Provébiu 20:15 - ꞌRe Ihâimana Uꞌâsi Mono Zadawa Wasuꞌu

¹⁵ Ẽtẽ waipo pré oru hã ahâ na te 're hâimana za'ra, duré ẽtẽ waipo iwa'âbâ za'ẽne hã. Tane nherẽ, da'rãi waihu'u wẽ zarina damremezé hã iwa'âbâ za'ẽtẽ uptabi, ta hã.

Provébiu 20:15 ပူးပေါင်းရင်းမြစ်များ

Provébiu 15:23

Marĩ na da te 're dazada'âbâ wẽ za'ra mono wamhã, te za dama ãma rowẽ wazere ni. Duré danhimiroti wẽ bâtâ zarina da te dama ãma 're irowasu'u za'ra mono hã wẽ uptabi di.

Provébiu 15:7

I'rãi waihu'u wẽ mreme hã te rowaihu iwẽ na hã te te ãma dama 're ropé za'ra. Tazahã, isimiza'rese'õ norĩ, ãne hã te te dama 're 'manharĩ za'ra mono õ di.

Provébiu 16:16

Wẽ uptabi di ẽtẽ waipo pré oru nhipai u, da'rãiwaihu'u wẽ, da te 're iwaihu'u za'ra mono da hã. Duré wẽ uptabi di ẽtẽ waipo prã prata nhipai u, danhimirowaihu'u wẽ na 're idahâimana za'ra mono zé hã.

Provébiu 16:21

Ni'wai ma ipẽ'ẽ na rowaihu iwẽ tãma 're ihâimana mono hã ta hã isimirowaihu'u wẽ uptabi. Duré ni'wa timreme wẽ na te te dama 're roti mono wamhã, te za da te ãma 're saze su'u za'ra.

Provébiu 16:24

Damreme iwẽ hã aiwa ropĩ isei uptabi ne te 're hâimana, dapẽ'ẽzani ma hã. Duré dahâiba pesezéb da hã wẽ uptabi di, damreme iwẽ hã.

Provébiu 20:14

Rob'uipra'wa hã te za tinha ãne: “Wa'âbâ za'ẽtẽ di ã hã”. Tane nherẽ, oto watobro parimhã, 'râwi isi'madâ'â ze zarina te za dama siwasu'u, te te irob'uipra wẽ na hã.

Provébiu 20:16

Ni'wa dasiré a'uwẽ'õ hâiba wapto'wa na marĩ wa'âbâ'wa da, dama 're hâimana mono da, te te sima wẽ wamhã, te za ti'uza hã sena na te te ãma 're idapawa'âbâ mono zé te te roptété da hã aima tisõ.

Provébiu 25:12

Ni'wai ma, i'rãiwaihu'u wẽ te te tãma ipẽne hã te te iwapari ze zé hã, danhiptõmo hi wasisizé oru na i'manharĩ nhipai u iwẽ uptabi, duré oru na marĩ da te 're i'manharĩ za'ra mono norĩ nhipai u zama iwẽ.

Provébiu 3:15

Rowaihu iwẽ hã, ẽtẽ waipo iwa'âbâ za'ẽtẽ mono nhipai u hã wẽ uptabi di. Uburé marĩ zô 're irob'ruiwapari mono hã tarére tãma hã, marĩ dai õ wa.

Provébiu 5:2

Ãne wamhã, te za niha na hã 're i'aihâimana mono zéb da hã iwaihu. Te za duré marĩ na 're irobzanhamri wẽ mono zarina asimiza'rese wẽ hã te te 're aihâi'ré.

Provébiu 8:10

Ma'ãpé aima ĩnhimirotizé, ẽtẽ waipo prã prata nhibrob're, asima 're wẽ za'ra wa'aba mono. Duré ĩnhimirowaihu, ẽtẽ waipo pré oru uptabi nhibrob're, asima 're pisutu za'ra wa'aba mono.

Provébiu 8:11

“E marĩ wa. Rowaihu iwẽ hã ẽtẽ'ubuzi waipo nhipai u hã wẽ uptabi di. Uburé marĩ 're i'ruiwapari za'ra wa'aba mono hã tarére õhõ ma hã.

Éfézu 4:29

Aimreme wasété na dama 're aimreme zusi aba mono õ di za oto. Aimreme wẽ na si te za oto dama 're aimreme zusi aba mo, asimiroti wẽ na si 're dapawaptob za'ra wa'aba mono da ãma.