Provébiu 21:13 - ꞌRe Ihâimana Uꞌâsi Mono Zadawa Wasuꞌu

¹³ Ni'wa isimarĩ'õ norĩ hârâ te te wapari tõ da, sipo're nhidâ wamhã, õhõ hârâ zama duré da te isada'âbâ da hã mare di.

Provébiu 21:13 ပူးပေါင်းရင်းမြစ်များ

Neemia 5:13

Tawamhã ĩsi'awasisizé isinhai ré hã wa tô waze. Te wazere wamhã, wa tô oto sãsã'ã. Tahawa, wa tô tãma nharĩ za'ra ãne: — Ãne te za 'Re ihâimana u'âsi mono hã ai'masãsã'ã 'wa, asimiropisutuzé tãma ãma 'mai'uwaimrami aba õ wamhã. Tawamhã te za asõrõwa wa'wa hã aiwi 'maiwazere 'wa. Te za duré uburé asimarĩ wa'wa hã aiwi 'mazani wa'wa, asimarĩ õ uptabi na oto 're ai'maihâimana aba mono da. Tawamhã uburé õme idahâimana za'ra hã te ãne nharĩ za'ra: — Tane tô! Tane romhâimana da hã iwẽ! Tawamhã Uburé Danhib'apito ãma te tiwata za'ra. Tawamhã tinhimiropisudu te te i'manharĩ za'ra zém na hã ma tô oto duré ãma uwaimrami za'ra.

Provébiu 1:28

Tahawa, ĩzô aihârâ za'ra wa'aba wamhã, wa hã Rowaihu iwẽ hã te ãma i'asada'âbâ za'ra wa'aba da hã mare di za. Duré ĩzô 're airĩtĩ za'ra wa'aba mono nherẽ, asiwi ĩnhopẽtẽ aba da hã mare di za.

Provébiu 28:27

Ni'wa isimarĩ'õ ma, tinhimarĩ te te 're anhomri mono wamhã, marĩ zô tiwi 're iro'wanhi'riti mono da hã mare di. Tane nherẽ, ni'wa isimarĩ'õ te te 'madâ'â tõ da, tiwi 're u'rata mono wamhã, te za ropipa hã da te tãma 're pisutu.

Mateu 6:14

Tawamhã ãne te duré tãma roti za'ra: — Dawasédé hã da te ai'ãma 're i'manharĩ za'ra wa'aba mono zé hã asina 're 'madâ'â u'âsi za'ra wa'aba mono wamhã, Aimama 'wa hã te za duré uburé aiwasédé 're i'manharĩ za'ra wa'aba mono zé hã te te ai'ãma 're 'madâ'â u'âsi za'ra wa'wa. Dawasédé hã da te ai'ãma 're 'manharĩ za'ra wa'aba mono nherẽ, asina 're 'madâ'â za'ra wa'aba mono õ wamhã, tawapsi, aiwasété 'wa hã te te ai'ãma 're 'madâ'â za'ra wa'aba mono õ di za Aimama 'wa, hâiwa ãma 're isãmra mono hã.

Mateu 7:2

Asi'uihâ na asiwi 're dawẽ'õ pese za'ra wa'aba mono wamhã, taha zarina te za tô duré 'Re ihâimana u'âsi mono hã te te siwi 're aiwẽ'õ pese za'ra wa'wa, iwa'rãmi. Asiwi 're dawẽ'õ za'ra wa'aba mono õ wamhã, tawapsi, te te duré siwi 're aiwẽ'õ za'ra wa'aba mono õ di za, ãne na hã aiwa.

Luca 13:25

Nimahã na te za 'ri tede'wa hã wahudu, te te siré 'rinhitop tete da. Tawamhã te za i'ridawa ta'a za'ra wa'wa, rowi 're ai'ubumroi wa'aba mono hã. 'Ri tede'wa hã te za i'mahârâ za'ra wa'wa, ãne: “Apito, ma'ãpé we wazô 'ridawa za'ra na, ãma atẽme wanhisisi da.” Ãne te za 're i'mahârâ za'ra wa'aba mo. Tazahã, te za asa aima nharĩ za'ra wa'wa, ãne: “Te aiwaihu'u za'ra wa'aba õ di. E ma hawimhã, a norĩ wa'wa hã.”

Zezusihi zadawa wasuꞌuꞌwa norĩ nhimiromhuri na robꞌuiꞌéré 7:57

Tahawa, tinhib'rata na ma tô tiwi sipo're nhidâ za'ra, dama roti'wa norĩ hã. Asa tãma 're sipari za'ra mono sina, ma tô sô sisãmra, te te siwi âri da.

1 Zuwã 3:17

Ni'wam norĩ hã marĩ, tãma 're hâimana za'ra mono nherẽ, marĩ zô dawi 're iro'wanhi'riti za'ra mono na te te 're dawaihu'u za'ra mono nherẽ, da'ãma 're pẽ'ẽzé za'ra mono õ wamhã, e ta norĩ hã 'Re ihâimana u'âsi mono nhimizawi pese zéb ré te 're hâimana za'ra. Mare di. 'Re ihâimana u'âsi mono nhimizawi pese zé hã te te 're waihu'u za'ra mono õ di, ta norĩ hã.