Roma 6:12 - ꞌRe Ihâimana Uꞌâsi Mono Zadawa Wasuꞌu

¹² 'Râwi marĩ na asima 're irosa'rata wasété za'ra wa'aba mono zé hã 're 'madâ'â za'ra wa'aba mono tõ da, te za aiwasété wi asina 're asiptete za'ra wa'aba mo, aipẽ'ẽ na.

Roma 6:12 ပူးပေါင်းရင်းမြစ်များ

Zenezi 4:7

Tô i'uwaibaba na a hã 'manharĩ 'wa'âhã, te aré 're aihâ mo, rowẽ te. Tane nherẽ, ma tô asiwasé, a hã. Tahawa te i'aiwasétézé hã 'ridawa ãma asô mapa. Ta hã te sima wẽ, siptete na asada 're hâimana mono da. Tane nherẽ, te za a hã asiptete na ãma ai'uté da sada asipte.

Salmu 119:133

Ma'ãpé ĩpara na 're ĩmorĩ ré, 're ĩzaprõni wẽ mono, aimreme zarina. Duré iwasédé siptete na ĩzada 're ihâimana mono ma, 're ĩ'madâ'â rẽme mono tõ.

Salmu 19:13

Duré ĩwasédé te ĩsima iwẽzéb zarina, te 're i'a'manharĩ mono hã ma'ãpé tiwi ĩzawi na. Õne u'â te te 're ĩwada'uri mono tõ da hã ma'ãpé tiwi 're ĩnhiptete mono. Tawamhã wa za sena na i'uwaibaba na si 're ĩhâimana. Wa za ĩwasédé ipire nhiti ĩsima iwẽ na oto 're mo, aimreme te 're iwapari mono õ zém na 're ĩhâimana mono nhiti hã.

Roma 13:14

Siwa'ru 'râwi asima iwẽzéb zarina, aipẽ'ẽ 're asimirosa'rata wasété aba na ãma 're rosa'rata za'ra wa'aba mono õ di za. Wanhib'apito Zezu Cristu 're imorĩzém na si te za oto 're aihâimana za'ra wa'aba mo, isine.

Roma 2:8

Duré ni'wam norĩ hã sima si te marĩ na te te 're rosa'rata za'ra, hâiba pisutu ãma 're hâimana za'ra mono da. Ta norĩ hã uburé marĩ iwẽ hã te te siwi 're wẽ'õ za'ra, marĩ iwasété na si 're hâimana za'ra mono da. Ta norĩ si te za 'Re ihâimana u'âsi mono hã sa'ẽtẽ te te 're ahâ za'ra, po're õ wa.

Roma 5:21

Ãne na rowasu'u na, wa za oto aima 'rãsutu za'ra wa'wa. Dawasété na si 're danomro u'âsi mono wa, ma tô aré dapẽ'ẽ 'remhã, dadâ'â ne 're dahâimana u'âsi za'ra, 'Re ihâimana u'âsi mono nhiti. Tane nherẽ, tinhimizawi pese zéb zarina, ma tô 'Re ihâimana u'âsi mono hã Wanhib'apito Zezu Cristu dâ'âzéb zarina te te sima 're wa'awẽ, taha zarina si rowẽ uptabi na 're wanomro u'âsi mono da oto.

Roma 6:14

'Re ihâimana u'âsi mono nhimiroti 'rata na rob'ui'éré hã asina tãma ãma 're i'uwaimrami za'ra wa'aba mono zéb zarina, aiwasédé hã te te oto ai'ãma 're ab'madâ'â aba mono tõ da, 're asi'madâ'â za'ra wa'aba mono õ di za. Tinhimizawi pese zém na si, ma tô 'Re ihâimana u'âsi mono hã ai'ãma 're pẽ'ẽzé za'ra wa'wa, aiwasété na 're aihâimana za'ra wa'aba mono nherẽ. Taha zarina si, ma tô te te 're aiwẽsãmri za'ra wa'wa. Tahawa, te za aiwasété wi asina 're asiptete u'âsi za'ra wa'aba mo oto.

Roma 6:16

A norĩ wa'wa hã dama 're romhuri za'ra wa'aba mono da, aihâiba hã dama 're sõmri za'ra wa'aba mono wamhã, taha nhimiwada'uri na si, te za tô 're aihâimana za'ra wa'aba mo. Ãne hã aima waihu'u pese za'ra wa'aba di. Tane, aihâiba hã aiwasété ma, 're sõmri za'ra wa'aba mono wamhã, te za tô ãma 're asiwasété za'ra wa'aba mo. Taha zarina te za atâ'â u'âsi ne, 're aihâimana za'ra wa'aba mo, aipẽ'ẽ 're, 'Re ihâimana u'âsi mono nhiti. Tane nherẽ, 'Re ihâimana u'âsi mono ma, aihâiba hã 're sõmri za'ra wa'aba mono wamhã, taha nhimiwada'uri na si te za 're aihâimana za'ra wa'aba mo. Tawapsi te za oto te te 're aiwẽsãmri za'ra wa'wa.

Roma 8:11

'Re ihâimana u'âsi mono hã Zezusihi hâiwa'utu'wa hã, Ipẽ'ẽzani te aipẽ'ẽ 're, 're sãmra za'ra wa'wa. Tô õ hã Cristu te te ihâiwa'udu hã te za aihâiba hã niwamhã aiwi 're si'utõrĩ pese za'ra wa'aba mono nherẽ, te te 're aihâiwa'utu za'ra wa'wa, Ipẽ'ẽzani hã aipẽ'ẽ 're, 're isãmra za'ra wa'aba mono zéb zarina.

Roma 8:13

Aipẽ'ẽ 'remhã asimirosa'rata wasété na 're aihâimana za'ra wa'aba mono wamhã, te za atâ'â u'âsi ne 're anomro aba mo, 'Re ihâimana u'âsi mono nhiti. 'Re ihâimana u'âsi mono pẽ'ẽzani nhimipawaptobzém na, uburé aiwasédé 're i'manharĩ za'ra wa'aba mono zé hã asiwi 're uprosi pese za'ra wa'aba mono wapsi, te za 're aihâimana u'âsi za'ra wa'aba mo, 'Re ihâimana u'âsi mono 'rata.

2 Corĩtu 5:4

Ti'ai ãma wahâiba ré u'âsi 're wahâimana za'ra mono õ di za. Ti'ab ré, wa za tô 're wawazidi za'ra, wa te 're robzépata za'ẽtẽ za'ra mono wa, wahâiba na hã. E tawamhã wa za wa te wasima 're rosa'rata za'ra, 're wadâ'â su'u za'ra mono da, wahâiba zô 're rob'é'é za'ra mono hâ. Mare di. Ãne na hã wa te wasina 're rosa'rata za'ra mono õ di za, wa norĩ hã. Tane nherẽ, wa za tô sô 're watob'uzu u'âsi za'ra, 'Re ihâimana u'âsi mono hã wahâiba itém na isi'utõrĩ waihu'u'õ na, za te te wama ãma 're i'azaprĩ mono zéb zô. Ãne wamhã, ti'ab ré aré wahâiba hã wawi 're si'utõrĩ za'ra mono da nherẽ, wa za taha wa'rãmi isi'utõrĩ'õ ré 're wahâimana u'âsi za'ra.

Galata 5:16

Wa norĩ hã marĩ iwẽ'õ na ãté 'râwi wapẽ'ẽ 're, wa za wasima wa te 're rosa'rata za'ra. Ãne na te te sima 're wa'awẽ mono õ di, 'Re ihâimana u'âsi mono pẽ'ẽzani hã. Marĩ iwẽ na si 'râwi wapẽ'ẽ 're, wa te wasima 're rosa'rata za'ra mono da, te za te te sima 're wa'awẽ. Tawamhã marĩ iwẽ'õ na 'râwi wapẽ'ẽ 're, wa te wasima 're rosa'rata za'ra mono wamhã, te za te te 're wa'a'uwati, 'Re ihâimana u'âsi mono pẽ'ẽzani hã, wa te wasima ãma 're rob'manharĩ za'ra mono tõ da. Tahawa, wa za ãne aima waihu'u za'ra wa'wa. Ma'ãpé, 'Re ihâimana u'âsi mono pẽ'ẽzani nhimiwada'uri zarina si, 're anomro aba mono za oto. Tawamhã siwa'ru marĩ iwẽ'õ na aipẽ'ẽ 're asima 're rosa'rata za'ra wa'aba mono nherẽ, asina hã 're rob'manharĩ za'ra wa'aba mono õ di za.

Galata 5:24

Cristu Zezusihi nhib'a'uwẽ 're idahâimana za'ra mono norĩ hã, tiwasédé hã aré te te 're 'manharĩ ze za'ra mono nherẽ, duré tiwasété zô aré te te 're rowasutu za'ra mono nherẽ, 'râwi te za tô oto te te siwi 're wẽ'õ pese za'ra, te te 're 'manharĩ za'ra mono tõ da hã oto.

Éfézu 2:3

Tane wa norĩ hã, wa aré tô wanhimirosa'rata wasété zarina 're wanomro. Wa te wasima 're iwẽ za'ra mono zéb zarina, wa tô aré wa te wasima ãma 're uwaimrami za'ra. Ãne 're wahâimana wasété za'ra mono wa, te aré tô duré dazu wahâ za'ra, 'Re ihâimana u'âsi mono hã.

Éfézu 4:22

'Re anomro wasété aba mono da si, te aré asima 're irosa'rata za'ra wa'aba mo. Tahawa, te aré aiwi 're si'utõrĩ za'ra wa'wa, 're anomro wẽ wa'aba mono zé hã. Tane nherẽ, te za oto irẽme pese za'ra wa'wa, 're aihâimana wasété za'ra wa'aba mono zé hã.

1 Tesalonita 4:5

'Re irowasutu za'ra wa'aba mono zô si asima 're rob'ruiwapari za'ra wa'aba mono õ di za. Ta hã, isazei'õ'wa norĩ 're ihâimana za'ra mono zé, 'Re ihâimana u'âsi mono te te waihu'u za'ra õ wa.

2 Timotiu 2:22

Ãne wa, dahâiba téb ré, dawasété zô 're idasiwasutu za'ra mono norĩ ne, 're aihâimana mono õ di za. Te za asina 're irosa'rata u'âsi mo, aihâimana wẽ na 're aihâimana mono da, duré Wanhib'apito umnhasi sina 're aihâimana mono da zama, duré asimizawi pese na 're aihâimana mono da zama, duré rowẽ na si dasiré 're aihâimana mono da zama. Taha da, te za asina 're irosa'rata u'âsi mo, uburé Wanhib'apito zazei'wa norĩ me, hâimana wẽ sina, isimipawaptobzéb zô te te tiwi 're irowaptẽrẽ za'ra mono norĩ me.

Titu 2:12

Ta hã te te 're wa'azawi pese mono wa, ma tô wama waihu'u, wa te 're rẽme pese za'ra mono da, isazei'õ'wa norĩ hâimanazé hã, dawẽ te, wawasété zô wa te 're rowasutu tõ za'ra mono da, ti'ab ré wasina 're wanhiptete za'ra mono da, 'Re ihâimana u'âsi mono ãma si oto 're wanomro wẽ mono da.

Titu 3:3

Wa norĩ zama hã, Cereta nhihudu norĩ ne, wanhimiza'rese ãna, wa aré tô 're wanomro. Wapo're'õ u'âsi, wa aré 're wahâimana za'ra. Dazadawa nhipese na ma tô da te wama 're rob'rãmi za'ra. Uburé marĩ hã sipu'u pese na, wa tô aré wa te wasima 're wẽ za'ra, iwẽ newa, ãma wama 're robze za'ra mono da hã. Wa tô duré wa te dama 're rob'manharĩ wasété za'ra. Danhimarĩ na da'ruiwapari hã ma tô aré duré wama 're hâimana za'ra duré. Wawasédé hã wa te 're 'manharĩ za'ra mono 'ru te, ma tô aré da te 're wa'ruiwapari za'ra. Wa norĩ wa norĩ zama asa wa te 're da'ruiwapari za'ra aré.

1 Pedru 1:14

Tahawa, te za 'Re ihâimana u'âsi mono nhimiroti hã 're iwapari pese za'ra wa'aba mo. Isimiroti hã 're waihu'u za'ra wa'aba mono õ ré, ma tô marĩ hã iwasété zô si 're irowasutu za'ra wa'aba mo. Taha zarina 're anomro aba mono õ di za oto.

1 Pedru 2:11

Ĩsisãnawã norĩ, ĩma asawi pese za'ra wa'aba norĩ hã, darom nhiti 're idahâimana za'ra mono ne, te 're aihâimana za'ra wa'aba mo, ti'ab ré. Tahawa, marĩ wasété na 'râwi asima 're rosa'rata za'ra wa'aba mono õ di za, asimirosa'rata wasété zarina 're 'manharĩ za'ra wa'aba mono tõ da, aiwasété 'wa hã.

Zuda 1:16

Ta norĩ hã te 're siwapsari u'âsi za'ra, soto wasété na. Si'upana si te duré ta norĩ hã dawasédé hã te te da'ãma 're sa'ra, 're danomro wẽ mono nherẽ. Si'uihâ na marĩ hã te te sima 're iwẽ za'ra mono zéb uwaibaba si, te te 're 'manharĩ za'ra, iwasétére hã. 'Râwi te ta norĩ hã duré sina 're wata u'âsi za'ra, tiwẽ na. Te duré taré dawẽ te te da'ãma 're sa'ra, iwa'rãmi marĩ iwẽ hã da te tãma 're sõmri za'ra mono da.

Zuda 1:18

Ãne ma tô ta norĩ hã wama waihu'u siromo za'ra: “Nimahã na iropsi'utõrĩzéb u hã aibâ norĩ te za dawazari 're hâimana za'ra, iwasété norĩ hã. 'Re ihâimana u'âsi mono hã te te siwi 're wazé mono õ di za. Te za duré ai'ãma 're wa'ẽ za'ra wa'wa. Si'uihâ na marĩ hã te te sima 're iwẽ za'ra mono zéb uwaibaba si, te za te te 're 'manharĩ za'ra, iwasétére hã.” Ãne ma tô wama waihu'u siromo za'ra, Zezu Cristuhu zadawa wasu'u'wa norĩ hã.

Zuize 2:3

Tahawa wa za ãhã na aima nharĩ za'ra wa'wa. Ã hã a'uwẽ norĩ aihawi za'ra wa'aba te isani za'ra da hã, mare di za. Tahawa te za asitob'ru na aima 're hâimana za'ra wa'wa. Te za duré ite za'ra ihâiba'õ norĩ, abazei mramizém ne na te te 're i'aiwaibui wa'aba mono da hã asada 're hâimana za'ra wa'wa.