Provébiu 31:17 - ꞌRe Ihâimana Uꞌâsi Mono Zadawa Wasuꞌu

¹⁷ Tinhiptede te duré te te 're 'manharĩ, romhuri pese 'wa, isiptede.

Provébiu 31:17 ပူးပေါင်းရင်းမြစ်များ

Zenezi 49:24

Tane nherẽ, tinhimnhi'ã te te rési ãna, te za itété tete na hã ãma uzusi. Duré ipaihi si'uiwa na paihi nhiptete zahuré di za, Zacoho te 'Re ihâimana u'âsi mono iwaihu'u pese nhiptetezém hawim na wa, Pone'ẽrebâ 'madâ'â'wa ne Izaraéu nhihudu norĩ te, Ẽtẽ tõmo wawẽ nhisi na hã.

Provébiu 31:16

Tawamhã te za duré daburu te te sima azabui mono pari, sima uipra. Taha pari rob'uiprazé te te sima i'a'ubumro na te za uwa 'ru hã a're.

Provébiu 31:18

Uburé isimiromhuri wa'âbâzé hã tãma waihu'u pese di. Duré ãma imara simei pese zéb u te õne haré te te 're romhuri.

Luca 12:35

Tawamhã Zezusi hã te duré tãma romnhimiré'é za'ra, ãne: — Romhuri'wa norĩ hã hâimana nhimiza'rese sina, te za tinhib'apito zô 're simipari za'ra. Tane, te za aihâimana nhimiza'rese sina, 're aihâimana za'ra wa'aba mo. Ãté dasina damrozéb u, te za isib'apito hã tiwi timorĩ za'ra, dame sa da. Tawamhã apâ wisi õ ré, te za si'uza za'ra, tãma iromhuri'wa norĩ hã, te te tãma romhuri za'ra da. Te za sô ro'o za'ra rob'uiwẽzé hã, rowa'a na sébré da, isib'apito za'ra hã. Tawamhã 'ri tẽme wisi wi, te za isib'apito za'ra hã 'ridawa ta'a, te te tãma 'ridawa za'ra da. Tahawa, te za awa'awi tãma 'ridawa za'ra.

Éfézu 6:10

Wa za oto roti na aima 'rãsutu za'ra wa'wa. A norĩ wa'wa hã Wanhib'apito siré si te 're aihâimana za'ra wa'aba mo. Tahawa, Wanhib'apito ma si iwaihu'upe hã sa'ẽtẽ na tãma 're hâimana mono wa, te za iwaihu'u pese zarina aihâimana nhiptete sina 're anomro aba mo.

Éfézu 6:14

Tahawa, te za asimiza'rese sina 're aihâimana za'ra wa'aba mo. Da'usisizé isa'ẽtẽ na, te za 're asi'usisi za'ra wa'aba mo. Da'usisizé isa'ẽne hã tô sena 're idahâimana za'ra mono zé, te wasu'u. Duré danho'utu'ubuzé itete na te za 're asisõ'utu ubu za'ra wa'aba mo. Danho'utu'ubuzé itede hã 're idanomro wẽ mono zé, te duré ta hã wasu'u.

1 Pedru 1:13

Zezu Cristu hã nimahã na te za wei mo apâ. Tahawa, te za aihâimana nhimiza'rese 're aihâimana za'ra wa'aba mo. Aihâiba na te za 'râwi 're asi'madâ'â za'ra wa'aba mo. Zezu Cristu hã apâ wei morĩ wapsi, te za aima 're irowẽ za'ra wa'aba mono zé hã aima pisutu za'ra wa'wa, hâiwa ãma. Taha zô si te za asina 're asimipari u'âsi za'ra wa'aba mo.