Provébiu 29:9 - ꞌRe Ihâimana Uꞌâsi Mono Zadawa Wasuꞌu

⁹ Aibâ isimiza'rese wẽ, isimiza'rese'õ da hâimana da, dama rowairébézéb u morĩ wamhã, te za isimiza'rese'õ hã taré nasi ãma wasété. Te za duré nasi sahi sina robzanha. Tawamhã ro'wa'rutu uptabi di za.

Provébiu 29:9 ပူးပေါင်းရင်းမြစ်များ

Provébiu 17:12

Robzahi ursu wi, i'ra da te tiwi 're iwaibui mono, da te 're sõpẽtẽ za'ra mono wamhã, pipa di. Tane nherẽ, isimiza'rese'õ tihâimana nhimiza'rese'õ zarina marĩ te te 're 'manharĩ mono ré, da te ãma 're sõpẽtẽ mono wamhã, taha si ipipa uptabi hã.

Provébiu 26:4

Ihâimana nhimiza'rese'õ nhinharĩzém na, aiwam na a hã ãma sada'âbâ wamhã, te za õhõ sine tawamhã oto 're aihâimana mo.

Provébiu 29:10

Dapãrĩ'wa norĩ hã te sena na 're ihâimana za'ra mono norĩ zada 're siti'ru wairébé. Tane nherẽ, te iwẽ norĩ hã i'wawimhã 're simapa za'ra.

Provébiu 29:8

Da'ãma 're iwa'ẽ za'ra mono hã te za 'ri nho'õmo mono bâ ro'wa'rudu hã te te dawi 're sani za'ra. Tane nherẽ, te za 'rãiwaihu'u wẽ na 're ihâimana za'ra mono hã dasisada dahâimana wa'ro zé hã te te dawi 're uprosi za'ra, rowẽ na si apâ 're romhâimana mono da.

Mateu 7:6

— Duré 'Re ihâimana u'âsi mono 'ruiwapari'wa norĩ ma, iwasu'uwẽ na tãma 're rowasu'u za'ra wa'aba mono õ di za, te te ãma 're iwasété za'ra mono norĩ ma hã. E marĩ wa. Ta norĩ hã wapsã ma, marĩ ise hã da te tãma 're a za'ra mono nherẽ, dazô 're sipizari za'ra mono wa, te te 're idahâzu mono ne, te za ta norĩ hã asada 're hâimana wasété za'ra wa'wa. Uhâbâ norĩ hã marĩ wẽ zô, sima 're sõpré waihu'u mono õ di. Marĩ iwẽ hã wa'âbâ za'ẽtẽ nherẽ, uhâbâi ma, da te 're sãmra mono wa, taré te te 're iwati'i za'ra mono ne, te za ta norĩ hã taré te te 're wapari za'ra, iwasu'uwẽ hã. Tahawa, ta norĩ ma, 're rowasu'u za'ra wa'aba mono õ di za, 'Re ihâimana u'âsi mono 'ruiwapari'wa norĩ ma hã.