Roma 7:14 - ꞌRe Ihâimana Uꞌâsi Mono Zadawa Wasuꞌu

¹⁴ 'Re ihâimana u'âsi mono nhimiroti 'rata na Mozési te te ãma irob'ui'éré hã e ma hawimhã. Ipẽ'ẽzani hawip si. Tane nherẽ, ta hawimhã, wa hã 're ĩhâimana mono õ di. Wa hã a'uwẽ hâiba na 're ĩmorĩ wa, wa ĩhâimana nhib'uware na 're ĩhâimana, ĩsi'uihâ na ĩsina 're ĩnhiptete waihu'u mono õ na hã. 'Re ĩhâimana wasété mono zé ma si, wa tô ĩhâiba hã te 're sõmri u'âsi.

Roma 7:14 ပူးပေါင်းရင်းမြစ်များ

Zenezi 37:27

Wasisãnawã nherẽ, wa te wasiwi wĩrĩ tõ da, taré wa te oto wasiwi wede aba, Ismaeu nhihudu norĩ ma. E marĩ wa. Õ hã tô wasisãnawã, duré wasiwapru 'râwibre hã. Tawamhã ãne te te tãma waihu'u za'ra wa, ma tô isisãnawã norĩ hã ãma siwi saze.

Zenezi 37:36

Taha ré ma tô midiãnita norĩ hã, Zuzé, Ezitu ãma apito 'madâ'â'wa norĩ nhib'ihâ'a Potifaha ma hã siwi wede.

Zenezi 40:15

Sena ĩzada iropsisapẽtẽ hawimhã ma tô hebreu norĩ nhipti'ai hawimhã dasiwi ĩwazere ni, Ezitu u we da te dasiwi ĩzaprõni da hã. Duré ãme Ezitu 'remhã marĩ te 'manharĩ õ nherẽ, ma tô dazazéb u hã we ĩnherẽ ni, ĩzab da.

Salmu 119:25

Wa hã ti'a zapru wamhã wa tô oto nomro. Tahawa, ma'ãpé asimiropisutuzéb zarina ĩnhiptede hã apâ ĩma sõmri.

Salmu 51:6

A hã, dapẽ'ẽ 're, sena na i'uwaibaba na si 're idahâimana za'ra mono zép si aima iwẽ hã. Tahawa ma'ãpé ĩpẽ'ẽ 'remhã asimirowaihu iwẽ hã ĩma sa'ẽtẽ.

Provébiu 30:2

Wa hã abaze ne ĩnhimiza'rese õ pese na wa oto 're ĩhâimana. Ĩnhimirowaihu'uzé hã ĩma hâimana õ di, dama 're ihâimana za'ra mono ne hã.

Provébiu 30:5

“Uburé marĩ na 'Re ihâimana u'âsi mono te te inharĩzé hã tô sena. Õ hã uburé i'wawi 're simapa za'ra mono da, sô 're isõpré mono norĩ ma hã, te ibaihâ zapoto 'manharĩ na dasi'wawi dasimapazém na hã tãma 're hâimana za'ra.

Mateu 16:23

Tawamhã Zezusi hã ma tô aipi'ra, Pedruhu u. Ãne te tãma tinha: — Satanasi, mo oto aimorĩ, ĩnhiti. Marĩ hã bâdâdi wa, 're isimi'wara mono, te te 're ida'marõpãrĩ za'ra mono ne, te ĩwasutu u'âsi mo, Ĩmama te te ĩma ipisutuzéb zarina te ĩsina dama uwaimrami tõ da. 'Re ihâimana u'âsi mono nhimirosa'rata nei õ di, asimirosa'rada hã. Ti'ai ãma danhimirosa'rata zarina si te a hã ĩ'ãma irosa'ra.

Mateu 18:25

Tawamhã te te tãma sõmri waihu'u õ wa, ma tô isib'apito hã dama ti'ru, da te wede da, da te uipra da, imro zama, duré i'ra norĩ zama, pawa'âbâ ãna te te dama 're romhuri za'ra mono da oto. Uburé isibro hã da te dama wede za'ra da hã, ma tô duré dama ti'ru, rob'uiprazé te te tiwi 're i'awaptẽrẽ mono hã te te ãma wa'âbâ da.

Mateu 5:22

Ãne na roti hã tô sena nherẽ, wa za oto wa hã aimawi na aima waihu'u za'ra wa'wa, ãne na roti na hã. Ni'wam norĩ hã tisiré 're ihâimana za'ra mono norĩ da, 're siti'ru za'ra mono wamhã, ta norĩ hã te za 'Re ihâimana u'âsi mono hã te te siwi 're awẽ'õ, iwasété na te te 're i'awaihu'u mono zéb zarina. Duré ãté ni'wa hã te za tisiré ma tinha, ãne: “A hã, marĩ da, 're aihâimana mono õ.” Ãne ni'wam norĩ hã te te dama 're nharĩ za'ra mono wamhã, te za da te 're simro, zudeu norĩ ma roti'wa norĩ u, dawasété na dawaihu'u'wa norĩ tẽme, ta norĩ hã te te siwi 're wẽ'õ za'ra mono da, iwasété na te te siwi 're waihu'u za'ra mono wa. Duré ni'wa hã ãté ãne te za tisiré ma tinha: “E niha asimiza'rese'õ a hã, 'Re ihâimana u'âsi mono wasu'u na hã.” Ãne ni'wam norĩ hã tisiré ma, te te 're nharĩ za'ra mono wamhã, ãté ta norĩ hã te za ropipa u 're sisisi, unhama ro'o u'âsi u.

Mateu 5:28

Ãne na roti hã tô sena nherẽ, wa za oto wa hã aimawi aima roti za'ra wa'wa, tô õhõ rotizém na hã. Ni'wam norĩ hã pi'õ, titõmo na te te 're 'madâ'â ze za'ra mono wa, te te 're waibui mono da, te te sima ãma 're rosa'rata za'ra mono wamhã, taha na zama te za tiwasédé hã te te 're 'manharĩ za'ra, tinhimirosa'rata na si nherẽ.

Luca 5:8

Tebe ahâ na te te awaibui wamhã, ma tô ãma titob'uzu za'ra. Tiagu norĩ zama, ma tô ãma titob'uzu zahuré, Zuwãhã me. Ta norĩ hã Zebedehe 'ra zahuré. Isiré tepe na, te te 're romhuri zahuré, Simahã siré hã. Tawamhã hi'rãtitõ, ma aime Zezusihi papara, Sima Pedru hã, tebe ahâ na te te 'madâ'â wa. Ãne te Zezusihi ma tinha: — Ĩ'rata asãmra õ di za. Te za oto aimo, ĩnhiti. Wa hã ĩwasétére di. Tawamhã Zezusi te asa tãma tinha, ãne: — Asina aipahi õ di za. Tepe na 're iromhuri mono ne, te za oto ĩma 're ida'awaibui wẽ mo.

Luca 7:6

Tawamhã Zezusi te isiré timorĩ za'ra. Ma tô oto rosahutu za'ra, 'ri u. Te te rosahutu za'ra wamhã, romanu hã ma tô tisiwadi norĩ hã 'mazatõrĩ za'ra, te te tãma sadawa wasu'u za'ra da, Zezusihi ma. Tawamhã te te uzusi za'ra wamhã, ãne te tãma rowasu'u za'ra, Zezusihi ma: — Wasiwadi hã zudeu'õ nherẽ, ãté asébré õ di za, u, isõrõwa u. A hã, u, aiwẽ di. Õ hã, u, wẽ prã ti. Wẽ prãi wa, ãté isõrõwa u asébré õ di za, u.

Roma 3:9

Tawamhã wa norĩ hã zudeu norĩ hã e taré zudeu na 're wahâimana za'ra mono wa, te za, zudeu'õ norĩ hâimanazém nhipai u, te te 're wa'awẽsãmri, 'Re ihâimana u'âsi mono hã. Mare di. Uburé aiwapsi tãma 're idahâimana za'ra mono zé hã. Uburé dahâimana wasédé hã da te 're i'manharĩ za'ra mono na si te 're dahâimana za'ra, zudeu norĩ hã duré zudeu'õ norĩ zama. Dawasété hawi, dasi'uihâ na 're dawairébé waihu'u mono õ di, dama siptete wa, dawasédé hã. Ãne, wa tô aima waihu'u pari za'ra wa'wa.

Roma 6:6

Wawasété na 're iwanomro 'rata mono zé hã, tâibâ oto. Cristu hã wedepo'o nhonhi'rãmi na idâ'â siré, ma tô 'Re ihâimana u'âsi mono hã te te wama 're a'uprosi, 're iwanomro 'rata mono zé hã. Marĩ iwasétére si, wa te wasima 're i'ruiwapari u'âsi za'ra mono zém hawi, te te 're wa'anho'reptui mono da, ma tô te te wama 're a'uprosi, 're iwanomro 'rata mono zé hã. Wawasédé hã wa te 're sahâri waihu'u za'ra mono ãna, 're wanomro mono tõ da, ma tô te te wawi 're a'uprosi. Ãne hã wama waihu'u pese za'ra di.

Roma 7:18

Marĩ iwẽ hã ĩpẽ'ẽ 'remhã ĩma 're hâimana mono õ di. Ãne hã ĩma waihu'u pese di. Uburé marĩ iwẽ si te 're ab'manharĩ mono da, te ĩsima 're awẽ mono nherẽ, te ĩsina 're uwaimrami waihu'u mono õ di, ĩsi'uihâ na hã.

Galata 4:3

Tane wa norĩ hã, ai'uté ne, roti sena hã wama iwaihu'u pese za'ra õ zarina, wa tô aré 're wahâimana za'ra, roti da te wama 're iwaihu'u za'ra mono zéb zarina si.

Éfézu 3:8

Ĩwana isazei'wa norĩ hã ĩwẽ na te sipa za'ra õ di. Ta norĩ si ma tô tiwẽ na ĩnhipa za'ra. Tane nherẽ, ma tô ĩpisutu, zudeu'õ norĩ ma te tãma 're wasu'u za'ra mono da, iwẽ hã sa'ẽtẽ na Cristuhu ma 're ihâimana mono hã dama ãma 're isõpru mono zéb da hã.

Hebreu 4:12

'Re ihâimana u'âsi mono zadawa wasu'u hã ihâiba ré ne, te tô wama 're hâimana u'âsi za'ra. Siptete uptabi di duré imreme hã, uburé marĩ hã i'uwaibaba si te te dama ãma 're i'ab'manharĩ mono zéb da hã, 'Re ihâimana u'âsi mono hã. Sib'ézé 'wa pa si'uiwa i'wa pese ne, te wama 're hâimana za'ra, isadawa wasu'u hã. Sib'ézé i'wa pese na te za romnhi hã da te 're nhizazari za'ra, ihi si da te 're urĩrĩ za'ra mono da hã. Tane duré, 'Re ihâimana u'âsi mono zadawa wasu'u hã wa te 're wapari za'ra mono wamhã, 'râwi wapẽ'ẽ na wanhimirosa'rada iwẽ hã duré iwasédé hã wa za wa te ãma 're waihu'u za'ra.