Roma 3:25 - ꞌRe Ihâimana Uꞌâsi Mono Zadawa Wasuꞌu

²⁵ 'Re ihâimana u'âsi mono hã ma tô Zezusi hã pisutu, dazada idâ'âzém na dawasédé, da te 're i'manharĩ za'ra mono zé hã te te dama 're apari mono da, taha zarina tiwi 'rusimani da, iwa'rãmi da'ãma 're pẽ'ẽzé mono da. Duré taha na si te te 're ida'awẽsãmri mono zé hã, 'râwi da te dasina 're waihu'u za'ra mono da, ma tô ãne da pisutu, Zezusi hã. Zezusi hã da te 're sazei pese za'ra mono wapsi, te za dawasédé hã te te dama 're apari. 'Re ihâimana u'âsi mono hã da'ãma 're wa'a su'u mono õ wa, dawasédé hã te te da'ãma 're ab'madâ'â mono õ di aré.

Roma 3:25 ပူးပေါင်းရင်းမြစ်များ

Salmu 22:31

Zahadu 're ipoto za'ra mono õ norĩ hã, te za niwamhã zahadu wapsi, 'Re ihâimana u'âsi mono te te 're i'manharĩ mono zé hã te te 're wapari za'ra za: “'Re ihâimana u'âsi mono, tinhib'a'uwẽ hã ma tô anho'reptu!”

Salmu 40:10

Asiminho'reptuzé wasu'u hã, ĩsima si te 're tété mono õ di. Õne u'â ai'umnhasizém na hã wa tô te ãma 're robzanhamri u'âsi, duré asiminho'reptu nhiptetezém na zama. Asib'a'uwẽ 're isi'rã'õtõ mono zéb ãma hã, 're ida'azawi mono zé wasu'u na hã, duré ai'umnhasizém na hã, ĩmreme ãna ari'iwi 're ĩhâimana mono õ di.

Zuwã 6:47

— Tawamhã Danho'reptui'wa na da te dasina 're ĩ'umnhasi za'ra mono wamhã, rowẽ u'âsi te za dadâ'â ãna 're dahâimana u'âsi za'ra hâiwa ãma, 'Re ihâimana u'âsi mono 'rata. Tô sena, wa aima rowasu'u za'ra wa'wa, waihu'u za'ra wa'aba da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 14:16

Duréihã, dahi'rata sidâpâsi da te dasima iwẽzéb uwaibaba te 're danomro. 'Re ihâimana u'âsi mono hã te te 're da'ahâ za'ra su'u mono õ di.

Zezusihi zadawa wasuꞌuꞌwa norĩ nhimiromhuri na robꞌuiꞌéré 15:18

Wa hã uburé Danhib'apito, wa tô ãne hã isãna'rata hawimhã dama waihu'u pa.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:30

'Re ihâimana u'âsi mono hã dama waihu'u ãna 're danomro mono ré, te te 're dahâ za'ra siromo mono õ di. Tane nherẽ, ãhã na ropâ 're idasi'ubumroi mono hã te za te te 're da'awada'uri, dawasété wi 're dasipizari za'ra mono da, isiniwĩ 're danomro mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 2:23

'Re ihâimana u'âsi mono hã ma tô tiwaihu'u pese na waihu'u siro romhâ ré, Zezusihi dâ'âzé hã. Te te iwaihu'u siromo zéb uwaibaba, duré te te sima iwẽzéb uwaibaba, ma tô aima pisutu za'ra wa'wa, Zezusi hã dama 'ru za'ra wa'aba da, 'Re ihâimana u'âsi mono nhimiroti waihu'u'õ'wa norĩ ma, ai'upana za'ra wa'aba, te te siwi wĩrĩ da. Tahawa, ma tô siwi sasõ, wedepo'o nhonhi'rãmi na. Taha na ma siwi tiwĩ.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:18

Taha zarina, ma tô 'Re ihâimana u'âsi mono hã timreme hã ãma uwaimra, duréihã isadawa 'mahârâ'wa norĩ hã wahi'rata norĩ ma, te te ãma 're i'awaihu'u siromo mono zéb zarina, Cristu hã za te te irobzépatazém na hã, Danho'reptui'wa da, te te ipisudu hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:28

A hã romhâ ré, ãma iropisutuzéb zarina ma tô si'uihâ na ãma siwi uwaimra tô, te te waihu'u za'ra õ nherẽ, Erodi norĩ hã.

Roma 2:4

Ãté te za ãne asima 're inharĩ za'ra wa'aba mo: “'Re ihâimana u'âsi mono hã simizawi pese uptabi di. Dasi'uihâ na dawasédé hã da te 're 'manharĩ u'âsi za'ra mono nherẽ, da'ãma 're wa'a su'u mono õ di. Tahawa, ĩwasédé te 're 'manharĩ mono nherẽ, te te 're ĩ'ahâri su'u mono õ di.” Ãne hã asi'uihâ na asi'ãma 're rosa'rata za'ra wa'aba mono õ di za. 'Re ihâimana u'âsi mono hã aiwasété wi 're aipizari za'ra wa'aba mono da si, te simi'ẽ na te te 're ai'madâ'â za'ra wa'wa, simizawi pese uptabi na. E ãne hã zahadu aima waihu'u za'ra wa'aba õ di bété.

Roma 3:26

Tane nherẽ, ãhã na hã dawasédé hã da te 're i'manharĩ za'ra mono zém na, te te da'ãma 're ab'madâ'â mono ãna 're hâimana mono õ di oto. Te oto te te da'ãma 're ab'madâ'â u'âsi, uburé marĩ hã i'uwaibaba si te te 're i'ab'manharĩ wẽ mono na, da te dasina 're waihu'u za'ra mono da, duré uburé Zezusi hã da te 're isazei pese za'ra mono norĩ hã te te 're ida'awẽsãmri mono na, da te dasina 're waihu'u za'ra mono da.

Roma 5:1

Wanhib'apito Zezu Cristu hã ma tô te te sima 're wa'awẽ, wa te wasina 're i'umnhasi za'ra mono zéb zarina. Tahawa, 'Re ihâimana u'âsi mono hã ma tô te te sima wa'ãma 're aroti, wa te 're isazei pese za'ra mono na, wawasédé hã te te oto wa'ãma 're ab'madâ'â tõ mono da, taha zarina si te te duré 're wa'awẽsãmri mono da, wawasété na 're wanomro mono nherẽ, te te 're wa'ahâ za'ra mono tõ da. Tahawa, rowẽ u'âsi, wa oto ãma 're wanomro, 'Re ihâimana u'âsi mono ãma hã.

Roma 5:11

Tane nherẽ, taha si õ di. 'Re ihâimana u'âsi mono ãma, wa duré watoi u'âsi 're wahâimana za'ra, Wanhib'apito Zezu Cristu dâ'âzém na, wa'ãma 're siwadi za'ra mono wa oto.

Roma 5:18

Aibâ hã misi tiwasédé hã te te i'manharĩzém hawi, ma tô 'Re ihâimana u'âsi mono hã uburé te te 're da'awẽ'õ pese, dawasédé hã te te da'ãma 're i'awaihu'u mono zéb zarina. Tane, misi Zezusihi nhimi'manharĩ wẽ zém na, te za oto 'Re ihâimana u'âsi mono hã te te 're da'anho'reptu, dapẽ'ẽ 're, dadâ'â u'âsi ne 're idanomro mono zém hawi, i'rata 're dahâimana u'âsi za'ra mono da oto.

Roma 5:9

Zezusi wazada idâ'âzém na, ma tô 'Re ihâimana u'âsi mono hã te te 're wa'awẽsãmri, wawasédé hã te te oto wa'ãma 're i'ab'madâ'â mono õ zarina. Ãne wa, te za duré Zezusi hã tidâ'âzém na te te 're wa'anho'reptu, 'Re ihâimana u'âsi mono nhimihâzé wi, ro hã za isi'utõrĩzéb ãma hã.

1 Corĩtu 5:7

Ãne, wa za duré aima ãma romnhimiré'é za'ra wa'wa. 'Re ihâimana u'âsi mono, zudeu norĩ hi'rata norĩ hã Ezitu hawi te te isõ'reptu za'ra zém na, 're sipo're pu'u za'ra mono da, tisa te te 're huri mono wamhã, te za i'u'ẽtẽ wapuzé hã rob u te te 're sa'ra a'â, 'ri mono bâ, 'ri para 're isimi'wara mono hã. Taha zarina, te za i'u'ẽtẽ duptoi'õ na si tisa hã te te 're huri, Pascowa na dato nhisizém na hã. Tane duré, a norĩ wa'wa hã te za oto aiwasédé hã 're irẽme pese za'ra wa'aba mo, i'u'ẽtẽ wapuzé hã rob u da te dasisiti 're isani za'ra mono ne, 're aipoto téb za'ra wa'aba mono na si oto 're aihâimana za'ra wa'aba mono da. Zudeu norĩ hã, Pascowa na tisa te te 're huri mono wamhã, ihi'rata norĩ ma, 'Re ihâimana u'âsi mono, tinhimihâzé te te tãma iba'a za'ra zém na, ãma 're sipo're pu'u za'ra mono wamhã, te za ãma 're toi u'âsi za'ra. Tane ma tô duré Cristu hã wazada tidâ'â za'ra, wawasédé hã te te wama 're apari mono da, 'Re ihâimana u'âsi mono hã. Tahawa, zudeu norĩ hã Pascowa na tito te te 're i'manharĩ za'ra mono ne, wa za oto wa norĩ zama 're watoi u'âsi za'ra, Cristuhu ãma si oto 're wanomro mono wa. Zudeu norĩ hã i'u'ẽtẽ wapuzém na tisa te te 're huri mono õ di, Pascowa na tito te te 're 'manharĩ za'ra mono wamhã. I'u'ẽtẽ duptoi'õ na si, te tisa hã te te 're huri. Tane, wa norĩ hã wasiré isazei'wa norĩ hã, wa za wahâimanazéb 'rada iwasédé hã wa te 're rẽme pese za'ra. Wawasédé hã oto wa te 're 'manharĩ za'ra mono ãna, wa za 're wahâimana wẽ u'âsi za'ra, wanhimirosa'rada hã sena na si, duré wahâimanazé sena na si.

2 Corĩtu 5:21

Cristu hã ti'ai ãma 're morĩ ré, ma tô wasété ãna 're hâimana u'âsi. Tiwasédé hã te te 'manharĩ õ nherẽ, 'Re ihâimana u'âsi mono hã ma tô uburé wawasédé, wa te 're i'manharĩ za'ra mono zém na hâiba wati'i, wa'upana za'ra, Cristuhu ãma 're wanomro mono wa, te te oto 're iwa'awẽsãmri mono da hã.

Éfézu 1:7

Cristu hã wedepo'o nhonhi'rãmi na wazada dâ'â wamhã, ma tô tidâ'âzém na wa'awa'â. Marĩ, wa te 're i'manharĩ wasété za'ra mono zé hã ma tô duré te te wama 're apari, wawasédé hã te te wa'ãma 're ab'madâ'â tõ mono da oto. Ãne wamhã, ma tô Wamama hã wa'ãma uwaimrami wẽ, sa'ẽtẽ na tãma 're hâimana mono wa, te te 're iwa'azawi pese mono zé hã.

Éfézu 2:13

Tane nherẽ, dasisiti 're idahâimana za'ra mono ne, 'Re ihâimana u'âsi mono nhiti, romhâ na 're aihâimana za'ra wa'aba mono õ di oto, asimirosa'rata aba na. Cristu hã wazada idâ'âzéb zarina, ma tô Wamama hã sitẽme ai'ãwisi za'ra wa'wa, Cristu Zezusihi ãma oto 're anomro aba mono da, 'râwi i'rata 're aihâimana za'ra wa'aba mono da oto, asimirosa'rata aba na hã.

1 Timotiu 1:15

Ti'ai u ma tô wei mo, Cristu Zezusi hã, 're idanomro wasété mono hawi te te 're da'anho'reptui mono da. Ãne te dasima da te 're rowasu'u za'ra. Danhimirowasu'u hã tô sena wamhã, aihĩni ãma 're idasisaze za'ra mono da hã, ĩma wẽ di. Wa hã dawasété nhipai u, ĩwasédé hã sa'ẽtẽ uptabi di.

Hebreu 11:14

Ãne na ta norĩ hã dama 're siwasu'u za'ra mono wamhã, daro hã aimawi itéb zô 're isõpré u'âsi mono zé, te wama wasu'u za'ra, taha na si za oto 're irob uptabi za'ra mono na hã.

Hebreu 11:17

Abra'ã hã 'Re ihâimana u'âsi mono si te te sina 're i'umnhasi mono zéb zarina, ma tô aré ti'ra hã tãma tiwĩ Izaqui hã, tãma ãma isõprubzéb da, 'Re ihâimana u'âsi mono hã te te pibui wamhã. Taha õ ré, ma tô 'Re ihâimana u'âsi mono hã tãma ropisutu siro, Abra'ãhã ma hã, ãne: “Ai'ra Izaquihi hawip si, te za asihudu norĩ hã ahâ uptabi na 're hâimana za'ra, asihudu sidâpâsi te aima iropisutuzéb zarina.” Ãne na 'Re ihâimana u'âsi mono te te tãma ropisutu nherẽ, ma tô aré Abra'ã hã ti'ra hã tiwĩ Izaqui hã, i'ra si'aibâ hã misi tãma poto nherẽ. Duré ta hawip si za isihudu norĩ hã sitébré da nherẽ, ma tô aré tãma tiwĩ, 'Re ihâimana u'âsi mono ma hã.

Hebreu 11:7

Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.

Hebreu 9:28

Tane ma tô duré Cristu hã misi haré dazada dârâ, dawasédé hã da'ahâ na te te oto dama ãma 're i'apari mono zéb da hã. Tawamhã niwa ti'ai u apâ wei morĩ zahu wamhã, ta hã oto dazada dâ'â da hã, wei morĩ õ di za, taha zarina dawasédé hã te te duré dama 're apari mono da hã. Ãne hã mare di za. Sô 're isimipari za'ra mono norĩ si, te te oto isõ'reptui pese za'ra da si, te za wei mo apâ Cristu hã, ta norĩ zô si.

Hebreu 9:5

Wedehâ're nhisiwi te duré ropodo hã 're sima'wara zahuré, rob'manharĩ hã ropoto hâiba hã isaripi ré hã. 'Re ihâimana u'âsi mono, tame 're isãmra mono zé, te ta norĩ hã wasu'u zahuré. Wedehâ're nhisiwi, te ta norĩ hã duré 're papo zahuré. Wedehâ're nhitobzé nhisi hã 'Re ihâimana u'âsi mono, dawasédé te te dama 're i'apari mono zém na isisi hã. Ãne duréihã romhâ 'manharĩ na 'ri wasu'u hã. Tane nherẽ, ãhã na hã te ãma aima rowasu'u uptabi za'ra wa'aba õ di za. Suru na wa tô ãma aima rowasu'u za'ra wa'wa.

1 Zuwã 1:10

Duréihã 'Re ihâimana u'âsi mono hã ma tô da'ãma waihu'u siro, uburé 're idahâimana wasété za'ra mono zém na hã. Tahawa, wa norĩ hã wawasété ãna 're iwahâimana za'ra mono na dama 're wasiwasu'u za'ra mono wamhã, 'Re ihâimana u'âsi mono ãma, wa isadawa nhipe hã wa te ãma 're sa'ra za'ra. Tawamhã 'Re ihâimana u'âsi mono nhimiroti hã wapẽ'ẽ 'remhã, wama 're hâimana za'ra mono õ di za.

1 Zuwã 2:2

Ta hã ma tô wazada dârâ, 'Re ihâimana u'âsi mono wawasédé hã te te wama 're i'apari mono zéb da hã. Tane nherẽ, wazada si dâ'â õ di. Uburé da'udâna dawasédé hã da te 're i'manharĩ za'ra mono norĩ da zama, ma tô dârâ, da'upana.

1 Zuwã 4:10

Wa norĩ hã 'Re ihâimana u'âsi mono, wama sawi pese za'ra di. Tane nherẽ, te taha nhipai u te te 're wa'azawi pese uptabi. Tahawa, ma tô ti'ra we satõ ti'ai u, wazada dâ'â da, wazada dâ'â wa, wawasété na te te oto 're wa'ab'madâ'â tõ mono da. Tô sena isimizawi pese zé hã siwaprosi te tãma 're hâimana, danhipai u.

Apocalipsi 1:5

Zezu Cristuhu zama te te 're aipawaptob u'âsi za'ra wa'aba mono da, wa duré ai'ãma te 're rosa'rata u'âsi za'ra wa'wa. Ta hã dama i'umnha, te simi'ẽ na 're hâimana, 'Re ihâimana u'âsi mono zadawa wasu'uwẽ 'wa da hã. Ta hã ma tô dawana tihâiwa'utu 'rata, ihâiba si'utõrĩ waihu'u õ na. Uburé ti'ai ãma danhib'apito norĩ nhipai u, Zezusi hã te 're hâimana. Misi Danhib'apito uptabi na, te tô 're hâimana. Ta hã te te 're wa'azawi pese. Tahawa, ma tô wazada dârâ. Wazada dâ'â wamhã, iwapru ma tiwi puru. Tawamhã wawasété na 're wanomro mono ré, ma tô tiwapru na tidâ'âzém na te te 're wa'a'upsõ, wawasété ãna ãma 're wanomro mono da oto.

Apocalipsi 13:8

Tawamhã ti'ai ãma daro mono bâ 're idahâimana za'ra mono norĩ hã te za ãma 're dawata za'ra, da'ahâ uptabi na. Tane nherẽ, ni'wam norĩ hã ãma 're wata za'ra mono õ di za, ibaihâ na 're idahâimana u'âsi za'ra mono norĩ nhisi, 're isimi'wara mono zém na isisi 're isimi'wara mono norĩ hã. Duréihã 'Re ihâimana u'âsi mono hã te te ropoto mono õ ré, danhisi na te te ãma irob'ui'éré za'ra hã ã ibaihâ hã, Pone'ẽrebâ, da te dasiwi iwĩrĩ te hã.

Apocalipsi 5:9

Tawamhã ta norĩ hã te Pone'ẽrebâi ma tinho're za'ra, tinho're itém na. Ãne te tãma tinho're za'ra: “A hã ma tô dasiwi aiwĩrĩ ni. Ma tô dazada hã atâ. Dazada atâ'âzém na ma tô ida'awa'â, dawasédé hã dama 're apari mono da ãma, 'Re ihâimana u'âsi mono nhib'a'uwẽ oto 're danomro mono da. Dapoto mono bâ a hã ma tô ida'awa'â, damreme sipo'o mono bâ 're idahâimana za'ra mono hã. Danhipai u aiwẽ uptabi di, a hã. Aiwaihu'u pese uptabi di duré. Tahawa, te aiwétési sada hã aihâiba, ibaihâ isinhai ré i'âri da hã, duré i'uptobzé hã aprub da.