Roma 16:18 - ꞌRe Ihâimana Uꞌâsi Mono Zadawa Wasuꞌu

¹⁸ Ta norĩ hã Wanhib'apito Cristuhu ma, te te 're romhuri za'ra mono õ di. Te te sima 're iwẽ za'ra mono zéb zarina si, te marĩ iwasétére zô si hã sima 're sõpré. Ta norĩ hã sadawa nhipese nherẽ, te isimiroti hã sena newa da te 're wapari ze za'ra, danhimirosa'rata nhib'uware na 're idahâimana za'ra mono norĩ hã. Mreme wapari zei wa, duré asa imreme hã da te dasima 're wẽ za'ra mono da, te taré timreme amo na te te dama 're rowasu'u za'ra, da'ãma 're wata za'ra mono sina. Tawamhã taha zarina, te za awa'awi imreme na da te 're saze za'ra.

Roma 16:18 ပူးပေါင်းရင်းမြစ်များ

Salmu 119:130

Aimreme na ãma isaprĩzé hã te rowa'a hã te te dama sina 're sani. Te duré 'rãiwaihu'u wẽ ãna 're ihâimana za'ra mono norĩ ma, i'rãnhimiza're hã te te tãma 're sõmri za'ra.

Salmu 19:7

Uburé Danhib'apito nhimiroti hã wẽ uptabi na te 're hâimana. Te duré wanhiptetezé ité hã te te wama 're anhomri. Tô ibâre isimiroti hã umnhasi na dama 're ihâimana mono zéb zarina, te rowaihu'u prãi'wa norĩ ma, rowaihu iwẽ hã te te tãma 're anhomri.

Provébiu 14:15

Simirosa'rata waihu'u prã na 're ihâimana za'ra mono norĩ hã te za uburé marĩ na te te 're dazaze su'u za'ra. Tanei õ di, isimiza'rese norĩ hã. Te sisõwamhã te te 're rob'madâ'â wẽ za'ra.

Provébiu 22:3

Isimiza'rese wẽ, marĩ isimimnha te te 'madâ'â wamhã, te za tãma ai'ré, romhâ na ré. Tanei õ di, isimiza'rese'õ hã. Ta hã te za õne haré itẽme mo. Tahawa, te za robzépada hã sisô waze.

Provébiu 8:5

Asimirowaihu'u wẽ prã na 're i'aihâimana za'ra wa'aba mono norĩ, ma'ãpé rowaihu iwẽ hã 're waihu'u za'ra wa'aba mono. Duré asimiza'rese ãna 're i'aihâimana za'ra wa'aba mono norĩ, asimiza'rese wẽ zé hã te za oto 're iwaihu'u za'ra wa'aba mo.

Daniéu 11:34

Ta norĩ ma, da te irob'manharĩ wasété za'ra mono siwaprã, te za 'Re ihâimana u'âsi mono nhib'a'uwẽ norĩ, ni'wam norĩ nhimipawaptobzé hã tãma tihâimana za'ra. Tane nherẽ, da'ahâ uptabi na te za taré marĩ zô dasima ãma ana ni.

Mateu 24:11

'Re ihâimana u'âsi mono zadawa 'mahârâ'wa newa, roti tô senai'õ na te te dama 're iroti za'ra mono norĩ hã te za datẽme 're nomro, sadawa nhipese na te te dama 're rowasu'u za'ra mono da, taré. Tawamhã isimiroti hã te za tô da te 're saze za'ra, tô sena newa, ta norĩ hã sadawa nhipese na taré dama 're siwasu'u za'ra mono nherẽ.

Mateu 24:24

E marĩ wa, wa ãne aima waihu'u za'ra wa'wa. Ni'wam norĩ hã te za datẽme 're nomro, danho'reptui'wa na, niha wamhã, 'Re ihâimana u'âsi mono zadawa 'mahârâ'wa na dama 're siwasu'u za'ra mono da, sadawa nhipese sina. Ta norĩ hã marĩ dama i'manharĩ waihu'u'õ hã te za duré te te dama 're 'manharĩ za'ra, 'Re ihâimana u'âsi mono zadawa param newa, da te ãma 're sasõmri za'ra mono da. Isazei'wa norĩ zama te te dame ãma 're saze za'ra mono da, te za ãne na te te dama 're romhõsi za'ra. Tane nherẽ, te te dame 're sazei waihu'u za'ra mono õ di za ta norĩ hã, 'Re ihâimana u'âsi mono te te sima 're apisutu siromo mono wa, ãma 're sib'a'uwẽ za'ra mono da hã.

Mateu 6:24

— Dama romhuri'wa isib'apito maparane tãma 'maihâimana wamhã, aiwa te te tãma 're 'mairomhuri wẽ mono õ di za, tinhib'apito zahuré ma hã. Isib'apito maparane wamhã, sahuré te te 're sawi pese zahuré mono õ di za. Misi te za te te 're sawi pese. Ihâiba amo si te za te te siwi 're wẽ'õ. Duré sahuré te te 're wapari pese zahuré mono õ di za, romhuri'wa hã. Misi te za te te 're wapari pese. Ihâiba amo si te za te te 're 'ruiwapari. Tane, a norĩ wa'wa hã rob'uiprazéb zô si, asima 're romhuri za'ra wa'aba mono wamhã, 'Re ihâimana u'âsi mono ma, 're romhuri wẽ waihu'u za'ra wa'aba mono õ di za.

Mateu 7:15

— Duré, 'Re ihâimana u'âsi mono zadawa wasu'u uptabi õ 'wa norĩ wi, te za 're asi'madâ'â pese za'ra wa'aba mo. Ta norĩ hã tô sena dasiré 're hâimana wẽ za'ra mono newa, te za te te dama 're roti za'ra taré. Ta norĩ hã te abaze zahi ne 're hâimana u'âsi za'ra, isazei'wa norĩ zada hã.

Zuwã 12:26

Duré ni'wam norĩ hã te te ĩma 're romhuri za'ra mono da, te te sima 're ĩwẽ za'ra mono wamhã, 're ĩmorĩzém na si te za 're nomro, ĩnhirã zarina si. Tawamhã ĩ'rata te za 're hâimana u'âsi za'ra, hâiwa ãma. Te te ĩma 're romhuri pese za'ra mono wa, te za Ĩmama hã ãma 're wata za'ra. Te za duré te te tãma 're wa'âbâ za'ra, isimiromhuri hã.

Roma 14:18

Ãne na ni'wam norĩ hã Cristuhu ma, te te 're romhuri wẽ za'ra mono wamhã, 'Re ihâimana u'âsi mono ma, te za te te sina 're rowẽ zani za'ra, uburé 're ihâimana wẽ za'ra mono zém na. Tawamhã te za duré da te 're wẽsãmri za'ra, ti'ai ãma ré.

Roma 16:19

Tanei õ di, a norĩ wa'wa hã. Zezusihi wasu'uwẽ 're iwapari pese za'ra wa'aba mono zém na, ma tô daro mono bâ isazei'wa norĩ hã aiwasu'u za'ra wa'wa hã te te 're wapari ze za'ra. Tahawa, ma tô ãma asina ĩma 're irowẽ zani za'ra wa'aba mo. Ãne wa, wa za duré aima roti za'ra wa'wa. Asimiza'rese sina, te za marĩ iwẽ hã 're i'manharĩ za'ra wa'aba mono zéb da si, asina 're asõpré wa'aba mo. Marĩ iwasédé hã 're 'manharĩ za'ra wa'aba mono da, asima 're 'madâ'â za'ra wa'aba mono õ di za. Te za tiwi 're asiptete za'ra wa'aba mo, aiwasété wi hã.

2 Corĩtu 11:3

Tane nherẽ, wa ĩhâtâ'â sina, te ai'ãma 're rosa'rata u'âsi za'ra wa'wa. E marĩ wa. Cristuhu ãma si, 're sasõmri pese za'ra wa'aba mono nherẽ, ãté ni'wam norĩ hã roti tô senai'õ na taré te te aima 're irowasu'u za'ra wa'aba mono zéb zarina, te za Cristuhu wasu'uwẽ hã irẽme za'ra wa'wa. Duréihã Wa'uburé hã wahi na sihâiba wa, Ewaha ma, sadawa nhipese na te te irowasu'u ne, te za tô ãté ni'wam norĩ hã te te aima 're rowasu'u za'ra wa'wa, roti tô senai'õ na hã.

2 Corĩtu 2:17

Ni'wam norĩ hã 're simarĩ ahâ za'ra mono da si, te 'Re ihâimana u'âsi mono zadawa wasu'u na te te dama 're romhuri za'ra. Tane nherẽ, wa norĩ hã ta norĩ ne, 're wahâimana za'ra mono õ di. Duré marĩ aimawi zô, wa te wasima 're romhuri za'ra mono õ di wa norĩ hã, 'Re ihâimana u'âsi mono zadawa wasu'u na hã. Cristuhu waihu'u pese zarina si, wa tô wa te dama 're rowasu'u za'ra sena na, 'Re ihâimana u'âsi mono nho'a, ãne da, te te sima wapisutu za'ra wa, ta hã.

2 Corĩtu 4:2

Ni'wam norĩ hã asiré 're hâimana za'ra wa'aba mono nherẽ, ma tô wawasédé hã wa'ãma sa'ra za'ra, wahâimana nhipese sina dawi 're wahâimana mono newa. Uburé marĩ hã pi'uriwi da te 're i'manharĩ wasété za'ra mono zé hã, wa tô wa te wasiwi 're awẽ'õ. 'Re ihâimana u'âsi mono zadawa wasu'u hã, wa te dawi ãma 're 'wa'rutu mono õ di. Õhõ si, wa tô sõ'awi wa te dama 're wasu'u u'âsi, sena na, 'Re ihâimana u'âsi mono nho'a. Ãhã zarina, te za 'râwi dapẽ'ẽ na da te 're wawaihu'u za'ra, wazadawa nhipese ãna, 're iwahâimana mono zém na hã.

Galata 1:10

E ĩnhimiroti na ĩ'ãma 're idawata za'ra mono zéb zô, wa ĩsina 're ĩnhimipari. Mare di. 'Re ihâimana u'âsi mono si ĩ'ãma 're iwata mono zéb zô si, wa ĩsina 're ĩnhimipari. Ti'ai ãma ĩ'ãma 're dawata za'ra mono da, 'râwi ĩsi'uihâ na te ĩsina 're rosa'rata mono 'wa'âhã, Zezu Cristuhu ma romhuri'wa, 're ĩhâimana mono õ di aré.

Filipu 2:21

Tanei õ di, ni'wam norĩ hã. 'Râwi te sima si marĩ zô 're sõpré, te te sima 're iwẽ za'ra mono zéb uwaibaba si. Zezu Cristu te te tãma 're i'awẽ mono zéb zô, sima 're sõpré mono õ di, ta norĩ hã.

Filipu 3:19

Ta norĩ hã 'Re ihâimana u'âsi mono nhiti, dapẽ'ẽ 're dadâ'â u'âsi ne 're idahâimana za'ra mono zéb u, te za 're nomro, ropipa u. E marĩ wa. Ta norĩ hã te te sima 're iwẽ za'ra mono zéb uwaibaba si, te marĩ hã tihâiba ma te te 're 'ruiwapari za'ra, 'Re ihâimana u'âsi mono upana. E ta norĩ hã tihâimana wasété na 'râwi 're siwẽ'õ za'ra mono ã bâ, te bété sina 're wata za'ra, 're ihâimana wẽ uptabi za'ra mono na hã. Ti'ai ãma uburé marĩ hã iwasété na si, te ta norĩ hã te te sima 're rosa'rata wasété u'âsi za'ra.

Colosu 2:4

Ni'wam norĩ hã roti senai'õ na taré te te aima 're irowasu'u za'ra wa'aba mono hã wapari ze nherẽ, ãma 're saze za'ra wa'aba mono tõ da, wa ãne na aima nharĩ za'ra wa'wa.

Colosu 3:24

Aipawa'âbâ aba zé hã hâiwa ãma asô 're isimi'wara aba mono hã, Wanhib'apito hã za te te aima isõmri za'ra wa'aba na asina waihu'u siromo za'ra wa'aba wa, te za ãne hã tô sena ti'ai ãma asib'apito norĩ ma 're iromhuri wẽ u'âsi za'ra wa'aba mo. Tane nherẽ, ta norĩ ma si 're romhuri za'ra wa'aba mono õ di. Ta norĩ u'âbâ, te Wanhib'apito Cristuhu ma zama 're iromhuri za'ra wa'aba mo, ta hã Wanhib'apito uptabi wama 're hâimana mono wa.

2 Tesalonita 2:10

Tinhimiromhuri wasété na te za dawi udâ pese za'ra, 'Re ihâimana u'âsi mono nhiti za 're idahâimana u'âsi za'ra mono norĩ wi. Ta norĩ hã te iwasu'uwẽ hã te te siwi 're wẽ'õ za'ra, tô sena iwasu'uwẽ hã. Tahawa, ta norĩ hã te te 're sõ'reptu za'ra mono õ di za, 'Re ihâimana u'âsi mono hã.

Tiagu 1:1

Wa hã Tiagu, 'Re ihâimana u'âsi mono ma romhuri'wa, duré Wanhib'apito Zezu Cristuhu ma romhuri'wa, wa 're mo. Uburé 'Re ihâimana u'âsi mono nhib'a'uwẽ norĩ, daro mono bâ 're aihâimana za'ra wa'aba mono norĩ hã, wa za ĩnhimi'ui'éré na ãma asawi za'ra wa'wa.

2 Pedru 2:3

Tô senai'õ na rowasu'u'wa norĩ hã te za taré rob'uiprazéb zô, tinhimirosa'rata na si, marĩ na te te aima 're rowasu'u za'ra wa'wa. Tane nherẽ, ta norĩ hã iwasété na 'Re ihâimana u'âsi mono ma, waihu'u pese di. Tahawa, isimihâzé wi, 're sisõ'reptu waihu'u za'ra mono õ di za.

Zuda 1:1

Wa hã Zuda, Zezu Cristuhu ma romhuri'wa, Tiaguhu no, wa aima ãma rob'ui'éré za'ra wa'wa. 'Re ihâimana u'âsi mono hã ma tô te te 're aipisutu za'ra wa'wa, isib'a'uwẽ na oto tãma 're aihâimana za'ra wa'aba mono da. Tahawa, tãma asawi pese za'ra wa'aba di, Wamama ma hã. Duré Zezu Cristu hã te te oto 're ai'madâ'â pese za'ra wa'wa.

Zuda 1:12

A norĩ wa'wa hã te asiré isazei'wa norĩ me 're asisawi za'ra wa'aba mono sina, asa hã asima 're i'manharĩ za'ra wa'aba mo, simisutu. Tane nherẽ, te iwasété norĩ hã atẽme 're sihutu 'wa, asa hã asima 're 'manharĩ za'ra wa'aba mono ré. Siséb za'ra õ zarina te ta norĩ hã te te aiwi 're ro'wa'rutu za'ra wa'wa, siwa'ru. A norĩ wa'wa hã zazahâ ihâirã ne te 're aihâimana wẽ za'ra wa'aba mo, iwẽ na si. Tane nherẽ, ta norĩ hã zazahâ ihâirã, da te 're ihâ'uptob za'ra mono ne, te 're hâimana wasété za'ra, sima si te te 're rosa'rata wasété za'ra mono wa. Ta norĩ hã hâiwa nhirõno hã, tã ihawi 're ta'a za'ra mono ãna, rowa'u te te 're i'mapraba za'ra mono ne, marĩ iwẽ hã te te 're 'manharĩ za'ra mono õ di. Duré rob'rã, 're i'rã prédu mono zéb u, wede hã 'rãi ãna 're isimasa mono ne, duré da te oto 're sariza'o'o za'ra mono wa, 're i'ré pese za'ra mono ne, marĩ iwẽ hã te te 're 'manharĩ za'ra mono õ di, ta norĩ hã.

Zuda 1:16

Ta norĩ hã te 're siwapsari u'âsi za'ra, soto wasété na. Si'upana si te duré ta norĩ hã dawasédé hã te te da'ãma 're sa'ra, 're danomro wẽ mono nherẽ. Si'uihâ na marĩ hã te te sima 're iwẽ za'ra mono zéb uwaibaba si, te te 're 'manharĩ za'ra, iwasétére hã. 'Râwi te ta norĩ hã duré sina 're wata u'âsi za'ra, tiwẽ na. Te duré taré dawẽ te te da'ãma 're sa'ra, iwa'rãmi marĩ iwẽ hã da te tãma 're sõmri za'ra mono da.

Apocalipsi 1:1

Duréihã, 'Re ihâimana u'âsi mono hã ma tô Zezu Cristuhu ma awaihu'u siro, tô sena na za romhutu na 're iromhâimana mono zém na, tinhib'a'uwẽ norĩ ma, te te duré waihu'u siromo za'ra da. Tahawa, Zezusi hã ma tô hâiwa ãma romhuri'wa hã we satõ Zuwãhã u, marĩ te te tãma waihu'u da. Tawamhã ma tô itẽme wi. Itẽme wisi wamhã, Zezusihi ma, 'Re ihâimana u'âsi mono hã sõ'awi te te oto tãma iromhâi'rézém na ma tô Zuwãhã ma waihu'u. Ãhã wamhã, sõtõ 'rowim ne, ma tô marĩ hã 'madâ, da te 're irosawẽrẽ za'ra mono ne. Tahawa, tô sena na te za oto Zuwã hã ãne aima ãma rob'ui'éré za'ra wa'wa, waihu'u za'ra wa'aba da, uburé marĩ hã te te i'madâ'âzém na, tô sena 'Re ihâimana u'âsi mono nhimiwaihu'uzém na hã, Zezusi hã sena na te te iwaihu'uzém na.

1 Samuéu 2:29

E marĩ da, ma tô ãne nherẽ, danhoprubzéb zô 're irob'ruiwapari za'ra wa'aba mo, wa hã te dama iwaihu'uzéb zarina danhoprubzé da te ĩma 're i'manharĩ za'ra mono zô. Eri, e marĩ da, te ai'ra norĩ hã iwazéb za'ra ĩnhipai u, taré hâipese za'ra da si. Ta norĩ hã ĩma danhoprubzé romnhi wa'õno danhipai u iwẽ uptabi si te te dawi 're huri mono nherẽ, a hã tiwi sawi za'ra õ di.