Roma 12:3 - ꞌRe Ihâimana Uꞌâsi Mono Zadawa Wasuꞌu

³ 'Re ihâimana u'âsi mono hã tinhimizawi pese zéb zarina, ma tô ĩpisutu, isadawa wasu'u'wa na oto 're ĩhâimana mono da. Tahawa, wa za oto ãne na aima roti pese za'ra wa'wa. Dama aipire na, duré dama aiwẽ na 're aihâimana za'ra wa'aba mono õ nherẽ, 'râwi aipire na 're asi'madâ'â za'ra wa'aba mono õ di za. 'Re ihâimana u'âsi mono, ma tô te te sima 're aipisutu za'ra wa'wa, õhõ ãma si oto 're anomro aba mono da. Tane nherẽ, aihĩni isazei'wa, asiré 're anomro aba mono nherẽ, ni'wam norĩ si te isazei pese 'wa hã 're hâimana za'ra. Duré ni'wam norĩ hã isazei prãi 'wa, te 're hâimana za'ra. Isazei prãi 'wa norĩ hã 're sazei pese za'ra wa'aba mono newa, 'râwi asi'ãma 're rosa'rata za'ra wa'aba mono õ di za, 're sazei pese za'ra wa'aba mono õ nherẽ.

Roma 12:3 ပူးပေါင်းရင်းမြစ်များ

Provébiu 25:27

Ropĩ da te 're i'upsõmri hâ za'ra mono hã wẽ õ di. Tane duré wẽ õ di, ni'wai ãma dawata zô simire sina 're imorĩzé hã.

Provébiu 26:12

E aima waihu'u pese di, ni'wa hã ti'rãiwaihu'u wẽ na 'râwi 're isi'madâ'â zei mono hã. Taha ma hã rowẽ õ di za. Isimiza'rese'õ ma si, tãma rowẽ di za, õhõ nhipai u iwa'rãmi.

Luca 18:11

Zasi wamhã, hâiwi te oto za, farizeu hã, rob'uiprazé arĩ ubumroi'wa nhiti. Ãne ma tô mre: “'Re ihâimana u'âsi mono, ãhã na, wa za ai'ãma ĩwata. E marĩ wa. Wa hã ĩsiré aibâ norĩ ne, ĩwasété na 're ĩmorĩ õ di. Danhibrob zô, te 're rob'ruiwapari mono õ di. Wa hã rob'uiprazém na, dawi 're ĩnhipsaihuri mono õ di. Duré pi'õ na zama, dawi 're ĩnhipsaihuri mono õ di. Tahawa, wa za duré ai'ãma ĩwata, õhõ ne, rob'uiprazé arĩ ubumroi'wa ne, 're ĩmorĩ õ wa.

Zuwã 3:34

Ti'ra we te te satõrĩ wamhã, ma tô Tipẽ'ẽzani hã tãma tisõ, iré 're morĩ u'âsi da. Tahawa, te Timama nhimiroti si te te dama 're wasu'u.

Roma 1:5

'Re ihâimana u'âsi mono hã tinhoprubzéb zarina ma tô Cristuhu ma ĩpisutu siro, ĩpire na te dama 're sadawa wasu'u mono da. Cristuhu ma, te 're romhuri wẽ mono da, ma tô ĩpisutu, ĩnhimiromhurizéb zarina dapoto mono bâ, da te 're sazei pese za'ra mono da, duré da te 're sazei pese za'ra mono wa, isimiroti si, da te 're 'madâ'â pese za'ra mono da.

Roma 11:20

Ãne na asima 're nharĩ za'ra wa'aba mono wamhã, i'uwaibaba te za tô asima ãma 're irowaihu'u za'ra wa'aba mo, ta norĩ ãma hã. Ta norĩ hã ma tô te te 're awẽ'õ tô siwi, te te 're saze za'ra mono õ wa. A norĩ wa'aba si 're sazei pese za'ra wa'aba mono wa, te tô ta norĩ wa'rãmi 're aihâimana za'ra wa'aba mo. Tane nherẽ, a norĩ wa'wa hã asina 're aiwata za'ra wa'aba mono õ di za. Tô'ã. Tahawa, te za 'Re ihâimana u'âsi mono si asiwi 're iwazéb za'ra wa'aba mo.

Roma 11:25

Ĩsisãnawã norĩ, zudeu'õ na da te 're aiwaptẽrẽ za'ra wa'aba mono norĩ hã, marĩ aré dama iwaihu'u'õ na roti ipire wasu'u na hã wa za oto aima rowasu'u za'ra wa'wa, asimiza'rese ãna 're aihâimana za'ra wa'aba mono tõ da. Zudeu norĩ upana, 'Re ihâimana u'âsi mono hã ai'ãma wa'aba si 're sib'a'uwẽ mono newa, 'râwi asi'ãma 're aiwata za'ra wa'aba mono tõ da, wa za oto ãne na aima rowasu'u za'ra wa'wa. Izaraéu nhihudu norĩ hã 'Re ihâimana u'âsi mono wi, pẽ'ẽ tete uptabi na 're hâimana za'ra mono nherẽ, pẽ'ẽ tete u'âsi, tiwi 're hâimana za'ra mono õ di za. Duréihã, 'Re ihâimana u'âsi mono te te sima ipisutu siromo zéb zarina, zudeu'õ norĩ hã da'ahâ uptabi na Cristu za da te 're isaze za'ra mono norĩ za'ratazé hã, oto iwa waptã'ã wapsi, te za oto zudeu norĩ hã ahâ uptabi na itẽme 're sipizari za'ra, õhõ ãma si oto 're nomro mono da.

Roma 12:16

Duré simisutu te za asimirosa'rata na 're asisazei pese za'ra wa'aba mo, asiré isazei'wa nherẽ, asisada 're rosa'rata wasété za'ra wa'aba mono tõ da. Duré aiwẽ na 'râwi asina 're aiwata za'ra wa'aba mono õ di za. Duré dama ipire norĩ zapari, marĩ na romhuri wapu na da te dasima 're iromhuri za'ra mono zé hã asiwi 're wẽ'õ za'ra wa'aba mono õ di za, 're 'manharĩ za'ra wa'aba mono tõ da. Duré asiré norĩ nhipai u aiwaihu'u pese na 'râwi asi'ãma 're rosa'rata za'ra wa'aba mono õ di za.

1 Corĩtu 15:10

Tane nherẽ, 'Re ihâimana u'âsi mono hã tinhimizawi pese zéb zarina si, ma tô ĩma tinhopru, tô õhõ na si dama 're ĩhâimana mono da oto, Cristuhu zadawa wasu'u'wa na. E tawamhã, taré ma tô ĩma tinhopru, 'Re ihâimana u'âsi mono hã. Mare di. Wa tô te ĩsina tãma 're uwaimrami u'âsi. Uburé ĩsiré Cristuhu zadawa wasu'u'wa norĩ hã, wa tô romhuri na te 're 'rãnhipai u'âsi za'ra. Tane nherẽ, ĩsi'uihâ na te dama 're romhuri mono õ di. 'Re ihâimana u'âsi mono si, ma tô te te 're ĩpawapto, ãne na te dama 're romhuri mono da, ĩma isõprubzéb zarina si.

1 Corĩtu 3:10

'Ri na romhuri'wa norĩ hã 'ri na'rata uimrehẽne, te za siwi 'manha, sipese na. Tane duré wa hã, ĩnhimiromhuri wẽ na, wa tô sãna'rata, te aima 're irowasu'u za'ra wa'aba mono na hã, Cristuhu wasu'uwẽ na, 'Re ihâimana u'âsi mono, tiwaihu'u pese na te te oto 're ĩpawapto mono zéb zarina. Duré 'ri na'rada hã da te dasiwi 'manharĩ pari, ihâiba amo 'ri'wa norĩ isisiwi te te oto siwi i'ri ne, tane te duré ni'wam norĩ hã te te aima ãma 're rowasu'u za'ra wa'wa, ĩza'u hã. 'Ri na'rata 'manharĩ nhisiwi, da te dasiwi 'ri wamhã, pibui pese na te za dasiwi 'ri ni, marĩ iwẽ na si hã oto. Tane ni'wam norĩ hã Cristuhu wasu'uwẽ na te te dama 're rowasu'u za'ra mono wamhã, pibui pese na te za oto te te dama ãma 're rowasu'u za'ra, i'uwaibaba si.

1 Corĩtu 7:17

Wanhib'apito hã te te aima 're ipisutu za'ra wa'aba mono zéb zarina si, te za oto 're aihâimana u'âsi za'ra wa'aba mo. 'Re ihâimana u'âsi mono hã tinhib'a'uwẽ da, te te sima 're aipisutu za'ra wa'aba mono õ ré, niha 're i'aihâimana za'ra wa'aba mono zém hawi, 're aiwairébé aba mono zém na, 're asi'madâ'â za'ra wa'aba mono õ di za, zudeu na, duré zudeu'õ na. Õne haré te za oto 're aihâimana u'âsi za'ra wa'aba mo. Ãne na si, wa tô wa hã te dama 're aroti u'âsi, daro mono bâ isazei'wa norĩ hã siré 're isi'rã'õtõ u'âsi mono norĩ ma hã.

2 Corĩtu 10:13

Tane nherẽ, wa norĩ hã tô ibâre, wa aima wasiwasu'u za'ra wa'aba ni. 'Re ihâimana u'âsi mono te te wama ipisutuzém nhipai u, aima wasiwasu'u za'ra wa'aba õ di. Romhuri hã, 'Re ihâimana u'âsi mono te te wama ipisutuzéb zarina si, wa tô wa te dama 're romhuri, a norĩ wa'aba ma zama. Taha na si, wa aima wasiwasu'u za'ra wa'aba ni, wa te dama 're iromhuri wẽ mono zém na si.

2 Corĩtu 12:13

E tawamhã ai'upana za'ra wa'aba si, wa tô darob amoi ãma isazei'wa norĩ 're ihâimana za'ra mono norĩ hã te 're apawapto pese, ta norĩ si ĩma sawi pese za'ra wa. Mare di. E marĩ na, wa tô bété a norĩ wa'wa hã ai'mararé za'ra wa'wa, sena na Zezusihi zadawa wasu'u'õ'wa na asiwi ĩwaihu'u za'ra wa'aba zéb da hã. Ãté asimarĩ aba zô, te 're aiwasutu za'ra wa'aba mono õ zém na si, wa tô ai'mararé za'ra wa'wa, ai'rata ĩnhamra aba ré hã. Ma'ãpé, ãne na tô ĩwasédé hã te aima 'manharĩ za'ra wa'aba ze te bâ, ĩma pari za'ra wa'aba.

2 Corĩtu 12:7

Danhotõ 'rowi, da te 're irosawẽrẽ za'ra mono ne, wa tô marĩ iwẽ uptabi hã te ab'madâ'â tô, ĩnhotõ nem na te i'awaihu'u ne. Tahawa, danhipai u dama ĩpire newa, 'râwi ãma 're ĩsi'madâ'â zei mono tõ da, ma tô 'Re ihâimana u'âsi mono hã ĩma pisutu, ĩhâiba na te tô 're robzépata mono da, ro'wa hã te te 're danhiptâ'â za'ra mono wa, dawa 're si'ẽ za'ra mono wa, da'ãma 're isépu'u siroptub za'ra mono ne. Taha zarina, te tô Satanasi hã te te 're ĩpibui u'âsi, te ãma 're irobzépata u'âsi mono da hã. Tane nherẽ, 'Re ihâimana u'âsi mono hã te te tiwi 're ĩzawi mono õ di, ãne na te te 're ĩpibu tõ mono da hã. E marĩ wa. Dama ĩpire newa, 'râwi te ĩsina 're rosa'rata tõ mono da.

Galata 6:3

Ãté ni'wa hã simiroti pire newa, te za 'râwi tinhimiroti pire na 're si'madâ'â ze. Ãne wamhã, 'râwi te za tipẽ'ẽ na sima 're sadawa nhipese.

Éfézu 3:2

'Re ihâimana u'âsi mono hã simizawi pese wa, ma tô romhuri hã ĩma tisõ, aima 're irowẽ za'ra wa'aba mono zéb da hã. Ãne na ma tô iwapari za'ra wa'wa, tô.

Éfézu 4:16

Marĩ mono bâ wahâiba bâ wama 're hâimana za'ra mono nherẽ, wa za wa'rã zadawa para si marĩ hã wa te 're 'manharĩ za'ra. Tane wa norĩ hã Wanhib'apito zadawa para si marĩ hã wa te 're 'manharĩ za'ra mono wamhã, rowẽ na wa za wasiré 're wahâimana za'ra. Tawamhã 're iwasisawi pese za'ra mono zéb zarina, wa za 're wasipawaptob za'ra, wa te wasima 're sa'ẽtẽ za'ra mono da, wahâimana wẽ zé hã.

Filipu 2:13

E marĩ wa. 'Re ihâimana u'âsi mono hã aipẽ'ẽ 're, te te ai'ãma 're romhuri u'âsi za'ra wa'aba mono wa, isimipawaptobzém na marĩ na ãma 're sazei pese za'ra wa'aba mono da, duré taha zarina i'uwaibaba si marĩ hã tãma 're 'manharĩ wẽ za'ra wa'aba mono da, te te sima 're i'aiwẽ za'ra wa'aba mono zéb uwaibaba.

Colosu 1:29

Ãne da, wa tô 're ĩsi'wapéi u'âsi, ĩnhiptete sina te tãma 're romhuri mono da. Cristu hã tinhiptetezé te te ĩma 're sõmri mono wa, wa iré te ãma 're romhuri pese, taha na si 're ĩnhiptete uptabi mono wa.

Colosu 2:13

A norĩ wa'wa hã aipẽ'ẽ 're, 're atâ'â za'ra wa'aba mono ne, ma tô aré 're anomro aba mo, aiwasété si 're 'manharĩ u'âsi za'ra wa'aba mono wa, duré 'Re ihâimana u'âsi mono nhiti 're aihâimana u'âsi za'ra wa'aba mono wa aré. Taha ré, ma tô oto 'Re ihâimana u'âsi mono hã te te aima 're pisutu za'ra wa'wa, 're anomro aba mono zép téb da hã, aipẽ'ẽ 're ato sina ãma 're anomro u'âsi aba mono da, Cristu hã dâ'â uptabi nherẽ, apâ te te ihâiwa'utu ne. Tahawa, wawasédé wa te 're i'manharĩ za'ra mono zé hã te te oto wa'ãma 're ab'madâ'â mono õ di za, ta hã.

1 Timotiu 1:14

Wanhib'apito hã tinhimizawi pese zém na ma tô ĩpawapto pese, te saze da, duré dazawizéb da hã, ĩma hâimana da. Aihĩni Cristu Zezusihi ãma 're ihâimana za'ra mono norĩ hã te te 're ipawaptob za'ra mono ne, ma tô ĩpawapto duré.

1 Timotiu 2:15

Tane nherẽ, pi'õi mono bâ hâimana wẽ na 're hâimana za'ra mono wamhã, tãma 're rowẽ za'ra mono di za. Wanhib'apito umnhasi sina, te za 're hâimana za'ra. Te za duré te te 're dazawi pese za'ra. Hâimana wẽ uptabi na te za dama 're hâimana za'ra. Tawamhã iwasã hã ãma 're sépu'u za'ra mono wamhã, i'ra hã tãma 're rere'e wẽ mono da, te za Wamama hã te te 're anho'reptu, pi'õ norĩ hã.

1 Timotiu 2:9

Pi'õ norĩ hã, aibâ norĩ te te sima 're 'madâ'â ze za'ra mono da, dama 're si'uza wamnarĩ za'ra mono õ di za. Duré dama 'madâ'â ze da, 're siséré tété wẽ za'ra mono da hã mare di za. Duré tinho'rebzui wẽ na si, sima 're isipese za'ra mono õ di za. Duré tinhipsisi wẽ na si, sima 're isipese za'ra mono da hã mare di za. Duré da'uzazé iwa'âbâ za'ẽtẽ na si, 're isi'uza za'ra mono da hã mare di za. Dama rob'manharĩ wẽ zéb zô si, te za sina 're sõpré, 'Re ihâimana u'âsi mono nhimiroti 'madâ'â'wa na 're isiwasu'u za'ra mono zéb zarina.

Titu 2:12

Ta hã te te 're wa'azawi pese mono wa, ma tô wama waihu'u, wa te 're rẽme pese za'ra mono da, isazei'õ'wa norĩ hâimanazé hã, dawẽ te, wawasété zô wa te 're rowasutu tõ za'ra mono da, ti'ab ré wasina 're wanhiptete za'ra mono da, 'Re ihâimana u'âsi mono ãma si oto 're wanomro wẽ mono da.

Titu 2:2

Aibâ ihi norĩ ma, te za 're i'aroti mo, hâimana prédup sina 're hâimana za'ra mono da, duré tiwasété wi sina 're siptete za'ra mono sina, 're hâimana za'ra mono da. Wanhib'apito nhimiroti si te za duré te te 're sazei pese za'ra, ta hã tô sena wa. Te za duré te te 're dazawi pese za'ra. Marĩ hã sada 're hâimana za'ra mono nherẽ, Wanhib'apito ãma si te za 're nomro wẽ u'âsi.

Titu 2:6

'Ritéi'wa norĩ ma zama, te za duré 're i'aroti pese mo, sina 're siptete za'ra mono sina, 're nomro wẽ mono da.

Tiagu 4:6

Ãne wa, Wamama zawi'wa 're wanomro mono da, te za te te 're wa'apawaptob u'âsi. Duréihã ma tô taha wasu'u na rob'ui'éré, isadawa wasu'u'wa hã, ãne: “Si'uihâ na 'râwi tinhimirosa'rata na 're isi'madâ'â ze za'ra mono norĩ zada, te za 're hâimana, Wamama hã. 'Râwi tinhimirosa'rata na 're isi'madâ'â za'ra mono õ norĩ si, te za te te 're apawapto.” Ãne ãma irob'ui'éré hã.

1 Pedru 1:13

Zezu Cristu hã nimahã na te za wei mo apâ. Tahawa, te za aihâimana nhimiza'rese 're aihâimana za'ra wa'aba mo. Aihâiba na te za 'râwi 're asi'madâ'â za'ra wa'aba mo. Zezu Cristu hã apâ wei morĩ wapsi, te za aima 're irowẽ za'ra wa'aba mono zé hã aima pisutu za'ra wa'wa, hâiwa ãma. Taha zô si te za asina 're asimipari u'âsi za'ra wa'aba mo.

1 Pedru 4:11

Tawamhã dama 're rowahutu za'ra wa'aba mono wamhã, duré dama 're roti za'ra wa'aba mono wamhã, timreme te te aima 're isõmri za'ra wa'aba mono na si, te za dama 're irowasu'u za'ra wa'aba mo. Duré aihâiba na zama 're dapawaptob za'ra wa'aba mono wamhã, 'Re ihâimana u'âsi mono, tinhiptede te te aima 're isõmri za'ra wa'aba mono na, te za 're idapawaptob za'ra wa'aba mo. Ãne na hã te za dama ãma 're i'uwaimrami za'ra wa'aba mo, 'Re ihâimana u'âsi mono ãma 're dawata za'ra mono da, Zezu Cristuhu nhib'a'uwẽ 're aihâimana za'ra wa'aba mono wa, dama ãma 're i'uwaimrami za'ra wa'aba mono zém na. 'Re ihâimana u'âsi mono hã wẽ uptabi wa, duré waihu'u pese uptabi wa, wa za ãma 're wawata u'âsi za'ra.

1 Pedru 4:7

Ro isi'utõrĩzéb u hã, romhuture di oto. Tahawa, te za aihâiba na asina 're asiptete za'ra wa'aba mo. Duré aihâimana nhimiza'rese te za 're aihâimana za'ra wa'aba mo, 'Re ihâimana u'âsi mono ma, 're aimreme zusi u'âsi aba mono da.

1 Pedru 5:5

Ipréduptém norĩ, iprédum norĩ mreme si te za 're iwapari pese za'ra wa'aba mo. Isazei'wa norĩ, aihĩni te za romhuri na 're asipawaptob za'ra wa'aba mo, aipire na 're asi'madâ'â za'ra wa'aba mono ãna. Duréihã ãne na ma tô rob'ui'éré, 'Re ihâimana u'âsi mono zadawa 'mahârâ'wa hã: “Dapire na 'râwi 're idasi'madâ'â ze za'ra mono norĩ da si, te za 're hâimana, 'Re ihâimana u'âsi mono hã. Dapire na 'râwi da te dasi'ãma 're irosa'rata za'ra mono õ norĩ si, te za te te 're apawaptob u'âsi.”

1 Pedru 5:8

Ma'ãpé, aihâimana nhimiza'rese sina 're aihâimana za'ra wa'aba mono. Duré 're asi'madâ'â pese za'ra wa'aba mono. E marĩ wa. Da'rui'wa hã datẽme 're morĩ wa, wa'uburé norĩ nhib'apito hã. Hu'u zéré pa hã wairõ sina, tisa zô 're inomro mono ne, te ta hã datẽme 're morĩ u'â, Wanhib'apito si da te dasina 're i'madâ'â u'âsi za'ra mono zé hã te te dawi 're a'uprosi mono da.

3 Zuwã 1:9

Ãne wa za duré ãma aima waihu'u. Ĩnhimi'ui'éré hã tamomo wa tô ãma tisõ isurure hã, isazei'wa norĩ hã asiré 're isi'rã'õtõ mono norĩ ma. Tane nherẽ, te ni'wa hã tame 're sãmra, ĩwẽ'õ'wa hã, Diutrefesi na isisi hã. Ta hã uburé asiré isazei'wa norĩ ma, si'apito da si te te sina 're rob'ruiwapari u'âsi mono wa, ĩnhimiroti hã te te 're wapari mono õ di, isipai u da'madâ'â'wa na 're ĩhâimana mono 'ru te.