Provébiu 8:9 - ꞌRe Ihâimana Uꞌâsi Mono Zadawa Wasuꞌu

⁹ Ni'wam norĩ ma, i'rãi waihu'u wẽ, tãma 're hâimana za'ra mono wamhã, ĩmreme hã tãma pibu pese za'ra di. Duré rowaihu'u wẽ 'wa norĩ ma hã, tãma wapu za'ra di, te te 're iwaihu'u za'ra mono da hã.

Provébiu 8:9 ပူးပေါင်းရင်းမြစ်များ

Provébiu 14:6

Uburé marĩ na da'ãma 're iwa'ẽ za'ra mono ti'rãi waihu'u wẽ zô 're isi'wapé za'ra mono norĩ hã, niha hã ti'rãi waihu'u wẽ na tihâimanazé te te 're isõpẽtẽ za'ra mono da hã, mare di. Tane nherẽ, simiza'rese wẽ na 're ihâimana za'ra mono norĩ ma hã wapure di, te te 're iwaihu'u za'ra mono da hã.

Provébiu 15:14

I'rãi waihu'u wẽ norĩ hã te rowaihu iwẽ zô si sima 're sõpré. Tane nherẽ, simiza'rese ãna 're ihâimana za'ra mono hã te tizaihâ na si te te 're rob'masi za'ra, tinhimiza'rese'õ zarina.

Provébiu 15:24

Isimiza'rese wẽ norĩ hã bâdâdi na rowẽ na 're idahâimana hâ za'ra mono zém na si te 're nomro. Bâdâdi, 're idadâ'â za'ra mono zép te na 're inomro mono da hã mare di.

Provébiu 17:24

Isimiza'rese wẽ, te za ti'rãi waihu'u wẽ zô si sima 're sõpré. Tane nherẽ, isimiza'rese'õ te za titõmo na marĩ te te sima 're wẽ ahâ za'ra, misi haré te te sima 're pisutu za'ra mono ãna.

Provébiu 18:15

I'rãiwaihu'u wẽ 're ihâimana mono hã te õne u'â tipẽ'ẽ na marĩ te te 're iwaihu'u mono da hã sô 're si'wapé.

Provébiu 3:13

Ni'wa hã rowaihu iwẽ hã te te sõpẽtẽ wamhã, duré ti'rãi waihu'u wẽ na marĩ te te 're awaihu'u mono wamhã, tãma 're rowẽ mono di za.

Zuwã 6:45

Duréihã ma tô ãne na rob'ui'éré, 'Re ihâimana u'âsi mono zadawa 'mahârâ 'rata 'wa hã: “Timreme te za te te dama 're awaihu'u, 'Re ihâimana u'âsi mono hã.” Ãne ma tô ãma rob'ui'éré. Tawamhã Ĩmama, timreme te te dama 're i'awaihu'u mono na, da te ãma 're sazei pese za'ra mono wamhã, ĩmreme na zama te za duré da te 're ĩzazei pese za'ra.

Zuwã 7:17

E niha te za da te 're ĩwaihu'u za'ra, 'Re ihâimana u'âsi mono nhimiroti na si te dama 're irowasu'u mono na hã, niha wamhã, ĩsi'uihâ na ĩnhimiroti na si te dama 're irowasu'u mono õ na hã. 'Re ihâimana u'âsi mono nhimiroti si, da te 're 'madâ'â pese za'ra mono wamhã, te za da te ãma 're ĩwaihu'u za'ra.

Tiagu 1:5

'Re ihâimana u'âsi mono hawi, dahâimanazém na rowaihu'u ré 're aihâimana za'ra wa'aba mono õ wamhã, te za asima tiwi 're irowaptẽrẽ za'ra wa'aba mo, ta hã sõpru uptabi wa. Duré uburé ta hã dama marĩ wẽ nhomri'wa. Ãne wa, tiwi 're irowaptẽrẽ za'ra wa'aba mono zéb uwaibaba, te za te te aima 're sõmri za'ra wa'wa, dahâimanazém na rowaihu iwẽ uptabi hã.