Provébiu 16:22 - ꞌRe Ihâimana Uꞌâsi Mono Zadawa Wasuꞌu

²² Rowaihu'u wẽ hã te i'rãiwaihu'u wẽ norĩ ma, rowẽ na 're idahâimana za'ra mono na'rata zém na tãma 're hâimana za'ra. Tane nherẽ, simiza'rese ãna 're ihâimana za'ra mono norĩ hã te ti'ahârizép si te te sisô 're sani za'ra, tinhimiza'rese'õ zarina.

Provébiu 16:22 ပူးပေါင်းရင်းမြစ်များ

Provébiu 10:11

Sena na 're ihâimana za'ra mono norĩ mreme hã, rowẽ na 're idahâimana za'ra mono zém na'rata da hã te tô dama 're hâimana. Tane nherẽ, iwasété norĩ te te 're idawamnarĩ za'ra mono da hã te timreme zô simrami pese na hã 're hâimana za'ra.

Provébiu 13:14

I'rãiwaihu'u wẽ norĩ nhimiroti hã rowẽ na 're idahâimana za'ra mono zém na'rata da hã te dama 're hâimana. Ta hã te za dadâ'â da, 're idasisitob za'ra mono zé wi, te te 're da'apawapto, roti iwẽ hã.

Provébiu 14:27

Uburé Danhib'apito da te 're iwazéb za'ra mono zé hã rowẽ na 're idahâimana za'ra mono zém na'rata da hã te dama 're hâimana. Te duré 're dadâ'â za'ra mono da, 're idasisitob za'ra mono hawimhã te te 're da'azani.

Provébiu 15:2

I'rãi waihu'u wẽ mreme hã da te 're wapari za'ra mono wamhã, te za rowaihu iwẽ hã da te dasima 're wẽ za'ra. Tazahã, isimiza'rese'õ norĩ hã te za siwa'ru timreme wasété na si 're mreme zusi.

Provébiu 15:28

I'uwaibaba na si 're ihâimana za'ra mono norĩ hã te za te te 're dazada'âbâ za'ra mono wana ré, te te sima 're rosa'rata za'ra a'â, waimri na. Tane nherẽ, iwasété norĩ zadawa hawimhã te imreme wasédé hã 're wairébé.

Provébiu 16:21

Ni'wai ma ipẽ'ẽ na rowaihu iwẽ tãma 're ihâimana mono hã ta hã isimirowaihu'u wẽ uptabi. Duré ni'wa timreme wẽ na te te dama 're roti mono wamhã, te za da te ãma 're saze su'u za'ra.

Provébiu 16:23

'Rãi waihu'u wẽ na 're ihâimana za'ra mono norĩ hã te te 're nharĩ za'ra mono wana ré, te za te te sima 're rosa'rata pese za'ra a'â, waimri na. Tahawa te te dama 're i'awaihu'u mono zém na hã te za da te ãma 're saze su'u.

Provébiu 18:4

Da'rãi waihu'u wẽ zarina, damreme hã aiwa â 'rehâ ne hã te 're hâimana. Duré rowaihu'u pese 'wai mreme hã â 're ipraba u'âsi mono ne, 'ré waihu'u õ di.

Provébiu 18:7

Isimiza'rese'õ nhimirobzanhamrizéb zarina te za ti'uprosizé hã te te sima ãma 're sani. Duré timreme na te za sisõwada, abaze mramizém na.

Provébiu 3:22

Ta hã te za aihâimana hâ zé hã aima te te 're ãwisi. Tawamhã aibutu na danho'rebzu dama i'madâ'â ze ne hã te za aihâimanazé hã da te 're 'madâ'â ze za'ra.

Mateu 15:14

Farizeu norĩ ãma 're aihâtâ'â za'ra wa'aba mono õ di za. Tô si'uihâ na 're hâimana za'ra mono. Ni'wa hã tob'a na 're ihâimana mono hã te za tisiré itob'a hã saprõ. Te te saprõni wamhã, te za ab're 're siré tiwaptã'ã zahuré. Tane te farizeu norĩ hã itob'a ne hã te te 're danhimro.

Zuwã 5:24

— Ĩmreme hã da te 're wapari za'ra mono wamhã, duré we ĩzatõrĩ'wa hã da te dasina 're umnhasi za'ra mono wamhã, te za dapẽ'ẽ na da te sina 're uwaimrami siromo za'ra, rowẽ na 're idahâimana u'âsi za'ra mono zé hã. 'Re ihâimana u'âsi mono nhimihâzé hã da te dasina 're waihu'u za'ra mono õ di za. Te za dapẽ'ẽ na ãma saprĩ siromo za'ra ni, dapẽ'ẽ 're, dadâ'â u'âsi 're idahâimana za'ra mono zém hawi, dapẽ'ẽ 're rowẽ na 're idahâimana u'âsi za'ra mono zéb u hã.

Zuwã 6:63

'Re ihâimana u'âsi mono pẽ'ẽzani si te za te te dama 're anhomri, dadâ'â ãna 're idahâimana u'âsi za'ra mono zé hã. Dasi'uihâ na da te dasina 're uwaimrami za'ra mono õ di za. Marĩ na te aima 're irowasu'u za'ra wa'aba mono zéb zarina, te za Ipẽ'ẽzani hã te te dama 're anhomri, 're idahâimana u'âsi za'ra mono zéb da hã.

Zuwã 6:68

Tawamhã Sima Pedruhu si te asa tãma tinha, ãne: — Mare di. Wa te airẽme za'ra õ di za. Wa te airẽme za'ra wamhã, e 'wa tẽme, wa za 're wanomro, rowasu'uwẽ hã wa te 're iwapari za'ra mono da hã. Aimreme si wama pire za'ra di. Aimreme na si da te 're asaze za'ra mono wamhã, rowẽ u'âsi te za ai'ãma 're danomro. Te za duré hâiwa ãma 're dadâ'â za'ra mono ãna 're dahâimana u'âsi za'ra, 'Re ihâimana u'âsi mono 'rata.