Roma 5:2 - ꞌRe Ihâimana Uꞌâsi Mono Zadawa Wasuꞌu

² Zezusi hã wa te wasina 're umnhasi za'ra mono wa, te 'Re ihâimana u'âsi mono hã iwẽ si te te wama 're ab'madâ'â. Taha na si, wa oto wa norĩ hã 're wahâimana za'ra. Niwapsi te za 'Re ihâimana u'âsi mono hã te te wama 're apisutu, iwaihu'u pese zarina ihâiba na rowa'a za'ẽtẽ na isiré 're wahâimana u'âsi za'ra mono da, rowẽ uptabi na. Tahawa, wato sina, wa sô 're wanhimipari za'ra, wa te 're sazei utõrĩ za'ra mono ãna.

Roma 5:2 ပူးပေါင်းရင်းမြစ်များ

Provébiu 14:32

Ropire hã iwasété norĩ zô 're pusi mono wamhã, te za te te 're uprosi. Tane nherẽ, sena na 're ihâimana za'ra mono norĩ, tãma romnhimimnhasi na 're hâimana za'ra mono nherẽ, te i'uwaibaba na si 're ihâimana za'ra mono zéb zarina isimapazé hã tãma 're hâimana za'ra.

Mateu 25:21

— Tawamhã isib'apito te asa tãma tinha, ãne: “Wẽ di tô. A hã ĩma romhuri wẽ 'wai uptabi. Ĩma ai'umnhasi di. Rob'uiprazé hã surure na hâimana nherẽ, ma tô ãma iromhuri wẽ, ĩzô. Tahawa, ãhã nhipai u wa za oto aima pisutu, marĩ ahâ uptabi na ĩma 're ab'madâ'â u'âsi mono da. Te za oto ĩsiré 're aihâimana mo, wasiré ãma 're watoi u'âsi mono da.” Ãne ma tô tãma ropisutu siro, tãma iromhuri wẽ 'wai ma.

Zuwã 10:7

Tawamhã Zezusi te duré dama tinha, ãne: — Tô sena wa za aima ĩsiwasu'u za'ra wa'wa. Wa hã wa 'ridawa na ĩsina simiré'é, pone'ẽrebâ da te 're i'mazasi za'ra mono zém na wa'ra u hã.

Zuwã 10:9

Wa hã, 'ridawa na wa ĩsiwasu'u, ĩsiwaprosi Danho'reptui'wai wa. Taha na ni'wam norĩ ĩ'ãma 're sisisi mono wamhã, te za tinho'reptuzé te te sina 're uwaimrami za'ra. Pone'ẽrebâ hã wa'ra u sima iwẽ na 're isisisi mono ne, duré sima iwẽ na apâ 're iwairébé mono ne, te za duré ta norĩ hã sima iwẽ na 're hâimana za'ra. Duré pone'ẽrebâ tisa te te 're isõpẽtẽ wẽ za'ra mono ne, te za ĩzazei'wa norĩ hã rowẽ te te 're sõpẽtẽ za'ra.

Zuwã 14:6

Tawamhã Zezusi ma te asa ãma tãma wa'rã ãne: — Wa hã bâdâdi uptabi na, wa ĩsiwasu'u, duré tô sena na rowaihu'u wẽ nhomri'wa na, duré 're idanomro u'âsi mono zé nhomri'wa na. Tahawa, ni'wa hã ĩ'ãma 're morĩ õ nherẽ, Ĩmama u hã wisi waihu'u õ di za.

Zuwã 5:24

— Ĩmreme hã da te 're wapari za'ra mono wamhã, duré we ĩzatõrĩ'wa hã da te dasina 're umnhasi za'ra mono wamhã, te za dapẽ'ẽ na da te sina 're uwaimrami siromo za'ra, rowẽ na 're idahâimana u'âsi za'ra mono zé hã. 'Re ihâimana u'âsi mono nhimihâzé hã da te dasina 're waihu'u za'ra mono õ di za. Te za dapẽ'ẽ na ãma saprĩ siromo za'ra ni, dapẽ'ẽ 're, dadâ'â u'âsi 're idahâimana za'ra mono zém hawi, dapẽ'ẽ 're rowẽ na 're idahâimana u'âsi za'ra mono zéb u hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:27

Ãtioquia u apâ simasisi zahuré wamhã, ma tô isazei'wa norĩ zô tihârâ zahuré, te te itẽme ubumro da. Tahawa, ma tô dama siwasu'u zahuré, 'Re ihâimana u'âsi mono nhimipawaptobzém na. Ãne te tãma rowasu'u za'ra: — 'Re ihâimana u'âsi mono, ma tô wapawapto, marĩ iwẽ hã wa te dama 're 'manharĩ mono da, iwasu'uwẽ hã wa te dama ãwisi da, zudeu'õ norĩ ma zama. Tawamhã ta norĩ zama ma tô te te 're sazei pese za'ra.

Roma 11:20

Ãne na asima 're nharĩ za'ra wa'aba mono wamhã, i'uwaibaba te za tô asima ãma 're irowaihu'u za'ra wa'aba mo, ta norĩ ãma hã. Ta norĩ hã ma tô te te 're awẽ'õ tô siwi, te te 're saze za'ra mono õ wa. A norĩ wa'aba si 're sazei pese za'ra wa'aba mono wa, te tô ta norĩ wa'rãmi 're aihâimana za'ra wa'aba mo. Tane nherẽ, a norĩ wa'wa hã asina 're aiwata za'ra wa'aba mono õ di za. Tô'ã. Tahawa, te za 'Re ihâimana u'âsi mono si asiwi 're iwazéb za'ra wa'aba mo.

Roma 12:12

Uburé marĩ iwẽ hã 'Re ihâimana u'âsi mono, za te te wama 're i'apisutu mono zéb zô, wa za wanhimipari nhimi'ẽ na sô 're wahâimana za'ra, wato sina. Zezusihi zazei'wa oto 're anomro aba mono wa, da te 're ai'ruiwapari za'ra wa'aba mono nherẽ, te za asiptete sina ãma 're anomro u'âsi aba mo. 'Re ihâimana u'âsi mono ma, te za 're aimreme zusi u'âsi aba mo.

Roma 14:4

E a norĩ wa'wa hã isib'apito za'ra wa'aba bâ, te za marĩ tiwi 're iwẽ'õ za'ra wa'aba mo, isib'apito upana. Taha si te za te te 're waihu'u za'ra, ihâimana wasété na, duré ihâimana wẽ na zama. Tawamhã isazei'wa norĩ hã te za siptete u'âsi 're hâimana za'ra. E marĩ wa. Wanhib'apito 'Re ihâimana u'âsi mono hã tiwaihu'u pese na te te 're siptete u'âsi za'ra mono wa.

Roma 15:13

'Re ihâimana u'âsi mono hã waihu'u pese wa, te za te te 're wa'apawaptob u'âsi, marĩ iwẽ hã te te wama 're ipisutu za'ra mono zéb zarina, za te te wama ãma 're i'a'uwaimrami mono zéb zô, wa te wasiwi 're umnhasi za'ra mono sina, sô 're wanhimipari u'âsi za'ra mono da. Tahawa, wa ai'ãma tãma 're ĩmreme u'âsi za'ra wa'wa, atoi uptabi na 're aihâimana u'âsi za'ra wa'aba mono da, duré rowẽ si te te aima 're pisutu za'ra wa'aba mono da, asina 're i'umnhasi za'ra wa'aba mono paramhã. Ipẽ'ẽzani nhimipawaptobzéb zarina, marĩ iwẽ uptabi hã 'Re ihâimana u'âsi mono, za te te aima 're isõmri za'ra wa'aba mono zéb zô, asiwi 're umnhasi za'ra wa'aba mono sina, sô 're asimipari za'ra wa'aba mono zém na, 'râwi asima ãma 're sa'ẽtẽ za'ra wa'aba mono da, wa tô te ĩsima 're aiwẽ za'ra wa'wa.

Roma 2:7

Ni'wam norĩ si te marĩ hã simi'ẽ na te te dama 're 'manharĩ u'âsi za'ra, iwẽ hã. Ta norĩ hã 'Re ihâimana u'âsi mono si te te 're wẽsãmri za'ra mono da, te sina 're simipari za'ra, duré i'rata 're isi'ubumroi u'âsi mono zé, te te tãma 're apisutu mono da. Ta norĩ ma si, te za tô 'Re ihâimana u'âsi mono hã te te 're apisutu, 're isi'ubumroi u'âsi mono zéb da hã, i'rata.

Roma 3:23

Uburé te dawasété na a'uwẽ mono bâ 're danomro. Tahawa, te 'Re ihâimana u'âsi mono 're imorĩ wẽ uptabi zém nhiti 're dahâimana za'ra, 'râwi da te dasina 're tété waihu'u za'ra mono ãna.

Roma 5:5

Ãhã zô, taré sô 're wanhimipari baba za'ra mono õ di za. E marĩ wa. 'Re ihâimana u'âsi mono hã Tipẽ'ẽzani te te wama 're i'anhomri mono na, tinhimizawi pese zé hã te te wama 're awaihu'u mono wa. Tahawa, taré sô 're wanhimipari za'ra mono õ di za, marĩ iwẽ hã te te wama 're i'apisutu mono zéb zô hã.

Roma 8:1

Cristu Zezusihi ãma 're inomro mono norĩ hã, 'Re ihâimana u'âsi mono te te siwi 're i'awẽ'õ mono zé hã hâimana õ di oto. Taha zarina, te te duré oto 're ahâ za'ra mono õ di za.

Roma 8:24

'Re ihâimana u'âsi mono, iwẽ si za te te wama 're i'apisutu mono zéb zô, wa te 're wawã za'ra mono ãna, sô 're iwanhimipari za'ra mono zéb zarina, ma tô te te 're wa'anho'reptu. Ti'ab ré, marĩ zô 're wanhimipari za'ra mono ré, wa te oto 're 'madâ'â za'ra mono wamhã, e wa za õne u'âsi sô 're wanhimipari za'ra. Mare di. Tâibâ oto, sô 're iwanhimipari za'ra mono zé hã za. Marĩ zô 're iwanhimipari za'ra mono zé hã, zahadu wa te 're 'madâ'â za'ra mono õ ré si, wa za tô wanhiptete sina sô 're wanhimipari u'âsi za'ra, wa te 're sazei utõrĩ za'ra mono ãna.

1 Corĩtu 15:1

Ĩsisãnawã norĩ, ãne wa za duré ãma aipo're pu'u za'ra wa'wa. Duréihã Zezusihi wasu'uwẽ na, wa tô te aima 're rowasu'u za'ra wa'wa. Taha zarina, ma tô oto asima iwẽ za'ra wa'wa, asiptete sina ãma 're anomro u'âsi aba mono da hã oto.

2 Corĩtu 3:18

Wa norĩ hã wasiré isazei'wa norĩ hã da'rã ubu ãna ne, wa oto 're wahâimana za'ra. Tahawa, Wanhib'apito 're imorĩ wẽ uptabi zé hã wama waihu'u pese za'ra di oto. Ipẽ'ẽzani te te 're iwa'apawapto mono zéb zarina, wa za oto 're iwanomro wẽ mono zém na, wa te wasima ãma 're sa'ẽtẽ za'ra, isine ãma 're iwahâimana za'ra mono zéb da hã.

2 Corĩtu 4:17

Ti'ab ré, wa za tô wa te 're robzépata a'â. Tane nherẽ, ta hã wama wapure di. E marĩ wa. Taha wa'rãmi, te za 'Re ihâimana u'âsi mono iwẽ uptabi na hã duré ipire uptabi na hã te te wama 're wa'âbâ, isi'utõrĩ'õ na. Ti'ab ré, wa te 're robzépata za'ẽtẽ mono nherẽ, taha nhipai u wẽ uptabi di za, iwẽ na te te wama iropisutu siromo zé hã.

Éfézu 2:18

Cristu hã wazada dâ'â wa, duré wama 're hâimana za'ra mono wa, te za oto Ipẽ'ẽzani hã simisutu te te 're wa'apawapto, Wamama u 're iwasihutu mono zéb da hã wanhimirosa'rata na. Tawamhã tãma 're wamreme zusi mono wamhã, te za te te 're wa'awapari u'âsi, zudeu norĩ hã, zudeu'õ norĩ me.

Éfézu 3:12

Tahawa, Wanhib'apito ãma oto 're wanomro mono wa, duré isimipawaptobzém na wa te wasina 're i'umnhasi za'ra mono zéb zarina, wa za wasina wapahi ãna itẽme 're wasihutu wanhimirosa'rata na, 'Re ihâimana u'âsi mono u, robze na tãma 're wamreme zusi mono da.

Éfézu 6:13

Tahawa, 'Re ihâimana u'âsi mono nhimipawaptobzéb ré, te za 're aihâimana za'ra wa'aba mo. Tawamhã wa'uburé norĩ hã nimahã bâtâ na asô 're sihutu aba mono wamhã, te za 're i'wapé za'ra wa'aba mo. Tawamhã 're i'wapé za'ra wa'aba mono na, ãma 're ai'uté za'ra wa'aba mono wamhã, te za ta norĩ wi 're aiwairébé aba mo.

2 Tesalonita 2:16

'Re ihâimana u'âsi mono hã Wamama hã, te te 're wa'azawi pese. Te duré te te 're wa'apawapto, wapẽ'ẽ 're, 're wanomro wẽ u'âsi mono da, wahâimana nhiptete sina wanhimi'ẽ na sô 're wanhimipari u'âsi za'ra mono da, iwẽ zô. Tahawa, wa za Wamama wi, wa te 're rowaptẽrẽ u'âsi za'ra, duré Wanhib'apito Zezu Cristuhu wi zama, ato sina 're aihâimana za'ra wa'aba mono da, duré asiptete sina iwẽ na si tãma 're romhuri pese za'ra wa'aba mono da, asimirowasu'u wẽ za'ra wa'aba na hã.

Hebreu 3:6

Tane nherẽ, te Cristuhu si tãma umnhasi na uburé isib'a'uwẽ norĩ hã te te tãma 're 'madâ'â pese za'ra, pire uptabi na, 'Re ihâimana u'âsi mono 'ra hã. Wa norĩ hã Cristuhu ãma si 're wanomro mono wa, da te wama 're rob'manharĩ wasété za'ra mono nherẽ, wapahi ãna wanhiptete sina ãma 're wanomro mono wamhã, wa za tô isib'a'uwẽ na tãma 're wahâimana u'âsi za'ra. 'Re ihâimana u'âsi mono hã iwẽ si, za te te wama ipisutu za'ra zéb zô, wama umnhasi sina sô 're iwanhimipari u'âsi za'ra mono zéb zarina, tiwi 're wasipizari za'ra mono õ wamhã, tawapsi wa za tô isib'a'uwẽ na tãma 're wahâimana u'âsi za'ra.

Hebreu 6:18

'Re ihâimana u'âsi mono hã sadawa nhipese waihu'u õ di. Tahawa, te te dama iropisutuzé hã te te ãma saprĩ waihu'u õ di. Tinhisi pire na te te dama iropisutuzém na hã te te ãma saprĩ waihu'u õ di duré. Tahawa, wa norĩ hã 'Re ihâimana u'âsi mono, wa'ãma 're sisaprĩ za'ra mono da, itẽme 're iwasisa'rei mono norĩ hã wa za oto wato sina 're wahâimana za'ra, iwẽ uptabi zô wasina 're iwanhimipari u'âsi za'ra mono zé hã, wanhiptete sina wa te wasima 're tété u'âsi za'ra mono da, 'Re ihâimana u'âsi mono te te wama ipisutu za'ra zé hã.

1 Pedru 3:18

Misi haré ma tô Cristu hã dazada dârâ, 're idahâimana wasété za'ra mono hawi, te te 're da'anho'reptui mono da. 'Re imorĩ wẽ uptabi hã ma tô dârâ, 're idanomro wasété mono norĩ da, te te 're wa'anhimroi mono da, 'Re ihâimana u'âsi mono u. Cristu hã dâ'â uptabi nherẽ, ma tô Imama hã hâiwa'utu, apâ 're hâimana u'âsi mono da.

Apocalipsi 21:11

'Re ihâimana u'âsi mono nhimirowa'a na, te 'ri nho'u hã tirowa'a za'ẽtẽ. Ẽtẽ'ubuzi zarob'a si'ubuzi ne, ma ai'ubuzi, 'ri nho'u hã.

Apocalipsi 21:23

Duré 'ri nho'õmo na hã bâdâ te te 're rob'uiwẽ mono õ di za oto, duré a'amo zama hã. 'Re ihâimana u'âsi mono nhimirowa'a si te za oto te te 're rowa'a, Pone'ẽrebâ nhimirowa'a zama.

Apocalipsi 21:3

Tawamhã damreme 'rãihâ hã wa tô duré wapa, danhib'apito simasisizém hawi we te te inharĩ hã. Ãne te we ĩma tinha: — Ma'ãpé, waihu'u. 'Re ihâimana u'âsi mono hã te za oto dasiré 're hâimana u'âsi, 'râwi. Isib'a'uwẽ te za oto 're dahâimana u'âsi za'ra. Te za tô oto duré dasiré 're hâimana u'âsi. Isib'apito za'ra te za oto 're hâimana, 'Re ihâimana u'âsi mono hã.

Apocalipsi 3:21

“Duré, ni'wam norĩ hã tidâ'âzéb u ĩwi sipizari ãna Satanasihi ãma te te i'ai'uté za'ra norĩ hã, ta norĩ hã wa za pisutu za'ra, danhib'apito 're ĩsimasisi mono zéb ãma, ĩzababa 're si'ubumroi u'âsi mono da. Wa hã ĩdâ'âzéb u ĩsipi'rai õ na Satanasihi ãma te ai'uté wa, taha pari Ĩmama zababa oto 're ĩnhamra u'âsi mono ne, te za ta norĩ hã ĩzababa 're si'ubumroi u'âsi.