Provébiu 29:13 - ꞌRe Ihâimana Uꞌâsi Mono Zadawa Wasuꞌu

¹³ Isimarĩ'õ norĩ, isimarĩ'õ wati'wai me te ãhã si aiwa tãma 're hâimana zahuré: Uburé Danhib'apito ma tô rob'madâ'âzéb da hã ito hã te te tãma 're 'manharĩ za'ra.

Provébiu 29:13 ပူးပေါင်းရင်းမြစ်များ

Esdra 9:8

Tane nherẽ, Uburé Danhib'apito, wate 'Re ihâimana u'âsi mono, ãhã na awa'awi na ma tô nimosi prã na iwẽ na wama 're i'ab'manharĩ mono na hã isãna'ra. Taha zarina ma tô ni'wam norĩ ma, wasimani za'ra da hã wama irowairébé za'ra, ãme ro iwazéb zahi ãma wasima iwẽ na 're iwahâimana za'ra mono da hã. Duré wapawa'âbâ ãna danhimiwada'uri zarina 're iwahâimana za'ra mono zém hawi wasimani za'ra da hã ma tô wama irowairébé za'ra. Ma tô duré wahâimanazép té hã wama isõmri za'ra.

Provébiu 22:2

Isimarĩ pe, duré isimarĩ'õ hã aiwab zahuré. E marĩ wa. Uburé Danhib'apito si'uiwa na aiwa te te da'apoto wa.

Mateu 5:45

Ãne te za dama 're i'manharĩ za'ra wa'aba mo, Aimama aba 'ra na sena na da te 're aiwaihu'u za'ra wa'aba mono da, hâiwa ãma 're isãmra mono 'ra na. E marĩ wa, te za ai'ruiwapari'wa norĩ hã 're isawi pese za'ra wa'aba mo. Ni'wai ma, isawi hã te te 're ba'a mono õ wa, 'Re ihâimana u'âsi mono hã. Uburé te te 're da'azawi pese, te te 're isawi pese za'ra mono norĩ hã, duré te te 're isawi õ za'ra mono norĩ zama. Aiwapsi te bâdâ hã te te dama 're rob'uiwẽ za'ra, 're inomro wẽ mono norĩ ma, duré 're inomro wasété mono norĩ ma zama, 'Re ihâimana u'âsi mono nhimipisutuzéb zarina. Aiwapsi te duré tã hã dama 're ta'a za'ra, 'Re ihâimana u'âsi mono nhimiroti te te 're i'madâ'â pese za'ra mono norĩ ma, duré te te 're iwapari za'ra mono õ norĩ ma zama, isimipisutuzéb zarina.

Mateu 9:9

Tawamhã Zezusi hã ma tô mo, dahawi. Morĩ ré, ma tô tisã, danhib'apito ma, rob'uiprazé arĩ ubumroi'wa hã, Mateu na isisi hã. Tinhimiromhurizéb ãma te nhamra, rob'uiprazé te te dawi 're i'a'ubumroi mono zéb ãma. Tawamhã Zezusi hã te 'mahâ ãne: — We aimorĩ, ĩsiré 're aimorĩ da oto. Tawamhã awa'awi ma tô wahudu, isiré 're morĩ da oto.

Éfézu 2:1

Duréihã a norĩ wa'wa hã aipẽ'ẽ 're, 're atâ'â za'ra wa'aba mono na, te aré tô 're anomro aba mo, 'Re ihâimana u'âsi mono nhimiroti na 're anomro aba mono õ wa, duré aiwasédé hã 're 'manharĩ za'ra wa'aba mono wab zama.