Roma 1:16 - ꞌRe Ihâimana Uꞌâsi Mono Zadawa Wasuꞌu

¹⁶ 'Re ĩnhisé mono õ di, Zezusihi wasu'uwẽ hã te dama 're wasu'u tõ mono da. E marĩ wa. 'Re ihâimana u'âsi mono hã siptete uptabi wa, iwasu'uwẽ na te te ãma 're da'anho'reptui mono da, Zezusi te te sina 're i'umnhasi za'ra mono norĩ hã. Zudeu norĩ si ma tô isãna'rata hawimhã te te 're sõ'reptu za'ra aré. Tane nherẽ, te oto ãhã na hã zudeu'õ norĩ zama te te 're anho'reptu.

Roma 1:16 ပူးပေါင်းရင်းမြစ်များ

Salmu 110:2

Uburé Danhib'apito, te za asiptete na Siã hawi 're ida'a'madâ'â mono zéb da hã aima 'wani, poré daro mono bâ hâimana da. Uburé te za asitob'ru norĩ nhipai u asiptete na 're aihâimana mo.

Salmu 119:46

Uburé Danhib'apito, apito norĩ nho'remhã wa za asimiroti na te tãma 're rob'mahârâ za'ra, 're ĩnhisé mono ãna.

Marcu 8:38

Ãhã na da'ahâ na 'Re ihâimana u'âsi mono nhimiroti hã ma tô rẽme za'ra ni. Dawasété na si te oto 're danomro, ã nimosi dapoto té mono hã. Tawamhã ni'wam norĩ hã ĩzazei'wa na, duré ĩmreme wapari pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa ne. Taha wamhã, ti'ai ãma Dasiré Ipodo hã nimahã na za we apâ morĩ wamhã, Timama te ré rowa'a za'ẽtẽ ré, te za wei mo, hâiwa ãma tãma iromhuri'wa norĩ siré. Tawamhã apâ we morĩ wapsi, i'udâ'wa norĩ hã isazei'wa na te te waihu'u za'ra õ di za.

Luca 9:26

Ni'wam norĩ hã dapipa te, ĩzazei'wa na, duré ĩmreme 'madâ'â pese 'wa na, ãté dama 're siwasu'u za'ra mono õ di za, 're siséb za'ra mono õ'umnhasite. Ãté te za dawi 're si'udâ za'ra, ĩzazei'õ'wa newa. Ãne wamhã, nimahã na, ti'ai ãma Dasiré Ipodo hã ihâiba na rowa'a za'ẽtẽ na duré Timama te rowa'a za'ẽtẽ na duré hâiwa ãma tãma iromhuri'wa norĩ te rowa'a za'ẽtẽ na za we apâ morĩ wamhã, te za i'udâ'wa norĩ hã asa tizazei'õ'wa na sisi za'ra.

Zuwã 7:35

Tahawa, te sima nharĩ za'ra, dama ipire norĩ hã, ãne: — E momo te za merẽ mo, wa te wasiwi sãmri tõ da hã. E darob amoi u te za mo, wasiré zudeu norĩ u gregu norĩ 'rata, 're isi'ubumroi mono norĩ u. E tamomo te za oto mo, gregu norĩ rob ãma te te 're rowahutu mono da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 3:26

— Tahawa, ma tô 'Re ihâimana u'âsi mono hã tinhimiropisudu hã ãma uwaimra. Ti'ra hã ma tô we atẽme uimrehẽne satõrĩ za'ra wa'wa, te te 're aipawaptob za'ra wa'aba mono da. Te te tãma 're iromhuri mono da hã te te pisutu wamhã, ma tô we atẽme satõrĩ za'ra wa'wa, 're anomro wasété aba mono zé hã 're rẽme za'ra wa'aba mono da, rowẽ na ãma 're anomro aba mono da oto.

Roma 10:17

Tane nherẽ, Cristuhu wasu'uwẽ na, da te ãma 're dapawaptob za'ra mono õ nherẽ, da te ãma 're sasõmri waihu'u za'ra mono õ di. Cristuhu wasu'uwẽ hã dapo're na da te 're wapari za'ra mono wapsi, te za da te 're saze za'ra.

Roma 15:19

'Re ihâimana u'âsi mono pẽ'ẽzani hã tiwaihu'u pese na te te 're ĩpawapto mono zém na si, wa tô marĩ dama i'manharĩ waihu'u'õ hã te dama 're ab'manharĩ, zudeu'õ norĩ hã tô sena te te 're saze za'ra mono da, ta norĩ hã. Zeruzalẽ hawi, Iliriza u 're ĩmorĩ ré, wa tô daza'rui mono bâ te dama 're rowasu'u, Cristuhu wasu'uwẽ na hã.

Roma 15:29

Tawamhã atẽme ĩwisi za'ra wa'aba wamhã, Cristuhu nhoprubzém na, sa'ẽtẽ uptabi na te za aihĩni wama ãma tirowẽ pese za'ra.

Roma 2:9

Uburé dawasété si, da te 're i'manharĩ za'ra mono norĩ hã te za te te 're robzépata za'ẽtẽ za'ra, zudeu norĩ hã, duré zudeu'õ norĩ zama.

Roma 4:11

'Re ihâimana u'âsi mono hã, Abra'ã hã te te sina i'umnhasi pese zém na si, ma tô wẽsã, sihâiwata nhizâri õ nherẽ. Tahawa, sihâiwata nhizâri õ ré, Abra'ã hã, 'Re ihâimana u'âsi mono te te iwẽsãmrizém na hã, te wama wasu'u za'ra, tô sena na uburé da te 're iwaihu'u za'ra mono zéb da hã. Tahawa, Abra'ã hã uburé 'Re ihâimana u'âsi mono, da te dasina 're i'umnhasi za'ra mono norĩ hi'rada, ta hã. Duré sihâiwata nhihâri õ nherẽ, 'Re ihâimana u'âsi mono te te 're i'awẽsãmri mono norĩ hi'rada.

1 Corĩtu 15:2

Ãhã wasu'uwẽ hã te aima ãma 're iwasu'u za'ra wa'aba mono zé hã, asiptete sina 're sazei utõrĩ za'ra wa'aba mono õ wapsi, te za 'Re ihâimana u'âsi mono te te 're asõ'reptu za'ra wa'aba mono zé hã asina 're i'uwaimrami za'ra wa'aba mo. Tane nherẽ, ãté 'Re ihâimana u'âsi mono, asina 're umnhasi uptabi za'ra wa'aba mono õ wamhã, te te 're i'asõ'reptu za'ra wa'aba mono zé hã asina 're uwaimrami za'ra wa'aba mono õ di za.

1 Corĩtu 2:2

Ai'rata 're ĩnhamra aba mono ré, wa tô ĩsima pisutu pese, Zezu Cristuhu wasu'uwẽ si te aima 're wasu'u za'ra wa'aba mono da, 'Re ihâimana u'âsi mono, Danho'reptui'wa da, Zezusi te te ipisudu hã wedepo'o nhonhi'rãmi na dazada idâ'âzé wasu'u si.

1 Corĩtu 2:4

Zezusihi wasu'uwẽ, te aima 're wasu'u za'ra wa'aba mono wamhã, ti'ai ãma danhimirowaihu'u pese na da te dama 're iroti za'ra mono ne, te aima 're rowasu'u za'ra wa'aba mono õ di, ãma 're ĩzaze za'ra wa'aba mono da hã. 'Re ihâimana u'âsi mono pẽ'ẽzani hã tiwaihu'u pese na te te 're i'aipawaptob za'ra wa'aba mono na si, ma tô sena na 're isazei pese za'ra wa'aba mo, Zezusihi wasu'uwẽ hã.

1 Corĩtu 9:12

Ni'wam norĩ hã Cristuhu wasu'uwẽ na te te 're idapawaptob za'ra mono norĩ hã, tô ibâre te marĩ na 're ipawaptob u'âsi za'ra wa'aba mo, ãma 're ihâimana za'ra mono zéb da hã. Tawamhã wa norĩ hã Zezusi, wa te aima 're wasu'u 'rata za'ra wa'aba mono nherẽ, e ta norĩ nhipai u, marĩ zô aiwi 're wanhimnhasi za'ra wa'aba mono õ di za bété. E ãne hã isarinai õ di, aima za'ra wa'aba hã. Tô ãne hã, isarina. I'uwaibaba nherẽ, niwamhã marĩ zô, aiwi 're wanhimnhasi za'ra wa'aba mono õ di. Mare di. Duré, wa te aiwi 're rowaptẽrẽ za'ra wa'aba mono ãna, wa tô wa te 're robzépata za'ra, iwasu'uwẽ ré daro mono bâ, wa te 're iropéi mono zé hã, wa te dawi ãma 're 'wa'rutu tõ za'ra mono da.

1 Corĩtu 9:18

E marĩ na tawamhã, ĩpawa'âbâzé hã. 'Re ihâimana u'âsi mono zadawa 'mahârâ'wa norĩ siré 're ĩhâimana mono nherẽ, marĩ zô dama 're ĩnhimnhasi mono õ zarina, da te 're ĩpawa'âbâ mono ãna, wa iwasu'uwẽ si te dama 're wasu'u. Taha na si, wa 're ĩtoi u'âsi. Taha na si ĩpawa'â hã, ãma 're ĩtoi u'âsi mono zém na si.

2 Corĩtu 2:12

Ãne wa za duré aima ĩsiwasu'u za'ra wa'wa. Trowadi na 'ri nho'õmo nhisi u, wa tô mo, tame Cristuhu wasu'uwẽ hã te dama wasu'u da. Tamomo ĩmorĩ wamhã, Wanhib'apito hã ma tô ĩma 'ridawa ĩnhowa, tame te oto tãma romhuri da.

2 Corĩtu 4:4

Ta norĩ hã, Cristu te te 're saze za'ra mono õ wa, ma tô Wa'uburé hã ipo're'õ norĩ nhib'apito hã te te 're apo're nhito, tob'a ne 're hâimana za'ra mono da. Tahawa, Cristuhu wasu'uwẽ hã wẽ uptabi nherẽ, rob'uiwẽzém ne, te te dama 're rowa'a za'ra mono nherẽ, te te 're waihu'u za'ra mono õ di, ta norĩ hã. Cristu hã aiwa Timama ne 're morĩ wẽ uptabi nherẽ, ta norĩ hã te te siwi 're waihu'u za'ra mono õ di, sena na iwasu'uwẽ na hã.

2 Corĩtu 9:13

A norĩ wa'wa hã tãma asõprub za'ra wa'aba zém na, pawaptob za'ra wa'aba wa, te za tãma ãma i'uwaimrami za'ra wa'wa, 'Re ihâimana u'âsi mono ma hã. Tahawa, ahâ na te za tô 'Re ihâimana u'âsi mono ãma tiwata zara, Cristuhu wasu'uwẽ zarina 're anomro wẽ wa'aba mono na, duré asõprub uptabi na pawaptob za'ra wa'aba wa, ta norĩ hã, duré darob amoi ãma 're ihâimana za'ra mono norĩ hã, pawaptob za'ra wa'aba wa.

Galata 1:7

Aimawi rowasu'u hã Cristuhu wasu'uwẽ me, aiwa 're hâimana mono õ di. Mare uptabi di. E marĩ wa, wa tô ãne aima waihu'u za'ra wa'wa. Ni'wam norĩ hã ma tô sima te te 're wẽ za'ra, Cristuhu wasu'uwẽ upana te te ãma saprĩ za'ra da, aimawi rowasu'u u. Ta norĩ hã ma tô aimawi tinhimirowasu'u na aiwi ãma ro'wa'rutu za'ra wa'wa.

1 Tesalonita 2:13

'Re ihâimana u'âsi mono zadawa wasu'u hã wa te aima iwasu'u za'ra wa'wa hã wapari za'ra wa'aba wamhã, ma tô asima iwẽ za'ra wa'wa. Taré ti'ai ãma aibâ nhimirowasu'u newa, ãma 're rosa'rata za'ra wa'aba mono õ di. Tô sena 'Re ihâimana u'âsi mono mreme na, ma tô ãma irosa'rata za'ra wa'wa. Tane tô, 'Re ihâimana u'âsi mono zadawa wasu'u na si wanhimirowasu'u za'ra hã. Isadawa wasu'u hã te tô ai'ãma te te 're romhuri pese za'ra wa'wa, aipẽ'ẽ 're, iwẽ na si 're anomro aba mono da. Tahawa, 'Re ihâimana u'âsi mono ãma si, wa 're wawata za'ra, imreme hã asina 're waihu'u za'ra wa'aba mono wa.

1 Timotiu 1:11

Roti tô sena na si, wa tô te dama ãma 're aroti, Wanhib'apito wasu'uwẽ na te dama 're rowasu'u mono wamhã. Wẽ uptabi di, Wanhib'apito wasu'u hã. Taha da, ma tô ĩma pisutu, iwasu'uwẽ na te ãma 're da'apo're pu'u mono da, 'Re ihâimana u'âsi mono hã, rowẽ u'âsi 're imorĩ hã.

2 Timotiu 1:12

Tahawa, te te ĩpisutuzéb zarina, te ĩsina uwaimrami wa, wa oto te 're robzépata. Tane nherẽ, 're ĩnhisé mono õ di, isadawa wasu'u'wa na 're ĩmorĩ tõ da. Wanhib'apito hã wa ĩsina te 're umnhasi, te te 're ĩpawaptob u'âsi mono da. Ta hã ĩma waihu'u pese di, iwaihu'u pese na hã. Wa hã wa tô tãma ĩsihâiba nho, tô sena tãma waihu'u pese wa, te te 're ĩ'madâ'â mono zéb da hã, bâdâ iwa waptã'ã õ ré, apâ we imorĩzéb u hã.

2 Timotiu 1:16

Onesifuruhu si ma tô tinhimipawaptobzém na nasi ĩma rowẽ zani. Tahawa, wa ĩsima wẽ, Wanhib'apito hã Onesifuru norĩ hã, duré isõrõwa ãma isiré 're ihâimana za'ra mono norĩ zama, iwẽ na te te 're apawapto mono da. Ta hã ĩma 're sisé mono õ di, ĩwasu'u na hã. Tahawa, Roma u wei wisi wamhã, ma tô te te ĩzô aba, te te ĩnhopẽtẽ da.

2 Timotiu 1:8

Ãne wamhã, 're asisé mono õ di za, Wanhib'apito wasu'uwẽ hã dama 're wasu'u tõ mono da hã. Duré 're asisé mono õ di za, ĩwasu'u na. Wanhib'apito wasu'uwẽ na te dama 're rowasu'u mono 'ru te, ma tô dasiwi ĩnherẽ ni, dazazéb 're. Tahawa, wa oto te 're robzépata. Ãne wa, ma'ãpé 'Re ihâimana u'âsi mono hã tinhiptede te te aima isõmri na, sada 're asiptete mono, ĩsine 're robzépata mono da.

Hebreu 4:12

'Re ihâimana u'âsi mono zadawa wasu'u hã ihâiba ré ne, te tô wama 're hâimana u'âsi za'ra. Siptete uptabi di duré imreme hã, uburé marĩ hã i'uwaibaba si te te dama ãma 're i'ab'manharĩ mono zéb da hã, 'Re ihâimana u'âsi mono hã. Sib'ézé 'wa pa si'uiwa i'wa pese ne, te wama 're hâimana za'ra, isadawa wasu'u hã. Sib'ézé i'wa pese na te za romnhi hã da te 're nhizazari za'ra, ihi si da te 're urĩrĩ za'ra mono da hã. Tane duré, 'Re ihâimana u'âsi mono zadawa wasu'u hã wa te 're wapari za'ra mono wamhã, 'râwi wapẽ'ẽ na wanhimirosa'rada iwẽ hã duré iwasédé hã wa za wa te ãma 're waihu'u za'ra.