Roma 4:17 - ꞌRe Ihâimana Uꞌâsi Mono Zadawa Wasuꞌu

¹⁷ Duréihã ni'wa hã ma tô ãne na 'Re ihâimana u'âsi mono mreme na rob'ui'éré, Abra'ãhã ãma hã: “Wa hã wa tô aipisutu, daro mono bâ da te dasina 're ĩ'umnhasi za'ra mono norĩ hi'rata na, da te 're asisi za'ra mono da.” 'Re ihâimana u'âsi mono nhimiropisutuzé hã, tô sena. Pire uptabi di. E marĩ wa. Õ hã tô sena, 're hâimana mono wa. Taha si, ma tô Abra'ã hã te te sina 're umnhasi u'âsi. Taha si, 're dadâ'â za'ra mono nherẽ, dahâiwa'utu'wa hã te 're hâimana. Taha si duré marĩ õ ré, Ropoto mono 'wa hã.

Roma 4:17 ပူးပေါင်းရင်းမြစ်များ

Zenezi 17:16

Ĩwẽ uptabi wa za te tãma 're anhomri. Tahawa wa za duré ai'ra aima tisõ, isé're hawimhã. Wa za tô iwẽ hã te tãma 're anhomri. Tahawa te za a'uwẽ wamri mono bâ da'ahâ uptabi hi'rata sipi'õ na dama 're hâimana. Te za isihudu norĩ 'remhã nima norĩ hã dama 're si'apito za'ra.

Zenezi 17:20

Tawamhã duré Ismaeu ma irowaptẽrẽzéb zama wa tô wapa. Tahawa iwẽ hã wa za te tãma 're anhomri. I'ra norĩ, duré isihudu norĩ ahâ uptabi na 're hâimana za'ra mono da hã wa za 'manha. Tahawa te za 12 na dama ipire norĩ mama na 're hâimana. Duré isihudu norĩ hã a'uwẽ misi ãma isitom na dama siptete na 're hâimana za'ra mono da, wa za 'manha.

Zenezi 28:3

'Re ihâimana u'âsi mono danhipai u iwaihu'u pe, iwẽ hã te te aima 're i'apisutu mono da si, wa ĩsima wẽ. Duré asihudu norĩ ahâ uptabi na aihawimhã a'uwẽ mono bâ sipu'u pese na 're isitébré mono da si, wa duré ĩsima wẽ.

Mateu 3:9

Duré Abra'ãhã nhihudu wẽ te, asina 're rosa'rata za'ra wa'aba mono õ di za, 'Re ihâimana u'âsi mono te te 're i'aihâ za'ra wa'aba mono õ na hã. 'Re ihâimana u'âsi mono ma, waihu'u pese di, ã ẽtẽ norĩ ma, te te nharĩ da, tãma si'a'uwẽ za'ra da, Abra'ãhã nhihudu oto 're hâimana za'ra mono da, ẽne hã.

Zuwã 5:21

'Re dadâ'â za'ra mono wa, te Ĩmama hã ab're hawi te te 're da'ahâiwa'utu, apâ 're danomro u'âsi mono da. Ĩzama te ĩsima 're i'awẽ mono norĩ ma, wa za duré te 're anharĩ, apâ 're hâiwa'utu za'ra mono wa, 're nomro u'âsi mono da, wa hã i'ra wa. Tawapsi te za da te 're ĩwaihu'u za'ra, ĩwaihu'u pese uptabi na.

Zuwã 6:63

'Re ihâimana u'âsi mono pẽ'ẽzani si te za te te dama 're anhomri, dadâ'â ãna 're idahâimana u'âsi za'ra mono zé hã. Dasi'uihâ na da te dasina 're uwaimrami za'ra mono õ di za. Marĩ na te aima 're irowasu'u za'ra wa'aba mono zéb zarina, te za Ipẽ'ẽzani hã te te dama 're anhomri, 're idahâimana u'âsi za'ra mono zéb da hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:18

Wa hã uburé Danhib'apito, wa tô ãne hã isãna'rata hawimhã dama waihu'u pa.”

Roma 3:29

E zudeu norĩ nhib'apito si, te 'Re ihâimana u'âsi mono hã 're hâimana. E zudeu'õ norĩ ma hã, 're hâimana mono õ di bété. Ta norĩ ma zama te duré 're hâimana.

Roma 4:18

Duréihã Abra'ã hã 100 na ãma iwahubzéb u hã romhutu na ma tô 'Re ihâimana u'âsi mono hã tãma ropisutu, ãne: “Asihudu sidâpâsi, da'ahâ uptabi di za.” Ãne rob'ui'éré 'rata na iwasu'u hã. Abra'ã hã romhutu na ma tô tidâ'âzé hã sina waihu'u, ihâiba isib'uware na hã oto. Timro zama ma duré waihu'u, 'ra waihu'u õ na, Sara hã. Tane nherẽ, siptete sina ma tô 'Re ihâimana u'âsi mono si saze, za i'ra te te tãma isõmrizém na hã. Te te 're wawãi mono ãna, te sô 're simipari u'âsi, 'Re ihâimana u'âsi mono nhimiropisutuzéb zô hã, marĩ hã tãma hâimana õ nherẽ, sô 're isimipari mono zéb da hã. Tahawa, ma tô 'Re ihâimana u'âsi mono hã pisutu, daro mono bâ da te 're isazei pese za'ra mono norĩ hi'rata na, da te 're sisi za'ra mono da.

Roma 4:2

Ta hã uburé marĩ hã te te 're i'ab'manharĩ wẽ mono na, 'Re ihâimana u'âsi mono, iwasédé hã te te oto ãma 're 'madâ'â mono tõ da, te te sima ãma roti 'wa'âhã, duré taha zarina Abra'ã hã 'râwi tiwẽ na sina 're wata mono 'wa'âhã, te aré tô sena 'râwi sina 're wata. Tane nherẽ, marĩ hã te te 're i'ab'manharĩ wẽ mono na, 'râwi sina 're wata waihu'u mono õ di Abra'ã hã, taha zarina 'Re ihâimana u'âsi mono hã te te sima ãma roti õ wa, iwasédé hã te te oto ãma 're i'madâ'â mono õ zarina, te te iwẽsãmrizéb da hã.

Roma 8:11

'Re ihâimana u'âsi mono hã Zezusihi hâiwa'utu'wa hã, Ipẽ'ẽzani te aipẽ'ẽ 're, 're sãmra za'ra wa'wa. Tô õ hã Cristu te te ihâiwa'udu hã te za aihâiba hã niwamhã aiwi 're si'utõrĩ pese za'ra wa'aba mono nherẽ, te te 're aihâiwa'utu za'ra wa'wa, Ipẽ'ẽzani hã aipẽ'ẽ 're, 're isãmra za'ra wa'aba mono zéb zarina.

Roma 9:11

Tane nherẽ, idi'i 're, zahadu hâimana zahuré nherẽ, duré marĩ iwẽ hã te te waihu'u zahuré õ nherẽ, zahadu marĩ iwasédé hã te te duré waihu'u zahuré õ nherẽ, ma tô ãne 'Re ihâimana u'âsi mono hã tãma waihu'u siro, Rebecaha ma: “Idub'rada hã te za tinoi ma wapu na 're hâimana.” Ãne ma tô 'Re ihâimana u'âsi mono hã ino si sima pisutu, tidub'rata ma, pire na 're hâimana mono da. E marĩ hã te te 're i'manharĩ wẽ zahuré mono zéb zarina, ma tô ino si sima pisutu, 'Re ihâimana u'âsi mono hã. Mare di. Taha wab õ di. Si'uihâ na te te sima iwẽzéb uwaibaba, ma tô sima pisutu, ino si.

Roma 9:26

Tirob ãma 're si'ubumroi mono ré, wa tô aré te tãma 're nharĩ za'ra, ãne: A norĩ wa'wa hã ĩnhib'a'uwẽ'õ na te 're aihâimana za'ra wa'aba mo. Tane nherẽ, tame 're si'ubumroi mono ré, wa za oto ĩ'ra na te 're sisi za'ra, wa hã 'Re ĩhâimana u'âsi mono 'ra na.”

1 Corĩtu 1:28

Isazei'õ'wa norĩ ma 're ihâimana wapu za'ra mono norĩ hã ma tô 'Re ihâimana u'âsi mono hã te te 're pisutu za'ra, isib'a'uwẽ si 're nomro mono da, isazei'õ'wa norĩ te te siwi 're iwẽ'õ pese za'ra mono norĩ hã. Isazei'õ'wa norĩ ma, pire na 're ihâimana za'ra mono zé hã te te tiwi 're a'uprosi mono da, ma tô dama iwapu norĩ si te te 're pisutu za'ra, isib'a'uwẽ si oto 're nomro mono da.

1 Corĩtu 15:45

Duréihã Mozési hã ma tô ãne na ãma rob'ui'éré: “'Re ihâimana u'âsi mono hã ma tô aibâ hã poto 'rata, Adã na isisi hã. A'uwẽ hâiba na 're morĩ da, ma tô poto 'rata tô.” Tane nherẽ, Adãhã ne te tô 're hâimana, 'Re ihâimana u'âsi mono 'rata, dadâ'â ãna 're danomro mono da, te te dama 're i'apisutu mono hã, Ipẽ'ẽzani nhimipisutuzéb zarina. Ta hã Zezusi.

1 Timotiu 6:13

Ãhã na, wa za aima pisutu, uburé te aima iroti mono zé hã asina 're 'madâ'â u'âsi mono da. 'Re ihâimana u'âsi mono nho'a, wa aima pisutu, ti'ai ãma 're idanomro mono zé hã te te dama 're i'apisutu mono nho'a. Cristu Zezusihi nho'a zama wa aima pisutu, Põsiu hã Pilatuhu ma, tihâimanazém na isiwaihu'u wẽ nho'a zama. Uburé te aima iroti mono zé hã te za asina 're i'madâ'â u'âsi mo, apâ we imorĩzéb u, Wanhib'apito Zezu Cristu hã. Asina 're 'madâ'â u'âsi mono wamhã, tawamhã da te aima 're nharĩ za'ra mono õ di za, asina 're i'madâ'â mono õ zém na hã.

Hebreu 11:12

Abra'ã hã si'ihi uptabi wa, idâ'âzéb u romhutu nherẽ, ma tô ihâiba hawi da'ahâ uptabi na hã dasina dahâ'â u'âsi, isihudu sidâpâsi. Wasi norĩ hã hâiwa na ahâ uptabi na 're isimasa mono ne, ma tô da'ahâ uptabi na hã atébré ni. Â zaihâ na supara, ahâ uptabi na 're isimi'wara mono ne, ma tô atébré ni.

Hebreu 11:3

'Re ihâimana u'âsi mono, wa te wasina 're i'umnhasi za'ra mono zéb zarina, wa tô, sena na wa te 're waihu'u za'ra, 'Re ihâimana u'âsi mono te te inharĩzéb zarina, marĩ õ uptabi ré, te te i'aropoto mono na hã. Datõmo na da te 're i'madâ'â waihu'u za'ra mono õ na si, ma tô te te ro'apoto, watõmo na wa te oto 're i'madâ'â za'ra mono da hã. Ãne na wa tô duré sena na wa te 're waihu'u za'ra, 'Re ihâimana u'âsi mono si, wa te wasina 're i'umnhasi za'ra mono zéb zarina hã.

Hebreu 11:7

Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.

1 Pedru 2:10

A norĩ wa'wa hã 'Re ihâimana u'âsi mono nhib'a'uwẽ 're anomro aba mono õ di aré. Ãhã na te oto isib'a'uwẽ tãma 're aihâimana za'ra wa'aba mo. Duré da'ãma 're ipẽ'ẽzé mono zé hã asina 're waihu'u za'ra wa'aba mono õ di aré. Ãhã na ma tô oto asina iwaihu'u za'ra wa'wa, da'ãma 're ipẽ'ẽzé mono zé hã.

2 Pedru 3:8

Ĩsiwadi norĩ, ĩma asawi pese za'ra wa'aba norĩ hã, Wanhib'apito hã zahadu apâ wei morĩ õ nherẽ, ma'ãpé marĩ na ãma 're rosa'rata pese za'ra wa'aba mono, aiwi 're simani tõ za'ra wa'aba mono da. Bâdâ hã wa te 're isa'rata za'ra mono nei õ di, Wamama nhimiza'ratazé hã. Bâdâ misi nherẽ, tãma hã wahub ahâ ne. Duré miu na wahum nherẽ, tãma hã misi bâtâ na ne.