Roma 15:8 - ꞌRe Ihâimana Uꞌâsi Mono Zadawa Wasuꞌu

⁸ Cristu hã ma tô we ti'ai u datẽme mo, zudeu norĩ hã te te 're apawapto mono da, duréihã zudeu norĩ hi'rata ma, dama ipire za'ra norĩ ma, 'Re ihâimana u'âsi mono te te tãma 're iropisutu za'ra mono zéb zarina, te te dama ãma 're a'uwaimrami mono da, duré uburé 'Re ihâimana u'âsi mono te te dama ãma 're i'a'uwaimrami mono zém na, tô sena na da te ãma 're waihu'u pese za'ra mono da.

Roma 15:8 ပူးပေါင်းရင်းမြစ်များ

Provébiu 8:7

Sena na wa ĩzaihâ na te 're nharĩ u'âsi. E marĩ wa. Dazadawa nhipese da, 're ĩnhiti'rui mono wa.

Mateu 15:24

Tawamhã Zezusi te tãma nharĩ za'ra, ãne asa: — Pone'ẽrebâ 're isimani za'ra mono norĩ zô si, ma tô we Ĩmama hã ĩzatõ, Izaraéu nhihudu norĩ zô si.

Mateu 20:28

Tane duré, ti'ai ãma Dasiré Ipodo hã da te tãma 're romhuri za'ra mono da, we morĩ õ di, ti'ai u. Te te 're da'apawapto mono da si, te we datẽme mo, sihâiba zawi ãna dazada dâ'â da, da'upana te te da'awa'âbâ da.

Zuwã 10:16

Ni'wam norĩ hã te duré 're nomro, ĩnhib'a'uwẽ 're hâimana za'ra mono da hã. Ta norĩ ãma, wa za pone'ẽrebâ na simiré'é za'ra, ĩnhimiwa'ra 're, 're isi'ubumroi mono õ na hã. Ta norĩ zama wa za ĩsitẽme ubumro. Tawamhã te za ĩmreme hã te te 're wapari pese za'ra. Pone'ẽrebâ norĩ hã maparane danhimi'ubumro hã siré oto 're isi'ubumroi mono ne, te za simisutu ĩnhib'a'uwẽ 're nomro, misi i'madâ'â'wa, tãma 're ĩhâimana za'ra mono wa za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:46

Tane nherẽ, pahi ãna ma tô Paulu norĩ hã tãma nharĩ za'ra, zudeu norĩ ma, ãne: — A norĩ wa'aba ma, uimrehẽne wa tô aima rowasu'u za'ra wa'aba ni, 'Re ihâimana u'âsi mono zadawa wasu'u na hã. Tane hã tô, wẽ di. Tane nherẽ, taré newa, ma tô asiwi iwẽ'õ za'ra wa'wa, iwasu'uwẽ hã. Tahawa, ibâi õ di, hâiwa ãma rowẽ ãma 're i'aihâimana u'âsi za'ra wa'aba mono zéb da hã, 'Re ihâimana u'âsi mono 'rata. Tahawa, wa za airẽme za'ra wa'aba ni, zudeu'õ norĩ ma, wa te tãma 're rowasu'u za'ra mono da oto.

Roma 11:22

Ãhã wasu'u na, wa za 'Re ihâimana u'âsi mono nhimizawi pese zé hã ãma waihu'u za'ra ni. Isimihâzé pire na zama, wa za duré ãma waihu'u pese za'ra ni. Tiwi 're isi'marõpãrĩ pese za'ra mono norĩ si, te za te te 're ahâ za'ra za'ẽtẽ. Tane nherẽ, a norĩ wa'wa hã 'Re ihâimana u'âsi mono te te 're asawi pese za'ra wa'aba mono zéb zarina, marĩ iwẽ na te te 're aipawaptob za'ra wa'aba mono zéb da hã, tãma asina 're uwaimrami u'âsi za'ra wa'aba mono wamhã, te za tô rowẽ hã te te aima 're pisutu u'âsi za'ra wa'wa, hâiwa hawi, ai'ãma 're ipẽ'ẽzé za'ra wa'aba mono zéb zarina. Ãne na tãma asina 're uwaimrami za'ra wa'aba mono õ wamhã, a norĩ wa'aba zama te za tô te te siwi 're aiwẽ'õ pese za'ra wa'wa, rob'rãi wede panhipti hã 're 'rã za'ra mono õ wa, da te 're isi'ẽ za'ra mono ne.

Roma 11:30

Duréihã, aihi'rata norĩ wa'wa hã 'Re ihâimana u'âsi mono nhimiroti hã te te 're wapari za'ra mono ãna, ma tô aré 're hâimana za'ra, zudeu'õ norĩ hã. Tane nherẽ, zudeu norĩ hã 'Re ihâimana u'âsi mono si te te 're sazei pese za'ra mono õ wa, ma tô oto ai'ãma 're pẽ'ẽzé za'ra wa'wa, ai'ãma 're sib'a'uwẽ za'ra wa'aba mono da, zudeu'õ 're aihâimana za'ra wa'aba mono nherẽ.

Roma 3:26

Tane nherẽ, ãhã na hã dawasédé hã da te 're i'manharĩ za'ra mono zém na, te te da'ãma 're ab'madâ'â mono ãna 're hâimana mono õ di oto. Te oto te te da'ãma 're ab'madâ'â u'âsi, uburé marĩ hã i'uwaibaba si te te 're i'ab'manharĩ wẽ mono na, da te dasina 're waihu'u za'ra mono da, duré uburé Zezusi hã da te 're isazei pese za'ra mono norĩ hã te te 're ida'awẽsãmri mono na, da te dasina 're waihu'u za'ra mono da.

Roma 3:3

Tane nherẽ, ni'wam norĩ hã zudeu norĩ hã 'Re ihâimana u'âsi mono nhimiroti zarina 're inomro mono na hã te te tãma ãma 're uwaimrami za'ra mono õ di. E tawamhã 'Re ihâimana u'âsi mono hã asa te te tãma ãma 're uwaimrami za'ra mono õ di za, uburé marĩ na te te tãma ãma 're iropisutu za'ra mono zéb zarina.

Roma 4:16

Tawamhã e marĩ hawi, ma tô 'Re ihâimana u'âsi mono hã Abra'ãhã ma ropisutu, isihudu norĩ ma ropibu ma. Abra'ã hã te te isazei pese zém hawi, ma tô tãma ropisutu. Te te tãma iropisutuzé wa'rãmi, asa tãma isiwa'âbâzéb zô 're isimnhasi mono õ na, da te dasina 're iwaihu'u pese za'ra mono zéb da hã, ma tô 'Re ihâimana u'âsi mono hã Abra'ã te te isazei pese zém hawip si, tãma ropisutu. E Mozésihi nhimi'ui'éré 'madâ'â'wa norĩ ma si, te 'Re ihâimana u'âsi mono nhimiropisutuzé hã tãma 're hâimana za'ra, zudeu norĩ te te 're isazei pese za'ra mono norĩ ma si. Mare di. Abra'ã hã, 'Re ihâimana u'âsi mono si te te sina i'umnhasi ne, uburé 're idahâimana za'ra mono norĩ ma zama, te tãma 're hâimana za'ra, 'Re ihâimana u'âsi mono nhimiropisutuzé hã. E marĩ wa. Abra'ã hã uburé wahi'rata wa, uburé wasiré isazei'wa norĩ hi'rata wa.

1 Corĩtu 1:12

Ãne wa za aima waihu'u za'ra wa'wa. Ni'wam norĩ me asiré 're aihâimana za'ra wa'aba mono nherẽ, te ãne dama 're asiwasu'u za'ra wa'aba mo: “Wa norĩ hã Pauluhu nhimiroti si, wa za wa te 're 'madâ'â za'ra.” Duré ni'wam norĩ hã te 're siwasu'u za'ra, ãne: “Wa norĩ hã Apoluhu nhimiroti si, wa za wa te 're 'madâ'â za'ra.” Duré ni'wam norĩ hã te 're siwasu'u za'ra, ãne: “Wa norĩ hã Pedruhu nhimiroti si, wa za wa te 're 'madâ'â za'ra.” Duré ni'wam norĩ hã te ãne 're siwasu'u za'ra: “Wa norĩ hã Cristuhu nhimiroti si, wa za wa te 're 'madâ'â za'ra.” Ãne te dama 're asiwasu'u za'ra wa'aba mo, aimreme si'ahâ za'ra wa'aba na.

1 Corĩtu 10:19

Ãne na te aima ãma irowaihu'u za'ra wa'aba mono zé hã, e marĩ te wama wasu'u za'ra. E romhâiba 'manharĩ hã, 'Re ihâimana u'âsi mono, waihu'u pese na 're ihâimana mono ne, 're ihâimana za'ra mono zé, te wama wasu'u za'ra. Mare di. Duré dasa hã romhâiba 'manharĩ ma, da te 're isõmri za'ra mono hã, e pire na te wama 're hâimana za'ra. Mare di. Ta hã wama za'ra hã, tarére hã.

1 Corĩtu 15:50

Ĩsisãnawã norĩ, ãne wa za aima ãma waihu'u za'ra wa'wa, sena na. Ti'ai ãma ré wahâiba hã wanhi ré hã duré wawaprui ré hã, taha ré, hâiwa u iré 're wanhisisi waihu'u mono õ di za, 'Re ihâimana u'âsi mono hã da'ãma 're isib'a'uwẽ mono zéb u hã. E marĩ wa. Ti'ai ãma ré wahâiba hã za wawi 're isi'utõrĩ za'ra mono hã, hâiwa ãma iré 're wahâimana waihu'u za'ra mono õ di za oto, 'Re ihâimana u'âsi mono 'rata iré 're iwahâimana u'âsi za'ra mono zéb da hã.

2 Corĩtu 1:20

'Re ihâimana u'âsi mono, iwẽ na te te dama 're i'aropisutu mono zé hã ahâ uptabi nherẽ, ma tô Zezu Cristu hã pisutu, uburé te te dama ãma 're i'a'uwaimrami mono da hã. Tahawa, Zezusi hã wama umnhasi di oto, uburé te te wama ãma 're i'a'uwaimrami mono zém na hã. Wa norĩ hã wasiré isazei'wa norĩ hã wasiré 're wasi'rã'õtõ mono wamhã, 'Re ihâimana u'âsi mono ãma 're wawata za'ra mono wamhã, wa 're wamreme zusi, ãne: “Tane tô.” E marĩ te wasu'u, ã hã. Cristu, tô sena uburé marĩ na te te wama 're i'a'uwaimrami mono zé, te wasu'u. Tane duré, wa norĩ hã isadawa wasu'u'wa norĩ sena na, wa wa te aima 're rowasu'u za'ra wa'wa, iwasu'uwẽ wasu'u na hã.