Provébiu 30:9 - ꞌRe Ihâimana Uꞌâsi Mono Zadawa Wasuꞌu

⁹ 'Re ĩnhimarĩ pese mono 'wa'âhã, wa aré ai'udâ. Wa aré airẽ. Ãne wa aré duré tinha: “Uburé Danhib'apito, te ai'ãma irosa'rata da hã mare di, marĩ dai õ wa.” Duré ĩnhimarĩ ãna 're ĩhâimana mono 'wa'âhã, wa aré 're ĩnhimisaihuri mono da hã 're ĩne. Tawamhã taha zarina wa aré asisi hã te 're upto, ĩte 'Re ihâimana u'âsi mono nhisi hã.

Provébiu 30:9 ပူးပေါင်းရင်းမြစ်များ

Ezodu 20:7

— Ĩnhisi na asiwi 're ĩwazé wa'aba mono ãna taré ãma 're nharĩ za'ra wa'aba mono tõ. E marĩ wa. Wa hã Uburé Danhib'apito, ate wa'wa 'Re ihâimana u'âsi mono, wa ĩnhisi te te 're iwazéb za'ra mono õ norĩ ma te tãma 're arob'manharĩ.

Ezodu 5:2

Tawamhã apito Fara'o te ãma sadanharĩ zahuré ãne: — E 'wa hã bété Asib'apito wa'wa, imreme te iwapari da hã, duré Izaraéu nhihudu norĩ ma, te iwaprosi da hã, ã hawi wairébé da. Asib'apito wa'wa hã ĩma waihu'u õ di. Tahawa Izaraéu nhihudu norĩ ma, ã hawi wairébé da, te tãma irowairébé za'ra da hã mare di za.

Provébiu 29:24

Isimisaihuri siré 're ihâimana mono hã, te tô 'râwi tisi'ru na hã 're hâimana. Dama rowairébézéb ãma sena na dama siwasu'u wamhã, te za tô tãma rob'manharĩ wasété ni. Tazahã ãne na sena na dama siwasu'u õ wamhã, te za 'Re ihâimana u'âsi mono hã niha hã ropipa tãma pisutu.

Daniéu 4:17

à hã ma tô hâiwa ãma romhuri'wa, sõtõ ãna 're isõpré u'âsi mono norĩ hã siwi ãma rowairébé, uburé danhipai u isiptede 'Re ihâimana u'âsi mono, daro mono bâ uburé da'rãnho'õmo nhimi'madâ'âzém nhipai u siptete na te te 're ida'a'madâ'â mono na, da te ãma waihu'u za'ra da hã. Ta hã te za da'rãnho'õmo na da'madâ'âzéb da hã, te te sima 're ida'awẽ mono zéb zarina te te dama 're apisutu, dama wapu na ni'wa 're hâimana mono nherẽ, oto dama pire da.’ ”

Daniéu 4:30

ma tô ãne sima tinha: — E niha 'ri nho'u Babilonia hã dama isa'ẽtẽ uptabi! Wa hã wa tô ĩnhiptete na 'ri nho'u hã 'manha, iwa apito na 're ĩnhamra mono zéb da hã, uburé dama ĩpire na duré ĩnhiptete na te 're ida'a'madâ'â mono zé hã te dama hâi'ré da.

Mateu 26:72

Tawamhã Pedru te duré dawi ai'udâ, ãne: — Tô sena, wa aima ĩsiwasu'u za'ra wa'wa, 'Re ihâimana u'âsi mono nho'a. Ta hã ĩma sa'rese õ di, aibâ hã.

Mateu 26:74

Tawamhã Pedru te asa tãma nharĩ za'ra, ãne: — Mare di. Tane na ĩwaihu'u nherẽ, õ hã ĩma sa'rese õ di. Tô sena te aiwi udâ za'ra wa'aba di pâ, 'Re ihâimana u'âsi mono hã te te ĩ'azâri pé. Tawamhã ãne na dama siwasu'u wi, ma tô si'a hã hârâ watobro, awa'awi.

Zozué 24:27

Tahawa te uburé dama tinha, ãne: — Ma'ãpé ã hã ẽne asiwi 'madâ'â aba! Ãma 're iwasipo're pu'u za'ra mono zéb da hã te za wama 're hâimana za'ra, wa te wasiwi 're 'madâ'â mono wa. Õ hã ma tô Uburé Danhib'apito te te wama inharĩ za'ra zé hã wapa. Niwa apto'oré 'Re ihâimana u'âsi mono 're rẽme za'ra wa'aba mono õ'umnhasite, te za te te 're ai'uwati za'ra wa'wa.