âsi mono nhimiroti 'rata na rob'ui'éré hã wasété di, Mozési te te ãma irob'ui'éré na hã. Mare di. Wasété õ di. Ãhã wasu'u hawi, wa tô wa hã ĩwasété na ĩsiwaihu'u, 'râwi. Ãne, 'Re ihâimana u'âsi mono nhimiroti 'rata wasu'u hã: “Marĩ iwẽ hã dawi 're 'ruiwapari za'ra wa'aba mono õ di za.” Ãne hã te waihu'u õ 'wa'âhã, aré ĩwasété na ĩsiwaihu'u õ di, marĩ te ĩsima i'ruiwaparizém na hã.

Roma 7:7 ပူးပေါင်းရင်းမြစ်များ

Zenezi 3:6

Tawamhã pi'õ te rowede iwẽ na hã 'madâ. Duré i'rã da te 're ihuri mono da hã te 'madâ'â ze na hã sima 'madâ. Tahawa, ma tô 'râwi duré sina rosa'rata, te te 'rẽne wamhã, za simiza'rese na rowaihu'u wẽ na 're ihâimana mono na hã. Tahawa, ma tô 'mata. Ma tô ti'rẽ. Taha pari, ma tô timro ma tisõ. Tawamhã taha zama ma tô duré oto ti'rẽ.

Salmu 119:96

Uburé marĩ sitõ pese na we 're ihâimana za'ra mono zém na hã, wa tô waihu'u. Tane nherẽ, te asimiroti sitõ pese ãna 're hâimana u'âsi.

Ezodu 20:17

— Asiré nhorõwa hã 're 'ruiwapari za'ra wa'aba mono tõ. Duré asiré mro hã 're 'ruiwapari za'ra wa'aba mono tõ, pawa'âbâ ãna tãma romhuri'wa norĩ zama, ite powawẽ hã, duré ite awaru po're pore hã. Siwa'ru uburé marĩ tãma 're ihâimana za'ra mono hã 're 'ruiwapari za'ra wa'aba mono tõ.

Mateu 5:28

Ãne na roti hã tô sena nherẽ, wa za oto wa hã aimawi aima roti za'ra wa'wa, tô õhõ rotizém na hã. Ni'wam norĩ hã pi'õ, titõmo na te te 're 'madâ'â ze za'ra mono wa, te te 're waibui mono da, te te sima ãma 're rosa'rata za'ra mono wamhã, taha na zama te za tiwasédé hã te te 're 'manharĩ za'ra, tinhimirosa'rata na si nherẽ.

Luca 12:15

Tawamhã te uburé dama tinha, ãne: — Ma'ãpé, ĩwapari pese za'ra wa'aba. 'Râwi te za 're asi'madâ'â za'ra wa'aba mo, asimarĩ ahâ zô, 're rob'ruiwapari za'ra wa'aba mono tõ da. Danhimarĩ ahâ uptabi nherẽ, robze u'âsi, ãma 're danomro mono õ di za, rowẽzéb õ wa, ta hã.

Luca 20:16

Te za sô timorĩ za'ra, uburé te te uprosi da. Tawamhã te za duré aimawi da'maipisutu, tiburu 'madâ'â'wa da hã. Tawamhã isimirowasu'u hã da te wapari za'ra wamhã, te nharĩ za'ra ni, ãne: — Rowasédé hã watobro õ neza.

Zezusihi zadawa wasuꞌuꞌwa norĩ nhimiromhuri na robꞌuiꞌéré 20:33

Wa hã danhibrob zô, te 're rob'ruiwapari mono õ di, rob'uiprazéb zô duré da'uzazéb zô.

Roma 13:9

Duréihã 'Re ihâimana u'âsi mono, Mozésihi ma, te te iwaihu'uzéb zarina te te ãma dama irob'ui'érézé hã, ãne: “Aimro na asiwi 're asimisaihuri za'ra wa'aba mono õ di za. Duré 're danhimroi wa'aba mono õ di za. Duré dawi 're asimisaihuri za'ra wa'aba mono õ di za. Duré marĩ iwẽ hã dawi 're 'ruiwapari za'ra wa'aba mono õ di za.” Ã norĩ hã, duré aimawi hã isimiroti hã ahâ uptabi nherẽ, simisutu haré te wasu'u isimiroti hã, ãne: “Te za 're idazawi pese za'ra wa'aba mo, aihâimanazé hã 'râwi asima 're isawi pese za'ra wa'aba mono ne.”

Roma 3:20

E 'Re ihâimana u'âsi mono nhimiroti 'rata na rob'ui'éré zarina, marĩ hã da te 're i'manharĩ wẽ za'ra mono na, te za te te sima da'ãma 're aroti, dawasédé hã te te oto da'ãma 're ab'madâ'â tõ mono da, taha zarina te te oto 're da'awẽsãmri mono da, dapo're'õ nherẽ, te te 're da'ahâ za'ra mono tõ da. Mare di. Taha nai õ di. Uburé marĩ hã da te 're i'manharĩ wasété za'ra mono na, 'râwi 're dasiwaihu'u za'ra mono da si, te dama 're hâimana, rob'ui'éré 'rada hã.

Roma 3:5

Ni'wam norĩ hã te ãne na te te si'ãma 're rosa'rata upa za'ra: “Wa norĩ hã wahâimana wasété na si, wa za oto 're wahâimana za'ra, 're iwanomro wasété uptabi mono na, da te 're wawaihu'u za'ra mono wa, 'Re ihâimana u'âsi mono si wasété ãna 're imorĩ wẽ uptabi na, da te 're waihu'u za'ra mono da, wanhipai u. Tawamhã wahâimana wasété na 're wahâimana za'ra mono nherẽ, e te za te te 're wa'ahâ za'ra, 'Re ihâimana u'âsi mono hã. Mare di. Te te 're wa'ahâ za'ra mono õ di za.” Ãne te ni'wam norĩ hã te te si'ãma 're rosa'rata upa za'ra.

Roma 4:1

E niha wa za tawamhã wa te wasima 're wasu'u 'rãzarõtõ za'ra, Abra'ã wasiré zudeu norĩ hi'rada hã. E niha ihâimanazé hã.

Roma 4:15

'Re idahâimana wẽ za'ra mono zéb da hã, dasi'uihâ na da te dasima 're ipisutu za'ra mono zé hã dama 're hâimana za'ra mono õ 'wa'âhã, aré da te ãma 're upai waihu'u za'ra mono õ di. Tane, 'Re ihâimana u'âsi mono nhimiroti na Mozési te te irob'ui'érézé hã dama 're hâimana za'ra mono õ 'wa'âhã, aré da te ãma 're upai waihu'u za'ra mono õ di duré. Tane nherẽ, te tô dama 're hâimana, isimiroti na rob'ui'éré 'rada hã. Tahawa, da te 're waihu'u pese za'ra mono nherẽ, da te 're 'madâ'â pese za'ra mono õ wamhã, 'Re ihâimana u'âsi mono te te 're ida'ahâ za'ra mono zé, te wasu'u.

Roma 5:20

Duréihã 'Re ihâimana u'âsi mono ma tô Mozésihi ma tinhimiroti hã waihu'u, te te ãma rob'ui'éré da, ãma 're dasipo're pu'u za'ra mono wa, dawasédé hã da te oto dasina 're waihu'u za'ra mono da. Tane nherẽ, ma tô dawasédé hã da te dasima 're sa'ẽtẽ u'âsi za'ra. Tane nherẽ, dawasédé da te dasima 're isa'ẽtẽ za'ra mono zém nhipai u, ma tô 'Re ihâimana u'âsi mono hã te te dama 're arob'manharĩ wẽ, da'ãma 're isiwamri u'âsi mono zéb zarina.

Roma 6:15

Tawamhã ãté ãne te za asima 're inharĩ za'ra wa'aba mo: “'Re ihâimana u'âsi mono nhimiroti na Mozési te te irob'ui'érézé hã wa te 're i'madâ'â pese za'ra mono zéb zarina, te te sima wa'ãma 're aroti mono õ di, taha zarina wawasédé hã te te oto wa'ãma 're ab'madâ'â tõ mono da, taha zarina te te 're wa'awẽsãmri mono da. Tinhimizawi pese zéb zarina si, ma tô te te 're wa'awẽsãmri, wawasété na 're wahâimana za'ra mono nherẽ, wa'ãma 're pẽ'ẽzé za'ra mono wa. Tahawa, wa za wawasédé hã duré apâ wa te 're 'manharĩ u'âsi za'ra õne u'â, 'Re ihâimana u'âsi mono hã dawasété nherẽ, simizawi pese wa.” Ãne na asima 're rosa'rata za'ra wa'aba mono õ di za. Tô'ã.

Roma 7:11

'Re ihâimana u'âsi mono nhimiroti 'rata si te 're i'madâ'â pese mono na, ĩwasédé hã te te oto ĩ'ãma 're 'madâ'â tõ mono da, te te sima ĩ'ãma roti da newa, wa tô aré ĩnhimiza'rese ãna 're ĩhâimana. Taha zarina, wa tô aré ĩpẽ'ẽ 're, ĩdâ'â u'âsi 're ĩhâimana, 'Re ihâimana u'âsi mono nhiti hã.

Roma 7:13

E tawamhã, 'Re ihâimana u'âsi mono nhimiroti 'rata na rob'ui'éré hã wẽ uptabi nherẽ, e taha zarina, wa tô aré ĩpẽ'ẽ 're, ĩdâ'â u'âsi 're ĩhâimana. Mare di. Ĩwasété na 're ĩhâimana 'rata mono zéb zarina si, wa tô aré ĩdâ'â u'âsi 're ĩhâimana. Taha zarina, wa tô 're ĩhâimana wasété mono zém na ĩsina waihu'u. Uburé marĩ iwasédé hã da te 're i'manharĩ za'ra mono zé hã iwasété uptabi na wa tô duré waihu'u.

Roma 7:5

Wahâimana wasété na 're wahâimana za'ra mono ré, wa tô marĩ iwasété zô si, wa te 're rob'ruiwapari za'ra aré. Taha ré, 'Re ihâimana u'âsi mono nhimiroti 'rata na rob'ui'érézé hã, wawasété ãna 're iwanomro mono zé waihu'uzéb da, wama 're hâimana za'ra mono nherẽ, duré wama waihu'u pese za'ra nherẽ, taha upana si, wa tô marĩ iwasété zô si, wa te 're rob'ruiwapari za'ra, tô õhõ zô si, 'Re ihâimana u'âsi mono te te wawi 're i'azawi mono zô si. Taha zarina wa tô aré wapẽ'ẽ 're, wadâ'â u'âsi ne 're wahâimana za'ra, 'Re ihâimana u'âsi mono nhiti.

Roma 7:8

Ãhã wasu'u na te oto waihu'u wamhã, marĩ hã te dawi 're i'ruiwapari mono zéb da si, wa tô te ĩsima 're rosa'rata u'âsi, 're ĩhâimana wasété mono zéb zarina. 'Re ihâimana u'âsi mono nhimiroti 'rata na rob'ui'éré hã dama waihu'u za'ra õ wa, dawasété na 're dasisãmri waihu'u za'ra mono õ di. Wa hã bété. 'Re ihâimana u'âsi mono nhimiroti 'rata wasu'uzéb zarina si, wa tô ĩsiwaihu'u, ĩwasété na hã.

1 Corĩtu 15:56

E marĩ wa, ma tô aré 're iwadâ'â za'ra mono zé hã siptete na wazada 're hâimana za'ra. Wawasété na 're iwanomro mono zéb zarina, ma tô aré tô siptete na wazada 're hâimana za'ra, te te 're iwa'a'uprosi mono zéb da hã. Duré 'Re ihâimana u'âsi mono nhimiroti na Mozési te te ãma irob'ui'érézéb zarina, 're wanomro wẽ mono õ wa, ma tô aré te te siwi 're wa'awẽ'õ pese, 'Re ihâimana u'âsi mono hã.

Éfézu 5:3

A norĩ wa'wa hã 'Re ihâimana u'âsi mono nhib'a'uwẽ 're anomro aba mono nherẽ, siwa'ru aiwasédé hã 're 'manharĩ za'ra wa'aba mono õ di za, pi'õ na, duré aibâ na zama. Duré aihâimana nhiséb'õ na 're anomro aba mono õ di za. Duré danhibrom na 're da'ruiwapari za'ra wa'aba mono õ di za, ta hã i'uwaibaba õ wa 're idahâimana wasété za'ra mono zé hã.

Colosu 3:5

Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.

1 Tesalonita 4:5

'Re irowasutu za'ra wa'aba mono zô si asima 're rob'ruiwapari za'ra wa'aba mono õ di za. Ta hã, isazei'õ'wa norĩ 're ihâimana za'ra mono zé, 'Re ihâimana u'âsi mono te te waihu'u za'ra õ wa.

Zozué 7:21

Marĩ hã te iwaibu za'ra 'remhã, wa tô Babilonia hawi da'uza ihâpa iwẽ hã 'madâ. Duré ẽtẽ waipo prã prata zama wa tô 200 na iwa'õno hã 'madâ, duré ẽtẽ waipo pré oru aiwa ãma isipo'o na ipire pibuzém na hã. Ã norĩ hã ĩma 'ruiwapari za'ẽtẽ wa, wa tô ĩsima sa'ra za'ra. Ĩte romhâ 'manharĩ na 'ri 're, te daba'wara simi'uri pese na, ti'ai 'rowi. Da'rowimhã prata hã te duré daba'wara.