Roma 2:10 - ꞌRe Ihâimana Uꞌâsi Mono Zadawa Wasuꞌu

^10-11 E ni'wam norĩ hã taré zudeu na 're hâimana za'ra mono wa, te za tinhimihâzé hã te te tãma 're ba'a za'ra, 'Re ihâimana u'âsi mono hã. Mare di. Taha zarina, tinhimihâzé hã te te tãma 're ba'a za'ra mono õ di za. Duré e ni'wam norĩ hã taré zudeu na 're hâimana za'ra mono wa, te za iwẽ hã te te tãma 're anhomri, danhipai u. Mare di. Uburé aiwapsi 'Re ihâimana u'âsi mono ma hã, dapoto mono bâ. Tane nherẽ, uburé iwẽ si te te 're i'manharĩ za'ra mono norĩ ma si, te za 'Re ihâimana u'âsi mono hã iwẽ hã te te tãma 're anhomri, zudeu norĩ ma, duré zudeu'õ norĩ ma zama. Rowẽ uptabi si, te za ta norĩ ma si te te 're apisutu. Ta norĩ si te za te te 're awẽsãmri.

Roma 2:10 ပူးပေါင်းရင်းမြစ်များ

Provébiu 11:18

Iwasété norĩ pawa'â hã, tô senai'õ i'uptabi'õ, duré iprãire. Tane nherẽ, marĩ i'uwaibaba si te te 're i'manharĩ za'ra mono norĩ hã te za tipawa'â hã sena uptabi hã te te sima 're waibu, i'uwaibaba na si da te 're robzuri mono wa, sa'ẽtẽ na amnho da te dasima 're itehâri za'ra mono ne.

Provébiu 8:18

Ĩhawip si danhimarĩ pe, dawazébzé hã, duré 're idasisimarĩ ahâ pese za'ra mono zé hã.

Mateu 10:13

Tawamhã danhorõwa u 're aihutu aba mono wi, da te 're ai'mazasi wẽ za'ra wa'aba mono wamhã, 're isawi za'ra wa'aba mono zéb zarina, te za rowẽ na 're hâimana za'ra, 'ri tede'wa norĩ hã. Duré da te 're ai'mazasi wẽ za'ra wa'aba mono õ wamhã, rowẽ na 're hâimana za'ra mono õ di za, 'ri tede'wa norĩ hã.

Luca 1:79

Tawamhã ab're pipa te, robzei'õ u'âsi, 're wanomro mono õ di za. Te za oto te te 're wa'anhimroi wẽ, rowẽ na 're iwanomro mono zém na.

Luca 12:37

Tãma iromhuri'wa norĩ hã sõtõ ãna, sô simipari za'ra wamhã, tãma rowẽ za'ra di za. Tawamhã ãté mara wa'wa, te za apâ wi, isib'apito za'ra hã. Ãté si'a hârâ wi, te za apâ wi. Hâimana nhimiza'rese sina, sô 're simipari za'ra mono ré, apâ wisi wamhã, tãma rowẽ za'ra di za, tãma iromhuri'wa norĩ ma hã. Tawamhã apito nherẽ, sai õ ré, te za a'â ti'uza na ãma saprĩ, isa te te tãma sõmri mono da, tãma iromhuri'wa norĩ ma. Te za duré tãma nharĩ za'ra, tisai ma, si'ubumro da. Taha pari, te za duré tãma sõmri za'ra, isa hã.

Luca 19:42

Tahawa, te ãne tinha: — Ãhã na dama 're irowẽ za'ra mono zé hã dama waihu'u za'ra 'wa'âhã, aré dama 're rowẽ za'ra mono di. Tane nherẽ, dama waihu'u za'ra õ di. Tahawa, da'ãma ĩpẽ'ẽzé di.

Luca 22:14

Tawamhã te za oto tasaihuri ni. Tahawa, te oto Zezusi norĩ hã ai'ubumro, saihuri da, tizadawa wasu'u'wa norĩ me.

Luca 9:48

Te duré tãma nharĩ za'ra, ãne: — Ni'wam norĩ hã te te 're ĩzawi pese za'ra mono wa, ai'uté zô 're tob'uzu za'ra mono wamhã, ta norĩ u'âbâ te duré ĩzô 're tob'uzu za'ra. Tawamhã e ĩzô si te 're tob'uzu za'ra. Mare di. We ĩzatõrĩ'wa zô zama te duré sô 're tob'uzu za'ra. Dama iwapu norĩ hã 're sawi pese za'ra wa'aba mono wamhã, asima ai'maipire zô asõpré wa'aba ãna, wa za aipire na te 're ai'awaihu'u 'wa.

Zuwã 12:26

Duré ni'wam norĩ hã te te ĩma 're romhuri za'ra mono da, te te sima 're ĩwẽ za'ra mono wamhã, 're ĩmorĩzém na si te za 're nomro, ĩnhirã zarina si. Tawamhã ĩ'rata te za 're hâimana u'âsi za'ra, hâiwa ãma. Te te ĩma 're romhuri pese za'ra mono wa, te za Ĩmama hã ãma 're wata za'ra. Te za duré te te tãma 're wa'âbâ za'ra, isimiromhuri hã.

Zuwã 14:27

— Rowẽ na si 're anomro aba mono zéb si, wa za oto aima pisutu za'ra wa'wa, ĩ'ãma 're aipẽ'ẽzé za'ra wa'aba mono tõ da, duré asina 're aihâtâ'â za'ra wa'aba mono ãna, 're anomro aba mono da. Taré te aima pisutu za'ra wa'aba õ di. Ĩzazei'õ'wa norĩ nhimipisutuzém nei õ di, ĩnhimipisutuzé hã.

Zuwã 16:33

Ãne na wa tô aima rowasu'u za'ra wa'wa, ĩ'ãma 're aihâimana za'ra wa'aba mono wa, rowẽ na 're aihâimana za'ra wa'aba mono da. Tane nherẽ, ĩzazei'õ'wa norĩ hã te za tô te te 're ai'ruiwapari u'âsi za'ra wa'wa. Tahawa, te za 're irobzépata za'ra wa'aba mo. Tane nherẽ, te za asiptete sina ĩ'ãma 're anomro aba mo. Wa hã ĩzazei'õ'wa norĩ ma, ĩnhiptete uptabi wa, wa tô ãma ai'uté za'ra.

Roma 14:17

E marĩ wa. 'Re ihâimana u'âsi mono hã isazei'wa norĩ ãma 're isib'a'uwẽ mono zé hã, dasa hã da te 're iwẽ'õ za'ra mono zé, te te wasu'u õ di. Uburé marĩ hã da te 're i'âhuri mono zéb zama te te wasu'u õ di duré. E marĩ te wasu'u tawamhã, 'Re ihâimana u'âsi mono, da'ãma 're isib'a'uwẽ mono zé hã. Ta hã 'Re ihâimana u'âsi mono nhimiroti zarina 're idanomro wẽ mono zé, te wasu'u. Duré 'Re ihâimana u'âsi mono, Tipẽ'ẽzani na te te 're ida'apawapto mono zéb zarina, rowẽ uptabi na 're idanomro mono zé, te wasu'u, dato sina.

Roma 15:13

'Re ihâimana u'âsi mono hã waihu'u pese wa, te za te te 're wa'apawaptob u'âsi, marĩ iwẽ hã te te wama 're ipisutu za'ra mono zéb zarina, za te te wama ãma 're i'a'uwaimrami mono zéb zô, wa te wasiwi 're umnhasi za'ra mono sina, sô 're wanhimipari u'âsi za'ra mono da. Tahawa, wa ai'ãma tãma 're ĩmreme u'âsi za'ra wa'wa, atoi uptabi na 're aihâimana u'âsi za'ra wa'aba mono da, duré rowẽ si te te aima 're pisutu za'ra wa'aba mono da, asina 're i'umnhasi za'ra wa'aba mono paramhã. Ipẽ'ẽzani nhimipawaptobzéb zarina, marĩ iwẽ uptabi hã 'Re ihâimana u'âsi mono, za te te aima 're isõmri za'ra wa'aba mono zéb zô, asiwi 're umnhasi za'ra wa'aba mono sina, sô 're asimipari za'ra wa'aba mono zém na, 'râwi asima ãma 're sa'ẽtẽ za'ra wa'aba mono da, wa tô te ĩsima 're aiwẽ za'ra wa'wa.

Roma 2:7

Ni'wam norĩ si te marĩ hã simi'ẽ na te te dama 're 'manharĩ u'âsi za'ra, iwẽ hã. Ta norĩ hã 'Re ihâimana u'âsi mono si te te 're wẽsãmri za'ra mono da, te sina 're simipari za'ra, duré i'rata 're isi'ubumroi u'âsi mono zé, te te tãma 're apisutu mono da. Ta norĩ ma si, te za tô 'Re ihâimana u'âsi mono hã te te 're apisutu, 're isi'ubumroi u'âsi mono zéb da hã, i'rata.

Roma 2:9

Uburé dawasété si, da te 're i'manharĩ za'ra mono norĩ hã te za te te 're robzépata za'ẽtẽ za'ra, zudeu norĩ hã, duré zudeu'õ norĩ zama.

Roma 5:1

Wanhib'apito Zezu Cristu hã ma tô te te sima 're wa'awẽ, wa te wasina 're i'umnhasi za'ra mono zéb zarina. Tahawa, 'Re ihâimana u'âsi mono hã ma tô te te sima wa'ãma 're aroti, wa te 're isazei pese za'ra mono na, wawasédé hã te te oto wa'ãma 're ab'madâ'â tõ mono da, taha zarina si te te duré 're wa'awẽsãmri mono da, wawasété na 're wanomro mono nherẽ, te te 're wa'ahâ za'ra mono tõ da. Tahawa, rowẽ u'âsi, wa oto ãma 're wanomro, 'Re ihâimana u'âsi mono ãma hã.

Roma 8:6

Ni'wam norĩ hã tihâimana wasété ma si, tihâiba te te 're sõmri u'âsi za'ra mono wamhã, ta norĩ hã te za ipẽ'ẽ 're, dâ'â u'âsi 're hâimana za'ra, 'Re ihâimana u'âsi mono nhiti. Tane nherẽ, ni'wam norĩ hã 'Re ihâimana u'âsi mono pẽ'ẽzani te te tãma 're iwẽ za'ra mono zéb zarina si, 're hâimana wẽ za'ra mono wamhã, ta norĩ si te za 'Re ihâimana u'âsi mono 'rata 're hâimana u'âsi za'ra, robzei u'âsi na.

Roma 9:21

I'manharĩ'wa hã te te sima iwẽzéb uwaibaba si, te za zé hã te te 're ab'manharĩ, piza na. Zé hã te te su pese wamhã, misi te za oto sada ub'rã. Tawamhã te za sima rosa'rata, piza maparane te te sima 'manharĩ da, ãma. Tawamhã te te i'manharĩ 'rada hã, wẽ uptabi na te za 'manha, i'madâ'â ze da hã. Duré ihâiba amo hã si'aba'ré na te za 'manha, wẽ prã na, marĩ da si 're hâimana mono da, taré.

Roma 9:23

Ãne hã ma tô duré te te sima 're wẽ, pire na 're ihâimana wẽ uptabi mono zém na, dama 're siwaihu'u mono da. Uburé wa'ãma 're ipẽ'ẽzé mono zéb zarina, wa'ãma 're isiwãrĩ za'ra mono norĩ ma, ma tô ãne na wama 're siwaihu'u, 'Re ihâimana u'âsi mono hã. Wa norĩ hã ma tô oto te te 're wa'apisutu siro, rowẽ uptabi ãma i'rata 're wahâimana u'âsi za'ra mono da.

Galata 5:22

Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.

Galata 5:6

Simisutu Cristu Zezusihi nhib'a'uwẽ oto 're wanomro mono wamhã, 'Re ihâimana u'âsi mono hã te te 're wa'aba'a mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeu'õ na 're iwahâimana za'ra mono zém na hã, te te oto 're wa'awaihu'u mono õ di za. Zezu Cristu Danho'reptui'wa na, wa te wasina 're umnhasi za'ra mono wa, wanhimizawi pese na 're iwahâimana za'ra mono zém na si, te za oto te te 're wa'awaihu'u, 'Re ihâimana u'âsi mono hã.

Filipu 4:7

Rowẽ hã 'Re ihâimana u'âsi mono te te wama 're i'apisutu mono hã, iwẽ uptabi hã te wama 're hâimana za'ra, da te 're iwaihu'u za'ra mono õ hã. Taha si te za te te 're aipẽ'ẽ nomri wẽ za'ra wa'wa, marĩ na 're aihâtâ'â za'ra wa'aba mono ãna 're aihâimana za'ra wa'aba mono da, Cristu Zezusihi ãma oto 're anomro aba mono zéb zarina. Ãne hã 'Re ihâimana u'âsi mono hawi rowẽ hã aima 're hâimana za'ra wa'aba mono da, te za asi'ãma tãma 're aimreme zusi u'âsi aba mo.

1 Timotiu 1:17

Tahawa, Danhib'apito uptabi ãma si wa za 're wawata u'âsi za'ra. Ta hã Apito u'â te dama 're sãmra, idâ'â'õ hã, ni'wa hã niwa te te i'madâ'â waihu'u õ hã. Õhõ si Danhib'apito uptabi, 'Re ihâimana u'âsi mono hã. Wẽ uptabi wa, wa za ãma 're wawata u'âsi za'ra.

Hebreu 2:7

Ma tô aré dama ipisu, hâiwa ãma aima romhuri'wa norĩ zapari, dawapu na 're dahâimana za'ra mono da a'â. Tazahã, ma tô oto dama ipisu, dapire na oto 're dahâimana za'ra mono da, iwẽ na si.

Tiagu 2:22

Abra'ã hã ma tô mreme 'manha, te te sina 're umnhasi za'ẽtẽ mono wa, 'Re ihâimana u'âsi mono te te tãma iropisutuzém na, isihudu hã ahâ da. Imreme hã te te i'manharĩzéb zarina, wa tô ãma waihu'u za'ra ni, 'Re ihâimana u'âsi mono nhimiropisutuzé hã tô sena te te sina 're i'umnhasi mono zém na.

Tiagu 3:13

E 'wam norĩ hã te 'Re ihâimana u'âsi mono hawi dahâimanazém na rowaihu'u ré 're hâimana za'ra, asiré wa'aba hã isimirosa'rata za'ẽne hã. Ãne hã ni'wam norĩ hã asiré 're hâimana za'ra wa'aba mono wamhã, hâimana wẽ na te za 're hâimana za'ra. 'Râwi tiwẽ na sina 're wata za'ra mono õ di za. Ãne wamhã, hâiwa hawi rowaihu'u ré 're inomro mono na, te za da te ãma 're waihu'u za'ra.

1 Pedru 1:7

Wanhib'apito umnhasi sina 're aihâimana za'ra wa'aba mono zô, te za rowasédé hã asada 're hâimana za'ra wa'wa. Wanhib'apito Zezu Cristuhu ma, wẽ di, Wanhib'apito umnhasi sina 're i'aihâimana za'ra wa'aba mono zé hã. Ẽtẽ waipo pré oru hã dama isawi pese zém nhipai u, tãma wẽ di. Ẽtẽ waipo pré oru hã wa'âbâ za'ẽtẽ wa, dama sawi pese di, ta hã dama 're hâimana u'âsi mono dai õ nherẽ. Zata õ zô, te za unhama wa hiri ni, zata õ wa, da te iwaihu'uzéb da hã, oru uptabi na. Tane, a norĩ wa'wa hã rowasédé hã asada 're hâimana za'ra wa'aba mono nherẽ, Wanhib'apito umnhasi sina 're aihâimana u'âsi za'ra wa'aba mono wamhã, apâ wei morĩ wapsi, te za danho'a ai'ãma tiwata za'ra wa'wa, õhõ umnhasi sina ãma 're i'aihâimana u'âsi za'ra wa'aba mono zém na. Tame te za duré marĩ hã iwẽ hã aima sõmri za'ra wa'wa. Rowẽ uptabi hã te za duré aima pisutu za'ra wa'wa. Tawapsi, aima 're rowẽ uptabi za'ra wa'aba mono di za oto.

1 Pedru 5:4

Tawamhã Da'madâ'â'wai uptabi hã apâ wei morĩ wapsi, tãma 're idapawapto wẽ za'ra wa'aba mono zé wa'rãmi, te za oto aima wa'âbâ za'ra wa'wa, iwẽ uptabi na, si'utõrĩ'õ na oto aima 're hâimana u'âsi za'ra wa'aba mono da.

1 Samuéu 2:30

Wa hã Izaraéu nhihudu norĩ te, 'Re ihâimana u'âsi mono Uburé Danhib'apito hã wa tô ropisutu duréihã aihi'rata norĩ ma hã za isihudu norĩ hã õne u'â te te ĩma 're iromhuri za'ra mono na hã sasedoti na. Tane nherẽ, ãhã na hã wa za tinha, õne u'â 're ihâimana mono õ na hã za oto. E marĩ wa. Wa hã za oto te 're da'awazé mono dâ'âsina, da te 're ĩwazéb za'ra mono norĩ hã, duré za oto te 're da'awazé mono õ dâ'âsina, da te 're ĩwazéb za'ra mono õ norĩ hã.