Roma 10:20 - ꞌRe Ihâimana Uꞌâsi Mono Zadawa Wasuꞌu

²⁰ Izaia hã ma tô duré ãne na isa'u ãma rob'ui'éré, zudeu'õ norĩ wasu'u na hã. Zudeu norĩ hã te te siwi 're iwẽ'õ pese za'ra mono zém na, ma tô siptete sina ãma rob'ui'éré, 'Re ihâimana u'âsi mono mreme na: “Ni'wam norĩ hã aré ĩzô 're sõpré u'âsi mono õ nherẽ, ma tô te te siwi 're ĩsãmri za'ra. Ĩzô 're sinharĩ za'ra mono õ nherẽ, wa tô ta norĩ ma 're ĩsiwaihu'u za'ra.”

Roma 10:20 ပူးပေါင်းရင်းမြစ်များ

Provébiu 28:1

Iwasédé hã te za wara, simani da, ni'wa hã isarina wara õ nherẽ. Tane nherẽ, sena na 're ihâimana mono hã te sib'ru na 're hâimana u'âsi, hu'u zérépa ne hã.

Mateu 20:16

Tawamhã ãne ma tô Zezusi hã timreme na tãma 'rãsutu za'ra: — Ni'wam norĩ hã dama pire na ti'ab ré 're hâimana za'ra mono nherẽ, 'Re ihâimana u'âsi mono si te za te te tãma 're pisutu za'ra, wapu na 're hâimana za'ra mono da oto, za da'ãma 're isib'a'uwẽ mono zéb ãma hã. Duré ni'wam norĩ hã ti'ab ré dama wapu na 're hâimana za'ra mono nherẽ, te za te te tãma 're pisutu za'ra, pire na oto 're hâimana za'ra mono da.

Luca 14:23

— Tahawa, te isib'apito hã duré asa tãma tinha, ãne: “Tane wamhã, dazô airĩtĩ mono pé, bâdâdi na. Da'manhopẽtẽ wamhã, ta norĩ hã te za we isimroi mo, ĩnhorõwa hã da te dasiwi 'masisi da.

Roma 10:3

'Re ihâimana u'âsi mono, dawasédé te te oto da'ãma 're i'ab'madâ'â mono õ zarina, te te 're ida'awẽsãmri mono zé hã, tãma waihu'u pese za'ra õ di. Te te 're ida'awẽsãmri mono zéb da, 'Re ihâimana u'âsi mono te te tãma 're ipisutu za'ra mono zé hã, te te 're 'madâ'â pese za'ra mono õ di, ta norĩ hã. Si'uihâ na te te sima 're ipisutu za'ra mono zéb zarina si, ma tô 'râwi sô 're si'wapé za'ra, taha na te te 're wẽsãmri za'ra mono da newa.

Roma 9:30

E marĩ te wama wasu'u za'ra, tawamhã, ã hã. E niha, wa za tawamhã ãma waihu'u za'ra ni, ãhã wasu'u na hã. Ãne, wa za ãma waihu'u za'ra ni. Zudeu'õ norĩ hã 'Re ihâimana u'âsi mono, iwasédé hã te te ãma 're i'ab'madâ'â mono õ zarina, te te 're iwẽsãmri za'ra mono zéb da hã, te te aré sô 're rob'ruiwapari za'ra mono õ nherẽ, ma tô te te 're awẽsãmri, taré te te 're isaze za'ra mono zém na si nherẽ.

Roma 9:31

Tane nherẽ, Izaraéu nhihudu norĩ hã 'Re ihâimana u'âsi mono nhimiroti 'rata na Mozési te te irob'ui'éré hã te te 're i'madâ'â pese za'ra mono na, 'Re ihâimana u'âsi mono, iwasédé te te oto ãma 're ab'madâ'â tõ mono da, duré taha zarina te te 're awẽsãmri mono da, te te sima ãma 're aroti mono newa, ma tô ta norĩ hã taré sô 're si'wapé za'ra, te te 're i'awẽsãmri mono zéb zô. 'Re ihâimana u'âsi mono hã, iwasédé hã te te ãma 're i'ab'madâ'â mono õ zarina, te te 're iwẽsãmri za'ra mono zéb da hã, te te sina tãma 're uwaimrami za'ra mono õ di, ta norĩ hã.

1 Zuwã 4:19

'Re ihâimana u'âsi mono hã imorĩ'rata na te te 're wa'azawi pese mono wa, wa duré wa norĩ hã wa te wasiwi 're sawi pese za'ra, asa. Tahawa, wa duré 're wasisawi pese za'ra.