Roma 5:13 - ꞌRe Ihâimana Uꞌâsi Mono Zadawa Wasuꞌu

^13-15 Dawasété ãna 're idahâimana za'ra mono zéb da, 'Re ihâimana u'âsi mono nhimiroti hã dama 're hâimana za'ra mono õ nherẽ, dawasédé hã te te da'ãma 're aza'ra mono õ di, 'Re ihâimana u'âsi mono hã. Tane nherẽ, duréihã Mozésihi ma, tinhimiroti hã te te waihu'u õ ré, duré te te rob'ui'éré õ ré, te dawasété na si 're dahâimana u'âsi za'ra. Isimiroti na rob'ui'éré hã dama 're hâimana za'ra mono õ nherẽ, dawasété na si 're dahâimana za'ra mono wa, ma tô Adãhã wasété na'rata hawim haré 're dadâ'â u'âsi za'ra, 'Re ihâimana u'âsi mono nhimiroti hã dapẽ'ẽ 're, dama 're hâimana za'ra mono nherẽ, da te dasina tãma ãma 're uwaimrami za'ra mono õ wa. Mozésihi ma, za oto 'Re ihâimana u'âsi mono, tinhimiroti te te iwaihu'uzéb u hã, dawasété na si 're danomro u'âsi mono wa, ma tô 're dadâ'â u'âsi za'ra. Adãhã wi, 'Re ihâimana u'âsi mono, rob'rã te te sawi nherẽ, te te sadawa 'madâ'â ãna, ma tô tiwasédé hã 'manha. Ãne hã Adãhã wasété ne, aiwa da te 're 'manharĩ za'ra mono õ nherẽ, ma tô aihĩni 're dadâ'â u'âsi za'ra, 'Re ihâimana u'âsi mono te te dama irotizé hã, sõ'awi dama 're hâimana za'ra mono õ nherẽ. Adã hã wasédé sãna'rata wamhã, ma tô ipire uptabi hã 'manha, tiwasédé hã. Taha uirĩ na si, ma tô Zezusi hã marĩ ipire uptabi hã 'manha duré iwẽ hã, ti'ai ãma 're morĩ ré. Tahawa, Zezusihi ne Adã hã, marĩ isine ipire hã te te 'manharĩ wa. Tane nherẽ, aiwab õ di, isimi'manharĩzé hã. 'Re ihâimana u'âsi mono hã iwẽ te te dama 're i'anhomri mono hã, Adãhã wasété nei õ di. Adã hã tiwasédé te te i'manharĩzém hawi, ma tô oto uburé 're dadâ'â u'âsi za'ra, tô sena. Tane nherẽ, 'Re ihâimana u'âsi mono iwẽ hã te te dama 're i'ab'manharĩ mono zé hã pire uptabi di, Adã hã tiwasédé te te i'manharĩzém nhipai u. Wẽ uptabi di. E marĩ tawamhã, 'Re ihâimana u'âsi mono, iwẽ hã te te dama 're i'ab'manharĩ mono zé hã. Zezusi hã sisawi ãna tihâiba na te te 're ida'azawi pese mono na, ma tô te te dama 're ab'manharĩ wẽ, tinhoprubzéb zarina.

Roma 5:13 ပူးပေါင်းရင်းမြစ်များ

Zenezi 13:13

a'uwẽ wasété uptabi na si 're ihâimana za'ra mono ãma, tiwasété si 'Re ihâimana u'âsi mono zada, te te 're i'manharĩ za'ra mono zéb ãma.

Zenezi 18:20

Tawamhã Uburé Danhib'apito, te Abra'ãhã ma oto tinha ãne: — Sodoma norĩ ãma Gomora me, iwasédé da te ãma 're inomri zahuré mono zé sa'ẽtẽ uptabi di. Duré iwa 're idahâimana za'ra mono norĩ wasété za'ra zé hã pire uptabi di.

Zenezi 19:32

Tahawa oto wamama ma, uwa 'rãi wa'u isé wa te tãma õ na, te te i'rãiwamnarĩ pese zéb u. Tawamhã wa za iré waza'wari ni. Ãhã wamhã, te za i'ra hã wa hawimhã wama ti'maihâimana za.

Zenezi 19:36

Ãne Loho 'ra norĩ hã ma tô imama hã 'râwi wasã zahuré.

Zenezi 19:4

Tane nherẽ, zahadu sõtõ zahuré õ ré, Sodoma ãma aibâ 're ihâimana za'ra mono norĩ, ipréduptém norĩ, duré ihi norĩ, ma tô iré zahuré hã 'ri siwi uirĩ.

Zenezi 38:10

Tawamhã Uburé Danhib'apito, Ona nasi te te i'manharĩzé hã ma tô wẽ'õ pese. Tahawa taha zama ma tô tiwĩ.

Zenezi 38:7

Tane nherẽ, Uburé Danhib'apito, Er hâimana wasété zé hã te te tãma rowẽ õ di. Tahawa ma tô tiwĩ.

Zenezi 6:11

Tane nherẽ, te 'Re ihâimana u'âsi mono tõmo nho'a, uburé dawasété na si daro mono bâ 're dahâimana za'ra. Tahawa, te uburé daza'rui mono na da te dasina 're rowamnarĩ u'âsi za'ra.

Zenezi 8:21

Tawamhã Nowéhé nhibzari zadaze, Uburé Danhib'apito te te hãi wamhã, ma tô wẽsã. Tahawa te ãne rosa'rata na hã sima tinha: “Niwamhã ti'ai ma, ãne na te irob'manharĩ na isahu da hã mare di za, iwa 're idahâimana za'ra mono norĩ u'âbâmhã, daprédup tém hawim haré, marĩ iwasété na si da te dasima 're rosa'rata u'âsi za'ra mono nherẽ.

Roma 3:20

E 'Re ihâimana u'âsi mono nhimiroti 'rata na rob'ui'éré zarina, marĩ hã da te 're i'manharĩ wẽ za'ra mono na, te za te te sima da'ãma 're aroti, dawasédé hã te te oto da'ãma 're ab'madâ'â tõ mono da, taha zarina te te oto 're da'awẽsãmri mono da, dapo're'õ nherẽ, te te 're da'ahâ za'ra mono tõ da. Mare di. Taha nai õ di. Uburé marĩ hã da te 're i'manharĩ wasété za'ra mono na, 'râwi 're dasiwaihu'u za'ra mono da si, te dama 're hâimana, rob'ui'éré 'rada hã.

Roma 4:15

'Re idahâimana wẽ za'ra mono zéb da hã, dasi'uihâ na da te dasima 're ipisutu za'ra mono zé hã dama 're hâimana za'ra mono õ 'wa'âhã, aré da te ãma 're upai waihu'u za'ra mono õ di. Tane, 'Re ihâimana u'âsi mono nhimiroti na Mozési te te irob'ui'érézé hã dama 're hâimana za'ra mono õ 'wa'âhã, aré da te ãma 're upai waihu'u za'ra mono õ di duré. Tane nherẽ, te tô dama 're hâimana, isimiroti na rob'ui'éré 'rada hã. Tahawa, da te 're waihu'u pese za'ra mono nherẽ, da te 're 'madâ'â pese za'ra mono õ wamhã, 'Re ihâimana u'âsi mono te te 're ida'ahâ za'ra mono zé, te wasu'u.

1 Corĩtu 15:56

E marĩ wa, ma tô aré 're iwadâ'â za'ra mono zé hã siptete na wazada 're hâimana za'ra. Wawasété na 're iwanomro mono zéb zarina, ma tô aré tô siptete na wazada 're hâimana za'ra, te te 're iwa'a'uprosi mono zéb da hã. Duré 'Re ihâimana u'âsi mono nhimiroti na Mozési te te ãma irob'ui'érézéb zarina, 're wanomro wẽ mono õ wa, ma tô aré te te siwi 're wa'awẽ'õ pese, 'Re ihâimana u'âsi mono hã.

1 Zuwã 3:14

Ni'wam norĩ hã te te 're dazawi pese za'ra mono õ wamhã, ta norĩ hã te dâ'â u'âsi ne 're hâimana za'ra, tipẽ'ẽ 'remhã, 'Re ihâimana u'âsi mono nhiti. Tanei õ di, wa norĩ hã wasiré isazei'wa norĩ hã. 'Re ihâimana u'âsi mono nhiti, wapẽ'ẽ 're wadâ'â u'âsi ne aré 're wanomro mono nherẽ, wa tô ihawi 're wawairébé, 'Re ihâimana u'âsi mono niwĩ, rowẽ na oto 're wanomro u'âsi mono da, wapẽ'ẽ 'remhã. Ãne, wa tô oto wasi'ãma waihu'u pese za'ra ni. 'Re wasisawi pese za'ra mono wa, wa ãne hã tô sena na wasi'ãma waihu'u pese za'ra ni.

1 Zuwã 3:4

E marĩ na tawamhã, 're idawasété za'ra mono zé hã. 'Re ihâimana u'âsi mono nhimiroti, da te dasiwi 're wẽ'õ pese za'ra mono wamhã, ta hã dawasédé. Tahawa, ni'wam norĩ hã 're wasété za'ra mono wamhã, ta norĩ te 'Re ihâimana u'âsi mono nhimiroti te te siwi 're wẽ'õ za'ra, 'râwi.