Roma 12:5 - ꞌRe Ihâimana Uꞌâsi Mono Zadawa Wasuꞌu

⁵ Tane hã wa oto wa norĩ hã wasiré isazei'wa norĩ hã Cristuhu ãma, wa'ahâ nherẽ, 're wahâimana za'ra, simisutu. Dahâiba misi nherẽ, dahâiba na marĩ hã ahâ na dama 're ihâimana za'ra mono hã, tite mono bâ te te 're iromhuri za'ra mono ne, wa oto wa norĩ hã wasiré isazei'wa norĩ hã wanhimiromhuri mono bâ sipu'u pese na, wa te 're romhuri za'ra, 'Re ihâimana u'âsi mono ma, dahâiba misi na 're idahâimana za'ra mono ne, simisutu wasiré 're wahâimana za'ra mono wa oto.

Roma 12:5 ပူးပေါင်းရင်းမြစ်များ

Zuwã 17:11

Ãhã na ãme 're ĩnhamra u'âsi mono õ di za oto. Atẽme wa za oto ãma mo. Ã norĩ si te za ĩza'u 're si'ubumro, ĩzazei'õ'wa norĩ 'rata. Ĩmama, a hã aiwẽ uptabi na te 're asãmra mo. Ma'ãpé, we ĩma ipisutu za'ra hã we 're apawaptob u'âsi mono, aiwaihu'u pese na, wasine 're sisawi pese za'ra mono wa, tinhimirosa'rata na 're sisazei pese u'âsi za'ra mono da.

Roma 12:4

Dahâiba misi nherẽ, dahâiba na marĩ hã dama 're ihâimana za'ra mono hã ahâ di, tite mono bâ te te 're iromhuri za'ra mono zéb da hã, dapara norĩ hã duré danhib'rada, duré dato, uburé iré 're idahâimana za'ra mono hã.

1 Corĩtu 10:17

Zezusi hã wazada idâ'âzém na 're wasipo're pu'u za'ra mono da, wasiré 're wasi'rã'õtõ mono wamhã, wa'ahâ nherẽ, wa za i'u'ẽne hã wa te wasima 're wẽ'ẽ za'ra, misi nherẽ, wa te 're ihuri mono da hã. E marĩ te wama wasu'u za'ra, misi i'u'ẽne hã. Wa norĩ hã wasiré isazei'wa norĩ hã wa'ahâ nherẽ, simisutu Cristuhu siré 're iwahâimana za'ra mono zé, te wama wasu'u za'ra. Misi dahâiba ne oto 're iwahâimana za'ra mono zé, te duré wama wasu'u za'ra.

1 Corĩtu 10:33

Wa hã bété. E niha dama 're ĩhâimana mono zé hã. Ãne si, wa tô te ĩsima 're da'awẽ, uburé marĩ hã te 're i'ab'manharĩ wẽ mono zém na, te ãma 're da'apawapto mono da. Ĩsima si, ãne na 're ĩhâimana mono õ di. Uburé, wa dama 're ĩhâimana, 'Re ihâimana u'âsi mono te te 're ida'anho'reptui mono zé hã da te dasina 're uwaimrami za'ra mono da, ĩnhimipawaptobzéb zarina.

1 Corĩtu 12:20

Tane nherẽ, marĩ ahâ na te tô wama 're hâimana za'ra wahâiba na hã, wahâiba misi nherẽ. Tahawa, wa tô 're wahâimana za'ra.

1 Corĩtu 6:15

A norĩ wa'wa hã aihâiba mono bâ, te oto Cristuhu nhib'a'uwẽ si 're anomro aba mo. Taha siré si, te oto duré 're aihâimana za'ra wa'aba mo. E ãne hã asina 're waihu'u za'ra wa'aba mono ã bâ bété. E tawamhã, Cristuhu nhib'a'uwẽ oto 're wanomro mono nherẽ, wa za pi'õ iwa'âbâ zô 're isisõmri mono hâiba me hã, wasina 're wasihâiba tob za'ra. Mare di.

Éfézu 4:12

Ãne ma tô Cristu hã da'apisutu, 'Re ihâimana u'âsi mono nhib'a'uwẽ norĩ te te 're pawaptob za'ra mono da, taha zarina 're sipawapto pese za'ra mono wa, siptete sina duré oto 're hâimana za'ra mono da.

Éfézu 4:25

Tahawa, dama 're asadawa nhipese za'ra wa'aba mono õ di za oto. Aihâiba mono bâ te za tô sena na si asima 're irowasu'u za'ra wa'aba mo.

Éfézu 5:23

E marĩ wa. Aimro za'ra wa'wa hã asipai u 're hâimana za'ra wa'aba mono wa, Cristu tinhib'a'uwẽ norĩ nhipai u 're ihâimana mono ne, ta norĩ nho'reptui'wa 're hâimana mono wa ta hã.

Colosu 1:24

Wa hã ai'udâna za'ra wa'aba, te ai'ãma 're robzépata za'ra wa'aba mono nherẽ, wa ĩto sina 're ĩhâimana. Cristuhu ma si, te 're romhuri mono wa, wa tô te 're robzépata za'ẽtẽ tô, ta hã ti'ai ãma 're morĩ ré, dazada te te irobzépata ne. Tane nherẽ, Cristuhu nhib'a'uwẽ norĩ ma, ĩnhimiromhuri na te tãma ãma 're uwaimrami mono da, wa za tô taha na te 're robzépata u'âsi.

Colosu 2:19

Ta norĩ hã Cristuhu wasu'uwẽ si te te sima 're tété za'ra mono õ di. Cristu hã uburé tizazei'wa norĩ 'madâ'â'wa te pire na 're hâimana taha si, da'rã hã dahâiba ma pire na 're ihâimana za'ra mono ne. Dahâiba na danhorõ 're ihâimana za'ra mono hã te dahi hã te te sitẽme 're tété tete za'ra, danhiptete sina ãma 're dahâimana za'ra mono da, dahâiba na hã. Tane duré Cristu hã te za tinhib'a'uwẽ norĩ hã te te 're apawapto, ta norĩ hã 're sipawaptob za'ra mono da, siptete sina ãma 're hâimana u'âsi za'ra mono da. Te za duré te te 're apawapto, prédup sina ãma 're ihâimana za'ra mono zém na te te sima 're sa'ẽtẽ u'âsi za'ra mono da, 'Re ihâimana u'âsi mono te te tãma 're i'awẽ mono zéb zarina.