Provébiu 3:7 - ꞌRe Ihâimana Uꞌâsi Mono Zadawa Wasuꞌu

⁷ Ai'rãi waihu'u pese na, asina 're rosa'rata mono tõ. Uburé Danhib'apito hã 're wazé mono. Aiba niwĩ uburé marĩ iwasété wi hã tãma 're aipâi mono, marĩ 're ab'manharĩ tõ mono da.

Provébiu 3:7 ပူးပေါင်းရင်းမြစ်များ

Neemia 5:15

Ĩwana dama i'rãnho'õmo norĩ, ma tô ropire hã te te dama 're sõmri za'ra. Ma tô duré bâtâ sidâpâsi mreme tete na te te dawi 're waibu, ẽtẽ waipo prã prata 480 grama na ipire pibuzém na da te tãma ãma 're wa'âbâ za'ra mono da, dasa norĩ uiprazéb da hã duré uwa 'rãi wa'u isé uiprazéb da. Tãma romhuri'wa norĩ zama ma tô duré te te 're dawati za'ra. Tane nherẽ, wa hã wa tô romhâimanazé aimawi na tãma ãma romhâimana za'ra, 'Re ihâimana u'âsi mono hã, te 're wazé pese mono wa.

Ezodu 20:20

Tawamhã Mozési, ma ãma da'azada'â ãne: — Aipahi za'ra wa'aba tõ. E marĩ wa. 'Re ihâimana u'âsi mono hã te sima wẽ, te te aipibu za'ra wa'aba da, tãma 're i'aipahi za'ra wa'aba mono zéb ré 're aihâimana u'âsi za'ra wa'aba mono wa, aiwasété wi 're aipizari za'ra wa'aba mono da.

Provébiu 14:16

I'rãi waihu'u wẽ norĩ hã te za ropire tãma 're hâimana za'ra mono tõ da, 're si'madâ'â pese za'ra. Tanei õ di, isimiza'rese'õ norĩ hã. Te rosa'rata ãna si'aba'ré na marĩ hã te te 're 'manharĩ za'ra.

Provébiu 14:27

Uburé Danhib'apito da te 're iwazéb za'ra mono zé hã rowẽ na 're idahâimana za'ra mono zém na'rata da hã te dama 're hâimana. Te duré 're dadâ'â za'ra mono da, 're idasisitob za'ra mono hawimhã te te 're da'azani.

Provébiu 16:6

Ni'wa hã 'Re ihâimana u'âsi mono te te 're sawi pese mono wamhã, duré sena na tãma 're hâimana mono wamhã, iwasédé hã te te ãma 're ab'madâ'â mono õ di za. Duré ni'wa, Uburé Danhib'apito te te 're iwazé mono hã te za marĩ iwasété wi hã tiwi sina 're hâiba za'o u'âsi, romhâ na.

Provébiu 23:4

Asisibro pese da, 're asipãrĩ mono tõ, romhuri na hã. Asimiza'rese wẽ zarina te za ãma 're irosahâri mo.

Provébiu 26:12

E aima waihu'u pese di, ni'wa hã ti'rãiwaihu'u wẽ na 'râwi 're isi'madâ'â zei mono hã. Taha ma hã rowẽ õ di za. Isimiza'rese'õ ma si, tãma rowẽ di za, õhõ nhipai u iwa'rãmi.

Provébiu 26:5

Ihâimana nhimiza'rese'õ nhimirobzanhamri wa'rãmip si ãma sada'âbâ, ti'rãi waihu'u pese na te te sina rosa'rata upa tõ da.

Provébiu 28:11

Isimarĩ pese norĩ, te õne u'â ti'rãi waihu'u pese na hã te te sina 're rosa'rata za'ra. Tane nherẽ, isimarĩ'õ i'rãiwaihu'u wẽ ma si tãma waihu'u pese di, niha hã we 're ihâimana za'ra mono zé hã.

Provébiu 28:26

Ni'wa 'râwi 're isi'umnhasi mono hã ta hã isimiza'rese'õ. Tane nherẽ, ni'wa rowaihu iwẽ zarina si 're ihâimana mono hã te za tãma romnhimimnhasi ãna 're hâimana.

Provébiu 8:13

Uburé Danhib'apito, da te 're wazéb za'ra mono wamhã, uburé marĩ iwasété da, 're idanhiti'ru za'ra mono zé, te wasu'u. 'Râwi 're idasi'madâ'â ze za'ra mono zé hã ĩma 'ru ti, dasina 're idawata za'ra mono zéb zama, dahâimana wasété zama, duré damreme wasété zama.

Roma 11:25

Ĩsisãnawã norĩ, zudeu'õ na da te 're aiwaptẽrẽ za'ra wa'aba mono norĩ hã, marĩ aré dama iwaihu'u'õ na roti ipire wasu'u na hã wa za oto aima rowasu'u za'ra wa'wa, asimiza'rese ãna 're aihâimana za'ra wa'aba mono tõ da. Zudeu norĩ upana, 'Re ihâimana u'âsi mono hã ai'ãma wa'aba si 're sib'a'uwẽ mono newa, 'râwi asi'ãma 're aiwata za'ra wa'aba mono tõ da, wa za oto ãne na aima rowasu'u za'ra wa'wa. Izaraéu nhihudu norĩ hã 'Re ihâimana u'âsi mono wi, pẽ'ẽ tete uptabi na 're hâimana za'ra mono nherẽ, pẽ'ẽ tete u'âsi, tiwi 're hâimana za'ra mono õ di za. Duréihã, 'Re ihâimana u'âsi mono te te sima ipisutu siromo zéb zarina, zudeu'õ norĩ hã da'ahâ uptabi na Cristu za da te 're isaze za'ra mono norĩ za'ratazé hã, oto iwa waptã'ã wapsi, te za oto zudeu norĩ hã ahâ uptabi na itẽme 're sipizari za'ra, õhõ ãma si oto 're nomro mono da.

Roma 12:16

Duré simisutu te za asimirosa'rata na 're asisazei pese za'ra wa'aba mo, asiré isazei'wa nherẽ, asisada 're rosa'rata wasété za'ra wa'aba mono tõ da. Duré aiwẽ na 'râwi asina 're aiwata za'ra wa'aba mono õ di za. Duré dama ipire norĩ zapari, marĩ na romhuri wapu na da te dasima 're iromhuri za'ra mono zé hã asiwi 're wẽ'õ za'ra wa'aba mono õ di za, 're 'manharĩ za'ra wa'aba mono tõ da. Duré asiré norĩ nhipai u aiwaihu'u pese na 'râwi asi'ãma 're rosa'rata za'ra wa'aba mono õ di za.