Roma 14:2 - ꞌRe Ihâimana Uꞌâsi Mono Zadawa Wasuꞌu

² Ni'wam norĩ hã isazei'wa norĩ uburé te tisazéb zô si hã sima sô 're sõpré, te te sô 're huri za'ra mono da, romnhi zô zama, 'Re ihâimana u'âsi mono te te tiwi 're isawi za'ra mono õ na, 'râwi 're isisaze za'ra mono zéb zarina. Tane nherẽ, ni'wam norĩ hã isazei'wa nherẽ, te za romnhi hã te te siwi 're wẽ'õ za'ra, te te 're huri mono tõ da, 'Re ihâimana u'âsi mono te te tiwi 're sawi za'ra mono newa.

Roma 14:2 ပူးပေါင်းရင်းမြစ်များ

Zenezi 1:29

Duré asazéb za'ra wa'aba da, uburé wa za rob're inhama ré hã, duré rowede i'rãi ré hã aima pisutu za'ra wa'wa.

Zenezi 9:3

Uburé te za abaze norĩ hã 're ihuri aba mo. Duré rob'rã norĩ sipu'u pese na 're ihâimana za'ra mono hã te za 're ihuri aba mo, asazéb da, te aima ipisutu za'ra wa'wa hã.

Provébiu 15:17

Wẽ uptabi di duré, dasai wa'aba zém norĩ 're idasisawi pese za'ra mono siré da te 're ihuri mono da hã, dasisada 're idanhiti'ru za'ra mono ãma powawẽ hâi pese nhi hã da te 're ihuri mono nhipai u hã.

Daniéu 1:12

— Wa ĩsima wẽ, te aiwi waptẽrẽ da, niha na pé we wa'ãma rob'madâ'â za'ra da. Ma'ãpé 10 bâtâ 'remhã rob're na si dasa norĩ hã wama a za'ra na, wa te ihuri da hã nasi. Â si te za duré wama isõmri za'ra, wa te nasi i'âhuri da hã.

Daniéu 1:16

Tahawa, ta hawim haré te oto ta norĩ 'madâ'â'wa hã rob're na dasa norĩ si te te tãma 're a za'ra, apito sazé upana, rob'rãi wa'u me.

Roma 14:1

Isazei'wa nherẽ, sib'uware na 're inomro mono norĩ zô, te za asitẽme sô 're aihãsi aba mo. Isimirosa'rata za'ra hã aimawi nherẽ, aiwab õ nherẽ, tãma 're nharĩ wasété za'ra wa'aba mono õ di za. Tane nherẽ, te za tô sô 're atob'uzu za'ra wa'aba mo.

Roma 14:14

Wa hã Wanhib'apito Zezusihi ãma 're ĩhâimana mono wa, wa tô ĩsina waihu'u sena na, uburé dasa iwẽ na hã, duré iwasété õ na. Tane nherẽ, ni'wam norĩ hã te za ãne hã te te ãma 're rosa'rata upa za'ra: “Ã hã romnhi hã, wasétére di. 'Re ihâimana u'âsi mono ma hã wẽ õ di, wa te 're ihuri mono da hã.” Ãne hã ni'wam norĩ hã te te ãma 're rosa'rata za'ra mono wamhã, õ norĩ ma si, romnhi hã wasété di tô. Tane nherẽ, te te siwi 're wẽ'õ za'ra mono nherẽ, te te 're huri mono wamhã, dawasédé te wasu'u.

Roma 14:20

Tawamhã dasa siwa'ru 're huri aba mono wa, 'Re ihâimana u'âsi mono, danhiptete sina ãma 're idanomro mono zéb da, te te da'ãma 're iromhuri wẽ mono zé hã tiwi 're uprosi za'ra wa'aba mono tõ da, ãté 're huri aba mono õ di za, siwa'ru dasa na, romnhi hã. Tô sena uburé dasa hã iwẽ si da te 're ihuri mono da hã. Tane nherẽ, dasa hã siwa'ru 're huri aba mono ré, asiré isazei'wa nherẽ, sib'uware na 're inomro mono norĩ hã te te 're ai'madâ'â za'ra wa'aba mono wa, asarina wa'aba tiwasété na 're si'marõpãrĩ za'ra mono wamhã, tawamhã, aiwasédé te za tô 're i'manharĩ za'ra wa'aba mo.

Roma 15:1

Wa norĩ hã wanhiptete sina, Wanhib'apito ãma, wa te 're isasõmri u'âsi za'ra mono norĩ hã, marĩ, wa te wasima 're iwẽ za'ra mono zéb zarina si, wa te 're 'manharĩ za'ra mono õ di za. Wasiré isazei'wa nherẽ, hâimana nhib'uware na 're ihâimana za'ra mono norĩ hã, wa za wa te 're pawaptob za'ra, hâimana nhiptete na wasiré ãma 're hâimana u'âsi za'ra mono da.

1 Corĩtu 10:25

Romnhi hã da te dasima 're iwede za'ra mono zéb ãma, da te 're i'uipra za'ra mono hã, te za asina aihâtâ'â ãna 're ihuri aba mo, nima hawib zô 're asimnhasi za'ra wa'aba mono ãna. Romhâiba 'manharĩ ma, da te 're isõmri za'ra mono na, 're rosa'rata za'ra wa'aba mono ãna aipẽ'ẽ 're, ãma 're asiwẽ'õ za'ra wa'aba mono õ di za.

1 Corĩtu 8:9

Ãté te za tô asima 're iwẽ za'ra wa'aba mo, dasa hã romhâiba 'manharĩ ma, da te 're isõmri za'ra mono na dame 're asaihuri aba mono da, 'Re ihâimana u'âsi mono hã za te te siwi 're aiwẽ'õ za'ra wa'aba mono õ na dâ'âsina. Tane nherẽ, te za 're asi'madâ'â u'âsi za'ra wa'aba mo, ta hã dasa hã 're huri aba mono wa, asiré isazei'wa nherẽ, sib'uware na 're inomro mono norĩ hã apâ tiwasété u 're rere'e mono tõ da.

1 Corĩtu 9:22

Duré ni'wam norĩ hã wasiré Zezusihi zazei'wa 're hâimana za'ra mono nherẽ, sib'uware na ãma 're ihâimana za'ra mono norĩ hã iwasu'uwẽ na te 're apawapto mono wamhã, wa za ta norĩ hâimanazéb zarina si 're ĩhâimana, ĩnhimipawaptobzéb zarina, te te 're sazei pese za'ra mono da. Ãne hã dapoto mono bâ 're idahâimana za'ra mono zép sidâpâsi, wa za dasine dama 're ĩhâimana, da'ahâ na Cristu hã da te 're isaze za'ra mono zéb da si.

1 Timotiu 4:4

Uburé dasazé hã wẽ di, 'Re ihâimana u'âsi mono nhimipodo hã ãma 're iwasaihuri mono zéb da hã. Wẽ wa, wa te wasiwi 're wẽ'õ za'ra mono õ di za, ãma 're wasaihuri mono tõ da hã. Sõpru wa, ãma 're wawata za'ra mono sina, wa za ãma 're wasaihuri, iwẽ na te te ãma nharĩ wa, 'Re ihâimana u'âsi mono hã. Ãhã wa, tãma wẽ di, isimipoto na 're iwasaihuri mono zéb da hã.

Titu 1:15

Danhimirosa'rata wẽ u'âsi 're danomro mono wamhã, uburé marĩ iwẽ na 'râwi ãma 're dasiwasété za'ra mono õ di za. Tane nherẽ, danhimirosa'rata wasété u'âsi 're danomro mono wamhã, marĩ wẽ nherẽ, da te ãma 're rosa'rata wasété za'ra mono wamhã, te za 'râwi ãma 're dasiwasété za'ra, isazei'õ'wa na 're idahâimana za'ra mono norĩ hã. Tane nherẽ, dawasété na 'râwi 're dasiwaihu'u za'ra mono ãna, te za 're dahâimana za'ra.

Hebreu 13:9

Cristuhu wasu'uwẽ upana, danhimiroti aimawi na da'ãma 're sasõmri za'ra wa'aba mono õ di za, senai'õ na da te dasima 're irowasu'u za'ra mono na hã. 'Re ihâimana u'âsi mono hã tinhoprubzéb zarina, iwẽ uptabi hã te te wama 're i'apisutu mono na si, wa za wapẽ'ẽ 're ãma 're wanhiptete u'âsi za'ra. Taha si wa norĩ hã wama iwẽ uptabi za'ra hã. Dasa hã da te dasiwi 're isawi za'ra mono na roti hã da te 're i'madâ'â za'ra mono na, ãma 're danhiptete waihu'u za'ra mono õ di, dapẽ'ẽ 'remhã. E marĩ wa. Taré na dasa hã 're hâimana mono wa. Taha na ãma 're dasipawapto waihu'u za'ra mono õ di tô, dasa da te dasiwi 're isawi za'ra mono na roti na hã.

Hebreu 9:10

'Re ihâimana u'âsi mono ma, danhoprubzé, da te 're isõmri za'ra mono zé hã dapẽ'ẽ 're, da te dasima 're irosa'rata za'ra mono zém na te te wama rowasu'u õ di. Taré dasa hã marĩ, da te 're ihuri mono zém na roti te wasu'u. Duré marĩ wa'u, da te 're i'âhuri mono zém na rowasu'u zama hã te wasu'u. Duré 're dasihâiba wasété za'ra mono tõ da, 're idasi'upsõi pese za'ra mono zém na zama roti hã te wasu'u. Ã norĩ na roti hã taré sõ'awi dahâiba na roti, ma tô dama 're hâimana za'ra. Tane nherẽ, 'Re ihâimana u'âsi mono hã 're idanomro mono zép té hã, te te dama ipisutuzép téb ãma, ma tô oto dawi ai'utõ, ã norĩ na roti 'rada hã.