Roma 12:10 - ꞌRe Ihâimana Uꞌâsi Mono Zadawa Wasuꞌu

¹⁰ Dasisãnawãi uptabi 're idasisawi pese za'ra mono ne, te za a norĩ wa'wa hã 're asisawi pese za'ra wa'aba mo, Cristuhu ãma asisãnawã oto asiré 're aihâimana za'ra wa'aba mono wa. Te za duré 're asiwazé pese za'ra wa'aba mo.

Roma 12:10 ပူးပေါင်းရင်းမြစ်များ

Zenezi 13:9

Tahawa wa za wasima aiwãnhizari ni. Õhõta ro inomro hã ma'ãpé 'madâ'â, rob're za'ẽtẽ uptabi di. Tahawa, ma'ãpé nima niwĩ ro inomro hã asima pisutu! Asimi'e niwĩ aimorĩ da wamhã, wa hã wa za ĩnhimire niwĩmhã mo. Duré asimire niwĩ aimorĩ da hã wamhã, wa hã wa za duré ĩnhimi'e niwĩmhã mo.

Mateu 20:26

Tane asima 're aihâimana za'ra wa'aba mono õ di za, a norĩ wa'wa hã. Asiré norĩ ma, ai'maipire wa'aba da, asina 're 'mairob'ruiwapari aba mono wamhã, te za asiré hã 're i'maipawaptob u'âsi aba mo, marĩ zô 're ai'manhimnhasi aba mono ãna.

Luca 14:10

Tahawa, ãne tõ da, dame asa da, asô dahârâ wamhã, da'rãsutu u, te za a'â asã. E marĩ da. 'Ri tede'wa hã si'uihâ na si te te aima pisutu da, dama ipire norĩ 'rata asãmra da, asa da. Danho'a te te aima pisutu wamhã, aima rowẽ uptabi di za.

Zuwã 15:17

Ãne wa za duré aima roti za'ra wa'wa. Ma'ãpé, 're asisawi pese za'ra wa'aba mono za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 4:32

Tawamhã isazei'wa norĩ hã uburé, ma tô sisaze za'ra, tinhimirosa'rata za'ra na hã. Ni'wam norĩ hã tinhibro te te sima 're sawi za'ra mono õ di, tite da si. Uburé, ma tô isibrob'õ norĩ udâna te te 're po'o za'ra.

Roma 13:7

Tahawa, te za tô isarina tãma 're i'arĩ za'ra wa'aba mo, aipawa'âbâzé hã duré uburé marĩ uiprazé hã. Te za duré tãma 're aihâimana prédub za'ra wa'aba mo, dama roti'wa norĩ ma.

Galata 5:13

Ĩsisãnawã norĩ, 'Re ihâimana u'âsi mono hã ma tô aima pisutu za'ra wa'wa, rowẽ na ãma 're aihâimana za'ra wa'aba mono da, isimiroti na rob'ui'éré 'rata zarina, 're irob'manharĩ za'ra wa'aba mono zém na 're asõpré wa'aba mono tõ da, taha zarina, 'Re ihâimana u'âsi mono te te 're asõ'reptu za'ra wa'aba mono dai õ wa. Tane nherẽ, rowẽ na 'Re ihâimana u'âsi mono ãma 're aihâimana za'ra wa'aba mono wẽ te, marĩ iwẽ'õ na aipẽ'ẽ 're, asima 're rosa'rata za'ra wa'aba mono wamhã, asina hã ãma 're rob'manharĩ za'ra wa'aba mono õ di za. Ãne te za oto 're anomro aba mo. Asimizawi pese za'ra wa'aba zéb zarina si, te za 're asipawaptob za'ra wa'aba mo niha wamhã asib'rata na, duré asimarĩ na zama, duré asimiroti na zama hã.

Galata 5:22

Ãne 're danomro wasété mono õ di za, 'Re ihâimana u'âsi mono pẽ'ẽzani nhimiwada'uri zarina 're danomro mono wamhã. Te za da te 're dazawi pese za'ra. Duré dapẽ'ẽ 're datoi u'âsi, te za 're dahâimana za'ra. Duré dapẽ'ẽ toi u'âsi, te za 're dahâimana za'ra. Duré dawara sina dasisada 're dazahi za'ra mono õ di za. Duré danhimizawi pese na te za 're dahâimana za'ra. Duré marĩ iwẽ na te za dama 're danhoprub za'ra. Duré tô sena wa, ropisutu wẽ na, te za da te dama ãma 're rob'manharĩ wẽ za'ra.

Galata 5:6

Simisutu Cristu Zezusihi nhib'a'uwẽ oto 're wanomro mono wamhã, 'Re ihâimana u'âsi mono hã te te 're wa'aba'a mono õ di za, isihâiwata nhihâri ré norĩ hã, duré isihâiwata nhihâri õ norĩ hã. Zudeu na duré zudeu'õ na 're iwahâimana za'ra mono zém na hã, te te oto 're wa'awaihu'u mono õ di za. Zezu Cristu Danho'reptui'wa na, wa te wasina 're umnhasi za'ra mono wa, wanhimizawi pese na 're iwahâimana za'ra mono zém na si, te za oto te te 're wa'awaihu'u, 'Re ihâimana u'âsi mono hã.

Filipu 2:3

'Râwi asima si 're irosa'rata za'ra wa'aba mono zéb zarina, marĩ hã asima 're 'manharĩ za'ra wa'aba mono õ di za. Duré aipire na dama 're aihâimana za'ra wa'aba mono newa, taré asina 're aiwata za'ra wa'aba mono da, marĩ hã asima 're 'manharĩ za'ra wa'aba mono õ di za. Duré dama aipire na 're asi'madâ'â ze za'ra wa'aba mono õ di za. Taha wa'rãmi te za iwẽ na si 're idahâimana wazéb za'ra wa'aba mo, aima dapire na da'ãma 're irosa'rata za'ra wa'aba mono zéb zarina.

Colosu 1:4

Cristu Zezusihi si asina 're i'umnhasi za'ra wa'aba mono zé wasu'u hã, duré uburé 'Re ihâimana u'âsi mono nhib'a'uwẽ 're isawi pese za'ra wa'aba mono zé wasu'u hã wa te 're wapari za'ra mono wa, wa ãma 're wawata u'âsi za'ra, 'Re ihâimana u'âsi mono ãma, ãne na oto 're aihâimana wẽ za'ra wa'aba mono wa.

1 Tesalonita 4:9

Isazei'wai mono bâ 're asisawi pese za'ra wa'aba mono zém na, wa te aima rob'ui'éré za'ra wa'aba õ di za oto. Tô sena ma tô 'Re ihâimana u'âsi mono hã si'uihâ na ãma aima rowahutu za'ra wa'wa, 're asisawi pese za'ra wa'aba mono zéb da hã.

2 Tesalonita 1:3

Wasisãnawã norĩ, 'Re ihâimana u'âsi mono ãma, wa 're wawata u'âsi za'ra, 're aihâimana wẽ za'ra wa'aba mono wa. Ta hã te te 're aipawaptob za'ra wa'wa, tiwaihu'u pese na. Tawamhã ma tô oto 're isazei pese za'ra wa'aba mo. Awẽ sidâpâsi 're isazei pese za'ra wa'aba mono zé hã, te ãma asima 're isa'ẽtẽ za'ra wa'aba mo. Aihâiba mono bâ, te 're asisawi za'ra wa'aba mo. Duré awẽ sidâpâsi 're asisawi pese za'ra wa'aba mono zé hã te ãma 're isa'ẽtẽ za'ra wa'aba mo. Tahawa, 'Re ihâimana u'âsi mono ãma, wa 're wawata u'âsi za'ra. Ãne, wa te 're 'manharĩ za'ra mono da, wama 're wẽ za'ra mono di. Tô i'uwaibaba na si.

Hebreu 13:1

'Re i'asisawi pese za'ra wa'aba mono zém na, te za ãma 're i'uzusi u'âsi za'ra wa'aba mo, Cristuhu ãma 're asisãnawã za'ra wa'aba mono wa oto.

1 Pedru 1:22

Wanhib'apito nhimiroti hã, tô sena. A norĩ wa'wa hã ma tô isimiroti hã 're iwapari pese za'ra wa'aba mo. Tahawa, marĩ iwasété na asima 're rosa'rata za'ra wa'aba mono õ di oto. Aiwẽ na 're anomro aba mono da si, te oto asima 're irosa'rata za'ra wa'aba mo. Dazawizé hã tô sena te oto aima 're hâimana za'ra wa'wa, asiré Wanhib'apito zazei'wa norĩ ãma. Tahawa, te za õne u'âsi 're asisawi pese za'ra wa'aba mo.

1 Pedru 2:17

Ãne wa, te za dahâiba mono bâ 're idahâiba wazéb za'ra wa'aba mo. Uburé asiré isazei'wa norĩ hã te za 're isawi pese za'ra wa'aba mo. 'Re ihâimana u'âsi mono hã te za duré asima 're ipipa za'ra wa'aba mo, iwaihu'u pese uptabi na. Duré ti'ai ãma danhipai u da'madâ'â'wa hã te za asiwi 're ihâiba wazéb za'ra wa'aba mo.

1 Pedru 5:5

Ipréduptém norĩ, iprédum norĩ mreme si te za 're iwapari pese za'ra wa'aba mo. Isazei'wa norĩ, aihĩni te za romhuri na 're asipawaptob za'ra wa'aba mo, aipire na 're asi'madâ'â za'ra wa'aba mono ãna. Duréihã ãne na ma tô rob'ui'éré, 'Re ihâimana u'âsi mono zadawa 'mahârâ'wa hã: “Dapire na 'râwi 're idasi'madâ'â ze za'ra mono norĩ da si, te za 're hâimana, 'Re ihâimana u'âsi mono hã. Dapire na 'râwi da te dasi'ãma 're irosa'rata za'ra mono õ norĩ si, te za te te 're apawaptob u'âsi.”

1 Zuwã 4:11

Ĩsisãnawã norĩ, 'Re ihâimana u'âsi mono hã ãne hã te te 're wa'azawi pese mono wa, wa za wa norĩ zama taha zarina 're wasisawi pese za'ra, isine.

1 Zuwã 4:20

Ãté ni'wam norĩ hã te za taré ãne dama 're siwasu'u za'ra: “'Re ihâimana u'âsi mono hã wa wa te 're sawi pese za'ra.” Ãne dama 're siwasu'u za'ra mono nherẽ, te te oto 're da'ruiwapari u'âsi za'ra mono wamhã, sadawa nhipese na te ta norĩ hã 're hâimana za'ra. Titõmo na 'râwi te te 're i'madâ'â za'ra mono norĩ hã te te 're sawi pese za'ra mono õ nherẽ, e niha te za tawamhã 'Re ihâimana u'âsi mono hã dahâiba u'âbâ hã te te siwi 're sawi pese, titõmo na te te siwi 're 'madâ'â mono õ nherẽ. Ãne wamhã, tãma sawi waihu'u za'ra õ di, ta norĩ ma hã.