Provébiu 24:16 - ꞌRe Ihâimana Uꞌâsi Mono Zadawa Wasuꞌu

¹⁶ E marĩ wa. Sena na 're ihâimana za'ra mono ahâ na tihâimanazém na 're rere'e mono nherẽ, te za apâ hã 're wahutu za'ra, hâiwi tipẽ'ẽ 'remhã para na 're simasa mono da hã. Tane nherẽ, iwasété norĩ si hã te za ropipa sô 're iwairébé mono hã te te 're uprosi.

Provébiu 24:16 ပူးပေါင်းရင်းမြစ်များ

Zenezi 19:35

Tawamhã tô taha mara na te te duré tãma õb zahuré wamhã, ma tô oto ino hã iré nomro. Ãhã wa, iré nomro wa, duré apâ ihawi wahutu wamhã, imama hã te te duré sina waihu'u õ di.

Salmu 34:19

Wẽ na 're inomro mono norĩ hã, te tô ropire na te te 're robzépata za'ra. Tane nherẽ, Uburé Danhib'apito, te uburé ropire mono hawimhã te te 're anho'reptu.

Salmu 34:21

Iwasété norĩ hã, marĩ te te 're i'manharĩ wasété za'ra mono zarina te za 're isi'utõrĩ mono zé hã te te sisô 're sani za'ra. Duré wẽ na 're inomro mono norĩ 'rui'wa norĩ ma, te za 'Re ihâimana u'âsi mono hã te te tãma 're arob'manharĩ wasété.

Provébiu 13:17

Romreme 'wapéi'wa norĩ iwasédé i'umnhasi'õ hã te za ropire u 're rere'e. Tane nherẽ, i'umnha hã da te 're isatõrĩ za'ra mono norĩ hã te za dahâzé'õzé hã te te dama 're ãwisi za'ra.

Provébiu 13:21

Iwasété na si 're ihâimana za'ra mono norĩ, ropire te te 're sitob za'ra mono da hã te isarina 're hâimana u'âsi za'ra. Tane nherẽ, i'uwaibaba na si 're ihâimana za'ra mono norĩ hã te za iwẽ hã te te sima 're sani za'ra.

Provébiu 14:32

Ropire hã iwasété norĩ zô 're pusi mono wamhã, te za te te 're uprosi. Tane nherẽ, sena na 're ihâimana za'ra mono norĩ, tãma romnhimimnhasi na 're hâimana za'ra mono nherẽ, te i'uwaibaba na si 're ihâimana za'ra mono zéb zarina isimapazé hã tãma 're hâimana za'ra.

Provébiu 24:22

E marĩ wa. Ta norĩ hã sa'ẽtẽ waptu na za te te sima rob'manharĩ wasété za'ra õ'umnhasite. E wapu bâ aré, Uburé Danhib'apito nhimirob'manharĩzé hã, duré dama ipire norĩ nhimirob'manharĩzé hã.

Provébiu 6:15

Tahawa, te za sa'rese ãna waptu na ropipa hã sô tiwisi za'ra, tiwi 'masimani ãna hã za.

Zezusihi zadawa wasuꞌuꞌwa norĩ nhimiromhuri na robꞌuiꞌéré 12:23

Tawamhã awa'awi ma tô hâiwa ãma Wanhib'apito ma romhuri'wa hã azâ, ihâzé pire na, Erodi hã. 'Re ihâimana u'âsi mono ãma si 're idawata za'ra mono zé hã te te sima sawi wa, ma tô azâ. Marĩ hã isãna wai'u ne hã ãma sépu'u wa, ma tô oto dârâ, Erodi hã.

1 Tesalonita 5:3

Sô 're danhimipari za'ra mono õ wa, te za isazei'õ'wa norĩ hã da te dasima 're rowasu'u za'ra, ãne: “Rowẽ na wa za oto 're wasi'ubumroi u'âsi, marĩ hã wazô 're wairébé mono ãna.” Ãne te za dasima da te 're rowasu'u za'ra, da te 're waihu'u za'ra mono õ wa. Ãne, da te dasima 're rowasu'u za'ra mono wapsi, awa'awi te za ropipa hã dazô 're wairébé, Wamama hã za te te dama irob'manharĩzém na hã. Tiwi dasimani waihu'u za'ra õ di za, pi'õi ma, i'ra tãma 're rere'e mono da, iwasã ãma 're sépu'u za'ra mono wa, ai'uté zépu'u wi tiwi 're isimani za'ra mono õ ne.

1 Samuéu 26:10

Sena na 're ihâimana u'âsi mono ne Wanhib'apito, tô sena te za tô taha si tiwĩ Sau hã, ite bâdâ hã tãma wisi wapsi, idâ'âzéb da hã, niha wamhã tô, dasi'wapéi u.

1 Samuéu 31:4

Tawamhã Sau ma tô tãma isimnhi'ãsi 'wapéi'wai ma tinha ãne: — Ma'ãpé ĩzada wazere ate sib'ézé 'wapa hã ãma ĩwĩrĩ da, filisteu iwasété norĩ hã ĩ'ãma sima to za'ra tõ da, duré ta norĩ hã te te siwi ĩwĩrĩ tõ da. Tane nherẽ, isimnhi'ãsi 'wapéi'wa ma tô tipahi pese. Tahawa, te te sima wẽ õ di, ãne hã te te tãma i'manharĩ da hã. Tahawa, ma tô Sau hã tite sib'ézé 'wapa hã ti'â. Tawamhã si'uihâ na itẽme simei wa, ma tô oto 'râwi taha na sima apese.