Roma 2:16 - ꞌRe Ihâimana Uꞌâsi Mono Zadawa Wasuꞌu

¹⁶ Ãne hã iwasu'uwẽ na te dama 're irowasu'u mono zéb zarina, te za tô nimahã na tiromhâiba, 'Re ihâimana u'âsi mono nhimipisutuzéb zarina, Zezu Cristu hã da'ãma isipo'ozéb da hã. 'Râwi dasima si da te 're irosa'rata za'ra mono na te za oto da'awaihu'u. Taha zarina te za dama arowairébé oto, Cristu hã.

Roma 2:16 ပူးပေါင်းရင်းမြစ်များ

Zenezi 18:25

'Re idanomro wasété mono zu, dawẽ na 're idahâimana za'ra mono i'uprosi da hã te ãma rosa'rata waihu'u õ di, dasine tiwasédé te te 're 'manharĩ za'ra mono õ nherẽ. Asimirob'manharĩzéb uwaibaba õ di, ãne hã. E marĩ wa. A hã uburé pese da'ãma 're irowairébé mono 'wa te 're aihâimana mo. Tahawa te za i'uwaibaba na si niha na dama 're i'ab'manharĩ mo.

Mateu 16:27

Ti'ai ãma Dasiré Ipodo, niwapsi te za wei mo apâ, Timama zadawa para, hâiwa ãma tãma iromhuri'wa norĩ siré. Tamep si uburé marĩ hã da te 're i'manharĩ za'ra mono zéb zarina, te za dama hã arowairébé, iwẽ norĩ ma, duré iwasété norĩ ma.

Luca 8:17

Tane, ĩmreme hã a'â te dama iwaihu'u'õ hã te za niwapsi waihu'u za'ra ni. Tahawa, wa tô rob'uiwẽzém na ãne ãma simiré'é.

Zuwã 12:48

Ni'wam norĩ hã te te 're ĩwẽ'õ za'ra mono wamhã, duré ĩmreme te te 're wẽ'õ za'ra mono wamhã, zahadu wapsi te za oto siwaihu'u za'ra, tiwasété na. Ti'a isi'utõrĩzéb ãma ĩmreme na po're pu'u za'ra wa, te za bâtâ na siwaihu'u za'ra, tiwasété na hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:42

Tahawa, ma tô wama pisutu za'ra, iwasu'uwẽ na wa te dama 're rowasu'u za'ra mono da. Ma tô duré wapisutu za'ra, Zezusi hã 'Re ihâimana u'âsi mono te te ipisutu na, wa te dama 're wasu'u u'âsi za'ra mono da, da'ãma rowairébé'wa da hã. Tawamhã dahâiba ré 're idahâimana za'ra mono norĩ ma, te za te te dama 're arowairébé, duré 're idadâ'â za'ra mono norĩ ma zama.

Zezusihi zadawa wasuꞌuꞌwa norĩ nhimiromhuri na robꞌuiꞌéré 17:31

Bâdâ hã ma tô sima pisutu siro, romhâ ré, danho'a te te dama i'arowairébézéb da hã. Tahawa, te ãne dama roti, 're dasipizari za'ra mono da. Ni'wa hã ma tô pisutu, sena na da'ãma rowairébé'wa da hã. Dâ'â uptabi nherẽ, apâ te te ihâiwa'udu, ma tô pisutu, 'Re ihâimana u'âsi mono hã. Apâ te te ihâiwa'utuzéb zarina, ma tô ãne hã dama waihu'u za'ra, õ hã da'ãma rowairébé'wa na hã.

Roma 16:25

'Re ihâimana u'âsi mono ãma si, wa za 're wawata u'âsi za'ra. Taha ma si, tãma waihu'u pese di, te te 're iwa'apawapto mono zéb da hã, Zezu Cristuhu wasu'uwẽ hã wa te 're isaze za'ra mono zé hã wa te 're rẽme za'ra mono ãna, wanhiptete u'âsi ãma 're iwanomro mono zéb da hã. Taha wasu'uwẽ hã wa tô te dama 're wasu'u u'âsi. Duréihã iwasu'uwẽ hã, 'Re ihâimana u'âsi mono te te dama 're awaihu'u mono õ di. Iwasu'uwẽ hã dama sa'rese ãna, ma tô aré 're danomro. Tane nherẽ, ma tô 'Re ihâimana u'âsi mono hã iwasu'uwẽ hã dama waihu'u oto, isadawa 'mahârâ'wa norĩ nhimi'ui'éré hawimhã. Tahawa, te oto isimiwada'urizéb zarina si, da te 're waihu'u za'ra daro mono bâ, da te ãma 're isazei pese za'ra mono zéb da hã, duré da te 're iwapari pese za'ra mono zéb da hã oto.

Roma 2:5

A norĩ wa'wa hã aipẽ'ẽ tete u'âsi, te 're aihâimana za'ra wa'aba mo. Tahawa, 'Re ihâimana u'âsi mono hã te za ropsi'utõrĩzéb u hã nimahã na bâdâ hã iwa iwaptã'ãzéb ãma, dazu aihâ za'ra wa'wa, dawasété wa, za te te ida'awẽ'õzéb ãma hã. Tame te za oto tinhimihâzé hã dama ãma uwaimra, i'uwaibaba si.

Roma 3:6

E tawamhã i'uwaibaba te ta norĩ hã ãne na hã te te 're rosa'rata za'ra. Mare di. I'uwaibaba õ di. 'Re ihâimana u'âsi mono hã te tô i'uwaibaba si te te 're da'ahâ za'ra. I'uwaibaba na si te marĩ na te te dama 're arowairébé. Ãne zarina te te dama 're arowairébé mono õ 'wa'âhã, aré te te da'awẽ'õ waihu'u õ di, za da'ãma isipo'ozéb ãma, 'Re ihâimana u'âsi mono hã.

1 Corĩtu 15:1

Ĩsisãnawã norĩ, ãne wa za duré ãma aipo're pu'u za'ra wa'wa. Duréihã Zezusihi wasu'uwẽ na, wa tô te aima 're rowasu'u za'ra wa'wa. Taha zarina, ma tô oto asima iwẽ za'ra wa'wa, asiptete sina ãma 're anomro u'âsi aba mono da hã oto.

1 Corĩtu 4:5

Tahawa, asiwi 're dawẽ'õ za'ra wa'aba mono õ di za, zahadu bâdâ hã wisi õ nherẽ. Wanhib'apito uburé za te te ida'awaihu'uzé wana, asiwi ĩwaihu'u aba zarina, asiwi ĩwẽ'õ za'ra wa'aba da, asima ĩ'ãma 're rosa'rata za'ra wa'aba mono õ di za, Wanhib'apito apâ wei morĩ õ ré hã. Ni'wam norĩ zama asiwi iwaihu'u aba zéb zarina, asiwi wẽ'õ za'ra wa'aba da, asima ãma 're rosa'rata za'ra wa'aba mono õ di za, bâtâ na Wanhib'apito za da'ãma isipo'ozé wana. Taha si te za dawi a'upsibi nhamra oto sõ'awi, uburé dapẽ'ẽ 're, 'râwi da te dasima 're irosa'rata za'ra mono zé hã. Marĩ hã bara na, da te 're 'madâ'â za'ra mono da, da te 're i'uiwẽ za'ra mono ne, te za Wanhib'apito hã sõ'awi oto dawi a'upsibi nhamra, uburé marĩ hã da te 're 'manharĩ za'ra mono da, da te dasima 're iwẽ za'ra mono zém na, danhimirosa'rada hã. Tawapsi te za 'Re ihâimana u'âsi mono hã wasu'u wẽ za'ra ni'wam norĩ hã, ti'ab ré tihâimana wẽ zém na te te tãma ãma 're uwaimrami za'ra mono wa, te te 're i'awaihu'u mono zéb zarina.

2 Corĩtu 5:10

E marĩ wa, wa za ãhã zô si, wa te 're rob'ruiwapari u'âsi za'ra, ti'ab ré hã. Niwapsi, wa za tô uburé Cristuhu nho're aimasam ni, te te wa'awaihu'u da, wahâimana wẽ na, duré wahâimana wasété na zama. Tame te za oto niha te te wama 're arowairébé, ti'ai ãma uburé marĩ, wa te 're i'manharĩ za'ra mono zéb zarina, iwẽ na, duré iwasété na.

Galata 1:11

Ĩsisãnawã norĩ, ma'ãpé niha we ĩ'ãma waihu'u za'ra wa'aba. Ti'ai ãma 're idahâimana za'ra mono norĩ nhimirowasu'u zarinai õ di, Zezu Cristuhu wasu'uwẽ te dama 're iwasu'u mono hã.

1 Timotiu 1:11

Roti tô sena na si, wa tô te dama ãma 're aroti, Wanhib'apito wasu'uwẽ na te dama 're rowasu'u mono wamhã. Wẽ uptabi di, Wanhib'apito wasu'u hã. Taha da, ma tô ĩma pisutu, iwasu'uwẽ na te ãma 're da'apo're pu'u mono da, 'Re ihâimana u'âsi mono hã, rowẽ u'âsi 're imorĩ hã.

2 Timotiu 2:8

Ma'ãpé, Zezu Cristuhu ãma 're rosa'rata pese mono. Ta hã dâ'â nherẽ, ma tô ab're hawi hâiwa'udu, Dawihi nhihudu hã. Wanhib'apito wasu'uwẽ na te 're da'apo're pu'u mono wamhã, taha wasu'u na wa tô te dama 're rowasu'u u'âsi.

2 Timotiu 4:1

Wa za oto marĩ hã aima waihu'u, 'Re ihâimana u'âsi mono nho'a, Cristu Zezusihi nho'a zama. Nimahã bâtâ na te za Cristu Zezusi hã dahâimanazém na da'awaihu'u, dawasété na, dawẽ na zama. Taha zarina, te za aihĩni norĩ ma dama arowairébé, dahâiba ré norĩ ma, duré adâ'â norĩ ma zama. Wanhib'apito hã te za wei mo apâ, Danhib'apito uptabi na oto dama 're sãmra mono da. Ãne wa, wa za aima ti'ru. Ma'ãpé, Wanhib'apito wasu'uwẽ na dama 're rowasu'u u'âsi mono za. Asô danhimiparizém na, duré asô danhimipari õ zém na zama, te za Wanhib'apito wasu'uwẽ na 're ida'apo're pu'u u'âsi mo. Da'ãma aiwa'a ãna, te za asimiroti na 're ida'apawapto mo, dawasété na 'râwi 're dasisãmri za'ra mono da, dawasédé hã da te 're rẽme pese za'ra mono da, dawẽ na si oto 're dahâimana za'ra mono da.

Hebreu 9:27

Misi haré te za aihĩni 're dadâ'â za'ra. Taha parip si te za 'Re ihâimana u'âsi mono hã niwapsi da'awaihu'u, dawẽ na duré dawasété na zama, taha zarina te te oto dama 're arowairébé mono da hã.

1 Pedru 4:5

Tane nherẽ, nimahã na ta norĩ hã 're ihâimana wasété za'ra mono zém na te te iwaihu'u za'ra zéb zarina, te za ta norĩ ma arowairébé, 'Re ihâimana u'âsi mono hã. Te te ida'awaihu'uzéb zarina, te za romhutu na uburé norĩ ma rowairébé, ihâiba ré norĩ ma, duré 're idâ'â za'ra mono norĩ ma zama.

2 Pedru 2:9

'Re ihâimana u'âsi mono ma, waihu'u pese di, Lo hã te te isõ'reptuzéb da hã. Tane duré, Wanhib'apito ma waihu'u pese di, ro'wa'rutu hawi te te 're i'anho'reptui mono zéb da hã, isimiroti 'madâ'â pese 'wa norĩ hã. Duré tãma waihu'u pese di, te te 're ida'ahâ za'ra mono zéb da hã, 're idanomro wasété mono norĩ hã, bâdâ iwa iwaptã'ãzéb u hã, dahâimanazém na te te ida'awaihu'uzéb da hã. Tawapsi te za dahâimanazéb zarina te te dama 're arowairébé, rob'rãsutuzéb ãma.