Roma 5:6 - ꞌRe Ihâimana Uꞌâsi Mono Zadawa Wasuꞌu

⁶ Duréihã 're idahâimana za'ra mono na'rata zém hawimhã, marĩ da te 're i'manharĩ wẽ za'ra mono zém na hã 'Re ihâimana u'âsi mono te te da'ãma sima 're aroti mono õ di, taha zarina dawasédé hã te te oto da'ãma 're ab'madâ'â tõ mono da, duré dapo're'õ nherẽ, te te 're da'ahâ za'ra tõ mono da. Ta hawim haré, dahâimana wẽ zém na 'râwi 're dasi'madâ'â waihu'u za'ra mono õ di, dawasédé hã te te da'ãma 're i'ab'madâ'â mono õ zarina, te te 're ida'awẽsãmri mono zéb da hã, 'Re ihâimana u'âsi mono hã. Taha ré, ma tô Cristu hã dazada dârâ, uburé dawasété na 're idahâimana za'ra mono norĩ zada, 'Re ihâimana u'âsi mono, bâdâ te te ãma ipisutuzé hã iwa iwaptã'ãzém na.

Roma 5:6 ပူးပေါင်းရင်းမြစ်များ

Salmu 1:1

Iwasété norĩ nhimiroti na 're ihâimana mono õ hã, iwasété norĩ hâimanazé nhizusi'õ'wa hã, duré 'Re ihâimana u'âsi mono nhimiroti zarina 're ihâimana za'ra mono norĩ ãma, 're idawa'ẽ za'ra mono norĩ siré 're isãmra mono õ hã te rowẽ na si to sina hã 're hâimana!

Daniéu 11:15

Tawamhã hâiwa nhimi'e niwĩ daza'ru te apito, tite dasi'wapéi 'manharĩ'wa norĩ ré, te za mo. Tahawa, dasi'wapé da, te za wede hâpâ norĩ, nimahã 'ri nho'õmo 'wawi wa'ra 'rãihâ te na te te sima isa'ra mono na hã ãma siwi uirĩ, te te ãma sa'uri za'ra wa, ãma sisisi da. Ãhã wamhã, te za ãma ai'uté za'ra. Tawamhã tô hâiwa nhimi'e niwĩ daza'ru hawi dasi'wapéi 'manharĩ'wa norĩ Ezitu u te te sina irosa'ré za'ra mono hã ezipsiu dasi'wapéi 'manharĩ'wa iwẽ norĩ isiptede asa tihâiba na te te ãma tãma wa'rãmi waihu'u za'ra õ di. Te za tô õne haré da te sate, tãma sib'uwa za'ra wa.

Roma 11:26

Ãne 'Re ihâimana u'âsi mono te te 're isõ'reptu za'ra mono zéb da hã, Izaraéu nhihudu norĩ hã. Ãne na ma tô duréihã Izaia hã ãma rob'ui'éré siro, ta norĩ ãma hã: “Danho'reptui'wa da hã, Zeruzalẽ ãma Siã na sa'a nhisi ãma, dasiré za 're ihâimana mono hã, tame. Ta hã Zacoho nhihudu norĩ 're iwasété za'ra mono zé hã te za te te tãma 're apari.

Roma 4:25

'Re ihâimana u'âsi mono hã ma tô Zezusi hã dama tisõ, da te dasiwi wĩrĩ da, wawasété na 're wanomro mono wa. Ma tô duré hâiwa'utu, taha na te te 're wa'awẽsãmri mono da, wawasédé hã te te oto wa'ãma 're ab'madâ'â tõ mono da, 'Re ihâimana u'âsi mono hã.

Roma 4:5

Tanei õ di, 'Re ihâimana u'âsi mono hã. Marĩ hã da te 're i'manharĩ wẽ za'ra mono na, te 'râwi 're dasi'madâ'â ze za'ra, taha na si 'Re ihâimana u'âsi mono hã dawasédé hã te te oto da'ãma 're i'ab'madâ'â mono õ na, te te sima da'ãma 're aroti mono newa. Tane nherẽ, te te sima da'ãma 're aroti mono õ di, taha na dawasédé hã te te oto da'ãma 're ab'madâ'â tõ mono da, taha zarina te te oto 're ida'awẽsãmri mono zéb da hã. 'Re ihâimana u'âsi mono hã da te dasina 're umnhasi za'ra mono wapsi, te za te te sina 're da'awẽsãmri, dawasédé hã za oto te te da'ãma 're ab'madâ'â mono õ wa, duré dawasété na 're danomro mono nherẽ, te te 're da'ahâ za'ra mono tõ da.

Roma 5:10

'Re ihâimana u'âsi mono nhitob'ru, wa aré 're wanomro. Tane nherẽ, ti'ra dâ'âzém na ma tô wa'ãma 're siwadi za'ra oto. Tawamhã isiwadi oto 're wahâimana za'ra mono wa, te za tô oto Zezusi hã te te 're wa'anho'reptu, dâ'â nherẽ, apâ hâiwa'utu wa, dâ'â ãna 're hâimana u'âsi mono wa za oto.

Roma 5:7

Ni'wa hã uburé danhimiroti wẽ hã te te 're 'madâ'â pese mono nherẽ, taha upana ida'matâ'â da hã, mare di. Ni'wa hã da'ãma 're isiwamri mono, 're 'maihâimana mono wamhã, taha upana si ida'matâ'â da hã, ãté te za 're si'madâ'â za'ra.

Roma 5:8

Tanei õ di, 'Re ihâimana u'âsi mono nhimizawizé hã. Wa norĩ hã wawasété na 're wahâimana za'ra mono nherẽ, ma tô Cristu hã pisutu, wazada dâ'â da, wa'upana. Ãne hã ma tô 'Re ihâimana u'âsi mono hã te te wama 're awaihu'u, te te 're iwa'azawi pese mono zém na hã.

Roma 8:32

'Re ihâimana u'âsi mono hã ti'ra te te wawi sawi za'ra õ di, wazada dâ'â za'ra tõ da. Wa'udâna ma tô wama sõmri za'ra tô, te te wawi sawi za'ra ãna. E tawamhã uburé marĩ iwẽ hã te te wama 're anhomri mono õ di za. Te te wawi 're azawi mono ãna, te za tô te te wama 're anhomri, 'Re ihâimana u'âsi mono hã.

Galata 4:4

Tawamhã bâdâ oto iwa waptã'ã wamhã, 'Re ihâimana u'âsi mono hã ti'ra ãma te te irotizéb zarina, ti'ai u we te te isatõrĩ da hã. We te te satõrĩ wamhã, ma tô pi'õi ma i'ra hã tãma podo oto, zudeu na. Zudeu na poto wa, pire na ma tô tãma 're hâimana, 'Re ihâimana u'âsi mono nhimiroti hã, Mozésihi ma te te 're i'awaihu'u mono hã.

Éfézu 5:2

Cristu te te 're iwa'azawi pese mono zéb zarina, te za oto 're idazawi pese za'ra wa'aba mo. Ta hã te te 're wa'azawi pese mono wa, ma tô sisawi ãna, wazada za'ra hã sisõ, dâ'â da. Tahawa, 'Re ihâimana u'âsi mono ma 're idanhoprub za'ra mono zéb zarina, sisawi ãna sisõmri wa, Wamama ma wẽ uptabi di, wazada idâ'âzé hã.

Colosu 2:13

A norĩ wa'wa hã aipẽ'ẽ 're, 're atâ'â za'ra wa'aba mono ne, ma tô aré 're anomro aba mo, aiwasété si 're 'manharĩ u'âsi za'ra wa'aba mono wa, duré 'Re ihâimana u'âsi mono nhiti 're aihâimana u'âsi za'ra wa'aba mono wa aré. Taha ré, ma tô oto 'Re ihâimana u'âsi mono hã te te aima 're pisutu za'ra wa'wa, 're anomro aba mono zép téb da hã, aipẽ'ẽ 're ato sina ãma 're anomro u'âsi aba mono da, Cristu hã dâ'â uptabi nherẽ, apâ te te ihâiwa'utu ne. Tahawa, wawasédé wa te 're i'manharĩ za'ra mono zé hã te te oto wa'ãma 're ab'madâ'â mono õ di za, ta hã.

1 Tesalonita 5:9

Tane tô. 'Re ihâimana u'âsi mono hã niha te te wama 're arob'manharĩ mono da, te te sima 're wa'awẽ mono õ di. Ma tô te te sima 're wa'awẽ, Wanhib'apito Zezu Cristu hã te te 're wa'anho'reptui mono da si.

1 Timotiu 1:9

E 're inomro wẽ mono norĩ ma, rotizéb da, te 're hâimana, Wamama nhimiroti hã. Mare di. Roti wẽ wẽ'õ'wa norĩ ma, rotizéb da, te 're hâimana. Duré rob'manharĩ wasété'wa norĩ ma zama, rotizéb da, te 're hâimana. Duré 'Re ihâimana u'âsi mono nhimiroti wẽ'õ'wa norĩ ma zama, rotizéb da, te 're hâimana. Duré iwasété norĩ ma zama, rotizéb da, te 're hâimana. Duré 'râwi pesere dasisô 're ida'a're nhi'oto za'ra mono norĩ ma zama, rotizéb da, te 're hâimana. Duré uburé romhuri Wamama te hã, te te ãma 're iwasété za'ra mono norĩ ma zama, rotizéb da, te 're hâimana. Duré timama te te 're isimroi mono norĩ ma zama, rotizéb da, te 're hâimana. Duré tina te te 're isimroi mono norĩ ma zama, rotizéb da, te 're hâimana. Duré dapãrĩ'wa norĩ ma zama, rotizéb da, te 're hâimana. Duré dahâiba na da'ãma 're isipsaihuri za'ra mono norĩ ma zama, rotizéb da, te 're hâimana. Duré aibâ si'uiwa dasina 're idanhipsaihuri za'ra mono norĩ ma zama, rotizéb da, te 're hâimana. Duré iwada'uri zarina si pawa'âbâ ãna dama romhuri'wa da, a'uwẽ hã da te dasiwi 're isimi'uri za'ra mono norĩ ma zama, rotizéb da, te 're hâimana. Duré 're isadawa nhipese za'ra mono norĩ ma zama, rotizéb da, te 're hâimana. Duré timreme hã tô sena na dama 're siwasu'u za'ra mono nherẽ, taré te te sina 're iroti za'ra mono norĩ ma zama, rotizéb da, te 're hâimana. Duré roti tô senai'õ na siwa'ru, ãma 're idanomro wasété mono norĩ ma zama, rotizéb da, te 're hâimana, 'Re ihâimana u'âsi mono nhimiroti hã.

Titu 2:12

Ta hã te te 're wa'azawi pese mono wa, ma tô wama waihu'u, wa te 're rẽme pese za'ra mono da, isazei'õ'wa norĩ hâimanazé hã, dawẽ te, wawasété zô wa te 're rowasutu tõ za'ra mono da, ti'ab ré wasina 're wanhiptete za'ra mono da, 'Re ihâimana u'âsi mono ãma si oto 're wanomro wẽ mono da.

Hebreu 8:3

'Re ihâimana u'âsi mono hã ma tô sasedoti tisiré norĩ nhipai u ipire uptabi norĩ hã te te 're apisutu, danhoprubzé hã da'upana te te tãma 're sõmri za'ra mono da, ãma 're iwata za'ra mono zéb da hã, duré danhimizama hã da'upana te te tãma 're simroi mono da, taha na dawasédé hã te te dama ãma 're i'apari mono zéb da hã. Taha zarina, ma tô duré Cristu hã tinhoprubzém na tãma sihâiba nho, 'Re ihâimana u'âsi mono ma, sasedoti ipire uptabi na taha si wama 're hâimana za'ra mono wa oto.

Hebreu 9:26

Cristu hã wahub sidâpâsi 'Re ihâimana u'âsi mono ma, dazada 're sisõmri u'âsi mono 'wa'âhã, te aré ropoto na'rata hawim haré dazada 're dâ'â u'âsi. Tawamhã robzépata za'ẽtẽ na te aré tô te te 're robzépata u'âsi. Tane nherẽ, za rob'rãsutu u irob'umhutuzéb u si ma tô misi haré tãma sisõ, 'Re ihâimana u'âsi mono ma hã, dazada dâ'â da, taha zarina dawasédé hã te te dama 're apari mono da oto, 'Re ihâimana u'âsi mono hã.

1 Pedru 1:20

'Re ihâimana u'âsi mono hã te te ro'apoto mono õ ré, ma tô Cristu hã pisutu siro, dazada dâ'â da, dawasété wa'âbâzéb da hã. Ãhã na ro isi'utõrĩzéb u hã, ma tô we datẽme wi oto Cristu hã, aima ãma 're irowẽ za'ra wa'aba mono zéb da hã.

2 Pedru 3:7

Duré 'Re ihâimana u'âsi mono mreme zarina, hâiwa norĩ hã ti'ai me te za a'â 're hâimana zahuré. Bâdâ iwa iwaptã'ãzéb u, te za dahâimanazéb zarina dama arowairébé, 'Re ihâimana u'âsi mono hã. Tawamhã te za da'uprosi, 're idahâimana wasété za'ra mono norĩ hã. Duré unhama ro'o na te za oto hâiwa norĩ hã uprosi zahuré, ti'ai me.

Zuda 1:15

Tawamhã te za oto da'awaihu'u, 're idahâimana wasété za'ra mono na, duré 're idahâimana wẽ za'ra mono na zama. Taha zarina te za oto da'ãma arowairébé. Tamep si te za oto 're ihâimana wasété za'ra mono norĩ hã awẽ'õ pese. Uburé marĩ iwasédé hã te te 're 'manharĩ za'ra mono wa, te za awẽ'õ pese, duré mreme wasété na 'Re ihâimana u'âsi mono ãma te te 're wasété za'ra mono wa.”

Zuda 1:18

Ãne ma tô ta norĩ hã wama waihu'u siromo za'ra: “Nimahã na iropsi'utõrĩzéb u hã aibâ norĩ te za dawazari 're hâimana za'ra, iwasété norĩ hã. 'Re ihâimana u'âsi mono hã te te siwi 're wazé mono õ di za. Te za duré ai'ãma 're wa'ẽ za'ra wa'wa. Si'uihâ na marĩ hã te te sima 're iwẽ za'ra mono zéb uwaibaba si, te za te te 're 'manharĩ za'ra, iwasétére hã.” Ãne ma tô wama waihu'u siromo za'ra, Zezu Cristuhu zadawa wasu'u'wa norĩ hã.

Zuda 1:4

E marĩ wa. Ni'wam norĩ hã, 'Re ihâimana u'âsi mono nhimiroti wẽ'õ'wa norĩ hã te aiwazari 're hâimana za'ra wa'wa. Sõ'awi te te 're rowahutu za'ra mono nherẽ, te ta norĩ hã roti na te te aiwi ãma 're upa za'ra wa'wa. Tahawa, isimiroti za'ra hã tô sena newa, te asiré isazei'wa norĩ hã te te 're wapari za'ra. Duré õ norĩ hã aibâ iwasété norĩ hã 'Re ihâimana u'âsi mono hã te te siwi 're wazé mono õ di. Duré Wanhib'apito Zezu Cristu hã misi uptabi 're ihâimana mono hã ma tô te te siwi 're wẽ'õ za'ra. 'Re ihâimana u'âsi mono nhimiroti hã te te duré 're 'madâ'â pese za'ra mono õ di. Aimawi na si te duré te te dama 're rowasu'u za'ra. Ãne isimiroti za'ra hã: “'Re ihâimana u'âsi mono hã te te 're da'azawi pese uptabi mono wa, te dawasédé hã te te dama 're apari. Tahawa, da te 're saze za'ra mono nherẽ, te za da te dasima 're iwẽ za'ra mono zéb uwaibaba, 're danomro wasété, 'Re ihâimana u'âsi mono nhimihâzém na dasina 're dapahi za'ra mono ãna.” Ãne isimiroti wasété za'ra hã, dama. Duréihã 'Re ihâimana u'âsi mono hã ma tô ta norĩ ãma waihu'u siro ibaihâ na hã, 're inomro wasété mono norĩ ãma, te te 're iwẽ'õ pese za'ra mono u'âbâ, za te te 're ihâ za'ra mono zém na hã.